৪. সমথক্খন্ধকং

সম্মুখাৱিনযকথা

১৮৬-১৮৭. সমথক্খন্ধকে – ‘‘অধম্মৱাদী পুগ্গলো’’তিআদীনি ছ মাতিকাপদানি নিক্খিপিত্ৱা ‘‘অধম্মৱাদী পুগ্গলো ধম্মৱাদিং পুগ্গলং সঞ্ঞাপেতী’’তিআদিনা নযেন ৱিত্থাৰো ৱুত্তো. তত্থ সঞ্ঞাপেতীতি কাৰণপতিৰূপকানি ৱত্ৱা পৰিতোসেত্ৱা জানাপেতি. নিজ্ঝাপেতীতি যথা সো তং অত্থং নিজ্ঝাযতি, ওলোকেতি; এৱং কৰোতি. পেক্খতি অনুপেক্খতীতি যথা সো তং অত্থং পেক্খতি চেৱ পুনপ্পুনঞ্চ পেক্খতি; এৱং কৰোতি. দস্সেতি অনুদস্সেতীতি তেসঞ্ঞেৱ পৰিযাযৱচনানি. অধম্মেন ৱূপসম্মতীতি যস্মা সো অধম্মমেৱ ‘‘অযং ধম্মো’’তিআদিনা নযেন মোহেত্ৱা দস্সেতি, তস্মা অধম্মেন ৱূপসম্মতি নাম.

১৮৮. ধম্মেন ৱূপসম্মতীতি যস্মা ধম্মৱাদী ধম্মমেৱ ‘‘অযং ধম্মো’’তিআদিনা নযেন অমোহেত্ৱা দস্সেতি, তস্মা ধম্মেন ৱূপসম্মতি নাম.

সম্মুখাৱিনযকথা নিট্ঠিতা.

সতিৱিনযকথা

১৯৫. পঞ্চিমানি ভিক্খৱে ধম্মিকানি সতিৱিনযস্স দানানীতি এত্থ সুদ্ধস্স অনাপত্তিকস্স দানং একং, অনুৱদিতস্স দানং একং, যাচিতস্স দানং একং, সঙ্ঘেন দানং একং, ধম্মেন সমগ্গদানং একন্তি এৱং পঞ্চ. এতানি পন একেকঅঙ্গৱসেন ন লব্ভন্তি, তস্মা দেসনামত্তমেৱেতং, পঞ্চঙ্গসমন্নাগতং পন সতিৱিনযদানং ধম্মিকন্তি অযমেত্থ অত্থো. তত্থ চ অনুৱদন্তীতি চোদেন্তি. সেসং উত্তানমেৱ. অযং পন সতিৱিনযো খীণাসৱস্সেৱ দাতব্বো ন অঞ্ঞস্স, অন্তমসো অনাগামিনোপি. সো চ খো অঞ্ঞেন চোদিযমানস্সেৱ, ন অচোদিযমানস্স. দিন্নে চ পন তস্মিং চোদকস্স কথা ন ৰুহতি. চোদেন্তোপি ‘‘অযং খীণাসৱো সতিৱিনযলদ্ধো, কো তুয্হং কথং গহেস্সতী’’তি অপসাদেতব্বতং আপজ্জতি.

সতিৱিনযকথা নিট্ঠিতা.

অমূড়্হৱিনযকথা

১৯৬. ভাসিতপৰিক্কন্তন্তি ৱাচায ভাসিতং কাযেন পৰিক্কন্তং; পৰিক্কমিত্ৱা কতন্তি অত্থো. সৰতাযস্মা এৱৰূপিং আপত্তিং আপজ্জিতাতি এত্থ সৰতু আযস্মা এৱৰূপিং আপত্তিং আপজ্জিতা; আযস্মা এৱৰূপিযা আপত্তিযাতি অযমত্থো. আপজ্জিত্ৱাতি ৱা পাঠো, তস্সত্থো – পঠমং আপজ্জিত্ৱা পচ্ছা তং আপত্তিং সৰতু আযস্মাতি.

অমূড়্হৱিনযকথা নিট্ঠিতা.

যেভুয্যসিকাকথা

২০২. যেভুয্যসিকায ৱূপসমেতুন্তি এত্থ যস্সা কিৰিযায ধম্মৱাদিনো বহুতৰা, এসা যেভুয্যসিকা নাম.

