১০. দন্তপোনসিক্খাপদৱণ্ণনা

২৬৩. দসমসিক্খাপদে – চতূসু পচ্চযেসু অন্তমসো দন্তকট্ঠম্পি সব্বং পংসুকূলমেৱ অস্সাতি সব্বপংসুকূলিকো. সো কিৰ সুসানে ছড্ডিতভাজনমেৱ পত্তং কত্ৱা তত্থ ছড্ডিতচোড়কেহেৱ চীৱৰং কত্ৱা তত্থ ছড্ডিতমঞ্চপীঠকানিযেৱ গহেত্ৱা পৰিভুঞ্জতি. অয্যৱোসাটিতকানীতি এত্থ অয্যা ৱুচ্চন্তি কালঙ্কতা পিতিপিতামহা. ৱোসাটিতকানি ৱুচ্চন্তি তেসং অত্থায সুসানাদীসু ছড্ডিতকানি খাদনীযভোজনীযানি; মনুস্সা কিৰ কালঙ্কতে ঞাতকে উদ্দিস্স যং তেসং সজীৱকালে পিযং হোতি, তং এতেসু সুসানাদীসু পিণ্ডং পিণ্ডং কত্ৱা ‘‘ঞাতকা নো পৰিভুঞ্জন্তূতি ঠপেন্তি. সো ভিক্খু তং গহেত্ৱা ভুঞ্জতি, অঞ্ঞং পণীতম্পি দিয্যমানং ন ইচ্ছতি. তেন ৱুত্তং – ‘‘সুসানেপি ৰুক্খমূলেপি উম্মাৰেপি অয্যৱোসাটিতকানি সামং গহেত্ৱা পৰিভুঞ্জতী’’তি. থেৰোতি থিৰো ঘনবদ্ধো. ৱঠৰোতি থূলো; থূলো চ ঘনসৰীৰো চাযং ভিক্খূতি ৱুত্তং হোতি. মনুস্সমংসং মঞ্ঞে খাদতীতি মনুস্সমংসং খাদতীতি নং সল্লক্খেম; মনুস্সমংসং খাদন্তা হি ঈদিসা ভৱন্তীতি অযং তেসং অধিপ্পাযো.

২৬৪. উদকদন্তপোনে কুক্কুচ্চাযন্তীতি এত্থ তে ভিক্খূ ‘‘অদিন্নং মুখদ্ৱাৰং আহাৰং আহৰেয্যা’’তি পদস্স সম্মা অত্থং অসল্লক্খেত্ৱা কুক্কুচ্চাযিসুং, ভগৱা পন যথাউপ্পন্নস্স ৱত্থুস্স ৱসেন পিতা ৱিয দাৰকে তে ভিক্খূ সঞ্ঞাপেন্তো অনুপঞ্ঞত্তিং ঠপেসি.

২৬৫. অদিন্নন্তি কাযেন ৱা কাযপটিবদ্ধেন ৱা গণ্হন্তস্স কাযকাযপটিবদ্ধনিস্সগ্গিযানং অঞ্ঞতৰৱসেন ন দিন্নং. এতদেৱ হি সন্ধায পদভাজনে ‘‘অদিন্নং নাম অপ্পটিগ্গহিতকং ৱুচ্চতী’’তি ৱুত্তং. দুতিযপাৰাজিকে পন ‘‘অদিন্নং নাম পৰপৰিগ্গহিতকং ৱুচ্চতী’’তি ৱুত্তং. দিন্নন্তি ইদং পন তস্সেৱ অদিন্নস্স পটিপক্খৱসেন লক্খণদস্সনত্থং উদ্ধটং. নিদ্দেসে চস্স ‘‘কাযেন ৱা কাযপটিবদ্ধেন ৱা নিস্সগ্গিযেন ৱা দেন্তে’’তি এৱং অঞ্ঞস্মিং দদমানে ‘‘হত্থপাসে ঠিতো কাযেন ৱা কাযপটিবদ্ধেন ৱা পটিগ্গণ্হাতীতি তং এৱং দিয্যমানং অন্তমসো ৰথৰেণুম্পি সচে পুব্বে ৱুত্তলক্খণে হত্থপাসে ঠিতো কাযেন ৱা কাযপটিবদ্ধেন ৱা পটিগ্গণ্হাতি, এতং এৱং পটিগ্গহিতং দিন্নং নাম ৱুচ্চতি. ন ‘‘ইদং গণ্হ, ইদং তৱ হোতূ’’তিআদিৱচনেন নিস্সট্ঠং.

তত্থ কাযেনাতি হত্থাদীসু যেন কেনচি সৰীৰাৱযৱেন; অন্তমসো পাদঙ্গুলিযাপি দিয্যমানং কাযেন দিন্নং নাম হোতি, পটিগ্গহণেপি এসেৱ নযো. যেন কেনচি হি সৰীৰাৱযৱেন গহিতং কাযেন গহিতমেৱ হোতি. সচেপি নত্থুকৰণিযা দিয্যমানং নাসাপুটেন অকল্লকো ৱা মুখেন পটিগ্গণ্হাতি. আভোগমত্তমেৱ হি এত্থ পমাণন্তি অযং নযো মহাপচ্চৰিযং ৱুত্তো. কাযপটিবদ্ধেনাতি কটচ্ছুআদীসু যেন কেনচি উপকৰণেন দিন্নং কাযপটিবদ্ধেন দিন্নং নাম হোতি. পটিগ্গহণেপি এসেৱ নযো. যেন কেনচি সৰীৰপটিবদ্ধেন পত্তথালকাদিনা গহিতং কাযপটিবদ্ধেন গহিতমেৱ হোতি. নিস্সগ্গিযেনাতি কাযতো চ কাযপটিবদ্ধতো চ মোচেত্ৱা হত্থপাসে ঠিতস্স কাযেন ৱা কাযপটিবদ্ধেন ৱা পাতিযমানম্পি নিস্সগ্গিযেন পযোগেন দিন্নং নাম হোতি. অযং তাৱ পাড়িৱণ্ণনা.

অযং পনেত্থ পাড়িমুত্তকৱিনিচ্ছযো – পঞ্চঙ্গেহি পটিগ্গহণং ৰুহতি – থামমজ্ঝিমস্স পুৰিসস্স উচ্চাৰণমত্তং হোতি, হত্থপাসো পঞ্ঞাযতি, অভিহাৰো পঞ্ঞাযতি, দেৱো ৱা মনুস্সো ৱা তিৰচ্ছানগতো ৱা কাযেন ৱা কাযপটিবদ্ধেন ৱা নিস্সগ্গিযেন ৱা দেতি, তং চে ভিক্খু কাযেন ৱা কাযপটিবদ্ধেন ৱা পটিগ্গণ্হাতি. এৱং পঞ্চহঙ্গেহি পটিগ্গহণং ৰুহতি.

