১০. নিৰুত্তিপথসুত্তৱণ্ণনা

৬২. দসমে নিৰুত্তিযোৱ নিৰুত্তিপথা, অথ ৱা নিৰুত্তিযো চ তা নিৰুত্তিৱসেন ৱিঞ্ঞাতব্বানং অত্থানং পথত্তা পথা চাতি নিৰুত্তিপথা. সেসপদদ্ৱযেপি এসেৱ নযো. তীণিপি চেতানি অঞ্ঞমঞ্ঞৱেৱচনানেৱাতি ৱেদিতব্বানি. অসংকিণ্ণাতি অৱিজহিতা, ‘‘কো ইমেহি অত্থো’’তি ৱত্ৱা অছড্ডিতা. অসংকিণ্ণপুব্বাতি অতীতেপি ন জহিতপুব্বা. ন সংকীযন্তীতি এতৰহিপি ‘‘কিমেতেহী’’তি ন ছড্ডীযন্তি. ন সংকীযিস্সন্তীতি অনাগতেপি ন ছড্ডীযিস্সন্তি. অপ্পটিকুট্ঠাতি অপ্পটিবাহিতা. অতীতন্তি অত্তনো সভাৱং ভঙ্গমেৱ ৱা অতিক্কন্তং. নিৰুদ্ধন্তি দেসন্তৰং অসঙ্কমিত্ৱা তত্থেৱ নিৰুদ্ধং ৱূপসন্তং. ৱিপৰিণতন্তি ৱিপৰিণামং গতং নট্ঠং. অজাতন্তি অনুপ্পন্নং. অপাতুভূতন্তি অপাকটীভূতং.

উক্কলাতি উক্কলজনপদৱাসিনো. ৱস্সভঞ্ঞাতি ৱস্সো চ ভঞ্ঞো চ. দ্ৱেপি হি তে মূলদিট্ঠিগতিকা. অহেতুকৱাদাতিআদীসু ‘‘নত্থি হেতু নত্থি পচ্চযো’’তি গহিতত্তা অহেতুকৱাদা. ‘‘কৰোতো ন কৰীযতি পাপ’’ন্তি গহিতত্তা অকিৰিযৱাদা. ‘‘নত্থি দিন্ন’’ন্তিআদিগহণতো নত্থিকৱাদা. তত্থ ইমে দ্ৱে জনা, তিস্সো দিট্ঠিযো, কিং একেকস্স দিযড্ঢা হোতীতি? ন তথা, যথা পন একো ভিক্খু পটিপাটিযা চত্তাৰিপি ঝানানি নিব্বত্তেতি, এৱমেত্থ একেকো তিস্সোপি দিট্ঠিযো নিব্বত্তেসীতি ৱেদিতব্বো. ‘‘নত্থি হেতু নত্থি পচ্চযো’’তি পুনপ্পুনং আৱজ্জেন্তস্স আহৰন্তস্স অভিনন্দন্তস্স অস্সাদেন্তস্স মগ্গদস্সনং ৱিয হোতি. সো মিচ্ছত্তনিযামং ওক্কমতি, সো একন্তকাড়কোতি ৱুচ্চতি. যথা পন অহেতুকদিট্ঠিযং, এৱং ‘‘কৰোতো ন কৰীযতি পাপং, নত্থি দিন্ন’’ন্তি ইমেসুপি ঠানেসু মিচ্ছত্তনিযামং ওক্কমতি.

ন গৰহিতব্বং নপ্পটিক্কোসিতব্বং অমঞ্ঞিংসূতি এত্থ ‘‘যদেতং অতীতং নাম, নযিদং অতীতং, ইদমস্স অনাগতং ৱা পচ্চুপ্পন্নং ৱা’’তি ৱদন্তো গৰহতি নাম. তত্থ দোসং দস্সেত্ৱা ‘‘কিং ইমিনা গৰহিতেনা’’তি? ৱদন্তো পটিক্কোসতি নাম. ইমে পন নিৰুত্তিপথে তেপি অচ্চন্তকাড়কা দিট্ঠিগতিকা ন গৰহিতব্বে ন পটিক্কোসিতব্বে মঞ্ঞিংসু. অতীতং পন অতীতমেৱ, অনাগতং অনাগতমেৱ, পচ্চুপ্পন্নং পচ্চুপ্পন্নমেৱ কথযিংসু. নিন্দাঘট্টনব্যাৰোসউপাৰম্ভভযাতি ৱিঞ্ঞূনং সন্তিকা নিন্দাভযেন চ ঘট্টনভযেন চ দোসাৰোপনভযেন চ উপাৰম্ভভযেন চ. ইতি ইমস্মিং সুত্তে চতুভূমিকখন্ধানং পণ্ণত্তি কথিতাতি. দসমং.

উপযৱগ্গো ছট্ঠো.