৫. অচেলকৱগ্গো

১. অচেলকসিক্খাপদৱণ্ণনা

২৬৯. অচেলকৱগ্গস্স ৯ পঠমসিক্খাপদে – পৰিৱেসনন্তি পৰিৱিসনট্ঠানং. পৰিব্বাজকসমাপন্নোতি পব্বজ্জং সমাপন্নো. দেতি আপত্তি পাচিত্তিযস্সাতি সমতিত্তিকং যাগুপত্তং একপযোগেন দেতি, একং পাচিত্তিযং. অৱচ্ছিন্দিত্ৱা অৱচ্ছিন্দিত্ৱা দেতি, পযোগে পযোগে পাচিত্তিযং. এসেৱ নযো পূৱভত্তাদীসু. তিত্থিযে অতিত্থিযসঞ্ঞীতি মাতা ৱা পিতা ৱা তিত্থিযেসু পব্বজতি, তেসং মাতাপিতুসঞ্ঞায দেন্তস্সাপি পাচিত্তিযমেৱ হোতি. দাপেতীতি অনুপসম্পন্নেন দাপেতি.

২৭৩. উপনিক্খিপিত্ৱা দেতীতি তথাৰূপে ভাজনে ঠপেত্ৱা তং ভাজনং তেসং সন্তিকে ভূমিযং নিক্খিপিত্ৱা দেতি, তেসং ৱা ভাজনং নিক্খিপাপেত্ৱা তত্থ দেতি, পত্তং আধাৰকে ৱা ভূমিযং ৱা ঠপেত্ৱাপি ‘‘ইতো গণ্হথা’’তি ৱত্তুং ৱট্টতি. সচে তিত্থিযো ৱদতি ‘‘ময্হং নাম ইদং সন্তকং, ইধ ন আকিৰথা’’তি আকিৰিতব্বং. তস্স সন্তকত্তা সহত্থা দানং নাম ন হোতি. সেসমেত্থ উত্তানমেৱ.

এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

অচেলকসিক্খাপদং পঠমং.

২. উয্যোজনসিক্খাপদৱণ্ণনা

২৭৪. দুতিযসিক্খাপদে – পটিক্কমনেপীতি আসনসালাযম্পি. ভত্তৱিস্সগ্গন্তি ভত্তকিচ্চং. ন সম্ভাৱেসীতি ন পাপুণি.

২৭৬. অনাচাৰন্তি ৱুত্তাৱসেসং কাযৱচীদ্ৱাৰৱীতিক্কমং. দস্সনূপচাৰং ৱা সৱনূপচাৰং ৱা ৱিজহন্তস্সাতি এত্থ যদি ঠিতো ৱা নিসিন্নো ৱা উয্যোজেতি; যো উয্যোজিতো, সো ৱিজহতি, তস্স চ আপত্তি নাম নত্থি. তস্মিং পন ৱিজহন্তেপি অত্থতো ইতৰেন ৱিজহিতমেৱ হোতি. তস্মা যো উয্যোজেতি, তস্সেৱাযং আপত্তি. তত্থ সচে উপচাৰব্ভন্তৰে একো পাদো হোতি, দুক্কটং. সীমাতিক্কমে পাচিত্তিযং. এত্থ চ দস্সনূপচাৰস্স অব্ভোকাসে দ্ৱাদসহত্থপ্পমাণং, তথা সৱনূপচাৰস্স. সচে পন অন্তৰা কুট্টদ্ৱাৰপাকাৰাদযো হোন্তি, তেহি অন্তৰিতভাৱো দস্সনূপচাৰাতিক্কমো, তস্স ৱসেন আপত্তি ৱেদিতব্বা. ন অঞ্ঞো কোচি পচ্চযো হোতীতি ঠপেত্ৱা ৱুত্তপ্পকাৰমনাচাৰং অঞ্ঞং কিঞ্চি কাৰণং ন হোতি.