২০৪. অধম্মিকসলাকগ্গাহেসু ওৰমত্তকন্তি পৰিত্তং অপ্পমত্তকং ভণ্ডনমত্তমেৱ. ন চ গতিগতন্তি দ্ৱে তযো আৱাসে ন গতং, তত্থ তত্থেৱ ৱা দ্ৱত্তিক্খত্তুং অৱিনিচ্ছিতং. ন চ সৰিতসাৰিতন্তি দ্ৱত্তিক্খত্তুং তেহি ভিক্খূহি সযং সৰিতং ৱা অঞ্ঞেহি সাৰিতং ৱা ন হোতি. জানাতীতি সলাকং গাহেন্তো জানাতি ‘‘অধম্মৱাদী বহুতৰা’’তি. অপ্পেৱ নামাতি ইমিনা নীহাৰেন সলাকায গাহিযমানায ‘‘অপি নাম অধম্মৱাদিনো বহুতৰা অস্সূ’’তি অযমস্স অজ্ঝাসযো হোতি. অপৰেসুপি দ্ৱীসু এসেৱ নযো.

অধম্মেন গণ্হন্তীতি অধম্মৱাদিনো ‘‘এৱং মযং বহূ ভৱিস্সামা’’তি দ্ৱে দ্ৱে সলাকাযো গণ্হন্তি. ৱগ্গা গণ্হন্তীতি দ্ৱে ধম্মৱাদিনো একং ধম্মৱাদিসলাকং গণ্হন্তি ‘‘এৱং ধম্মৱাদিনো ন বহূ ভৱিস্সন্তী’’তি মঞ্ঞমানা. ন চ যথাদিট্ঠিযা গণ্হন্তীতি ধম্মৱাদিনো হুত্ৱা ‘‘বলৱপক্খং ভজিস্সামা’’তি অধম্মৱাদিসলাকং গণ্হন্তি. ধম্মিকসলাকগ্গাহেসু অযমেৱত্থো পৰিৱত্তেত্ৱা ৱেদিতব্বো. এৱং সলাকং গাহেত্ৱা সচে বহুতৰা ধম্মৱাদিনো হোন্তি; যথা তে ৱদন্তি, এৱং তং অধিকৰণং ৱূপসমেতব্বং, এৱং যেভুয্যসিকায ৱূপসন্তং হোতি. অযমেত্থ সঙ্খেপো. ৱিত্থাৰো পন পৰতোপি আগমিস্সতি.

যেভুয্যসিকাকথা নিট্ঠিতা.

তস্সপাপিযসিকাকথা

২০৭. অসুচীতি অসুচীহি কাযৱচীকম্মেহি সমন্নাগতো. অলজ্জীতি সঞ্চিচ্চ আপজ্জনাদিনা অলজ্জিলক্খণেন সমন্নাগতো. সানুৱাদোতি সউপৱাদো. ইতি ইমেসঞ্চ তিণ্ণং অঙ্গানং ৱসেন তীণি কৰণানি, সঙ্ঘেন কৰণং, ধম্মেন সমগ্গেন কৰণন্তি ইমানি চ দ্ৱেতি পঞ্চ তস্সপাপিযসিকাকম্মস্স কৰণানি নাম হোন্তি. সেসমেত্থ তজ্জনীযাদীসু ৱুত্তনযমেৱ. অযং পনেত্থ ৱচনত্থো – ইদঞ্হি যো পাপুস্সন্নতায পাপিযো পুগ্গলো, তস্স কত্তব্বতো ‘‘তস্সপাপিযসিকাকম্ম’’ন্তি ৱুচ্চতি.

তস্সপাপিযসিকাকথা নিট্ঠিতা.