তত্থ ঠিতনিসিন্ননিপন্নানং পৱাৰণসিক্খাপদে ৱুত্তনযেনেৱ হত্থপাসো ৱেদিতব্বো. সচে পন দাযকপটিগ্গাহকেসু একো আকাসে হোতি, একো ভূমিযং, ভূমট্ঠস্স চ সীসেন আকাসট্ঠস্স চ ঠপেত্ৱা দাতুং ৱা গহেতুং ৱা পসাৰিতহত্থং, যং আসন্নতৰং অঙ্গং, তস্স ওৰিমন্তেন হত্থপাসপ্পমাণং পৰিচ্ছিন্দিতব্বং. সচেপি একো কূপে হোতি, একো কূপতটে, একো ৱা পন ৰুক্খে, একো পথৱিযং, ৱুত্তনযেনেৱ হত্থপাসপ্পমাণং পৰিচ্ছিন্দিতব্বং. এৱৰূপে হত্থপাসে ঠত্ৱা সচেপি পক্খী মুখতুণ্ডকেন ৱা হত্থী ৱা সোণ্ডায গহেত্ৱা পুপ্ফং ৱা ফলং ৱা দেতি, পটিগ্গহণং ৰুহতি. সচে পন অদ্ধট্ঠমৰতনস্সাপি হত্থিনো খন্ধে নিসিন্নো, তেন সোণ্ডায দিয্যমানং গণ্হাতি, ৱট্টতিযেৱ.

একো বহূনি ভত্তব্যঞ্জনভাজনানি সীসে কত্ৱা ভিক্খুস্স সন্তিকং আগন্ত্ৱা ঠিতকোৱ গণ্হথাতি ৱদতি, ন তাৱ অভিহাৰো পঞ্ঞাযতি, তস্মা ন গহেতব্বং. সচে পন ঈসকম্পি ওনমতি, ভিক্খুনা হত্থং পসাৰেত্ৱা হেট্ঠিমভাজনং একদেসেনাপি সম্পটিচ্ছিতব্বং. এত্তাৱতা সব্বভাজনানি পটিগ্গহিতানি হোন্তি, ততো পট্ঠায ওৰোপেত্ৱা ৱা উগ্ঘাটেত্ৱা ৱা যং ইচ্ছতি, তং গহেত্ৱা ভুঞ্জিতুং ৱট্টতি. সভত্তপচ্ছিআদিম্হি পন একভাজনে ৱত্তব্বমেৱ নত্থি, কাজেন ভত্তং হৰন্তোপি সচে কাজং ওনামেত্ৱা দেতি, ৱট্টতি. তিংসহত্থো ৱেণু হোতি, একস্মিং অন্তে গুড়কুম্ভো বদ্ধো, একস্মিং সপ্পিকুম্ভো, তঞ্চে পটিগ্গণ্হাতি, সব্বং পটিগ্গহিতমেৱ. উচ্ছুযন্তদোণিতো পগ্ঘৰন্তমেৱ ৰসং গণ্হথাতি ৱদতি, অভিহাৰো ন পঞ্ঞাযতীতি ন গহেতব্বো. সচে পন কসটং ছড্ডেত্ৱা হত্থেন উস্সিঞ্চিত্ৱা উস্সিঞ্চিত্ৱা দেতি, ৱট্টতি.

বহূ পত্তা মঞ্চে ৱা পীঠে ৱা কটসাৰকে ৱা দোণিযং ৱা ফলকে ৱা ঠপিতা হোন্তি, যত্থ ঠিতস্স দাযকো হত্থপাসে হোতি, তত্থ ঠত্ৱা পটিগ্গহণসঞ্ঞায মঞ্চাদীনি অঙ্গুলিযাপি ফুসিত্ৱা ঠিতেন ৱা নিসিন্নেন ৱা নিপন্নেন ৱা যং তেসু পত্তেসু দিয্যতি, তং সব্বং পটিগ্গহিতং হোতি. সচেপি পটিগ্গহেস্সামীতি মঞ্চাদীনি আৰুহিত্ৱা নিসীদতি, ৱট্টতিযেৱ. সচে পন মঞ্চাদীনি হত্থেন গহেত্ৱা মঞ্চে নিসীদতি, ৱত্তব্বমেৱ নত্থি.

পথৱিযং পন সচেপি কুচ্ছিযা কুচ্ছিং আহচ্চ ঠিতা হোন্তি, যং যং অঙ্গুলিযা ৱা সূচিযা ৱা ফুসিত্ৱা নিসিন্নো হোতি, তত্থ তত্থ দিয্যমানমেৱ পটিগ্গহিতং হোতি. ‘‘যত্থ কত্থচি মহাকটসাৰহত্থত্থৰণাদীসু ঠপিতপত্তে পটিগ্গহণং ন ৰুহতী’’তি ৱুত্তং, তং হত্থপাসাতিক্কমং সন্ধায ৱুত্তন্তি ৱেদিতব্বং. হত্থপাসে পন সতি যত্থ কত্থচি ৱট্টতি অঞ্ঞত্ৰ তত্থজাতকা.

তত্থজাতকে পন পদুমিনিপণ্ণে ৱা কিংসুকপণ্ণাদিম্হি ৱা ন ৱট্টতি. ন হি তং কাযপটিবদ্ধসঙ্খ্যং গচ্ছতি. যথা চ তত্থজাতকে; এৱং খাণুকে বন্ধিত্ৱা ঠপিতমঞ্চাদিম্হি অসংহাৰিমে ফলকে ৱা পাসাণে ৱা ন ৰুহতিযেৱ, তেপি হি তত্থজাতকসঙ্খেপুপগা হোন্তি. ভূমিযং অত্থতেসু সুখুমেসু তিন্তিণিকাদিপণ্ণেসুপি পটিগ্গহণং ন ৰুহতি, ন হি তানি সন্ধাৰেতুং সমত্থানীতি. মহন্তেসু পন পদুমিনিপণ্ণাদীসু ৰুহতি. সচে হত্থপাসং অতিক্কম্ম ঠিতো দীঘদণ্ডকেন উড়ুঙ্কেন দেতি, আগন্ত্ৱা দেহীতি ৱত্তব্বো. ৱচনং অসুত্ৱা ৱা অনাদিযিত্ৱা ৱা পত্তে আকিৰতিযেৱ, পুন পটিগ্গহেতব্বং. দূৰে ঠত্ৱা ভত্তপিণ্ডং খিপন্তেপি এসেৱ নযো.

