১২. সত্তসতিকক্খন্ধকং

দসৱত্থুকথা

৪৪৬. সত্তসতিকক্খন্ধকে – ভিক্খগ্গেনাতি ভিক্খুঅগ্গেন, ভিক্খূ গণেত্ৱা তত্তকে পটিৱীসে ঠপেসুন্তি অত্থো. মহিযাতি হিমপাতসমযে হিমৱলাহকা.

৪৪৭. অৱিজ্জানিৱুটাতি অৱিজ্জাপটিচ্ছন্না. পোসাতি পুৰিসা. পিযৰূপং অভিনন্দন্তি পত্থেন্তীতি পিযৰূপাভিনন্দিনো. অৱিদ্দসূতি অৱিজানন্তা. ৰাগৰজেহি সৰজা. মগসদিসাতি মগা. সহ নেত্তিযাতি সনেত্তিকা. ৱড্ঢেন্তি কটসিন্তি পুনপ্পুনং কড়েৱৰং নিক্খিপমানা ভূমিং ৱড্ঢেন্তি. এৱং ৱড্ঢেন্তাৱ ঘোৰং আদিযন্তি পুনব্ভৱং.

৪৫৪. পাপকং নো আৱুসো কতন্তি আৱুসো অম্হেহি পাপকং কতন্তি অত্থো.

৪৫৫. কতমেন ত্ৱং ভূমি ৱিহাৰেনাতি এত্থ ভূমীতি পিযৱচনমেতং. পিযং ৱত্তুকামো কিৰ আযস্মা সব্বকামী নৱকে ভিক্খূ এৱং আমন্তেতি. কুল্লকৱিহাৰেনাতি উত্তানৱিহাৰেন.

৪৫৭. সাৱত্থিযা সুত্তৱিভঙ্গেতি কথং সুত্তৱিভঙ্গে পটিক্খিত্তং হোতি? তত্ৰ হি ‘‘সন্নিধি নাম অজ্জ পটিগ্গহিতং অপৰজ্জূ’’তি ৱত্ৱা পুন ‘‘সন্নিধিকাৰকে অসন্নিধিকাৰকসঞ্ঞী খাদনীযং ৱা ভোজনীযং ৱা খাদতি ৱা ভুঞ্জতি ৱা আপত্তি পাচিত্তিযস্সা’’তি আপত্তিং ৱদন্তেন পটিক্খিত্তং হোতি. তত্ৰেকে মঞ্ঞন্তি ‘‘যো পন ভিক্খু সন্নিধিকাৰকং খাদনীযং ৱা ভোজনীযং ৱা’’তি হি ৱুত্তং, ইদঞ্চ লোণং নাম যাৱজীৱিকত্তা সন্নিধিভাৱং নাপজ্জতি. যম্পি অলোণকং আমিসং পটিগ্গহেত্ৱা তেন সদ্ধিং পৰিভুঞ্জতি, তং তদহুপটিগ্গহিতমেৱ, তস্মা ‘‘‘যাৱকালিকেন, ভিক্খৱে, যাৱজীৱিকং তদহুপটিগ্গহিতং কালে কপ্পতি, ৱিকালে ন কপ্পতী’তি ৱচনতো দুক্কটেনেত্থ ভৱিতব্ব’’ন্তি. তে ৱত্তব্বা – ‘‘তুম্হাকং মতেন দুক্কটেনপি ন ভৱিতব্বং, ন হি এত্থ যাৱজীৱিকং তদহুপটিগ্গহিতং, যাৱকালিকমেৱ তদহুপটিগ্গহিতং, ন চ তং ৱিকালে পৰিভুত্তং. যদি ৱা ‘‘ৱিকালে ন কপ্পতী’’তি ৱচনেন তুম্হে দুক্কটং মঞ্ঞেথ, যাৱজীৱিকমিস্সং যাৱকালিকং ৱিকালে ভুঞ্জন্তস্স ৱিকালভোজনপাচিত্তিযং ন ভৱেয্য. তস্মা ন ব্যঞ্জনমত্তং গহেতব্বং, অত্থো উপপৰিক্খিতব্বো.