তিণৱত্থাৰকাদিকথা

২১২. কক্খড়ত্তায ৱাড়ত্তাযাতি কক্খড়ভাৱায চেৱ ৱাড়ভাৱায চ. ভেদাযাতি সঙ্ঘভেদায. সব্বেহেৱ একজ্ঝন্তি কস্সচি ছন্দং অনাহৰিত্ৱা গিলানেপি তত্থেৱ আনেত্ৱা একতো সন্নিপতিতব্বং. তিণৱত্থাৰকেন ৱূপসমেয্যাতি এত্থ ইদং কম্মং তিণৱত্থাৰকসদিসত্তা ‘‘তিণৱত্থাৰকো’’তি ৱুত্তং. যথা হি গূথং ৱা মুত্তং ৱা ঘট্টিযমানং দুগ্গন্ধতায বাধতি, তিণেহি অৱত্থৰিত্ৱা সুপ্পটিচ্ছাদিতস্স পনস্স সো গন্ধো ন বাধতি; এৱমেৱ যং অধিকৰণং মূলানুমূলং গন্ত্ৱা ৱূপসমিযমানং কক্খড়ত্তায ৱাড়ত্তায ভেদায সংৱত্ততি, তং ইমিনা কম্মেন ৱূপসন্তং গূথং ৱিয তিণৱত্থাৰকেন পটিচ্ছন্নং সুৱূপসন্তং হোতীতি ইদং কম্মং তিণৱত্থাৰকসদিসত্তা ‘‘তিণৱত্থাৰকো’’তি ৱুত্তং.

২১৩. থুল্লৱজ্জন্তি পাৰাজিকঞ্চেৱ সঙ্ঘাদিসেসঞ্চ. গিহিপটিসংযুত্তন্তি গিহীনং হীনেন খুংসনৱম্ভনধম্মিকপটিস্সৱেসু আপন্নং আপত্তিং.

২১৪. এৱঞ্চ পন ভিক্খৱে তে ভিক্খূ তাহি আপত্তীহি ৱুট্ঠিতা হোন্তীতি এৱং তিণৱত্থাৰককম্মৱাচায কতায কম্মৱাচাপৰিযোসানে যত্তকা তত্থ সন্নিপতিতা অন্তমসো সুত্তাপি সমাপন্নাপি অঞ্ঞৱিহিতাপি সব্বে তে ভিক্খূ যাৱ উপসম্পদমণ্ডলতো পট্ঠায থুল্লৱজ্জঞ্চ গিহিপটিসংযুত্তঞ্চ ঠপেত্ৱা অৱসেসা আপত্তিযো আপন্না, সব্বাহি তাহি আপত্তীহি ৱুট্ঠিতা হোন্তি. যে পন ‘‘ন মেতং খমতী’’তি অঞ্ঞমঞ্ঞং দিট্ঠাৱিকম্মং কৰোন্তি, তেহি ৱা সদ্ধিং আপত্তিং আপজ্জিত্ৱাপি তত্থ অনাগতা, আগন্ত্ৱা ৱা ছন্দং দত্ৱা পৰিৱেণাদীসু নিসিন্না, তে আপত্তীহি ন ৱুট্ঠহন্তি. তেন ৱুত্তং – ‘‘ঠপেত্ৱা দিট্ঠাৱিকম্মং ঠপেত্ৱা যে ন তত্থ হোন্তী’’তি.

তিণৱত্থাৰকাদিকথা নিট্ঠিতা.

অধিকৰণকথা

২১৫. ভিক্খুনীনং অনুপখজ্জাতি ভিক্খুনীনং অন্তো পৱিসিত্ৱা. ৱিৱাদাধিকৰণাদীনং ৱচনত্থো দুট্ঠদোসৱণ্ণনাযং ৱুত্তোযেৱ. ৱিপচ্চতায ৱোহাৰোতি চিত্তদুক্খত্থং ৱোহাৰো; ফৰুসৱচনন্তি অত্থো. যো তত্থ অনুৱাদোতি যো তেসু অনুৱদন্তেসু উপৱাদো. অনুৱদনাতি আকাৰনিদস্সনমেতং; উপৱদনাতি অত্থো. অনুল্লপনা অনুভণনাতি উভযং অনুৱদনৱেৱচনমত্তমেৱ. অনুসম্পৱঙ্কতাতি পুনপ্পুনং কাযচিত্তৱাচাহি তত্থেৱ সম্পৱঙ্কতা; অনুৱদনভাৱোতি অত্থো. অব্ভুস্সহনতাতি ‘‘কস্মা এৱং ন উপৱদিস্সামি, উপৱদিস্সামিযেৱা’’তি উস্সাহং কত্ৱা অনুৱদনা. অনুবলপ্পদানন্তি পুৰিমৱচনস্স কাৰণং দস্সেত্ৱা পচ্ছিমৱচনেন বলপ্পদানং.

