১. পঠমসমুদ্দসুত্তৱণ্ণনা

২২৮. সমুদ্দৱগ্গস্স পঠমে চক্খু, ভিক্খৱে, পুৰিসস্স সমুদ্দোতি যদি দুপ্পূৰণট্ঠেন যদি ৱা সমুদ্দনট্ঠেন সমুদ্দো, চক্খুমেৱ সমুদ্দো. তস্স হি পথৱিতো যাৱ অকনিট্ঠব্ৰহ্মলোকা নীলাদিআৰম্মণং সমোসৰন্তং পৰিপুণ্ণভাৱং কাতুং ন সক্কোতি, এৱং দুপ্পূৰণট্ঠেনপি সমুদ্দো. চক্খু চ তেসু তেসু নীলাদীসু আৰম্মণেসু সমুদ্দতি, অসংৱুতং হুত্ৱা ওসৰমানং কিলেসুপ্পত্তিযা কাৰণভাৱেন সদোসগমনেন গচ্ছতীতি সমুদ্দনট্ঠেনপি সমুদ্দো. তস্স ৰূপমযো ৱেগোতি সমুদ্দস্স অপ্পমাণো ঊমিমযো ৱেগো ৱিয তস্সাপি চক্খুসমুদ্দস্স সমোসৰন্তস্স নীলাদিভেদস্স আৰম্মণস্স ৱসেন অপ্পমেয্যো ৰূপমযো ৱেগো ৱেদিতব্বো. যো তং ৰূপমযং ৱেগং সহতীতি যো তং চক্খুসমুদ্দে সমোসটং ৰূপমযং ৱেগং, মনাপে ৰূপে ৰাগং, অমনাপে দোসং, অসমপেক্খিতে মোহন্তি এৱং ৰাগাদিকিলেসে অনুপ্পাদেন্তো উপেক্খকভাৱেন সহতি.

সঊমিন্তিআদীসু কিলেসঊমীহি সঊমিং. কিলেসাৱট্টেহি সাৱট্টং. কিলেসগাহেহি সগাহং. কিলেসৰক্খসেহি সৰক্খসং. কোধূপাযাসস্স চ ৱসেন সঊমিং. ৱুতঞ্হেতং ‘‘ঊমিভযন্তি খো, ভিক্খৱে, কোধূপাযাসস্সেতং অধিৱচন’’ন্তি (ইতিৱু. ১০৯; ম. নি. ২.১৬২; অ. নি. ৪.১২২). কামগুণৱসেন সাৱট্টং. ৱুতঞ্হেতং ‘‘আৱট্টগ্গাহোতি খো, ভিক্খৱে, পঞ্চন্নেতং কামগুণানং অধিৱচন’’ন্তি (সং. নি. ৪.২৪১). মাতুগামৱসেন সগাহং সৰক্খসং. ৱুত্তঞ্হেতং ‘‘গাহৰক্খসোতি খো, ভিক্খৱে, মাতুগামস্সেতং অধিৱচন’’ন্তি (ইতিৱু. ১০৯). সেসৱাৰেসুপি এসেৱ নযো. সভযং দুত্তৰং অচ্চতৰীতি ঊমিভযেন সভযং দুৰতিক্কমং অতিক্কমি. লোকন্তগূতি সঙ্খাৰলোকস্স অন্তং গতো. পাৰগতোতি ৱুচ্চতীতি নিব্বানং গতোতি কথীযতি.