১০. ছপ্পাণকোপমসুত্তৱণ্ণনা

২৪৭. দসমে অৰুগত্তোতি ৱণসৰীৰো. তেসংযেৱ অৰূনং পক্কত্তা পক্কগত্তো. সৰৱনন্তি কণ্ডৱনং. এৱমেৱ খোতি অৰুগত্তো পুৰিসো ৱিয দুস্সীলপুগ্গলো ৱেদিতব্বো. তস্স কুসকণ্টকেহি ৱিদ্ধস্স সৰপত্তেহি চ অসিধাৰূপমেহি ৱিলিখিতগত্তস্স ভিয্যোসোমত্তায দুক্খদোমনস্সং ৱিয তত্থ তত্থ সব্ৰহ্মচাৰীহি ‘‘অযং সো ইমেসঞ্চ ইমেসঞ্চ কম্মানং কাৰকো’’তি ৱুচ্চমানস্স উপ্পজ্জনদুক্খং ৱেদিতব্বং.

লভতি ৱত্তাৰন্তি লভতি চোদকং. এৱংকাৰীতি এৱৰূপানং ৱেজ্জকম্মদূতকম্মাদীনং কাৰকো. এৱংসমাচাৰোতি ৱিধৱা গোচৰাদিৱসেন এৱৰূপগোচৰো. অসুচিগামকণ্টকোতি অসুদ্ধট্ঠেন অসুচি, গামৱাসীনং ৱিজ্ঝনট্ঠেন কণ্টকোতি গামকণ্টকো.

পক্খিন্তি হত্থিসোণ্ডসকুণং. ওস্সজ্জেয্যাতি ৱিস্সজ্জেয্য. আৱিঞ্ছেয্যুন্তি আকড্ঢেয্যুং. পৱেক্খামীতি পৱিসিস্সামি. আকাসং ডেস্সামীতি আকাসং উপ্পতিস্সামি.

এতেসু পন অহি ‘‘ভোগেহি মণ্ডলং বন্ধিত্ৱা সুপিস্সামী’’তি ৱম্মিকং পৱিসিতুকামো হোতি. সুসুমাৰো ‘‘দূৰে বিলং পৱিসিত্ৱা নিপজ্জিস্সামী’’তি উদকং পৱিসিতুকামো হোতি. পক্খী ‘‘অজটাকাসে সুখং ৱিচৰিস্সামী’’তি আকাসং ডেতুকামো হোতি. কুক্কুৰো ‘‘উদ্ধনট্ঠানে ছাৰিকং ব্যূহিত্ৱা উসুমং গণ্হন্তো নিপজ্জিস্সামী’’তি গামং পৱিসিতুকামো হোতি. সিঙ্গালো ‘‘মনুস্সমংসং খাদিত্ৱা পিট্ঠিং পসাৰেত্ৱা সযিস্সামী’’তি আমকসুসানং পৱিসিতুকামো হোতি. মক্কটো ‘‘উচ্চে ৰুক্খে অভিৰুহিত্ৱা দিসাদিসং পক্খন্দিস্সামী’’তি ৱনং পৱিসিতুকামো হোতি.

অনুৱিধাযেয্যুন্তি অনুগচ্ছেয্যুং, অনুৱিধিযেয্যুন্তিপি পাঠো, অনুৱিধানং আপজ্জেয্যুন্তি অত্থো. যত্থ সো যাতি, তত্থেৱ গচ্ছেয্যুন্তি ৱুত্তং হোতি. এৱমেৱাতি এত্থ ছ পাণকা ৱিয ছাযতনানি দট্ঠব্বানি, দড়্হৰজ্জু ৱিয তণ্হা, মজ্ঝে গণ্ঠি ৱিয অৱিজ্জা. যস্মিং যস্মিং দ্ৱাৰে আৰম্মণং বলৱং হোতি, তং তং আযতনং তস্মিং তস্মিং আৰম্মণে আৱিঞ্ছতি.