কিচ্চযতা কৰণীযতাতি এত্থ কিচ্চমেৱ কিচ্চযং, কিচ্চযস্স ভাৱো কিচ্চযতা, কৰণীযস্স ভাৱো কৰণীযতা; উভযম্পেতং সঙ্ঘকম্মস্সেৱ অধিৱচনং. অপলোকনকম্মন্তিআদি পন তস্সেৱ পভেদৱচনং. তত্থ অপলোকনকম্মং নাম সীমট্ঠকসঙ্ঘং সোধেত্ৱা ছন্দাৰহানং ছন্দং আহৰিত্ৱা সমগ্গস্স সঙ্ঘস্স অনুমতিযা তিক্খত্তুং সাৱেত্ৱা কত্তব্বকম্মং. ঞত্তিকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা কত্তব্বকম্মং. ঞত্তিদুতিযকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা একায চ অনুস্সাৱনাযাতি এৱং ঞত্তিদুতিযায অনুস্সাৱনায কত্তব্বকম্মং. ঞত্তিচতুত্থকম্মং নাম ৱুত্তনযেনেৱ সমগ্গস্স সঙ্ঘস্স অনুমতিযা একায ঞত্তিযা তীহি চ অনুস্সাৱনাহীতি এৱং ঞত্তিচতুত্থাহি তীহি অনুস্সাৱনাহি কত্তব্বকম্মং.

তত্থ অপলোকনকম্মং অপলোকেত্ৱাৱ কাতব্বং, ঞত্তিকম্মাদিৱসেন ন কাতব্বং. ঞত্তিকম্মম্পি একং ঞত্তিং ঠপেত্ৱাৱ কাতব্বং, অপলোকনকম্মাদিৱসেন ন কাতব্বং. ঞত্তিদুতিযকম্মং পন অপলোকেত্ৱা কত্তব্বম্পি অত্থি, অকত্তব্বম্পি অত্থি. তত্থ সীমাসম্মুতি সীমাসমূহননং কথিনদানং কথিনুব্ভাৰো কুটিৱত্থুদেসনা ৱিহাৰৱত্থুদেসনাতি ইমানি ছ কম্মানি গৰুকানি, অপলোকেত্ৱা কাতুং ন ৱট্টন্তি. ঞত্তিদুতিযকম্মৱাচং সাৱেত্ৱাৱ কাতব্বানি. অৱসেসা তেৰস সম্মুতিযো সেনাসনগ্গাহকমতকচীৱৰদানাদিসম্মুতিযো চাতি এৱৰূপানি লহুককম্মানি অপলোকেত্ৱাপি কাতুং ৱট্টন্তি. ঞত্তিকম্মঞত্তিচতুত্থকম্মৱসেন পন ন কাতব্বমেৱ. ঞত্তিচতুত্থকম্মং ঞত্তিঞ্চ তিস্সো চ কম্মৱাচাযো সাৱেত্ৱাৱ কাতব্বং, অপলোকনকম্মাদিৱসেন ন কাতব্বন্তি অযমেত্থ সঙ্খেপো.

ৱিত্থাৰতো পন ইমানি চত্তাৰি কম্মানি ‘‘কতিহাকাৰেহি ৱিপজ্জন্তী’’তিআদিনা নযেন পৰিৱাৰাৱসানে কম্মৱগ্গে এতেসং ৱিনিচ্ছযো আগতোযেৱ. যং পন তত্থ অনুত্তানং, তং কম্মৱগ্গেযেৱ ৱণ্ণযিস্সাম. এৱঞ্হি সতি ন অট্ঠানে ৱণ্ণনা ভৱিস্সতি, আদিতো পট্ঠায চ তস্স তস্স কম্মস্স ৱিঞ্ঞাতত্তা সুৱিঞ্ঞেয্যো ভৱিস্সতি.

২১৬. ৱিৱাদাধিকৰণস্স কিং মূলন্তিআদীনি পাড়িৱসেনেৱ ৱেদিতব্বানি.

২২০. ‘‘ৱিৱাদাধিকৰণং সিযা কুসল’’ন্তিআদীসু যেন ৱিৱদন্তি, সো চিত্তুপ্পাদো ৱিৱাদো, সমথেহি চ অধিকৰণীযতায অধিকৰণন্তি এৱমাদিনা নযেন অত্থো দট্ঠব্বো.

