৮. আদিত্তপৰিযাযসুত্তৱণ্ণনা

২৩৫. অট্ঠমে অনুব্যঞ্জনসো নিমিত্তগ্গাহোতি ‘‘হত্থা সোভনা পাদা সোভনা’’তি এৱং অনুব্যঞ্জনৱসেন নিমিত্তগ্গাহো. নিমিত্তগ্গাহোতি হি সংসন্দেত্ৱা গহণং, অনুব্যঞ্জনগ্গাহোতি ৱিভত্তিগহণং. নিমিত্তগ্গাহো কুম্ভীলসদিসো সব্বমেৱ গণ্হাতি, অনুব্যঞ্জনগ্গাহো ৰত্তপাসদিসো ৱিভজিত্ৱা হত্থপাদাদীসু তং তং কোট্ঠাসং. ইমে পন দ্ৱে গাহা একজৱনৱাৰেপি লব্ভন্তি, নানাজৱনৱাৰে ৱত্তব্বমেৱ নত্থি.

নিমিত্তস্সাদগথিতন্তি নিমিত্তস্সাদেন গন্থিতং বদ্ধং. ৱিঞ্ঞাণন্তি কম্মৱিঞ্ঞাণং. তস্মিং চে সমযে কালং কৰেয্যাতি ন কোচি সংকিলিট্ঠেন চিত্তেন কালং কৰোন্তো নাম অত্থি. সব্বসত্তানঞ্হি ভৱঙ্গেনেৱ কালকিৰিযা হোতি. কিলেসভযং পন দস্সেন্তো এৱমাহ. সমযৱসেন ৱা এৱং ৱুত্তং. চক্খুদ্ৱাৰস্মিঞ্হি আপাথগতে আৰম্মণে ৰত্তচিত্তং ৱা দুট্ঠচিত্তং ৱা মূড়্হচিত্তং ৱা আৰম্মণৰসং অনুভৱিত্ৱা ভৱঙ্গং ওতৰতি, ভৱঙ্গে ঠত্ৱা কালকিৰিযং কৰোতি. তস্মিং সমযে কালং কৰোন্তস্স দ্ৱেৱ গতিযো পাটিকঙ্খা, ইমস্স সমযস্স ৱসেনেতং ৱুত্তং.

ইমং খ্ৱাহং, ভিক্খৱে, আদীনৱন্তি ইমং অনেকানি ৱস্সসতসহস্সানি নিৰযে অনুভৱিতব্বং দুক্খং সম্পস্সমানো এৱং ৱদামি তত্তায অযোসলাকায অক্খীনি অঞ্জাপেতুকামোতি. ইমিনা নযেন সব্বত্থ অত্থো ৱেদিতব্বো. অযোসঙ্কুনাতি অযসূলেন. সম্পলিমট্ঠন্তি দ্ৱেপি কণ্ণচ্ছিদ্দানি ৱিনিৱিজ্ঝিত্ৱা পথৱিযং আকোটনৱসেন সম্পলিমট্ঠং.

ততিযৱাৰে সম্পলিমট্ঠন্তি নখচ্ছেদনং পৱেসেত্ৱা উক্খিপিত্ৱা সহধুনট্ঠেন ছিন্দিত্ৱা পাতনৱসেন সম্পলিমট্ঠং. চতুত্থৱাৰে সম্পলিমট্ঠন্তি বন্ধনমূলং ছেত্ৱা পাতনৱসেন সম্পলিমট্ঠং. পঞ্চমৱাৰে সম্পলিমট্ঠন্তি তিখিণায সত্তিযা কাযপসাদং উপ্পাটেত্ৱা পতনৱসেন সম্পলিমট্ঠং. সত্তিযাতি এত্থ মহতী দণ্ডকৱাসি ৱেদিতব্বা. সোত্তন্তি নিপজ্জিত্ৱা নিদ্দোক্কমনং. যথাৰূপানং ৱিতক্কানং ৱসং গতো সঙ্ঘং ভিন্দেয্যাতি ইমিনা ৱিতক্কানং যাৱ সঙ্ঘভেদা পাপকম্মাৱহনতা দস্সিতা. সেসমেত্থ উত্তানমেৱ.