২৭৭. কলিসাসনং আৰোপেতীতি ‘‘কলী’’তি কোধো; তস্স সাসনং আৰোপেতি; কোধস্স আণং আৰোপেতি; কোধৱসেন ঠাননিসজ্জাদীসু দোসং দস্সেত্ৱা ‘‘পস্সথ ভো ইমস্স ঠানং, নিসজ্জং আলোকিতং ৱিলোকিতং খাণুকো ৱিয তিট্ঠতি, সুনখো ৱিয নিসীদতি, মক্কটো ৱিয ইতো চিতো চ ৱিলোকেতী’’তি এৱং অমনাপৱচনং ৱদতি ‘‘অপ্পেৱ নাম ইমিনাপি উব্বাড়্হো পক্কমেয্যা’’তি. সেসং উত্তানমেৱ.

তিসমুট্ঠানং – কাযচিত্ততো ৱাচাচিত্ততো কাযৱাচাচিত্ততো চ সমুট্ঠাতি, কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, তিৱেদনন্তি.

উয্যোজনসিক্খাপদং দুতিযং.

৩. সভোজনসিক্খাপদৱণ্ণনা

২৭৯. ততিযসিক্খাপদে – সযনিঘৰেতি সযনিযঘৰে. যতো অয্যস্স ভিক্খা দিন্নাতি যস্মা ভিক্খা দিন্না, যং আগতেন লদ্ধব্বং তং ৱো লদ্ধং; গচ্ছথাতি অধিপ্পাযো. পৰিযুট্ঠিতোতি ৰাগপৰিযুট্ঠিতো; মেথুনাধিপ্পাযোতি অত্থো.

২৮০. সহ উভোহি জনেহীতি সভোজনং; তস্মিং সভোজনে. অথ ৱা সভোজনেতি সভোগে. ৰাগপৰিযুট্ঠিতস্স হি পুৰিসস্স ইত্থী ভোগো ইত্থিযা চ পুৰিসো. তেনেৱস্স পদভাজনে – ‘‘ইত্থী চেৱ হোতি পুৰিসো চা’’তিআদি ৱুত্তং. মহল্লকে ঘৰেতি মহল্লকে সযনিঘৰে. পিট্ঠসঙ্ঘাটস্স হত্থপাসং ৱিজহিত্ৱাতি তস্স সযনিঘৰে গব্ভস্স যো পিট্ঠসঙ্ঘাটো, তস্স হত্থপাসং ৱিজহিত্ৱা; অন্তোসযনস্স আসন্নে ঠানে নিসীদতীতি অত্থো. ঈদিসঞ্চ সযনিঘৰং মহাচতুস্সালাদীসু হোতি. পিট্ঠিৱংসং অতিক্কমিত্ৱাতি ইমিনা মজ্ঝাতিক্কমং দস্সেতি. তস্মা যথা ৱা তথা ৱা কতস্স খুদ্দকস্স সযনিঘৰস্স মজ্ঝাতিক্কমে আপত্তি ৱেদিতব্বা. সেসমেত্থ উত্তানমেৱ.

পঠমপাৰাজিকসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, অকুসলচিত্তং, দ্ৱিৱেদনন্তি.

সভোজনসিক্খাপদং ততিযং.

২৮৪. চতুত্থপঞ্চমসিক্খাপদেসু যং ৱত্তব্বং সিযা, তং সব্বং অনিযতদ্ৱযে ৱুত্তনযমেৱ. যথা চ সভোজনসিক্খাপদং, এৱমেতানিপি পঠমপাৰাজিকসমুট্ঠানানেৱাতি.

ৰহোপটিচ্ছন্নসিক্খাপদং চতুত্থং, ৰহোনিসজ্জসিক্খাপদং পঞ্চমং.

৬. চাৰিত্তসিক্খাপদৱণ্ণনা

২৯৪. ছট্ঠসিক্খাপদে – দেথাৱুসো ভত্তন্তি এত্থ তং কিৰ ভত্তং অভিহটং অহোসি, তস্মা এৱমাহংসু. অনভিহটে পন এৱং ৱত্তুং ন লব্ভতি, পযুত্তৱাচা হোতি.

২৯৫. তেন হি ভিক্খৱে পটিগ্গহেত্ৱা নিক্খিপথাতি ইদং পন ভগৱা কুলস্স সদ্ধানুৰক্খণত্থায আহ. যদি ‘‘ভাজেত্ৱা খাদথা’’তি ৱদেয্য, মনুস্সানং পসাদঞ্ঞথত্তং সিযা. উস্সাৰিযিত্থাতি পটিহৰিযিত্থ; ঘৰংযেৱ নং গহেত্ৱা অগমংসূতি ৱুত্তং হোতি.

