৩. অযোগুড়ৱগ্গো

২. অযোগুড়সুত্তৱণ্ণনা

৮৩৪. ততিযৱগ্গস্স দুতিযে ইমিনা চাতুমহাভূতিকেনাতি ইমিনা চতুমহাভূতমযেন এৱং ভাৰিকেন গৰুকেন সমানেনাপি. ওমাতীতি পহোতি সক্কোতি, ইদং তেপিটকে বুদ্ধৱচনে অসম্ভিন্নপদং. কাযম্পি চিত্তে সমোদহতীতি কাযং গহেত্ৱা চিত্তে আৰোপেতি, চিত্তসন্নিস্সিতং কৰোতি, চিত্তগতিযা পেসেতি. চিত্তং নাম মহগ্গতচিত্তং, চিত্তগতিগমনং লহুকং হোতি. চিত্তম্পি কাযে সমোদহতীতি চিত্তং গহেত্ৱা কাযে আৰোপেতি, কাযসন্নিস্সিতং কৰোতি, কাযগতিযা পেসেতি, কাযো নাম কৰজকাযো, কাযগতিগমনং দন্ধং হোতি. সুখসঞ্ঞঞ্চ লহুসঞ্ঞঞ্চাতি অভিঞ্ঞাচিত্তসহজাতসঞ্ঞা. সা হি সন্তসুখসমন্নাগতত্তা সুখসঞ্ঞা নাম হোতি, কিলেসদন্ধাযিতত্তস্স চ অভাৱা লহুসঞ্ঞা নাম.

অযোগুড়ো দিৱসং সন্তত্তো লহুতৰো চেৱ হোতীতি সো হি দ্ৱীহি তীহি জনেহি উক্খিপিত্ৱা কম্মাৰুদ্ধনে পক্খিত্তোপি দিৱসং পচ্চমানো ৱিৱৰানুপৱিট্ঠেন তেজেন চেৱ ৱাযেন চ ৱাযোসহগতো চ উস্মাসহগতো চ তেজোসহগতো চ হুত্ৱা এৱং লহুকো হোতি, যথা নং কম্মাৰো মহাসণ্ডাসেন গহেত্ৱা একতো পৰিৱত্তেতি উক্খিপতি বহি নীহৰতি. এৱং পন মুদু চ হোতি কম্মনিযো চ. যথা নং সো খণ্ডং খণ্ডং ৱিচ্ছিন্দতি, কূটেন হনন্তো দীঘচতুৰস্সাদিভেদং কৰোতি. ইমস্মিং সুত্তে ৱিকুব্বনিদ্ধি কথিতা.

৩-১০. ভিক্খুসুত্তাদিৱণ্ণনা

৮৩৫-৮৪২. ততিযে ৱিৱট্টপাদকিদ্ধি কথিতা, তথা চতুত্থে. অপিচ দ্ৱে ফলানি আদিং কত্ৱা হেট্ঠা মিস্সকিদ্ধিপাদা কথিতা, সত্তসু ফলেসু পুব্বভাগা. সত্তমাদীনি চত্তাৰি হেট্ঠা কথিতনযানেৱ.

১১-১২. মোগ্গল্লানসুত্তাদিৱণ্ণনা

৮৪৩-৮৪৪. একাদসমদ্ৱাদসমেসু ছ অভিঞ্ঞা কথিতা. সেসং সব্বত্থ উত্তানত্থমেৱাতি.

ইদ্ধিপাদসংযুত্তৱণ্ণনা নিট্ঠিতা.