২২২. আপত্তাধিকৰণং সিযা অকুসলং সিযা অব্যাকতং, নত্থি আপত্তাধিকৰণং কুসলন্তি এত্থ সন্ধায ভাসিতৱসেন অত্থো ৱেদিতব্বো. যস্মিঞ্হি পথৱিখণনাদিকে আপত্তাধিকৰণে কুসলচিত্তং অঙ্গং হোতি, তস্মিং সতি ন সক্কা ৱত্তুং ‘‘নত্থি আপত্তাধিকৰণং কুসল’’ন্তি, তস্মা নযিদং অঙ্গপ্পহোনকচিত্তং সন্ধায ৱুত্তং. ইদং পন সন্ধায ৱুত্তং. যং তাৱ আপত্তাধিকৰণং লোকৱজ্জং, তং একন্ততো অকুসলমেৱ, তত্থ ‘‘সিযা অকুসল’’ন্তি ৱিকপ্পো নত্থি. যং পন পণ্ণত্তিৱজ্জং, তং যস্মা সঞ্চিচ্চ ‘‘ইমং আপত্তিং ৱীতিক্কমামী’’তি ৱীতিক্কমন্তস্সেৱ অকুসলং হোতি, অসঞ্চিচ্চ পন কিঞ্চি অজানন্তস্স সহসেয্যাদিৱসেন আপজ্জতো অব্যাকতং হোতি, তস্মা তত্থ সঞ্চিচ্চাসঞ্চিচ্চৱসেন ইমং ৱিকপ্পভাৱং সন্ধায ইদং ৱুত্তং – ‘‘আপত্তাধিকৰণং সিযা অকুসলং, সিযা অব্যাকতং, নত্থি আপত্তাধিকৰণং কুসল’’ন্তি.

সচে পন ‘‘যং কুসলচিত্তো আপজ্জতি, ইদং ৱুচ্চতি আপত্তাধিকৰণং কুসল’’ন্তি ৱদেয্য, অচিত্তকানং পন এড়কলোমপদসোধম্মাদিসমুট্ঠানানম্পি কুসলচিত্তং আপজ্জেয্য, ন চ তত্থ ৱিজ্জমানম্পি কুসলচিত্তং আপত্তিযা অঙ্গং. কাযৱচীৱিঞ্ঞত্তিৱসেন পন চলিতপ্পৱত্তানং কাযৱাচানং অঞ্ঞতৰমেৱ অঙ্গং, তঞ্চ ৰূপক্খন্ধপৰিযাপন্নত্তা অব্যাকতন্তি.

যং জানন্তোতিআদিম্হি পন অযমত্থো – যং চিত্তং আপত্তিযা অঙ্গং হোতি, তেন ৱত্থুং জানন্তো ‘‘ইদং ৱীতিক্কমামী’’তি চ ৱীতিক্কমাকাৰেন সদ্ধিং জানন্তো সঞ্জানন্তো ৱীতিক্কমচেতনাৱসেন চেতেত্ৱা পকপ্পেত্ৱা উপক্কমৱসেন মদ্দন্তো অভিৱিতৰিত্ৱা নিৰাসঙ্কচিত্তং পেসেত্ৱা যং আপত্তাধিকৰণং ৱীতিক্কমং আপজ্জতি, তস্স এৱং ৱীতিক্কমতো যো ৱীতিক্কমো, ইদং ৱুচ্চতি ‘‘আপত্তাধিকৰণং অকুসল’’ন্তি.

অব্যাকতৱাৰেপি যং চিত্তং আপত্তিযা অঙ্গং হোতি, তস্স অভাৱেন অজানন্তো ৱীতিক্কমাকাৰেন চ সদ্ধিং অজানন্তো অসঞ্জানন্তো আপত্তিঅঙ্গভূতায ৱীতিক্কমচেতনায অভাৱেন অচেতেত্ৱা সঞ্চিচ্চ মদ্দনস্স অভাৱেন অনভিৱিতৰিত্ৱা নিৰাসঙ্কচিত্তং অপেসেত্ৱা যং আপত্তাধিকৰণং ৱীতিক্কমং আপজ্জতি, তস্স এৱং ৱীতিক্কমতো যো ৱীতিক্কমো, ইদং ৱুচ্চতি ‘‘আপত্তাধিকৰণং অব্যাকত’’ন্তি.