২৯৮. সন্তং ভিক্খুন্তি এত্থ কিত্তাৱতা সন্তো হোতি, কিত্তাৱতা অসন্তোতি? অন্তোৱিহাৰে যত্থ ঠিতস্স কুলানি পযিৰুপাসনচিত্তং উপ্পন্নং, ততো পট্ঠায যং পস্সে ৱা অভিমুখে ৱা পস্সতি, যস্স সক্কা হোতি পকতিৱচনেন আৰোচেতুং, অযং সন্তো নাম. ইতো চিতো চ পৰিযেসিত্ৱা আৰোচনকিচ্চং নাম নত্থি. যো হি এৱং পৰিযেসিতব্বো, সো অসন্তোযেৱ. অপিচ অন্তোউপচাৰসীমায ভিক্খুং দিস্ৱা আপুচ্ছিস্সামীতি গন্ত্ৱা তত্থ যং পস্সতি, সো আপুচ্ছিতব্বো. নো চে পস্সতি, অসন্তং ভিক্খুং অনাপুচ্ছা পৱিট্ঠো নাম হোতি.

৩০২. অন্তৰাৰামন্তি অন্তোগামে ৱিহাৰো হোতি, তং গচ্ছতি. ভত্তিযঘৰন্তি নিমন্তিতঘৰং ৱা সলাকভত্তাদিদাযকানং ৱা ঘৰং. আপদাসূতি জীৱিতব্ৰহ্মচৰিযন্তৰাযেসু সতি গন্তুং ৱট্টতি. সেসমেত্থ উত্তানমেৱ.

কথিনসমুট্ঠানং – কাযৱাচতো কাযৱাচাচিত্ততো চ সমুট্ঠাতি, কিৰিযাকিৰযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

চাৰিত্তসিক্খাপদং ছট্ঠং.

৭. মহানামসিক্খাপদৱণ্ণনা

৩০৩. সত্তমসিক্খাপদে – মহানামো নাম ভগৱতো চূড়পিতুপুত্তো মাসমত্তেন মহল্লকতৰো দ্ৱীসু ফলেসু পতিট্ঠিতো অৰিযসাৱকো. ভেসজ্জং উস্সন্নং হোতীতি ৱজতো আহৰিত্ৱা ঠপিতসপ্পি বহু হোতি.

৩০৬. সাদিতব্বাতি তস্মিং সমযে ৰোগো নত্থীতি ন পটিক্খিপিতব্বা; ৰোগে সতি ৱিঞ্ঞাপেস্সামীতি অধিৱাসেতব্বা. এত্তকেহি ভেসজ্জেহি পৱাৰেমীতি নামৱসেন সপ্পিতেলাদীসু দ্ৱীহি তীহি ৱা পৰিমাণৱসেন পত্থেন নাড়িযা আড়্হকেনাতি ৱা.অঞ্ঞং ভেসজ্জং ৱিঞ্ঞাপেতীতি সপ্পিনা পৱাৰিতো তেলং ৱিঞ্ঞাপেতি, আড়্হকেন পৱাৰিতো দোণং. ন ভেসজ্জেন কৰণীযেনাতি মিস্সকভত্তেনপি চে যাপেতুং সক্কোতি, ন ভেসজ্জকৰণীযং নাম হোতি.

৩১০. পৱাৰিতানন্তি যে অত্তনো পুগ্গলিকায পৱাৰণায পৱাৰিতা; তেসং পৱাৰিতানুৰূপেন ৱিঞ্ঞত্তিযা অনাপত্তি. সঙ্ঘৱসেন পৱাৰিতেসু পন পমাণং সল্লক্খেতব্বমেৱাতি. সেসং উত্তানমেৱ.

ছসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

মহানামসিক্খাপদং সত্তমং.

৮. উয্যুত্তসেনাসিক্খাপদৱণ্ণনা

৩১১. অট্ঠমে – অব্ভুয্যাতোতি অভিউয্যাতো; পৰসেনং অভিমুখো গমিস্সামীতি নগৰতো নিগ্গতোতি অত্থো. উয্যুত্তন্তি কতউয্যোগং; গামতো নিক্খন্তন্তি অত্থো.