ইমং পন উপমং ভগৱা সৰিক্খকেন ৱা আহৰেয্য আযতনানং ৱা নানত্তদস্সনৱসেন. তত্থ সৰিক্খকেন তাৱ ৱিসুং অপ্পনাকিচ্চং নত্থি, পাড়িযংযেৱ অপ্পিতা. আযতনানং নানত্তদস্সনেন পন অযং অপ্পনা – অহি নামেস বহি সিত্তসম্মট্ঠে ঠানে নাভিৰমতি, সঙ্কাৰট্ঠানতিণপণ্ণগহনৱম্মিকানিযেৱ পন পৱিসিত্ৱা নিপন্নকালে অভিৰমতি, একগ্গতং আপজ্জতি. এৱমেৱ চক্খুপেতং ৱিসমজ্ঝাসযং, মট্ঠাসু সুৱণ্ণভিত্তিআদীসু নাভিৰমতি, ওলোকেতুম্পি ন ইচ্ছতি, ৰূপচিত্তপুপ্ফলতাদিৱিচিত্তেসুযেৱ পন অভিৰমতি. তাদিসেসু হি ঠানেসু চক্খুম্হি অপ্পহোন্তে মুখম্পি ৱিৱৰিত্ৱা ওলোকেতুকামো হোতি.

সুসুমাৰোপি বহি নিক্খন্তো গহেতব্বং ন পস্সতি, অক্খিং নিমীলেত্ৱা চৰতি. যদা পন ব্যামসতমত্তং উদকং ওগাহিত্ৱা বিলং পৱিসিত্ৱা নিপন্নো হোতি, তদা তস্স চিত্তং একগ্গং হোতি, সুখং সুপতি. এৱমেৱ সোতম্পেতং বিলজ্ঝাসযং আকাসসন্নিস্সিতং, কণ্ণচ্ছিদ্দকূপকেযেৱ অজ্ঝাসযং কৰোতি, কণ্ণচ্ছিদ্দাকাসোযেৱ তস্স সদ্দসৱনে পচ্চযো হোতি. অজটাকাসোপি ৱট্টতিযেৱ. অন্তোলেণস্মিঞ্হি সজ্ঝাযে কযিৰমানে ন লেণচ্ছদনং ভিন্দিত্ৱা সদ্দো বহি নিক্খমতি, দ্ৱাৰৱাতপানছিদ্দেহি পন নিক্খমিত্ৱা ধাতুপৰম্পৰা ঘট্টেন্তো আগন্ত্ৱা সোতপসাদং ঘট্টেতি. অথ তস্মিং কালে ‘‘অসুকং নাম সজ্ঝাযতী’’তি লেণপিট্ঠে নিসিন্না জানন্তি.

এৱং সন্তে সম্পত্তগোচৰতা হোতি, কিং পনেতং সম্পত্তগোচৰন্তি? আম সম্পত্তগোচৰং. যদি এৱং দূৰে ভেৰিআদীসু ৱজ্জমানেসু ‘‘দূৰে সদ্দো’’তি জাননং ন ভৱেয্যাতি. নো ন ভৱতি. সোতপসাদস্মিঞ্হি ঘট্টিতে ‘‘দূৰে সদ্দো, আসন্নে সদ্দো, পৰতীৰে ওৰিমতীৰে’’তি তথা তথা জাননাকাৰো হোতি, ধম্মতা এসাতি. কিং এতায ধম্মতায? যতো যতো ছিদ্দং, ততো ততো সৱনং হোতি চন্দিমসূৰিযাদীনং দস্সনং ৱিযাতি অসম্পত্তগোচৰমেৱেতং.

