১০. উদকসুত্তৱণ্ণনা

১০৩. দসমে উদকো সুদন্তি এত্থ সুদন্তি নিপাতমত্তং. উদকোতি তস্স নামং. ইদং জাতু ৱেদগূতি এত্থ ইদন্তি নিপাতমত্তং. অথ ৱা ইদং মম ৱচনং সুণাথাতি দীপেন্তো এৱমাহ. জাতু ৱেদগূতি অহং একংসেনেৱ ৱেদগূ, ৱেদসঙ্খাতেন ঞাণেন নেয্যেসু গতো, ৱেদং ৱা গতো অধিগতো, পণ্ডিতোহমস্মীতি অত্থো. সব্বজীতি একংসেন সব্বৱট্টং জিনিত্ৱা অভিভৱিত্ৱা ঠিতোস্মীতি ৱদতি. অপলিখতং গণ্ডমূলন্তি অপলিখতং দুক্খমূলং. পলিখণিন্তি পলিখতং মযা, খনিত্ৱা ঠিতোস্মীতি দীপেতি.

মাতাপেত্তিকসম্ভৱস্সাতি মাতিতো চ পিতিতো চ নিব্বত্তেন মাতাপেত্তিকেন সুক্কসোণিতেন সম্ভূতস্স. ওদনকুম্মাসূপচযস্সাতি ওদনেন চেৱ কুম্মাসেন চ উপচিতস্স ৱড্ঢিতস্স. অনিচ্চুচ্ছাদনপৰিমদ্দনভেদনৱিদ্ধংসনধম্মস্সাতি এত্থ অযং কাযো হুত্ৱা অভাৱট্ঠেন অনিচ্চধম্মো, দুগ্গন্ধৱিঘাতত্থায তনুৱিলেপনেন উচ্ছাদনধম্মো, অঙ্গপচ্চঙ্গাবাধৱিনোদনত্থায খুদ্দকসম্বাহনেন পৰিমদ্দনধম্মো, দহৰকালে ৱা ঊৰূসু সযাপেত্ৱা গব্ভৱাসেন দুস্সণ্ঠিতানং তেসং তেসং অঙ্গানং সণ্ঠানসম্পাদনত্থং অঞ্ছনপীড়নাদীনং ৱসেন পৰিমদ্দনধম্মো, এৱং পৰিহৰিতোপি চ ভেদনৱিদ্ধংসনধম্মো ভিজ্জতি চেৱ ৱিকিৰতি চ, এৱং সভাৱোতি অত্থো.

তত্থ মাতাপেত্তিকসম্ভৱওদনকুম্মাসূপচযপৰিমদ্দনপদেহি ৱড্ঢি কথিতা, অনিচ্চভেদনৱিদ্ধংসনপদেহি পৰিহানি. পুৰিমেহি ৱা তীহি সমুদযো, পচ্ছিমেহি অত্থঙ্গমোতি. এৱং চাতুমহাভূতিকস্স কাযস্স ৱড্ঢিপৰিহানিনিব্বত্তিভেদা দস্সিতা. সেসং উত্তানত্থমেৱাতি.

সড়ৱগ্গো দসমো.

দুতিযো পণ্ণাসকো.