৬. পাতিমোক্খসংৱৰসুত্তৱণ্ণনা

৪১২. ছট্ঠে পাতিমোক্খসংৱৰসংৱুতোতি চতুন্নং সীলানং জেট্ঠকসীলং দস্সেন্তো এৱমাহ. তিপিটকচূড়নাগত্থেৰো পনাহ – ‘‘পাতিমোক্খসংৱৰোৱ সীলং, ইতৰানি তীণি সীলন্তি ৱুত্তট্ঠানং নাম নত্থী’’তি. ৱত্ৱা তং অনুজানন্তো আহ – ‘‘ইন্দ্ৰিযসংৱৰো নাম ছদ্ৱাৰৰক্খণমত্তমেৱ, আজীৱপাৰিসুদ্ধি ধম্মেনেৱ সমেন পচ্চযুপ্পত্তিমত্তকং, পচ্চযসন্নিস্সিতং পটিলদ্ধপচ্চযে ইদমত্থন্তি পচ্চৱেক্খিত্ৱা পৰিভুঞ্জনমত্তকং. নিপ্পৰিযাযেন পাতিমোক্খসংৱৰোৱ সীলং. যস্স সো ভিন্নো, অযং ছিন্নসীসো ৱিয পুৰিসো হত্থপাদে, সেসানি ৰক্খিস্সতীতি ন ৱত্তব্বো. যস্স পন সো অৰোগো, অযং অচ্ছিন্নসীসো ৱিয পুৰিসো জীৱিতং, সেসানি পুন পাকতিকানি কত্ৱা ৰক্খিতুম্পি সক্কোতী’’তি. তস্মা পাতিমোক্খসংৱৰোৱ সীলং, তেন পাতিমোক্খসংৱৰেন সংৱুতোতি পাতিমোক্খসংৱৰসংৱুতো, উপেতো সমন্নাগতোতি অত্থো.

আচাৰগোচৰসম্পন্নোতি আচাৰেন চ গোচৰেন চ সম্পন্নো. অণুমত্তেসূতি অপ্পমত্তকেসু. ৱজ্জেসূতি অকুসলধম্মেসু. ভযদস্সাৱীতি ভযদস্সী. সমাদাযাতি সম্মা আদিযিত্ৱা. সিক্খস্সু সিক্খাপদেসূতি সিক্খাপদেসু তং তং সিক্খাপদং সমাদিযিত্ৱা সিক্খ, যং যং পন কিঞ্চি সিক্খাপদেসু সিক্খাকোট্ঠাসেসু সিক্খিতব্বং কাযিকং ৱা ৱাচসিকং ৱা, তং তং সব্বং সম্মা আদায সিক্খস্সূতি অযমেত্থ সঙ্খেপত্থো. ৱিত্থাৰো পন ৱিসুদ্ধিমগ্গে (ৱিসুদ্ধি. ১.১৪) ৱুত্তো. ইতি ইমস্মিং সুত্তে পাতিমোক্খসংৱৰসীলমেৱ কথিতং.