সচে পত্তত্থৱিকতো নীহৰিযমানে পত্তে ৰজনচুণ্ণানি হোন্তি, সতি উদকে ধোৱিতব্বো, অসতি ৰজনচুণ্ণং পুচ্ছিত্ৱা পটিগ্গহেত্ৱা ৱা পিণ্ডায চৰিতব্বং. সচে পিণ্ডায চৰন্তস্স ৰজং পততি, পটিগ্গহেত্ৱা ভিক্খা গণ্হিতব্বা. অপ্পটিগ্গহেত্ৱা গণ্হতো ৱিনযদুক্কটং. তং পন পুন পটিগ্গহেত্ৱা ভুঞ্জতো অনাপত্তি. সচে পন ‘‘পটিগ্গহেত্ৱা দেথা’’তি ৱুত্তে ৱচনং অসুত্ৱা ৱা অনাদিযিত্ৱা ৱা ভিক্খং দেন্তিযেৱ, ৱিনযদুক্কটং নত্থি, পুন পটিগ্গহেত্ৱা অঞ্ঞা ভিক্খা গহেতব্বা.

সচে মহাৱাতো ততো ততো ৰজং পাতেতি, ন সক্কা হোতি ভিক্খং গহেতুং, ‘‘অনুপসম্পন্নস্স দস্সামী’’তি সুদ্ধচিত্তেন আভোগং কত্ৱা গণ্হিতুং ৱট্টতি. এৱং পিণ্ডায চৰিত্ৱা ৱিহাৰং ৱা আসনসালং ৱা গন্ত্ৱা তং অনুপসম্পন্নস্স দত্ৱা পুন তেন দিন্নং ৱা তস্স ৱিস্সাসেন ৱা পটিগ্গহেত্ৱা ভুঞ্জিতুং ৱট্টতি.

সচে ভিক্খাচাৰে সৰজং পত্তং ভিক্খুস্স দেতি, সো ৱত্তব্বো – ‘‘ইমং পটিগ্গহেত্ৱা ভিক্খং ৱা গণ্হেয্যাসি, পৰিভুঞ্জেয্যাসি ৱা’’তি তেন তথা কাতব্বং. সচে ৰজং উপৰি উপ্পিলৱতি, কঞ্জিকং পৱাহেত্ৱা সেসং ভুঞ্জিতব্বং. সচে অন্তো পৱিট্ঠং হোতি, পটিগ্গহেতব্বং. অনুপসম্পন্নে অসতি হত্থতো অমোচেন্তেন, যত্থ অনুপসম্পন্নো অত্থি তত্থ নেত্ৱা পটিগ্গহেতব্বং. সুক্খভত্তে পতিতৰজং অপনেত্ৱা ভুঞ্জিতুং ৱট্টতি. সচে অতিসুখুমং হোতি, উপৰিভত্তেন সদ্ধিং অপনেতব্বং, পটিগ্গহেত্ৱা ৱা ভুঞ্জিতব্বং. যাগুং ৱা সূপং ৱা পুৰতো ঠপেত্ৱা আলুলেন্তানং ভাজনতো ফুসিতানি উগ্গন্ত্ৱা পত্তে পতন্তি, পত্তো পটিগ্গহেতব্বো.

উড়ুঙ্কেন আহৰিত্ৱা দেন্তানং পঠমতৰং উড়ুঙ্কতো থেৱা পত্তে পতন্তি, সুপতিতা, অভিহটত্তা দোসো নত্থি. সচেপি চৰুকেন ভত্তে আকিৰিযমানে চৰুকতো মসি ৱা ছাৰিকা ৱা পততি, অভিহটত্তা নেৱত্থি দোসো. অনন্তৰস্স ভিক্খুনো দিয্যমানং পত্ততো উপ্পতিত্ৱা ইতৰস্স পত্তে পততি, সুপতিতং. পটিগ্গহিতমেৱ হি তং হোতি.

সচে জজ্ঝৰিসাখাদিং ফালেত্ৱা একস্স ভিক্খুনো দেন্তানং সাখতো ফুসিতানি অঞ্ঞস্স পত্তে পতন্তি, পত্তো পটিগ্গহেতব্বো. যস্স পত্তস্স উপৰি ফালেন্তি, তস্স পত্তে পতিতেসু দাতুকামতায অভিহটত্তা দোসো নত্থি. পাযাসস্স পূৰেত্ৱা পত্তং দেন্তি, উণ্হত্তা হেট্ঠা গহেতুং ন সক্কোতি, মুখৱট্টিযাপি গহেতুং ৱট্টতি. সচে তথাপি ন সক্কোতি, আধাৰকেন গণ্হিতব্বো.

আসনসালায পত্তং গহেত্ৱা নিসিন্নো ভিক্খু নিদ্দং ওক্কন্তো হোতি, নেৱ আহৰিযমানং ন দিয্যমানং জানাতি, অপ্পটিগ্গহিতং হোতি. সচে পন আভোগং কত্ৱা নিসিন্নো হোতি, ৱট্টতি. সচেপি সো হত্থেন আধাৰকং মুঞ্চিত্ৱা পাদেন পেল্লেত্ৱা নিদ্দাযতি, ৱট্টতিযেৱ. পাদেন আধাৰকং অক্কমিত্ৱা পটিগ্গণ্হন্তস্স পন জাগৰন্তস্সপি অনাদৰপটিগ্গহণং হোতি, তস্মা ন কাতব্বং. কেচি এৱং আধাৰকেন পটিগ্গহণং কাযপটিবদ্ধপটিবদ্ধেন পটিগ্গহণং নাম হোতি, তস্মা ন ৱট্টতীতি ৱদন্তি. তং তেসং ৱচনমত্তমেৱ. অত্থতো পন সব্বম্পেতং কাযপটিবদ্ধমেৱ হোতি. কাযসংসগ্গেপি চেস নযো দস্সিতোৱ. যম্পি ভিক্খুস্স দিয্যমানং পততি, তম্পি সামং গহেত্ৱা পৰিভুঞ্জিতুং ৱট্টতি. তত্ৰিদং সুত্তং –

‘‘অনুজানামি, ভিক্খৱে, যং দিয্যমানং পততি, তং সামং গহেত্ৱা পৰিভুঞ্জিতুং পৰিচ্চত্তং তং, ভিক্খৱে, দাযকেহী’’তি (চূড়ৱ. ২৭৩).

