৫. তলসত্তিকসিক্খাপদৱণ্ণনা

৪৫৪. পঞ্চমে – তলসত্তিকং উগ্গিৰন্তীতি পহাৰদানাকাৰং দস্সেত্ৱা কাযম্পি কাযপটিবদ্ধম্পি উচ্চাৰেন্তি. তে পহাৰসমুচ্চিতা ৰোদন্তীতি তে পহাৰপৰিচিতা পুব্বেপি লদ্ধপহাৰত্তা ইদানি চ পহাৰং দস্সন্তীতি মঞ্ঞমানা ৰোদন্তীতি অত্থো. ‘‘পহাৰস্স মুচ্চিতা’’তিপি সজ্ঝাযন্তি, তত্থ ‘‘পহাৰস্স ভীতা’’তি অত্থো.

৪৫৭. উগ্গিৰতি আপত্তি পাচিত্তিযস্সাতি এত্থ সচে উগ্গিৰিত্ৱা ৱিৰদ্ধো পহাৰং দেতি, অৱস্সং ধাৰেতুং অসক্কোন্তস্স পহাৰো সহসা পততি, ন পহৰিতুকামতায দিন্নত্তা দুক্কটং. তেন পহাৰেন হত্থাদীসু যংকিঞ্চি ভিজ্জতি, দুক্কটমেৱ.

৪৫৮. মোক্খাধিপ্পাযো তলসত্তিকং উগ্গিৰতীতি এত্থ পুব্বে ৱুত্তেসু ৱত্থূসু পুৰিমনযেনেৱ তলসত্তিকং উগ্গিৰন্তস্স অনাপত্তি. সচেপি ৱিৰজ্ঝিত্ৱা পহাৰং দেতি, অনাপত্তিযেৱ. সেসং পুৰিমসদিসমেৱ সদ্ধিং সমুট্ঠানাদীহীতি.

তলসত্তিকসিক্খাপদং পঞ্চমং.