৮. ভূতাৰোচনসিক্খাপদৱণ্ণনা

৬৭. অট্ঠমসিক্খাপদে – ৱত্থুকথায তাৱ যং ৱত্তব্বং সিযা, তং সব্বং চতুত্থপাৰাজিকৱণ্ণনাযং ৱুত্তনযমেৱ. অযমেৱ হি ৱিসেসো – তত্থ অভূতং আৰোচেসুং, ইধ ভূতং. ভূতম্পি পুথুজ্জনা আৰোচেসুং, ন অৰিযা. অৰিযানঞ্হি পযুত্তৱাচা নাম নত্থি, অত্তনো গুণে আৰোচযমানে পন অঞ্ঞে ন পটিসেধেসুং, তথাউপ্পন্নে চ পচ্চযে সাদিযিংসু, তথাউপ্পন্নভাৱং অজানন্তা.

‘‘অথ খো তে ভিক্খূ ভগৱতো এতমত্থং আৰোচেসু’’ন্তিআদিম্হি পন যে উত্তৰিমনুস্সধম্মস্স ৱণ্ণং ভাসিংসু, তে আৰোচেসুন্তি ৱেদিতব্বং. ‘‘কচ্চি পন ৱো ভিক্খৱে ভূত’’ন্তি পুচ্ছিতে পন সব্বেপি ‘‘ভূতং ভগৱা’’তি পটিজানিংসু. অৰিযানম্পি হি অব্ভন্তৰে ভূতো উত্তৰিমনুস্সধম্মোতি. অথ ভগৱা অৰিযমিস্সকত্তা ‘‘মোঘপুৰিসা’’তি অৱত্ৱা ‘‘কথঞ্হি নাম তুম্হে ভিক্খৱে’’তি ৱত্ৱা ‘‘উদৰস্স কাৰণা’’তিআদিমাহ. তত্থ যস্মা অৰিযা অঞ্ঞেসং সুত্ৱা ‘‘অয্যো কিৰ, ভন্তে, সোতাপন্নো’’তিআদিনা নযেন পসন্নেহি মনুস্সেহি পুচ্ছিযমানা অপঞ্ঞত্তে সিক্খাপদে অনাদীনৱদস্সিনো সুদ্ধচিত্ততায অত্তনো চ পৰেসঞ্চ ৱিসেসাধিগমং পটিজানিংসু. এৱং পটিজানন্তেহি চ তেহি যং অঞ্ঞে উদৰস্স কাৰণা উত্তৰিমনুস্সধম্মস্স ৱণ্ণং ভাসিত্ৱা পিণ্ডপাতং উপ্পাদেসুং, তং সুদ্ধচিত্ততায সাদিযন্তেহিপি উদৰস্স কাৰণা উত্তৰিমনুস্সধম্মস্স ৱণ্ণো ভাসিতো ৱিয হোতি. তস্মা সব্বসঙ্গাহিকেনেৱ নযেন ‘‘কথঞ্হি নাম তুম্হে, ভিক্খৱে, উদৰস্স কাৰণা গিহীনং অঞ্ঞমঞ্ঞং উত্তৰিমনুস্সধম্মস্স ৱণ্ণং ভাসিস্সথা’’তি আহ. সেসং চতুত্থপাৰাজিকৱত্থুসদিসমেৱ. সিক্খাপদৱিভঙ্গেপি কেৱলং তত্থ পাৰাজিকঞ্চেৱ থুল্লচ্চযঞ্চ ইধ ভূতত্তা পাচিত্তিযঞ্চেৱ দুক্কটঞ্চ অযং ৱিসেসো. সেসং ৱুত্তনযমেৱ.

৭৭. ‘‘উপসম্পন্নস্স ভূতং আৰোচেতী’’তি উত্তৰিমনুস্সধম্মমেৱ সন্ধায ৱুত্তং. পৰিনিব্বানকালে হি অন্তৰা ৱা অতিকড্ঢিযমানেন উপসম্পন্নস্স ভূতং আৰোচেতুং ৱট্টতি. সুতপৰিযত্তিসীলগুণং পন অনুপসম্পন্নস্সাপি আৰোচেতুং ৱট্টতি. আদিকম্মিকস্স অনাপত্তি. ‘‘উম্মত্তকস্সা’’তি ইদং পন ইধ ন ৱুত্তং. কস্মা? দিট্ঠিসম্পন্নানং উম্মাদস্স ৱা চিত্তক্খেপস্স ৱা অভাৱাতি. মহাপচ্চৰিযম্পি হি ৱিচাৰিতং ‘‘ঝানলাভী পন পৰিহীনে ঝানে উম্মত্তকো ভৱেয্য, তস্সপি ভূতাৰোচনপচ্চযা অনাপত্তি ন ৱত্তব্বা, ভূতস্সেৱ অভাৱতো’’তি. সেসং উত্তানমেৱ.

ভূতাৰোচনং নামেতং পুব্বে অৱুত্তেহি তীহি সমুট্ঠানেহি সমুট্ঠাতি – কাযতো ৱাচতো কাযৱাচতো চাতি. কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, কুসলাব্যাকতচিত্তেহি দ্ৱিচিত্তং, সুখমজ্ঝত্তৱেদনাহি দ্ৱিৱেদনন্তি.

ভূতাৰোচনসিক্খাপদং অট্ঠমং.