পক্খীপি ৰুক্খে ৱা ভূমিযং ৱা ন ৰমতি. যদা পন একং ৱা দ্ৱে ৱা লেড্ডুপাতে অতিক্কম্ম অজটাকাসং পক্খন্দো হোতি, তদা একগ্গচিত্ততং আপজ্জতি. এৱমেৱ ঘানম্পি আকাসজ্ঝাসযং ৱাতূপনিস্সযগন্ধগোচৰং. তথা হি গাৱো নৱৱুট্ঠে দেৱে ভূমিং ঘাযিত্ৱা ঘাযিত্ৱা আকাসাভিমুখো হুত্ৱা ৱাতং আকড্ঢন্তি. অঙ্গুলীহি গন্ধপিণ্ডং গহেত্ৱাপি চ উপসিঙ্ঘনকালে ৱাতং অনাকড্ঢন্তো নেৱ তস্স গন্ধং জানাতি.

কুক্কুৰোপি বহি চৰন্তো খেমট্ঠানং ন পস্সতি, লেড্ডুদণ্ডাদীহি উপদ্দুতো হোতি. অন্তোগামং পৱিসিত্ৱা উদ্ধনট্ঠানে ছাৰিকং ব্যূহিত্ৱা নিপন্নস্স পনস্স ফাসু হোতি. এৱমেৱ জিৱ্হাপি গামজ্ঝাসযা আপোসন্নিস্সিতৰসাৰম্মণা. তথা হি তিযামৰত্তিং সমণধম্মং কত্ৱাপি পাতোৱ পত্তচীৱৰমাদায গামং পৱিসিতব্বং হোতি. সুক্খখাদনীযস্স চ ন সক্কা খেড়েন অতেমিতস্স ৰসং জানিতুং.

সিঙ্গালোপি বহি চৰন্তো ৰতিং ন ৱিন্দতি, আমকসুসানে মনুস্সমংসং খাদিত্ৱা নিপন্নস্সেৱ পনস্স ফাসু হোতি. এৱমেৱ কাযোপি উপাদিণ্ণকজ্ঝাসযো পথৱীসন্নিস্সিতফোট্ঠব্বাৰম্মণো. তথা হি অঞ্ঞং উপাদিণ্ণকং অলভমানা সত্তা অত্তনোৱ হত্থতলে সীসং কত্ৱা নিপজ্জন্তি. অজ্ঝত্তিকবাহিৰা চস্স পথৱী আৰম্মণগ্গহণে পচ্চযো হোতি. সুসন্থতস্সাপি হি সযনস্স হেট্ঠাঠিতানম্পি ৱা ফলকানং ন সক্কা অনিসীদন্তেন ৱা অনুপ্পীড়ন্তেন ৱা থদ্ধমুদুভাৱো জানিতুন্তি অজ্ঝত্তিকবাহিৰা পথৱী এতস্স ফোট্ঠব্বজাননে পচ্চযো হোতি.

মক্কটোপি ভূমিযং ৱিচৰন্তো নাভিৰমতি, হত্থসতুব্বেধং পনস্স ৰুক্খং আৰুয্হ ৱিটপপিট্ঠে নিসীদিত্ৱা দিসাৱিদিসা ওলোকেন্তস্সেৱ ফাসুকো হোতি. এৱং মনোপি নানজ্ঝাসযো ভৱঙ্গপচ্চযো, দিট্ঠপুব্বেপি নানাৰম্মণজ্ঝাসযং কৰোতিযেৱ মূলভৱঙ্গং পনস্স পচ্চযো হোতীতি অযমেত্থ সঙ্খেপো, ৱিত্থাৰেন পন আযতনানং নানত্তং ৱিসুদ্ধিমগ্গে আযতননিদ্দেসে ৱুত্তমেৱ.

তং চক্খু নাৱিঞ্ছতীতি তণ্হাৰজ্জুকানং আযতনপাণকানং কাযগতাসতিথম্ভে বদ্ধানং নিব্বিসেৱনভাৱং আপন্নত্তা নাকড্ঢতীতি ইমস্মিং সুত্তে পুব্বভাগৱিপস্সনাৱ কথিতা.