৩১৪. দ্ৱাদসপুৰিসো হত্থীতি চত্তাৰো আৰোহকা একেকপাদৰক্খকা দ্ৱে দ্ৱেতি এৱং দ্ৱাদসপুৰিসো হোতি. তিপুৰিসো অস্সোতি একো আৰোহকো দ্ৱে পাদৰক্খকাতি এৱং তিপুৰিসো হোতি. চতুপুৰিসো ৰথোতি একো সাৰথি একো যোধো দ্ৱে আণিৰক্খকাতি এৱং চতুপুৰিসো হোতি. চত্তাৰো পুৰিসা সৰহত্থাতি আৱুধহত্থা চত্তাৰো পুৰিসাতি অযং পচ্ছিমকোটিযা চতুৰঙ্গসমন্নাগতা সেনা নাম. ঈদিসং সেনং দস্সনায গচ্ছতো পদে পদে দুক্কটং. দস্সনূপচাৰং ৱিজহিত্ৱাতি কেনচি অন্তৰিতা ৱা নিন্নং ওৰুড়্হা ৱা ন দিস্সতি; ইধ ঠত্ৱা ন সক্কা দট্ঠুন্তি অঞ্ঞং ঠানং গন্ত্ৱা পস্সতো পযোগে পযোগে পাচিত্তিযন্তি অত্থো.

৩১৫. একমেকন্তি হত্থিআদীসু চতূসু অঙ্গেসু একমেকং; অন্তমসো একপুৰিসাৰুড়্হকহত্থিম্পি একম্পি সৰহত্থং পুৰিসং. অনুয্যুত্তা নাম ৰাজা উয্যানং ৱা নদিং ৱা গচ্ছতি; এৱং অনুয্যুত্তা হোতি.

৩১৬. আপদাসূতি জীৱিতব্ৰহ্মচৰিযন্তৰাযেসু সতি এত্থ গতো মুঞ্চিস্সামীতি গচ্ছতো অনাপত্তি. সেসমেত্থ উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, লোকৱজ্জং, কাযকম্মং, অকুসলচিত্তং, তিৱেদনন্তি.

উয্যুত্তসেনাসিক্খাপদং অট্ঠমং.

৯. সেনাৱাসসিক্খাপদৱণ্ণনা

৩১৯. নৱমে – অত্থঙ্গতে সূৰিযে সেনায ৱসতীতি তিট্ঠতু ৱা নিসীদতু ৱা সযতু ৱা সচেপি আকাসে ইদ্ধিযা কঞ্চি ইৰিযাপথং কপ্পেতি, পাচিত্তিযমেৱ. সেনা ৱা পটিসেনায ৰুদ্ধা হোতীতি যথা সঞ্চাৰো ছিজ্জতি; এৱং ৰুদ্ধা হোতি. পলিবুদ্ধোতি ৱেৰিকেন ৱা ইস্সৰেন ৱা ৰুদ্ধো. সেসং উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

সেনাৱাসসিক্খাপদং নৱমং.

১০. উয্যোধিকসিক্খাপদৱণ্ণনা

৩২২. দসমে – উগ্গন্ত্ৱা উগ্গন্ত্ৱা এত্থ যুজ্ঝন্তীতি উয্যোধিকং; সম্পহাৰট্ঠানস্সেতং অধিৱচনং. বলস্স অগ্গং জানন্তি এত্থাতি বলগ্গং; বলগণনট্ঠানন্তি অত্থো. সেনায ৱিযূহং সেনাব্যূহং; সেনানিৱেসস্সেতং অধিৱচনং. তযো হত্থী পচ্ছিমং হত্থানীকন্তি যো পুব্বে ৱুত্তো দ্ৱাদসপুৰিসো হত্থীতি তেন হত্থিনা তযো হত্থী. সেসেসুপি এসেৱ নযো. সেসং উয্যুত্তসেনাসিক্খাপদে ৱুত্তনযেনেৱ ৱেদিতব্বং সদ্ধিং সমুট্ঠানাদীহীতি.

উয্যোধিকসিক্খাপদং দসমং.

সমত্তো ৱণ্ণনাক্কমেন অচেলকৱগ্গো পঞ্চমো.