৩. মাতুগামসংযুত্তং

১. পঠমপেয্যালৱগ্গো

১-২. মাতুগামসুত্তাদিৱণ্ণনা

২৮০-২৮১. মাতুগামসংযুত্তস্স পঠমে অঙ্গেহীতি অগুণঙ্গেহি. ন চ ৰূপৱাতি ন ৰূপসম্পন্নো ৱিৰূপো দুদ্দসিকো. ন চ ভোগৱাতি ন ভোগসম্পন্নো নিদ্ধনো. ন চ সীলৱাতি ন সীলসম্পন্নো দুস্সীলো. অলসো চাতি কন্তনপচনাদীনি কম্মানি কাতুং ন সক্কোতি, কুসীতো আলসিযো নিসিন্নট্ঠানে নিসিন্নোৱ, ঠিতঠানে ঠিতোৱ নিদ্দাযতি এৱ. পজঞ্চস্স ন লভতীতি অস্স পুৰিসস্স কুলৱংসপতিট্ঠাপকং পুত্তং ন লভতি, ৱঞ্ঝিত্থী নাম হোতি. সুক্কপক্খো ৱুত্তৱিপৰিযাযেন ৱেদিতব্বো. দুতিযং পঠমে ৱুত্তনযেনেৱ পৰিৱত্তেতব্বং.

৩. আৱেণিকদুক্খসুত্তৱণ্ণনা

২৮২. ততিযে আৱেণিকানীতি পাটিপুগ্গলিকানি পুৰিসেহি অসাধাৰণানি. পাৰিচৰিযন্তি পৰিচাৰিকভাৱং.

৪. তীহিধম্মেহিসুত্তাদিৱণ্ণনা

২৮৩-৩০৩. চতুত্থে মচ্ছেৰমলপৰিযুট্ঠিতেনাতি পুব্বণ্হসমযস্মিঞ্হি মাতুগামো খীৰদধিসঙ্গোপনৰন্ধনপচনাদীনি কাতুং আৰদ্ধো, পুত্তকেহিপি যাচিযমানো কিঞ্চি দাতুং ন ইচ্ছতি. তেনেতং ৱুত্তং ‘‘পুব্বণ্হসমযং মচ্ছেৰমলপৰিযুট্ঠিতেন চেতসা’’তি. মজ্ঝন্হিকসমযে পন মাতুগামো কোধাভিভূতোৱ হোতি, অন্তোঘৰে কলহং অলভন্তো পটিৱিস্সকঘৰম্পি গন্ত্ৱা কলহং কৰোতি, সামিকস্স চ ঠিতনিসিন্নট্ঠানানি ৱিলোকেন্তো ৱিচৰতি. তেন ৱুত্তং ‘‘মজ্ঝন্হিকসমযং ইস্সাপৰিযুট্ঠিতেন চেতসা’’তি. সাযন্হে পনস্সা অসদ্ধম্মপটিসেৱনায চিত্তং নমতি. তেন ৱুত্তং ‘‘সাযন্হসমযং কামৰাগপৰিযুট্ঠিতেন চেতসা’’তি. পঞ্চমাদীনি উত্তানত্থানেৱ.

৩. বলৱগ্গো

১. ৱিসাৰদসুত্তৱণ্ণনা

৩০৪. দসমে ৰূপবলন্তিআদীসু ৰূপসম্পত্তি ৰূপবলং, ভোগসম্পত্তি ভোগবলং, ঞাতিসম্পত্তি ঞাতিবলং, পুত্তসম্পত্তি পুত্তবলং, সীলসম্পত্তি সীলবলং. পঞ্চসীলদসসীলানি অখণ্ডানি কত্ৱা ৰক্খন্তস্স হি সীলসম্পত্তিযেৱ সীলবলং নাম হোতি. ইমানি খো ভিক্খৱে পঞ্চ বলানীতি ইমানি পঞ্চ উপত্থম্ভনট্ঠেন বলানি নাম ৱুচ্চন্তি.

২-১০. পসয্হসুত্তাদিৱণ্ণনা

৩০৫-৩১৩. পসয্হাতি অভিভৱিত্ৱা. অভিভুয্য ৱত্ততীতি অভিভৱতি অজ্ঝোত্থৰতি. নেৱ ৰূপবলং তাযতীতি নেৱ ৰূপবলং তাযিতুং ৰক্খিতুং সক্কোতি. নাসেন্তেৱ নং, কুলে ন ৱাসেন্তীতি ‘‘দুস্সীলা সংভিন্নাচাৰা অতিক্কন্তমৰিযাদা’’তি গীৱাযং গহেত্ৱা নীহৰন্তি, ন তস্মিং কুলে ৱাসেন্তি. ৱাসেন্তেৱ নং কুলে, ন নাসেন্তীতি ‘‘কিং ৰূপেন ভোগাদীহি ৱা, পৰিসুদ্ধসীলা এসা আচাৰসম্পন্না’’তি ঞত্ৱা ঞাতকা তস্মিং কুলে ৱাসেন্তিযেৱ, ন নাসেন্তি. সেসং সব্বত্থ উত্তানত্থমেৱাতি.

মাতুগামসংযুত্তৱণ্ণনা নিট্ঠিতা.