৩. বলৱগ্গো

১. ৱিসাৰদসুত্তৱণ্ণনা

৩০৪. দসমে ৰূপবলন্তিআদীসু ৰূপসম্পত্তি ৰূপবলং, ভোগসম্পত্তি ভোগবলং, ঞাতিসম্পত্তি ঞাতিবলং, পুত্তসম্পত্তি পুত্তবলং, সীলসম্পত্তি সীলবলং. পঞ্চসীলদসসীলানি অখণ্ডানি কত্ৱা ৰক্খন্তস্স হি সীলসম্পত্তিযেৱ সীলবলং নাম হোতি. ইমানি খো ভিক্খৱে পঞ্চ বলানীতি ইমানি পঞ্চ উপত্থম্ভনট্ঠেন বলানি নাম ৱুচ্চন্তি.

২-১০. পসয্হসুত্তাদিৱণ্ণনা

৩০৫-৩১৩. পসয্হাতি অভিভৱিত্ৱা. অভিভুয্য ৱত্ততীতি অভিভৱতি অজ্ঝোত্থৰতি. নেৱ ৰূপবলং তাযতীতি নেৱ ৰূপবলং তাযিতুং ৰক্খিতুং সক্কোতি. নাসেন্তেৱ নং, কুলে ন ৱাসেন্তীতি ‘‘দুস্সীলা সংভিন্নাচাৰা অতিক্কন্তমৰিযাদা’’তি গীৱাযং গহেত্ৱা নীহৰন্তি, ন তস্মিং কুলে ৱাসেন্তি. ৱাসেন্তেৱ নং কুলে, ন নাসেন্তীতি ‘‘কিং ৰূপেন ভোগাদীহি ৱা, পৰিসুদ্ধসীলা এসা আচাৰসম্পন্না’’তি ঞত্ৱা ঞাতকা তস্মিং কুলে ৱাসেন্তিযেৱ, ন নাসেন্তি. সেসং সব্বত্থ উত্তানত্থমেৱাতি.

মাতুগামসংযুত্তৱণ্ণনা নিট্ঠিতা.