২২৪. অযং ৱিৱাদো নো অধিকৰণন্তিআদীসু সমথেহি অধিকৰণীযতায অভাৱতো নোঅধিকৰণন্তি এৱমত্থো ৱেদিতব্বো.

অধিকৰণকথা নিট্ঠিতা.

অধিকৰণৱূপসমনসমথকথা

২২৮. যাৱতিকা চ ভিক্খূ কম্মপ্পত্তাতি এত্থ চতুৱগ্গকৰণে কম্মে চত্তাৰো, পঞ্চৱগ্গকৰণে পঞ্চ, দসৱগ্গকৰণে দস, ৱীসতিৱগ্গকৰণে ৱীসতি ভিক্খূ কম্মপ্পত্তাতি ৱেদিতব্বা.

২৩০. সুপৰিগ্গহিতন্তি সুট্ঠু পৰিগ্গহিতং কত্ৱা সম্পটিচ্ছিতব্বং. সম্পটিচ্ছিত্ৱা চ পন ‘‘অজ্জ ভণ্ডকং ধোৱাম, অজ্জ পত্তং পচাম, অজ্জেকো পলিবোধো অত্থী’’তি মাননিগ্গহত্থায কতিপাহং অতিক্কামেতব্বং.

২৩১. অনন্তানি চেৱ ভস্সানি জাযন্তীতি অপৰিমাণানি ইতো চিতো চ ৱচনানি উপ্পজ্জন্তি. ‘‘ভাসানী’’তিপি পাঠো, অযমেৱত্থো. উব্বাহিকায সম্মন্নিতব্বোতি অপলোকেত্ৱা ৱা সম্মন্নিতব্বো পৰতো ৱুত্তায ঞত্তিদুতিযায ৱা কম্মৱাচায. এৱং সম্মতেহি পন ভিক্খূহি ৱিসুং ৱা নিসীদিত্ৱা তস্সাযেৱ ৱা পৰিসায ‘‘অঞ্ঞেহি অসম্মতেহি ন কিঞ্চি কথেতব্ব’’ন্তি সাৱেত্ৱা তং অধিকৰণং ৱিনিচ্ছিতব্বং.

২৩৩. তত্ৰাস্সাতি তস্সং পৰিসতি ভৱেয্য. নেৱ সুত্তং আগতন্তি ন মাতিকা আগতা. নো সুত্তৱিভঙ্গোতি ৱিনযোপি ন পগুণো. ব্যঞ্জনচ্ছাযায অত্থং পটিবাহতীতি ব্যঞ্জনমত্তমেৱ গহেত্ৱা অত্থং পটিসেধেতি. জাতৰূপৰজতখেত্তৱত্থুপটিগ্গহণাদীসু ৱিনযধৰেহি ভিক্খূহি আপত্তিযা কাৰিযমানে দিস্ৱা ‘‘কিং ইমে আপত্তিযা কাৰেথ, ‘ননু জাতৰূপৰজতপটিগ্গহণা পটিৱিৰতো হোতী’তি এৱং সুত্তে পটিৱিৰতিমত্তমেৱ ৱুত্তং, নত্থি এত্থ আপত্তী’’তি ৱদতি. অপৰো ধম্মকথিকো সুত্তস্স আগতত্তা ওলম্বেত্ৱা নিৱাসেন্তানং আপত্তিযা আৰোপিযমানায ‘‘কিং ইমেসং আপত্তিং ৰোপেথ, ‘ননু পৰিমণ্ডলং নিৱাসেস্সামীতি সিক্খা কৰণীযা’তি এৱং সিক্খাকৰণমত্তমেৱেত্থ ৱুত্তং, নত্থি এত্থ আপত্তী’’তি ৱদতি.

২৩৪. যথা বহুতৰা ভিক্খূতি এত্থ একেনপি অধিকা বহুতৰাৱ কো পন ৱাদো দ্ৱীহি তীহীতি.

অধিকৰণৱূপসমনসমথকথা নিট্ঠিতা.