ইদঞ্চ পন সুত্তং নেয্যত্থং. তস্মা এৱমেত্থ অধিপ্পাযো ৱেদিতব্বো – যং দিয্যমানং দাযকস্স হত্থতো পৰিগড়িত্ৱা সুদ্ধায ৱা ভূমিযা পদুমিনিপণ্ণৱত্থকটসাৰকাদীসু ৱা পততি, তং সামং গহেত্ৱা পৰিভুঞ্জিতুং ৱট্টতি. যং পন সৰজায ভূমিযা পততি, তং ৰজং পুঞ্ছিত্ৱা ৱা ধোৱিত্ৱা ৱা পটিগ্গহেত্ৱা ৱা পৰিভুঞ্জিতব্বং. সচে পন পৱট্টন্তং অঞ্ঞস্স ভিক্খুনো সন্তিকং গচ্ছতি, তেন আহৰাপেতুম্পি ৱট্টতি. সচে তং ভিক্খুং ৱদতি ‘‘ত্ৱংযেৱ খাদা’’তি তস্সাপি খাদিতুং ৱট্টতি. অনাণত্তেন পন তেন ন গহেতব্বং. অনাণত্তেনাপি ‘‘ইতৰস্স দস্সামী’’তি গহেতুং ৱট্টতীতি কুৰুন্দিযং ৱুত্তং. কস্মা পনেতং ইতৰস্স ভিক্খুনো গহেতুং ন ৱট্টতীতি? ভগৱতা অননুঞ্ঞাতত্তা. ভগৱতা হি ‘‘সামং গহেত্ৱা পৰিভুঞ্জিতু’’ন্তি ৱদন্তেন যস্সেৱ তং দিয্যমানং পততি, তস্স অপ্পটিগ্গহিতকম্পি তং গহেত্ৱা পৰিভোগো অনুঞ্ঞাতো. ‘‘পৰিচ্চত্তং তং ভিক্খৱে দাযকেহী’’তি ৱচনেন পনেত্থ পৰসন্তকাভাৱো দীপিতো. তস্মা অঞ্ঞস্স সামং গহেত্ৱা পৰিভুঞ্জিতুং ন ৱট্টতি, তস্স পন আণত্তিযা ৱট্টতীতি অযং কিৰেত্থ অধিপ্পাযো.

যস্মা চ তং অপ্পটিগ্গহিতকত্তা অনুঞ্ঞাতং, তস্মা যথাঠিতংযেৱ অনামসিত্ৱা কেনচি পিদহিত্ৱা ঠপিতং দুতিযদিৱসেপি পৰিভুঞ্চিতুং ৱট্টতি, সন্নিধিপচ্চযা অনাপত্তি. পটিগ্গহেত্ৱা পন পৰিভুঞ্জিতব্বং. তংদিৱসংযেৱ হি তস্স সামং গহেত্ৱা পৰিভোগো অনুঞ্ঞাতো, ন ততো পৰন্তি অযম্পি কিৰেত্থ অধিপ্পাযো.

ইদানি অব্বোহাৰিকনযো ৱুচ্চতি – ভুঞ্জন্তানঞ্হি দন্তা খিয্যন্তি, নখা খিয্যন্তি, পত্তস্স ৱণ্ণো খিয্যতি, সব্বং অব্বোহাৰিকং. যম্পি সত্থকেন উচ্ছুআদীসু ফালিতেসু মলং পঞ্ঞাযতি, এতং নৱসমুট্ঠিতং নাম পটিগ্গহেত্ৱা পৰিভুঞ্জিতব্বং. সত্থকং ধোৱিত্ৱা ফালিতেসু মলং ন পঞ্ঞাযতি, লোহগন্ধমত্তং হোতি, তং অব্বোহাৰিকং. যম্পি সত্থকং গহেত্ৱা পৰিহৰন্তি, তেন ফালিতেপি এসেৱ নযো. ন হি তং পৰিভোগত্থায পৰিহৰন্তীতি. মূলভেসজ্জাদীনি পিসন্তানং ৱা কোট্টেন্তানং ৱা নিসদনিসদপোতকউদুক্খলমুসলাদীনি খিয্যন্তি, পৰিহৰণকৱাসিং তাপেত্ৱা ভেসজ্জত্থায তক্কে ৱা খীৰে ৱা পক্খিপন্তি, তত্থ নীলিকা পঞ্ঞাযতি. সত্থকে ৱুত্তসদিসোৱ ৱিনিচ্ছযো. আমকতক্কাদীসু পন সযং ন পক্খিপিতব্বা. পক্খিপতি চে, সামপাকতো ন মুচ্চতি.

দেৱে ৱস্সন্তে পিণ্ডায চৰন্তস্স সৰীৰতো ৱা চীৱৰতো ৱা কিলিট্ঠউদকং পত্তে পততি, তং পটিগ্গহেতব্বং. ৰুক্খমূলাদীসু ভুঞ্জন্তস্স পতিতেপি এসেৱ নযো. সচে পন সত্তাহং ৱস্সন্তে দেৱে সুদ্ধং উদকং হোতি, অব্ভোকাসতো ৱা পততি, ৱট্টতি. সামণেৰস্স ওদনং দেন্তেন তস্স পত্তগতং অচ্ছুপন্তেনেৱ দাতব্বো. পত্তো ৱাস্স পটিগ্গহেতব্বো. অপ্পটিগ্গহিতে ওদনং ছুপিত্ৱা পুন অত্তনো পত্তে ওদনং গণ্হন্তস্স উগ্গহিতকো হোতি.

সচে পন দাতুকামো হুত্ৱা ‘‘আহৰ সামণেৰ পত্তং, ওদনং গণ্হা’’তি ৱদতি, ইতৰো চ ‘‘অলং ময্হ’’ন্তি পটিক্খিপতি, পুন তৱেৱেতং মযা পৰিচ্চত্ত’’ন্তি চ ৱুত্তেপি ‘‘ন ময্হং এতেনত্থো’’তি ৱদতি. সতক্খত্তুম্পি পৰিচ্চজতু, যাৱ অত্তনো হত্থগতং পটিগ্গহিতমেৱ হোতি.

