৯. লোহিচ্চসুত্তৱণ্ণনা

১৩২. নৱমে মক্কৰকতেতি এৱংনামকে নগৰে অৰঞ্ঞকুটিকাযন্তি অৰঞ্ঞে কতায পাটিযেক্কায কুটিযং, ন ৱিহাৰপচ্চন্তকুটিযং. মাণৱকাতি যেপি তত্থ মহল্লকা, তে মহল্লককালেপি অন্তেৱাসিকতায মাণৱকাত্ৱেৱ ৱুত্তা. তেনুপসঙ্কমিংসূতি পাতো সিপ্পং উগ্গণ্হিত্ৱা সাযং ‘‘আচৰিযস্স কট্ঠানি আহৰিস্সামা’’তি অৰঞ্ঞং পৱিসিত্ৱা ৱিচৰন্তা যেন সা কুটিকা, তেনুপসঙ্কমিংসু. পৰিতো পৰিতো কুটিকাযাতি তস্সা কুটিকায সমন্ততো সমন্ততো. সেলেয্যকানীতি অঞ্ঞমঞ্ঞস্স পিট্ঠিং গহেত্ৱা লঙ্ঘিত্ৱা ইতো চিতো চঙ্কমনকীড়নানি.

মুণ্ডকাতিআদীসু মুণ্ডে মুণ্ডাতি, সমণে চ সমণাতি ৱত্তুং ৱট্টেয্য, ইমে পন হীড়েন্তা ‘‘মুণ্ডকা সমণকা’’তি আহংসু. ইব্ভাতি গহপতিকা. কণ্হাতি কণ্হা, কাড়কাতি অত্থো. বন্ধুপাদাপচ্চাতি এত্থ বন্ধূতি ব্ৰহ্মা অধিপ্পেতো. তঞ্হি ব্ৰাহ্মণা পিতামহোতি ৱোহৰন্তি. পাদানং অপচ্চা পাদাপচ্চা, ব্ৰহ্মুনো পিট্ঠিপাদতো জাতাতি অধিপ্পাযো. তেসং কিৰ অযং লদ্ধি ‘‘ব্ৰাহ্মণা ব্ৰহ্মুনো মুখতো নিক্খন্তা, খত্তিযা উৰতো, ৱেস্সা নাভিতো, সুদ্দা জাণুতো, সমণা পিট্ঠিপাদতো’’তি. ভৰতকানন্তি কুটিম্বিকানং. কুটিম্বিকা হি যস্মা ৰট্ঠং ভৰন্তি, তস্মা ভৰতাতি ৱুচ্চন্তি. ইমে পন পৰিভৱং কত্ৱা ৱদমানা ‘‘ভৰতকান’’ন্তি আহংসু.

ৱিহাৰা নিক্খমিত্ৱাতি ‘‘ৰত্তিট্ঠকাপৰিচ্ছন্নে ৰজতপট্টসন্নিভসমৱিপ্পকিণ্ণৱালিকে ৰমণীযে পৰিৱেণে কট্ঠকলাপে বন্ধিত্ৱা খিপমানা ৱালিকং আলুড়েত্ৱা, হত্থেন হত্থং আদায পণ্ণকুটিং পৰিযাযন্তা ‘ইমে ইমেসং ভৰতকানং সক্কতা, ইমে ইমেসং ভৰতকানং সক্কতা’তি পুনপ্পুনং ৱিৰৱন্তা অতিৱিয ইমে মাণৱকা কীড়ং কৰোন্তি, ৱিহাৰে ভিক্খূনং অত্থিভাৱম্পি ন জানন্তি, দস্সেস্সামি নেসং ভিক্খূনং অত্থিভাৱ’’ন্তি চিন্তেত্ৱা পণ্ণকুটিতো নিক্খমি.

সীলুত্তমা পুব্বতৰা অহেসুন্তি গুণৱন্তানং গুণে কথিতে নিগ্গুণানং গুণাভাৱো পাকটোৱ ভৱিস্সতীতি পোৰাণকব্ৰাহ্মণানং গুণে কথেন্তো এৱমাহ. তত্থ সীলুত্তমাতি সীলজেট্ঠকা. সীলঞ্হি তেসং উত্তমং, ন জাতিগোত্তং. যে পুৰাণং সৰন্তীতি যে পোৰাণকং ব্ৰাহ্মণধম্মং সৰন্তি. অভিভুয্য কোধন্তি কোধং অভিভৱিত্ৱা তেসং দ্ৱাৰানি সুগুত্তানি সুৰক্খিতানি অহেসুং. ধম্মে চ ঝানে চ ৰতাতি দসৱিধে কুসলকম্মপথধম্মে অট্ঠসমাপত্তিঝানেসু চ ৰতা.