তিৱিধসলাকগ্গাহকথা

২৩৫. সঞ্ঞত্তিযাতি সঞ্ঞাপনত্থায. গূড়্হকন্তিআদীসু অলজ্জুস্সন্নায পৰিসায গূড়্হকো সলাকগ্গাহো কাতব্বো, লজ্জুস্সন্নায পৰিসায ৱিৱটকো, বালুস্সন্নায সকণ্ণজপ্পকো. ৱণ্ণাৱণ্ণাযো কত্ৱাতি ধম্মৱাদীনঞ্চ অধম্মৱাদীনঞ্চ সলাকাযো নিমিত্তসঞ্ঞং আৰোপেত্ৱা অঞ্ঞমঞ্ঞং ৱিসভাগা কাতব্বা. ততো তা সব্বাপি চীৱৰভোগে কত্ৱা ৱুত্তনযেন গাহেতব্বা. দুগ্গহোতি পচ্চুক্কড্ঢিতব্বন্তি ‘‘দুগ্গহিতা সলাকাযো’’তি ৱত্ৱা পুন গহেত্ৱা যাৱততিযং গাহেতব্বা. সুগ্গহোতি সাৱেতব্বন্তি একস্মিম্পি ধম্মৱাদিম্হি অতিৰেকজাতে ‘‘সুগ্গহিতা সলাকাযো’’তি সাৱেতব্বং. যথা চ তে ধম্মৱাদিনো ৱদন্তি তথা তং অধিকৰণং ৱূপসমেতব্বন্তি. অথ যাৱততিযম্পি অধম্মৱাদিনোৱ বহুতৰা হোন্তি, অজ্জ ‘‘অকালো, স্ৱে জানিস্সামা’’তি ৱুট্ঠহিত্ৱা অলজ্জীনং পক্খভেদত্থায ধম্মৱাদিপক্খং পৰিযেসিত্ৱা পুনদিৱসে সলাকগ্গাহো কাতব্বো. অযং গূড়্হকো সলাকগ্গাহো.

সকণ্ণজপ্পকে পন গহিতে ৱত্তব্বোতি এত্থ সচে সঙ্ঘত্থেৰো অধম্মৱাদিসলাকং গণ্হাতি, সো এৱং অৱবোধেতব্বো – ‘‘ভন্তে, তুম্হে মহল্লকা ৱযোঅনুপ্পত্তা, তুম্হাকং এতং ন যুত্তং, অযং পন ধম্মৱাদিসলাকা’’তি অস্স ইতৰা সলাকা দস্সেতব্বা. সচে সো তং গণ্হাতি, দাতব্বা. অথ নেৱ অৱবুজ্ঝতি, ততো ‘‘মা কস্সচি আৰোচেহী’’তি ৱত্তব্বো. সেসং ৱুত্তনযমেৱ. ৱিৱটকো ৱিৱটত্থোযেৱ.

তিৱিধসলাকগ্গাহকথা নিট্ঠিতা.

তস্সপাপিযসিকাৱিনযকথা

২৩৮. পাৰাজিকসামন্তং ৱাতি এত্থ মেথুনধম্মে পাৰাজিকসামন্তং নাম দুক্কটং হোতি. অদিন্নাদানাদীসু থুল্লচ্চযং. নিব্বেঠেন্তন্তি ‘‘ন সৰামী’’তি ৱচনেন নিব্বেঠযমানং. অতিৱেঠেতীতি ‘‘ইঙ্ঘাযস্মা’’তিআদিৱচনেহি অতিৱেঠিযতি. সৰামি খো অহং আৱুসোতি পাৰাজিকপটিচ্ছাদনত্থায এৱং পটিজানাতি. পুন তেন অতিৱেঠিযমানো ‘‘সৰামি খো’’তি পটিঞ্ঞং দত্ৱা ‘‘ইদানি মং নাসেস্সন্তী’’তি ভযেন ‘‘দৱায মে’’তিআদিমাহ. এতস্স তস্সপাপিযসিকাকম্মং কাতব্বং. সচে সীলৱা ভৱিস্সতি, ৱত্তং পৰিপূৰেত্ৱা পটিপ্পস্সদ্ধিং লভতি, নো চে তথা নাসিতকোৱ ভৱিস্সতি. সেসং সব্বত্থ উত্তানত্থমেৱাতি.

তস্সপাপিযসিকাৱিনযকথা নিট্ঠিতা.

সমথক্খন্ধকৱণ্ণনা নিট্ঠিতা.