সচে পন আধাৰকে ঠিতং নিৰপেক্খো ‘‘গণ্হা’’তি ৱদতি, পুন পটিগ্গহেতব্বং. সাপেক্খো আধাৰকে পত্তং ঠপেত্ৱা ‘‘এত্তো পূৱং ৱা ভত্তং ৱা গণ্হা’’তি সামণেৰং ৱদতি, সামণেৰো হত্থং ধোৱিত্ৱা সচেপি সতক্খত্তুং গহেত্ৱা অত্তনো পত্তগতং অফুসন্তোৱ অত্তনো পত্তে পক্খিপতি, পুন পটিগ্গহণকিচ্চং নত্থি. যদি পন অত্তনো পত্তগতং ফুসিত্ৱা ততো গণ্হাতি, সামণেৰসন্তকেন সংসট্ঠং হোতি, পুন পটিগ্গহেতব্বং. কেচি পন ‘‘সচেপি গয্হমানং ছিজ্জিত্ৱা তত্থ পততি, পুন পটিগ্গহেতব্ব’’ন্তি ৱদন্তি. তং ‘‘একং ভত্তপিণ্ডং গণ্হ, একং পূৱং গণ্হ, ইমস্স গুড়পিণ্ডস্স এত্তকং পদেসং গণ্হা’’তি এৱং পৰিচ্ছিন্দিত্ৱা ৱুত্তে ৱেদিতব্বং. ইধ পন পৰিচ্ছেদো নত্থি. তস্মা যং সামণেৰস্স পত্তে পততি, তদেৱ পটিগ্গহণং ৱিজহতি. হত্থগতং পন যাৱ সামণেৰো ৱা ‘‘অল’’ন্তি ন ওৰমতি, ভিক্খু ৱা ন ৱাৰেতি, তাৱ ভিক্খুস্সেৱ সন্তকং, তস্মা পটিগ্গহণং ন ৱিজহতি.

সচে অত্তনো ৱা ভিক্খূনং ৱা যাগুপচনকভাজনে কেসঞ্চি অত্থায ওদনং পক্খিপতি, ‘‘সামণেৰ, ভাজনস্স উপৰি হত্থং কৰোহী’’তি ৱত্ৱা তস্স হত্থে পক্খিপিতব্বং, তস্স হত্থতো ভাজনে পতিতঞ্হি দুতিযদিৱসে ভাজনস্স অকপ্পিযভাৱং ন কৰোতি, পৰিচ্চত্তত্তা. সচে এৱং অকত্ৱা পক্খিপতি, পত্তমিৱ ভাজনং নিৰামিসং কত্ৱা পৰিভুঞ্জিতব্বং. দাযকা যাগুকুটং ঠপেত্ৱা গতা, তং দহৰসামণেৰো পটিগ্গণ্হাপেতুং ন সক্কোতি, ভিক্খু পত্তং উপনামেতি, সামণেৰো কুটস্স গীৱং পত্তস্স মুখৱট্টিযং ঠপেত্ৱা আৱজ্জেতি, পত্তগতা যাগু পটিগ্গহিতাৱ হোতি. অথ ৱা ভিক্খু ভূমিযং হত্থং ঠপেতি, সামণেৰো পৱট্টেত্ৱা তত্থ আৰোপেতি, ৱট্টতি. পূৱপচ্ছিভত্তপচ্ছিউচ্ছুভাৰাদীসুপি এসেৱ নযো.

সচে পটিগ্গহণূপগং ভাৰং দ্ৱে তযো সামণেৰা দেন্তি, একেন ৱা বলৱতা উক্খিত্তং দ্ৱে তযো ভিক্খূ গণ্হন্তি, ৱট্টতি. মঞ্চস্স ৱা পীঠস্স ৱা পাদে তেলঘটং ৱা ফাণিতঘটং ৱা নৱনীতঘটং ৱা লগ্গেন্তি, ভিক্খুস্স মঞ্চেপি পীঠেপি নিসীদিতুং ৱট্টতি. উগ্গহিতকং নাম ন হোতি.

নাগদন্তকে ৱা অঙ্কুসকে ৱা দ্ৱে তেলঘটা লগ্গিতা হোন্তি, উপৰি পটিগ্গহিতকো হেট্ঠা অপ্পটিগ্গহিতকো, উপৰিমং গহেতুং ৱট্টতি. হেট্ঠা পটিগ্গহিতকো উপৰি অপ্পটিগ্গহিতকো, উপৰিমং গহেত্ৱা ইতৰং গণ্হতো উপৰিমো উগ্গহিতকো হোতি. হেট্ঠামঞ্চে অপ্পটিগ্গহিতকং তেলথালকং হোতি, তং চে সম্মজ্জন্তো সম্মুঞ্জনিযা ঘট্টেতি, উগ্গহিতকং ন হোতি. পটিগ্গহিতকং গণ্হিস্সামীতি অপ্পটিগ্গহিতকং গহেত্ৱা ঞত্ৱা পুন ঠপেতি, উগ্গহিতকং ন হোতি. বহি নীহৰিত্ৱা সঞ্জানাতি, বহি অট্ঠপেত্ৱা হৰিত্ৱা তত্থেৱ ঠপেতব্বং, নত্থি দোসো. সচে পন পুব্বে ৱিৱৰিত্ৱা ঠপিতং ন পিদহিতব্বং; যথা পুব্বে ঠিতং তথেৱ ঠপেতব্বং. সচে বহি ঠপেতি, পুন ন ছুপিতব্বং.

হেট্ঠাপাসাদং ওৰোহন্তো নিস্সেণিমজ্ঝে সঞ্জানাতি, অনোকাসত্তা উদ্ধং ৱা অধো ৱা হৰিত্ৱা ঠপেতব্বং. পটিগ্গহিতকে তেলাদিম্হি কণ্ণকং উট্ঠেতি, সিঙ্গিৱেৰাদিম্হি ঘনচুণ্ণং, তংসমুট্ঠানমেৱ নামেতং, পুন পটিগ্গহণকিচ্চং নত্থি.

তালং ৱা নাড়িকেৰং ৱা আৰুড়্হো যোত্তেন ফলপিণ্ডিং ওতাৰেত্ৱা উপৰি ঠিতোৱ গণ্হথাতি ৱদতি, ন গহেতব্বং. সচে অঞ্ঞো ভূমিযং ঠিতো যোত্তপাসকে গহেত্ৱা উক্খিপিত্ৱা দেতি, ৱট্টতি. সফলং মহাসাখং কপ্পিযং কাৰেত্ৱা পটিগ্গণ্হাতি, ফলানি পটিগ্গহিতানেৱ হোন্তি, যথাসুখং পৰিভুঞ্জিতুং ৱট্টতি.

