৬-৭. তণ্হক্খযসুত্তাদিৱণ্ণনা

২০৭-২০৮. ছট্ঠে এতদৱোচাতি ‘‘ইমিস্সং পৰিসতি নিসিন্নো উদাযিত্থেৰো নাম অনুসন্ধিকুসলো ভিক্খু অত্থি, সো মং পুচ্ছিস্সতীতি ভগৱতা ওসাপিতদেসনং ঞত্ৱা দেসনানুসন্ধিং ঘটেস্সামী’’তি পুচ্ছন্তো এতং অৱোচ. ৱিপুলন্তিআদি সব্বং সুভাৱিতত্তং সন্ধায ৱুত্তং. সুভাৱিতো হি সতিসম্বোজ্ঝঙ্গো ৱিপুলো চ মহগ্গতো চ অপ্পমাণো চ অব্যাপজ্জো চ নাম হোতি. সো হি পত্থটত্তা ৱিপুলো, মহন্তভাৱং গতত্তা মহগ্গতো, ৱড্ঢিপমাণত্তা অপ্পমাণো, নীৱৰণানং দূৰীভাৱেন ব্যাপাদৰহিতত্তা অব্যাপজ্ঝো নাম হোতি. তণ্হায পহানা কম্মং পহীযতীতি যং তণ্হামূলকং কম্মং উপ্পজ্জেয্য, তং তণ্হাপহানেন পহীযতি. কম্মস্স পহানা দুক্খন্তি যম্পি কম্মমূলকং ৱট্টদুক্খং উপ্পজ্জেয্য, তং কম্মপহানেন পহীযতি. তণ্হক্খযাদযো তণ্হাদীনংযেৱ খযা, অত্থতো পনেতেহি নিব্বানং কথিতন্তি ৱেদিতব্বং. সত্তমং উত্তানমেৱ.