৪-৫. ভাৰদ্ৱাজসুত্তাদিৱণ্ণনা

১২৭-১২৮. চতুত্থে পিণ্ডং উলমানো পৰিযেসমানো পব্বজিতোতি পিণ্ডোলো. সো কিৰ পৰিজিণ্ণভোগো ব্ৰাহ্মণো অহোসি. অথ ভিক্খুসঙ্ঘস্স লাভসক্কাৰং দিস্ৱা পিণ্ডত্থায নিক্খমিত্ৱা পব্বজিতো. সো মহন্তং কপল্লপত্তং গহেত্ৱা চৰতি, তেন কপল্লপূৰং যাগুং পিৱতি, কপল্লপূৰে পূৱে খাদতি, কপল্লপূৰং ভত্তং ভুঞ্জতি. অথস্স মহগ্ঘসভাৱং সত্থু আৰোচযিংসু. সত্থা তস্স পত্তত্থৱিকং নানুজানি. হেট্ঠামঞ্চে পত্তং নিক্কুজ্জিত্ৱা ঠপেতি. সো ঠপেন্তোপি ঘংসন্তোৱ পণামেত্ৱা ঠপেতি, গণ্হন্তোপি ঘংসন্তোৱ আকড্ঢিত্ৱা গণ্হাতি. তং গচ্ছন্তে কালে ধংসনেন পৰিক্খীণং নাড়িকোদনমত্তমেৱ গণ্হনকং জাতং. ততো সত্থু আৰোচেসুং, অথস্স সত্থা পত্তত্থৱিকং অনুজানি. থেৰো অপৰেন সমযেন ইন্দ্ৰিযভাৱনং ভাৱেত্ৱা অগ্গফলে অৰহত্তে পতিট্ঠাসি. ইতি সো পিণ্ডত্থায পব্বজিতত্তা পিণ্ডোলো, গোত্তেন পন ভাৰদ্ৱাজোতি উভযং একতো কত্ৱা পিণ্ডোলভাৰদ্ৱাজোতি ৱুচ্চতি.

উপসঙ্কমীতি উগ্গতুগ্গতেহি মহাঅমচ্চেহি পৰিৱুতো উপসঙ্কমি. থেৰো কিৰ একদিৱসং সাৱত্থিযং পিণ্ডায চৰিত্ৱা কতভত্তকিচ্চো নিদাঘসমযে সীতঠানে দিৱাৱিহাৰং নিসীদিস্সামীতি আকাসেন গন্ত্ৱা গঙ্গাতীৰে উদেনস্স ৰঞ্ঞো উদপানং নাম উয্যানং অত্থি, তত্থ পৱিসিত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি সীতেন উদকৱাতেন বীজিযমানো.

উদেনোপি খো নাম ৰাজা সত্তাহং মহাপানং পিৱিত্ৱা সত্তমে দিৱসে উয্যানং পটিজগ্গাপেত্ৱা মহাজনপৰিৱাৰো উয্যানং গন্ত্ৱা মঙ্গলসিলাপট্টে অত্থতায সেয্যায নিপজ্জি. তস্স একা পৰিচাৰিকা পাদে সম্বাহমানা নিসিন্না. ৰাজা কমেন নিদ্দং ওক্কমি. তস্মিং নিদ্দং ওক্কন্তে নাটকিত্থিযো ‘‘যস্সত্থায মযং গীতাদীনি পযোজেয্যাম, সো নিদ্দং উপগতো, ন চ নিদ্দাকালে মহাসদ্দং কাতুং ৱট্টতী’’তি অত্তনো অত্তনো তূৰিযানি ঠপেত্ৱা উয্যানং পক্কন্তা. তা তত্থ তত্থ ফলাফলানি খাদমানা পুপ্ফানি পিড়ন্ধমানা ৱিচৰন্তিযো থেৰং দিস্ৱা ‘‘মা সদ্দং কৰিত্থা’’তি অঞ্ঞমঞ্ঞং নিৱাৰযমানা ৱন্দিত্ৱা নিসীদিংসু. থেৰো ‘‘ইস্সা পহাতব্বা, মচ্ছেৰং ৱিনোদেতব্ব’’ন্তিআদিনা নযেন তাসং অনুৰূপং ধম্মকথং কথেসি.

সাপি খো ৰঞ্ঞো পাদে সম্বাহমানা নিসিন্না ইত্থী পাদে চালেত্ৱা ৰাজানং পবোধেসি. সো ‘‘কহং তা গতা’’তি পুচ্ছি. কিং তাসং তুম্হেহি? তা একং সমণং পৰিৱাৰেত্ৱা নিসিন্নাতি. ৰাজা কুদ্ধো উদ্ধনে পক্খিত্তলোণং ৱিয তটতটাযমানো উট্ঠহিত্ৱা ‘‘তম্বকিপিল্লিকাহি নং খাদাপেস্সামী’’তি গচ্ছন্তো একস্মিং অসোকৰুক্খে তম্বকিপিল্লিকানং পুটং দিস্ৱা হত্থেনাকড্ঢিত্ৱা সাখং গণ্হিতুং নাসক্খি. কিপিল্লিকপুটো ছিজ্জিত্ৱা ৰঞ্ঞো সীসে পতি, সকলসৰীৰং সালিথুসেহি পৰিকিণ্ণং ৱিয দণ্ডদীপিকাহি ডয্হমানং ৱিয চ অহোসি. থেৰো ৰঞ্ঞো পদুট্ঠভাৱং ঞত্ৱা ইদ্ধিযা আকাসং পক্খন্দি. তাপি ইত্থিযো উট্ঠায ৰঞ্ঞো সন্তিকং গন্ত্ৱা সৰীৰং পুঞ্ছন্তিযো ৱিয ভূমিযং পতিতপতিতা কিপিল্লিকাযো গহেত্ৱা সৰীৰে খিপমানা সব্বা মুখসত্তীহি ৱিজ্ঝিংসু – ‘‘কিং নামেতং, অঞ্ঞে ৰাজানো পব্বজিতে দিস্ৱা ৱন্দন্তি, পঞ্হং পুচ্ছন্তি, অযং পন ৰাজা কিপিল্লিকপুটং সীসে ভিন্দিতুকামো জাতো’’তি.