অন্তোৱতিযং ঠত্ৱা ৱতিং ছিন্দিত্ৱা উচ্ছুং ৱা তিম্বৰূসকং ৱা দেন্তি, হত্থপাসে সতি ৱট্টতি. ৱতিদণ্ডকেসু অপ্পহৰিত্ৱা নিগ্গতং গণ্হন্তস্স ৱট্টতি. পহৰিত্ৱা নিগ্গতে অট্ঠকথাসু দোসো ন দস্সিতো. মযং পন যং ঠানং পহটং, ততো সযংপতিতমেৱ হোতীতি তক্কযাম. তস্মিম্পি অট্ঠত্ৱা গচ্ছন্তে যুজ্জতি, সুঙ্কঘাততো পৱট্টেত্ৱা বহিপতিতভণ্ডং ৱিয. ৱতিং ৱা পাকাৰং ৱা লঙ্ঘাপেত্ৱা দেন্তি, সচে পন ন পুথুলো পাকাৰো, অন্তোপাকাৰে চ বহিপাকাৰে চ ঠিতস্স হত্থপাসো পহোতি, হত্থসতম্পি উদ্ধং গন্ত্ৱা সম্পত্তং গহেতুং ৱট্টতি.

ভিক্খু গিলানং সামণেৰং খন্ধেন ৱহতি, সো ফলাফলং দিস্ৱা গহেত্ৱা খন্ধে নিসিন্নোৱ দেতি, ৱট্টতি. অপৰো ভিক্খুং ৱহন্তো খন্ধে নিসিন্নস্স ভিক্খুনো দেতি, ৱট্টতিযেৱ.

ভিক্খু ফলিনিং সাখং ছাযত্থায গহেত্ৱা গচ্ছতি, ফলানি খাদিতুং চিত্তে উপ্পন্নে পটিগ্গহাপেত্ৱা খাদিতুং ৱট্টতি. মচ্ছিকৱাৰণত্থং কপ্পিযং কাৰেত্ৱা পটিগ্গণ্হাতি, খাদিতুকামো চে হোতি, মূলপটিগ্গহণমেৱ ৱট্টতি, খাদন্তস্স নত্থি দোসো.

ভিক্খু পটিগ্গহণাৰহং ভণ্ডং মনুস্সানং যানে ঠপেত্ৱা মগ্গং গচ্ছতি, যানং কদ্দমে লগ্গতি, দহৰো চক্কং গহেত্ৱা উক্খিপতি, ৱট্টতি, উগ্গহিতকং নাম ন হোতি. নাৱায ঠপেত্ৱা নাৱং অৰিত্তেন ৱা পাজেতি, হত্থেন ৱা কড্ঢতি, ৱট্টতি. উড়ুম্পেপি এসেৱ নযো. চাটিযং কুণ্ডকে ৱা ঠপেত্ৱাপি তং অনুপসম্পন্নেন গাহাপেত্ৱা অনুপসম্পন্নং বাহাযং গহেত্ৱা তৰিতুং ৱট্টতি. তস্মিম্পি অসতি অনুপসম্পন্নং গাহাপেত্ৱা তং বাহাযং গহেত্ৱা তৰিতুং ৱট্টতি.

উপাসকা গমিকভিক্খূনং পাথেয্যতণ্ডুলে দেন্তি. সামণেৰা ভিক্খূনং তণ্ডুলে গহেত্ৱা অত্তনো তণ্ডুলে গহেতুং ন সক্কোন্তি, ভিক্খূ তেসং তণ্ডুলে গণ্হন্তি. সামণেৰা অত্তনা গহিততণ্ডুলেসু খীণেসু ইতৰেহি তণ্ডুলেহি যাগুং পচিত্ৱা সব্বেসং পত্তানি পটিপাটিযা ঠপেত্ৱা যাগুং আকিৰন্তি. পণ্ডিতো সামণেৰো অত্তনো পত্তং গহেত্ৱা থেৰস্স দেতি, থেৰস্স পত্তং অনুথেৰস্সাতি এৱং সব্বানি পৰিৱত্তেতি, সব্বেহি সামণেৰস্স সন্তকং ভুত্তং হোতি, ৱট্টতি.

সচেপি সামণেৰো অপণ্ডিতো হোতি, অত্তনো পত্তে যাগুং সযমেৱ পাতুং আৰভতি, ‘‘আৱুসো তুয্হং যাগুং ময্হং দেহী’’তি এৱং থেৰেহি পটিপাটিযা যাচিত্ৱাপি পিৱিতুং ৱট্টতি, সব্বেহি সামণেৰস্স সন্তকমেৱ ভুত্তং হোতি, নেৱ উগ্গহিতপচ্চযা ন সন্নিধিপচ্চযা ৱজ্জং ফুসন্তি. এত্থ পন মাতাপিতূনং তেলাদীনি ছাযাদীনং অত্থায সাখাদীনি চ হৰন্তানং ইমেসঞ্চ ৱিসেসো ন দিস্সতি. তস্মা কাৰণং উপপৰিক্খিতব্বং.

সামণেৰো ভত্তং পচিতুকামো তণ্ডুলে ধোৱিত্ৱা নিচ্চালেতুং ন সক্কোতি. ভিক্খুনা তণ্ডুলে চ ভাজনঞ্চ পটিগ্গহেত্ৱা তণ্ডুলে ধোৱিত্ৱা নিচ্চালেত্ৱা ভাজনং উদ্ধনং আৰোপেতব্বং, অগ্গি ন কাতব্বো, পক্ককালে ৱিৱৰিত্ৱা পক্কভাৱো জানিতব্বো. সচে দুপ্পক্কং হোতি, পাকত্থায পিদহিতুং ন ৱট্টতি. ৰজস্স ৱা ছাৰিকায ৱা অপতনত্থায ৱট্টতি, পক্ককালে আৰোপেতুম্পি ভুঞ্জিতুম্পি ৱট্টতি, পুন পটিগ্গহণকিচ্চং নত্থি.

সামণেৰো পটিবলো পচিতুং, খণো পনস্স নত্থি, কত্থচি গন্তুকামো. ভিক্খুনা সতণ্ডুলোদকভাজনং পটিগ্গহেত্ৱা উদ্ধনং আৰোপেত্ৱা অগ্গিং জালেত্ৱা গচ্ছাহীতি ৱত্তব্বো. ততো পৰং পুৰিমনযেনেৱ সব্বং কাতুং ৱট্টতি.

ভিক্খু যাগুঅত্থায সুদ্ধং ভাজনং আৰোপেত্ৱা উদকং তাপেতি, ৱট্টতি. তত্তে উদকে সামণেৰো তণ্ডুলে পক্খিপতি, ততো পট্ঠায ভিক্খুনা অগ্গি ন কাতব্বো. পক্কযাগুং পটিগ্গহেত্ৱা পাতুং ৱট্টতি.

