৫. সত্তট্ঠানসুত্তৱণ্ণনা

৫৭. পঞ্চমে সত্তট্ঠানকুসলোতি সত্তসু ওকাসেসু ছেকো. ৱুসিতৱাতি ৱুসিতৱাসো. উত্তমপুৰিসোতি সেট্ঠপুৰিসো. সেসমেত্থ ৱুত্তনযেনেৱ ৱেদিতব্বং. ইদং পন সুত্তং উস্সদনন্দিযঞ্চেৱ পলোভনীযঞ্চাতি ৱেদিতব্বং. যথা হি ৰাজা ৱিজিতসঙ্গামো সঙ্গামে ৱিজযিনো যোধে উচ্চট্ঠানে ঠপেত্ৱা তেসং সক্কাৰং কৰোতি. কিং কাৰণা? এতেসং সক্কাৰং দিস্ৱা সেসাপি সূৰা ভৱিতুং মঞ্ঞিস্সন্তীতি, এৱমেৱ ভগৱা অপ্পমেয্যং কালং পাৰমিযো পূৰেত্ৱা মহাবোধিমণ্ডে কিলেসমাৰৱিজযং কত্ৱা সব্বঞ্ঞুতং পত্তো সাৱত্থিযং জেতৱনমহাৱিহাৰে নিসীদিত্ৱা ইমং সুত্তং দেসেন্তো খীণাসৱে উক্খিপিত্ৱা থোমেসি ৱণ্ণেসি. কিং কাৰণা? এৱং অৱসেসা সেক্খপুগ্গলা অৰহত্তফলং পত্তব্বং মঞ্ঞিস্সন্তীতি. এৱমেতং সুত্তং খীণাসৱানং উক্খিপিত্ৱা পসংসিতত্তা উস্সদনন্দিযং, সেক্খানং পলোভিতত্তা পলোভনীযন্তি ৱেদিতব্বং.

এৱং খো, ভিক্খৱে, ভিক্খু সত্তট্ঠানকুসলো হোতীতি এত্তাৱতা চেত্থ মগ্গফলপচ্চৱেক্খণৱসেন দেসনং নিট্ঠপেত্ৱাপি পুন কথঞ্চ, ভিক্খৱে, ভিক্খু তিৱিধূপপৰিক্খী হোতীতি ইদং ‘‘খীণাসৱো যস্মিং আৰম্মণে সততৱিহাৰেন ৱিহৰতি, তং সত্তো ৱা পুগ্গলো ৱা ন হোতি, ধাতুআদিমত্তমেৱ পন হোতী’’তি এৱং খীণাসৱস্স সততৱিহাৰঞ্চ, ‘‘ইমেসু ধম্মেসু কম্মং কত্ৱা অযং আগতো’’তি আগমনীযপটিপদঞ্চ দস্সেতুং ৱুত্তং. তত্থ ধাতুসো উপপৰিক্খতীতি ধাতুসভাৱেন পস্সতি ওলোকেতি. সেসপদদ্ৱযেপি এসেৱ নযো. পঞ্চমং.