এৱং পোৰাণানং গুণং কথেত্ৱা অথেতৰহি ব্ৰাহ্মণানং মানং নিম্মদ্দেন্তো ইমে চ ৱোক্কম্ম জপামসেতিআদিমাহ. তত্থ ৱোক্কম্মাতি এতেহি গুণেহি অপক্কমিত্ৱা. জপামসেতি মযং জপাম সজ্ঝাযামাতি এত্তকেনেৱ ব্ৰাহ্মণম্হাতি মঞ্ঞমানা ব্ৰাহ্মণা মযন্তি ইমিনা গোত্তেন মত্তা হুত্ৱা ৱিসমং চৰন্তি, ৱিসমানি কাযকম্মাদীনি কৰোন্তীতি অত্থো. পুথুঅত্তদণ্ডাতি পুথু অত্তা দণ্ডা এতেহীতি পুথুঅত্তদণ্ডা, গহিতনানাৱিধদণ্ডাতি অত্থো. সতণ্হাতণ্হেসূতি সতণ্হনিত্তণ্হেসু. অগুত্তদ্ৱাৰস্স ভৱন্তি মোঘাতি অসংৱুতদ্ৱাৰস্স সব্বেপি ৱতসমাদানা মোঘা ভৱন্তীতি দীপেতি. যথা কিন্তি? সুপিনেৱ লদ্ধং পুৰিসস্স ৱিত্তন্তি যথা সুপিনে পুৰিসস্স লদ্ধং মণিমুত্তাদিনানাৱিধং ৱিত্তং মোঘং হোতি, পবুজ্ঝিত্ৱা কিঞ্চি ন পস্সতি, এৱং মোঘা ভৱন্তীতি অত্থো.

অনাসকাতি একাহদ্ৱীহাদিৱসেন অনাহাৰকা. থণ্ডিলসাযিকা চাতি হৰিতকুসসন্থতে ভূমিভাগে সযনং, পাতো সিনানঞ্চ তযো চ ৱেদাতি পাতোৱ উদকং পৱিসিত্ৱা ন্হানঞ্চেৱ তযো চ ৱেদা. খৰাজিনং জটা পঙ্কোতি খৰসম্ফস্সং অজিনচম্মঞ্চেৱ জটাকলাপো চ পঙ্কো চ, পঙ্কো নাম দন্তমলং. মন্তা সীলব্বতং তপোতি মন্তা চ অজসীলগোসীলসঙ্খাতং সীলং অজৱতগোৱতসঙ্খাতং ৱতঞ্চ. অযং ইদানি ব্ৰাহ্মণানং তপোতি ৱদতি. কুহনা ৱঙ্কদণ্ডা চাতি পটিচ্ছন্নকূপো ৱিয পটিচ্ছন্নদোসং কোহঞ্ঞঞ্চেৱ ৱঙ্কদণ্ডো, চ উদুম্বৰপলাসবেড়ুৱৰুক্খানং অঞ্ঞতৰতো গহিতং ৱঙ্কদণ্ডঞ্চাতি অত্থো. উদকাচমনানি চাতি উদকেন মুখপৰিমজ্জনানি. ৱণ্ণা এতে ব্ৰাহ্মণানন্তি এতে ব্ৰাহ্মণানং পৰিক্খাৰভণ্ডকৱণ্ণাতি দস্সেতি. কত কিঞ্চিক্খভাৱনাতি কতা কিঞ্চিক্খভাৱনা. অযমেৱ ৱা পাঠো, আমিসকিঞ্চিক্খস্স ৱড্ঢনত্থায কতন্তি অত্থো.

এৱং এতৰহি ব্ৰাহ্মণানং মানং নিম্মদ্দিত্ৱা পুন পোৰাণকব্ৰাহ্মণানং ৱণ্ণং কথেন্তো চিত্তঞ্চ সুসমাহিতন্তিআদিমাহ. তত্থ সুসমাহিতন্তি তেসং ব্ৰাহ্মণানং চিত্তং উপচাৰপ্পনাসমাধীহি সুসমাহিতং অহোসীতি দস্সেতি. অখিলন্তি মুদু অথদ্ধং. সো মগ্গো ব্ৰহ্মপত্তিযাতি সো সেট্ঠপত্তিযা মগ্গো, তুম্হে পন কিং ব্ৰাহ্মণা নামাতি দীপেন্তো এৱমাহ.

আগমংসু নু খ্ৱিধাতি আগমংসু নু খো ইধ. অধিমুচ্চতীতি কিলেসৱসেন অধিমুত্তো গিদ্ধো হোতি. ব্যাপজ্জতীতি ব্যাপাদৱসেন পূতিচিত্তং হোতি. পৰিত্তচেতসোতি অনুপট্ঠিতসতিতায সংকিলেসচিত্তেন পৰিত্তচিত্তো. চেতোৱিমুত্তিন্তি ফলসমাধিং. পঞ্ঞাৱিমুত্তিন্তি ফলপঞ্ঞং. অপ্পমাণচেতসোতি উপট্ঠিতসতিতায নিক্কিলেসচিত্তেন অপ্পমাণচিত্তো.