সামণেৰো যাগুং পচতি, হত্থকুক্কুচ্চকো ভিক্খু কীড়ন্তো ভাজনং আমসতি, পিধানং আমসতি, উগ্গতং ফেণং ছিন্দিত্ৱা হৰতি, তস্সেৱ পাতুং ন ৱট্টতি, দুৰুপচিণ্ণং নাম হোতি. সচে পন দব্বিং ৱা উড়ুঙ্কং ৱা গহেত্ৱা অনুক্খিপন্তো আলুড়েতি, সব্বেসং ন ৱট্টতি, সামপাকঞ্চেৱ হোতি দুৰুপচিণ্ণঞ্চ. সচে উক্খিপতি, উগ্গহিতকম্পি হোতি.

ভিক্খুনা পিণ্ডায চৰিত্ৱা আধাৰকে পত্তো ঠপিতো হোতি, তত্ৰ চে অঞ্ঞো লোলভিক্খু কীড়ন্তো পত্তং আমসতি, পত্তপিধানং আমসতি, তস্সেৱ ততো লদ্ধং ভত্তং ন ৱট্টতি. সচে পন পত্তং উক্খিপিত্ৱা ঠপেতি, সব্বেসং ন ৱট্টতি. তত্থজাতকফলানি সাখায ৱা ৱল্লিযা ৱা গহেত্ৱা চালেতি, তস্সেৱ ততো লদ্ধং ফলং ন ৱট্টতি, দুৰুপচিণ্ণদুক্কটঞ্চ আপজ্জতি. ফলৰুক্খং পন অপস্সযিতুং ৱা তত্থ কণ্ডকে ৱা বন্ধিতুং ৱট্টতি, দুৰুপচিণ্ণং ন হোতীতি মহাপচ্চৰিযং ৱুত্তং.

অৰঞ্ঞে পতিতং পন অম্বফলাদিং দিস্ৱা সামণেৰস্স দস্সামীতি আহৰিত্ৱা দাতুং ৱট্টতি. সীহৱিঘাসাদিং দিস্ৱাপি সামণেৰস্স দস্সামীতি পটিগ্গহেত্ৱা ৱা অপ্পটিগ্গহেত্ৱা ৱা আহৰিত্ৱা দাতুং ৱট্টতি. সচে পন সক্কোতি ৱিতক্কং সোধেতুং, ততো লদ্ধং খাদিতুম্পি ৱট্টতি, নেৱ আমকমংসপটিগ্গহণপচ্চযা ন উগ্গহিতকপচ্চযা ৱজ্জং ফুসতি.

মাতাপিতূনং অত্থায তেলাদীনি গহেত্ৱা গচ্ছতো অন্তৰামগ্গে ব্যাধি উপ্পজ্জতি, ততো যং ইচ্ছতি, তং পটিগ্গহেত্ৱা পৰিভুঞ্জিতুং ৱট্টতি. সচে পন মূলেপি পটিগ্গহিতং হোতি, পুন পটিগ্গহণকিচ্চং নত্থি. মাতাপিতূনং তণ্ডুলে আহৰিত্ৱা দেতি, তে ততোযেৱ যাগুআদীনি সম্পাদেত্ৱা তস্স দেন্তি, ৱট্টতি সন্নিধিপচ্চযা ৱা উগ্গহিতকপচ্চযা ৱা দোসো নত্থি.

ভিক্খু পিদহিত্ৱা উদকং তাপেতি, যাৱ পৰিক্খযা পৰিভুঞ্জিতুং ৱট্টতি. সচে পনেত্থ ছাৰিকা পততি, পটিগ্গহেতব্বং. দীঘসণ্ডাসেন থালকং গহেত্ৱা তেলং পচন্তস্স ছাৰিকা পততি, হত্থেন অমুঞ্চন্তেনেৱ পচিত্ৱা ওতাৰেত্ৱা পটিগ্গহেতব্বং. সচে অঙ্গাৰাপি দাৰূনি ৱা পটিগ্গহেত্ৱা ঠপিতানি, মূলপটিগ্গহণমেৱ ৱট্টতি.

ভিক্খু উচ্ছুং খাদতি, সামণেৰো ‘‘ময্হম্পি দেথা’’তি ৱদতি. ‘‘ইতো ছিন্দিত্ৱা গণ্হা’’তি ৱুত্তো গণ্হাতি, অৱসেসে পুন পটিগ্গহণকিচ্চং নত্থি. গুড়পিণ্ডকং খাদন্তস্সাপি এসেৱ নযো. ৱুত্তোকাসতো ছিন্দিত্ৱা গহিতাৱসেসঞ্হি অজহিতপটিগ্গহণমেৱ হোতি.

ভিক্খু গুড়ং ভাজেন্তো পটিগ্গহেত্ৱা কোট্ঠাসে কৰোতি, ভিক্খূপি সামণেৰাপি আগন্ত্ৱা একগহণেনেৱ একমেকং কোট্ঠাসং গণ্হন্তি, গহিতাৱসেসং পটিগ্গহিতমেৱ হোতি. সচে লোলসামণেৰো গণ্হিত্ৱা গণ্হিত্ৱা পুন ঠপেতি, তস্স গহিতাৱসেসং অপ্পটিগ্গহিতকং হোতি.

ভিক্খু ধূমৱট্টিং পটিগ্গহেত্ৱা ধূমং পিৱতি, মুখঞ্চ কণ্ঠো চ মনোসিলায লিত্তো ৱিয হোতি, যাৱকালিকং ভুঞ্জিতুং ৱট্টতি, যাৱকালিকেন যাৱজীৱিকসংসগ্গে দোসো নত্থি.

পত্তং ৱা ৰজনং ৱা পচন্তস্স কণ্ণনাসমুখচ্ছিদ্দেহি ধূমো পৱিসতি, ব্যাধিপচ্চযা পুপ্ফং ৱা ফলং ৱা উপসিঙ্ঘতি, অব্বোহাৰিকত্তা ৱট্টতি. ভত্তুগ্গাৰো তালুং আহচ্চ অন্তোযেৱ পৱিসতি, অৱিসযত্তা ৱট্টতি. মুখং পৱিট্ঠং পন অজ্ঝোহৰতো ৱিকালে আপত্তি. দন্তন্তৰে লগ্গস্স আমিসস্স ৰসো পৱিসতি, আপত্তিযেৱ. সচে সুখুমং আমিসং হোতি, ৰসো ন পঞ্ঞাযতি, অব্বোহাৰিকপক্খং ভজতি.