ৰাজা অত্তনো অপৰাধং দিস্ৱা উয্যানপালং পক্কোসাপেত্ৱা পুচ্ছি – ‘‘কিং এস পব্বজিতো? অঞ্ঞেসুপি দিৱসেসু ইধ আগচ্ছতী’’তি? আম, দেৱাতি. ইধ ত্ৱং আগতদিৱসে ময্হং আৰোচেয্যাসীতি. থেৰোপি কতিপাহেনেৱ পুন আগন্ত্ৱা ৰুক্খমূলে নিসীদি. উয্যানপালো দিস্ৱা – ‘‘মহন্তো মে অযং পণ্ণাকাৰো’’তি ৱেগেন গন্ত্ৱা ৰঞ্ঞো আৰোচেসি. ৰাজা উট্ঠহিত্ৱা সঙ্খপণৱাদিসদ্দং নিৱাৰেত্ৱা উগ্গতুগ্গতেহি অমচ্চেহি সদ্ধিং উয্যানং অগমাসি. তেন ৱুত্তং ‘‘উপসঙ্কমী’’তি.

অনিকীড়িতাৱিনো কামেসূতি যা কামেসু কামকীড়া, তং অকীড়িতপুব্বা, অপৰিভুত্তকামাতি অত্থো. অদ্ধানঞ্চ আপাদেন্তীতি পৱেণিং পটিপাদেন্তি, দীঘৰত্তং অনুবন্ধাপেন্তি. মাতুমত্তীসূতি মাতুপমাণাসু. লোকস্মিঞ্হি মাতা ভগিনী ধীতাতি ইদং তিৱিধং গৰুকাৰম্মণং নাম, ইতি গৰুকাৰম্মণে উপনিবন্ধং চিত্তং ৱিমোচেতুং ন লভতীতি দস্সেন্তো এৱমাহ. অথস্স তেন পঞ্হেন চিত্তং অনোতৰন্তং দিস্ৱা ভগৱতা পটিকূলমনসিকাৰৱসেন চিত্তূপনিবন্ধনত্থং ৱুত্তং দ্ৱত্তিংসাকাৰকম্মট্ঠানং কথেসি.

অভাৱিতকাযাতি অভাৱিতপঞ্চদ্ৱাৰিককাযা. তেসং তং দুক্কৰং হোতীতি তেসং তং অসুভকম্মট্ঠানং ভাৱেতুং দুক্কৰং হোতি. ইতিস্স ইমিনাপি চিত্তং অনোতৰন্তং দিস্ৱা ইন্দ্ৰিযসংৱৰসীলং কথেসি. ইন্দ্ৰিযসংৱৰস্মিঞ্হি উপনিবন্ধচিত্তং ৱিহেঠেতুং ন লভতি. ৰাজা তং সুত্ৱা তত্থ ওতিণ্ণচিত্তো অচ্ছৰিযং, ভো ভাৰদ্ৱাজাতিআদিমাহ.

অৰক্খিতেনেৱ কাযেনাতিআদীসু হত্থপাদে কীড়াপেন্তো গীৱং পৰিৱত্তেন্তো কাযং ন ৰক্খতি নাম, নানপ্পকাৰং দুট্ঠুল্লং কথেন্তো ৱচনং ন ৰক্খতি নাম, কামৱিতক্কাদযো ৱিতক্কেন্তো চিত্তং ন ৰক্খতি নাম. ৰক্খিতেনেৱ কাযেনাতিআদীসু ৱুত্তৱিপৰিযাযেন অত্থো ৱেদিতব্বো.

অতিৱিয মং তস্মিং সমযে লোভধম্মা পৰিসহন্তীতি মং তস্মিং সমযে অতিক্কমিত্ৱা লোভো অধিভৱতীতি অত্থো. উপট্ঠিতায সতিযাতি কাযগতায সতিযা সুপট্ঠিতায. ন মং তথা তস্মিং সমযেতি তস্মিং সমযে মং যথা পুব্বে, ন তথা লোভো অতিক্কমিত্ৱা উপ্পজ্জতীতি অত্থো. পৰিসহন্তীতি পদস্স উপ্পজ্জন্তীতিপি অত্থোযেৱ. ইতি ইমস্মিং সুত্তে তযো কাযা কথিতা. কথং? ‘‘ইমমেৱ কায’’ন্তি এত্থ হি কৰজকাযো কথিতো, ‘‘ভাৱিতকাযো’’তি এত্থ পঞ্চদ্ৱাৰিককাযো, ‘‘ৰক্খিতেনেৱ কাযেনা’’তি এত্থ চোপনকাযো, কাযৱিঞ্ঞত্তীতি অত্থো. পঞ্চমং উত্তানমেৱ.