৪. জম্বুখাদকসংযুত্তং

১. নিব্বানপঞ্হাসুত্তৱণ্ণনা

৩১৪. জম্বুখাদকসংযুত্তে জম্বুখাদকো পৰিব্বাজকোতি এৱংনামো থেৰস্স ভাগিনেয্যো ছন্নপৰিব্বাজকো. যো খো আৱুসো ৰাগক্খযোতি নিব্বানং আগম্ম ৰাগো খীযতি, তস্মা নিব্বানং ৰাগক্খযোতি ৱুচ্চতি. দোসমোহক্খযেসুপি এসেৱ নযো.

যো পন ইমিনাৱ সুত্তেন কিলেসক্খযমত্তং নিব্বানন্তি ৱদেয্য, সো ৱত্তব্বো ‘‘কস্স কিলেসানং খযো, কিং অত্তনো, উদাহু পৰেস’’ন্তি? অদ্ধা ‘‘অত্তনো’’তি ৱক্খতি. ততো পুচ্ছিতব্বো ‘‘গোত্ৰভুঞাণস্স কিং আৰম্মণ’’ন্তি? জানমানো ‘‘নিব্বান’’ন্তি ৱক্খতি. কিং পন গোত্ৰভুঞাণক্খণে কিলেসা খীণা খীযন্তি খীযিস্সন্তীতি? ‘‘খীণা’’তি ৱা ‘‘খীযন্তী’’তি ৱা ন ৱত্তব্বা, ‘‘খীযিস্সন্তী’’তি পন ৱত্তব্বাতি. কিং পন তেসু অখীণেসুযেৱ কিলেসেসু গোত্ৰভুঞাণং কিলেসক্খযং আৰম্মণং কৰোতীতি? অদ্ধা এৱং ৱুত্তে নিৰুত্তৰো ভৱিস্সতি.

মগ্গঞাণেনাপি চেতং যোজেতব্বং. মগ্গক্খণেপি হি কিলেসা ‘‘খীণা’’তি ৱা ‘‘খীযিস্সন্তী’’তি ৱা ন ৱত্তব্বা, ‘‘খীযন্তী’’তি পন ৱত্তব্বা, ন চ অখীণেসুযেৱ কিলেসেসু কিলেসক্খযো আৰম্মণং হোতি, তস্মা সম্পটিচ্ছিতব্বমেতং. যং আগম্ম ৰাগাদযো খীযন্তি, তং নিব্বানং. তং পনেতং ‘‘ৰূপিনো ধম্মা অৰূপিনো ধম্মা’’তিআদীসু (ধ. স. দুকমাতিকা ১১) দুকেসু অৰূপিনো ধম্মাতি সঙ্গহিতত্তা ন কিলেসক্খযমত্তমেৱাতি.

২. অৰহত্তপঞ্হাসুত্তৱণ্ণনা

৩১৫. অৰহত্তপঞ্হব্যাকৰণে যস্মা অৰহত্তং ৰাগদোসমোহানং খীণন্তে উপ্পজ্জতি, তস্মা ‘‘ৰাগক্খযো দোসক্খযো মোহক্খযো’’তি ৱুত্তং.

৩-১৫. ধম্মৱাদীপঞ্হাসুত্তাদিৱণ্ণনা

৩১৬-৩২৮. তে লোকে সুগতাতি তে ৰাগাদযো পহায গতত্তা সুট্ঠু গতাতি সুগতা. দুক্খস্স খো আৱুসো পৰিঞ্ঞত্থন্তি ৱট্টদুক্খস্স পৰিজাননত্থং. দুক্খতাতি দুক্খসভাৱো. দুক্খদুক্খতাতিআদীসু দুক্খসঙ্খাতো দুক্খসভাৱো দুক্খদুক্খতা. সেসপদদ্ৱযেপি এসেৱ নযো.

১৬. দুক্কৰপঞ্হাসুত্তৱণ্ণনা

৩২৯. অভিৰতীতি পব্বজ্জায অনুক্কণ্ঠনতা. নচিৰং আৱুসোতি আৱুসো ধম্মানুধম্মপ্পটিপন্নো ভিক্খু ‘‘পাতো অনুসিট্ঠো সাযং ৱিসেসমধিগমিস্সতি, সাযং অনুসিট্ঠো পাতো ৱিসেসমধিগমিস্সতী’’তি (ম. নি. ২.৩৪৫) ৱুত্তত্তা ঘটেন্তো ৱাযমন্তো নচিৰস্সং লহুযেৱ অৰহং অস্স, অৰহত্তে পতিট্ঠহেয্যাতি দস্সেতি. সেসং সব্বত্থ উত্তানত্থমেৱাতি.

জম্বুখাদকসংযুত্তৱণ্ণনা নিট্ঠিতা.