উপকট্ঠে কালে নিৰুদকট্ঠানে ভত্তং ভুঞ্জিত্ৱা কক্খাৰেত্ৱা দ্ৱে তযো খেড়পিণ্ডে পাতেত্ৱা উদকট্ঠানং গন্ত্ৱা মুখং ৱিক্খালেতব্বং. পটিগ্গহেত্ৱা ঠপিতসিঙ্গিৱেৰাদীনং অঙ্কুৰা নিক্খমন্তি, পুন পটিগ্গহণকিচ্চং নত্থি. লোণে অসতি সমুদ্দোদকেন লোণকিচ্চং কাতুং ৱট্টতি. পটিগ্গহেত্ৱা ঠপিতং লোণোদকং লোণং হোতি, লোণং ৱা উদকং হোতি, ৰসো ৱা ফাণিতং হোতি, ফাণিতং ৱা ৰসো হোতি, মূলপটিগ্গহণমেৱ ৱট্টতি. হিমকৰকা উদকগতিকা এৱ. পৰিহাৰিকেন কতকট্ঠিনা উদকং পসাদেন্তি, তং অব্বোহাৰিকং, আমিসেন সদ্ধিং ৱট্টতি. আমিসগতিকেহি কপিত্থফলাদীহি পসাদিতং পুৰেভত্তমেৱ ৱট্টতি.

পোক্খৰণীআদীসু উদকং বহলং হোতি, ৱট্টতি. সচে পন মুখে চ হত্থে চ লগ্গতি, ন ৱট্টতি, পটিগ্গহেত্ৱা পৰিভুঞ্জিতব্বং. খেত্তেসু কসিতট্ঠানে বহলং উদকং হোতি, পটিগ্গহেতব্বং. সচে সন্দিত্ৱা কন্দৰাদীনি পৱিসিত্ৱা নদিং পূৰেতি, ৱট্টতি. ককুধসোব্ভাদযো হোন্তি, ৰুক্খতো পতিতেহি পুপ্ফেহি সঞ্ছন্নোদকা, সচে পুপ্ফৰসো ন পঞ্ঞাযতি, পটিগ্গহণকিচ্চং নত্থি. পৰিত্তং উদকং হোতি, ৰসো পঞ্ঞাযতি, পটিগ্গহেতব্বং. পব্বতকন্দৰাদীসু কাড়ৱণ্ণপণ্ণসঞ্ছন্নউদকেপি এসেৱ নযো.

পানীযঘটে সৰেণুকানি ৱা সৱণ্টখীৰানি ৱা পুপ্ফানি পক্খিত্তানি হোন্তি, পটিগ্গহেতব্বং. পুপ্ফানি ৱা পটিগ্গহেত্ৱা পক্খিপিতব্বানি. পাটলিচম্পকমল্লিকা পক্খিত্তা হোন্তি, ৱাসমত্তং তিট্ঠতি তং অব্বোহাৰিকং, দুতিযদিৱসেপি আমিসেন সদ্ধিং ৱট্টতি. ভিক্খুনা ঠপিতপুপ্ফৱাসিতকপানীযতো সামণেৰো পানীযং গহেত্ৱা পীতাৱসেসং তত্থেৱ আকিৰতি, পটিগ্গহেতব্বং. পদুমসৰাদীসু উদকং সন্থৰিত্ৱা ঠিতং পুপ্ফৰেণুং ঘটেন ৱিক্খম্ভেত্ৱা উদকং গহেতুং ৱট্টতি. কপ্পিযং কাৰাপেত্ৱা পটিগ্গহেত্ৱা ঠপিতং দন্তকট্ঠং হোতি, সচে তস্স ৰসং পিৱিতুকামো, মূলপটিগ্গহণমেৱ ৱট্টতি. অপ্পটিগ্গহেত্ৱা ঠপিতং পটিগ্গহেতব্বং. অজানন্তস্স ৰসে পৱিট্ঠেপি আপত্তিযেৱ. অচিত্তকঞ্হি ইদং সিক্খাপদং.

মহাভূতেসু কিং ৱট্টতি, কিং ন ৱট্টতীতি? খীৰং তাৱ ৱট্টতি, কপ্পিযমংসখীৰং ৱা অকপ্পিযমংসখীৰং ৱা হোতু, পিৱন্তস্স অনাপত্তি. অস্সু খেড়ো সিঙ্ঘাণিকা মুত্তং কৰীসং সেম্হং দন্তমলং অক্খিগূথকো কণ্ণগূথকো সৰীৰে উট্ঠিতলোণন্তি ইদং সব্বং ৱট্টতি. যং পনেত্থ ঠানতো চৱিত্ৱা পত্তে ৱা হত্থে ৱা পততি, তং পটিগ্গহেতব্বং. অঙ্গলগ্গং পটিগ্গহিতকমেৱ. উণ্হংপাযাসং ভুঞ্জন্তস্স সেদো অঙ্গুলিঅনুসাৰেন একাবদ্ধোৱ হুত্ৱা পাযাসে সন্তিট্ঠতি, পিণ্ডায ৱা চৰন্তস্স হত্থতো পত্তস্স মুখৱট্টিংতো ৱা পত্ততলং ওৰোহতি, এত্থ পটিগ্গহণকিচ্চং নত্থি. ঝামমহাভূতেসু ইদং নাম ন ৱট্টতীতি নত্থি, দুজ্ঝাপিতং পন ন ৱট্টতি. সুজ্ঝাপিতং মনুস্সট্ঠিম্পি চুণ্ণং কত্ৱা লেহে উপনেতুং ৱট্টতি.

চত্তাৰি মহাৱিকটানি অসতি কপ্পিযকাৰকে সামম্পি গহেত্ৱা পৰিভুঞ্জিতুং ৱট্টতি. এত্থ চ দুব্বচোপি অসমত্থোপি কপ্পিযকাৰকো অসন্তপক্খেযেৱ তিট্ঠতি. ছাৰিকায অসতি সুক্খদাৰুং ঝাপেত্ৱা ছাৰিকা গহেতব্বা. সুক্খদাৰুম্হি অসতি অল্লদাৰুং ৰুক্খতো ছিন্দিত্ৱাপি কাতুং ৱট্টতি. ইদং পন চতুব্বিধম্পি মহাৱিকটং কালোদিস্সং নাম সপ্পদট্ঠক্খণেযেৱ ৱট্টতি. সেসমেত্থ উত্তানমেৱ.

এড়কলোমসমুট্ঠানং – কাযতো চ কাযচিত্ততো চ সমুট্ঠাতি, কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

দন্তপোনসিক্খাপদং দসমং.

সমত্তো ৱণ্ণনাক্কমেন ভোজনৱগ্গো চতুত্থো.