অযঞ্হেত্থ অত্থো – যাৱকালিকেন যাৱজীৱিকং তদহুপটিগ্গহিতং যদি সম্ভিন্নৰসং হোতি, যাৱকালিকগতিকমেৱ হোতি. তস্মা ‘‘যো পন ভিক্খু ৱিকালে খাদনীযং ৱা ভোজনীযং ৱা’’তি ইমিনা সিক্খাপদেন কালে কপ্পতি, ৱিকালে ন কপ্পতি. ন ইধ ‘‘ন কপ্পতী’’তি ৱচনমত্তেনেত্থ দুক্কটং হোতি. যথেৱ যাৱজীৱিকং তদহুপটিগ্গহিতং যাৱকালিকেন সম্ভিন্নৰসং ৱিকালে ন কপ্পতি, ৱিকালভোজনপাচিত্তিযাৱহং হোতি. এৱং অজ্জ পটিগ্গহিতম্পি অপৰজ্জু যাৱকালিকেন সম্ভিন্নৰসং ন কপ্পতি, সন্নিধিভোজনপাচিত্তিযাৱহং হোতি. তং ‘‘সন্নিধিকতং ইদ’’ন্তি অজানন্তোপি ন মুচ্চতি. ৱুত্তঞ্হেতং – ‘‘সন্নিধিকাৰকে অসন্নিধিকাৰকসঞ্ঞী খাদনীযং ৱা ভোজনীযং ৱা খাদতি ৱা ভুঞ্জতি ৱা আপত্তি পাচিত্তিযস্সা’’তি. তস্মা ‘‘কত্থ পটিক্খিত্ত’’ন্তি ইমিস্সা পুচ্ছায ‘‘পৰিসুদ্ধমিদং ব্যাকৰণং সাৱত্থিযা সুত্তৱিভঙ্গে’’তি.

ৰাজগহে উপোসথসংযুত্তেতি ইদং ‘‘ন ভিক্খৱে একস্মিং আৱাসে দ্ৱে উপোসথাগাৰানি সম্মন্নিতব্বানি; যো সম্মন্নেয্য, আপত্তি দুক্কটস্সা’’তি এতং সন্ধায ৱুত্তং. ৱিনযাতিসাৰে দুক্কটন্তি ‘‘ন ভিক্খৱে একস্মিং আৱাসে দ্ৱে উপোসথাগাৰানি সম্মন্নিতব্বানী’’তি এতস্স ৱিনযস্স অতিসাৰে দুক্কটং. চম্পেয্যকে ৱিনযৱত্থুস্মিন্তি ইদং ‘‘অধম্মেন চে ভিক্খৱে ৱগ্গকম্মং, অকম্মং ন চ কৰণীয’’ন্তি এৱমাদিং কত্ৱা চম্পেয্যক্খন্ধকে আগতং ৱিনযৱত্থুং সন্ধায ৱুত্তং.

একচ্চো কপ্পতীতি ইদং ধম্মিকং আচিণ্ণং সন্ধায ৱুত্তং. ছেদনকে পাচিত্তিযন্তি সুত্তৱিভঙ্গে হি ‘‘নিসীদনং নাম সদসং ৱুচ্চতী’’তি আগতং, তস্মা দ্ৱিন্নং সুগতৱিদত্থীনং উপৰি দসাযেৱ ৱিদত্থিমত্তা লব্ভতি. দসায ৱিনা তং পমাণং কৰোন্তস্স ইদং আগতমেৱ হোতি – ‘‘তং অতিক্কামযতো ছেদনকং পাচিত্তিয’’ন্তি. তস্মা ‘‘কিং আপজ্জতী’’তি পুট্ঠো ‘‘ছেদনকে পাচিত্তিয’’ন্তি আহ. ছেদনকসিক্খাপদে ৱুত্তপাচিত্তিযং আপজ্জতীতি অত্থো. সেসং সব্বত্থ উত্তানমেৱাতি.

দসৱত্থুকথা নিট্ঠিতা.

সমন্তপাসাদিকায ৱিনযসংৱণ্ণনায

সত্তসতিকক্খন্ধকৱণ্ণনা নিট্ঠিতা.

দ্ৱিৱগ্গসঙ্গহা ৱুত্তা, দ্ৱাৱীসতিপভেদনা;

খন্ধকা সাসনে পঞ্চক্খন্ধদুক্খপ্পহাযিনো.

যা তেসং ৱণ্ণনা এসা, অন্তৰাযং ৱিনা যথা;

সিদ্ধা সিজ্ঝন্তু কল্যাণা, এৱং আসাপি পাণিনন্তি.

চূড়ৱগ্গ-অট্ঠকথা নিট্ঠিতা.