২. দুতিযৱগ্গো

১. দুগ্গতসুত্তৱণ্ণনা

১৩৪. দুতিযৱগ্গস্স পঠমে দুগ্গতন্তি দলিদ্দং কপণং. দুৰূপেতন্তি দুস্সণ্ঠানেহি হত্থপাদেহি উপেতং. পঠমং.

২. সুখিতসুত্তৱণ্ণনা

১৩৫. দুতিযে সুখিতন্তি সুখসমপ্পিতং মহদ্ধনং মহাভোগং. সুসজ্জিতন্তি অলঙ্কতপটিযত্তং হত্থিক্খন্ধগতং মহাপৰিৱাৰং. দুতিযং.

৩. তিংসমত্তসুত্তৱণ্ণনা

১৩৬. ততিযে পাৱেয্যকাতি পাৱেয্যদেসৱাসিনো. সব্বে আৰঞ্ঞিকাতিআদীসু ধুতঙ্গসমাদানৱসেন তেসং আৰঞ্ঞিকাদিভাৱো ৱেদিতব্বো. সব্বে সসংযোজনাতি সব্বে সবন্ধনা, কেচি সোতাপন্না, কেচি সকদাগামিনো, কেচি অনাগামিনো. তেসু হি পুথুজ্জনো ৱা খীণাসৱো ৱা নত্থি. গুন্নন্তিআদীসু সেতকাড়াদিৱণ্ণেসু একেকৱণ্ণকালোৱ গহেতব্বো. পাৰিপন্থকাতি পৰিপন্থে তিট্ঠনকা পন্থঘাতচোৰা. পাৰদাৰিকাতি পৰদাৰচাৰিত্তং আপজ্জনকা. ততিযং.

৪-৯. মাতুসুত্তাদিৱণ্ণনা

১৩৭-১৪২. চতুত্থাদীসু লিঙ্গনিযমেন চেৱ চক্কৱাড়নিযমেন চ অত্থো ৱেদিতব্বো. পুৰিসানঞ্হি মাতুগামকালো, মাতুগামানঞ্চ পুৰিসকালোতি এৱমেত্থ লিঙ্গনিযমো. ইমম্হা চক্কৱাড়া সত্তা পৰচক্কৱাড়ং, পৰচক্কৱাড়া চ ইমং চক্কৱাড়ং সংসৰন্তি. তেসু ইমস্মিং চক্কৱাড়ে মাতুগামকালে মাতুভূতঞ্ঞেৱ দস্সেন্তো যো নমাতাভূতপুব্বোতি আহ. যো নপিতাভূতপুব্বোতিআদীসুপি এসেৱ নযো. চতুত্থাদীনি.

১০. ৱেপুল্লপব্বতসুত্তৱণ্ণনা

১৪৩. দসমে ভূতপুব্বন্তি অতীতকালে একং অপদানং আহৰিত্ৱা দস্সেতি. সমঞ্ঞা উদপাদীতি পঞ্ঞত্তি অহোসি. চতূহেন আৰোহন্তীতি ইদং থামমজ্ঝিমে সন্ধায ৱুত্তং. অগ্গন্তি উত্তমং. ভদ্দযুগন্তি সুন্দৰযুগলং. তীহেন আৰোহন্তীতি এত্তাৱতা কিৰ দ্ৱিন্নং বুদ্ধানং অন্তৰে যোজনং পথৱী উস্সন্না, সো পব্বতো তিযোজনুব্বেধো জাতো.

অপ্পং ৱা ভিয্যোতি ৱস্সসততো উত্তৰিং অপ্পং দস ৱা ৱীসং ৱা ৱস্সানি. পুন ৱস্সসতমেৱ জীৱনকো নাম নত্থি, উত্তমকোটিযা পন সট্ঠি ৱা অসীতি ৱা ৱস্সানি জীৱন্তি. ৱস্সসতং পন অপ্পত্ৱা পঞ্চৱস্সদসৱস্সাদিকালে মীযমানাৱ বহুকা. এত্থ চ ককুসন্ধো ভগৱা চত্তালীসৱস্সসহস্সাযুককালে, কোণাগমনো তিংসৱস্সসহস্সাযুককালে নিব্বত্তোতি ইদং অনুপুব্বেন পৰিহীনসদিসং কতং, ন পন এৱং পৰিহীনং, ৱড্ঢিত্ৱা ৱড্ঢিত্ৱা পৰিহীনন্তি ৱেদিতব্বং. কথং? ককুসন্ধো তাৱ ভগৱা ইমস্মিংযেৱ কপ্পে চত্তালীসৱস্সসহস্সাযুককালে নিব্বত্তো আযুপ্পমাণং পঞ্চ কোট্ঠাসে কত্ৱা চত্তাৰো ঠত্ৱা পঞ্চমে ৱিজ্জমানেযেৱ পৰিনিব্বুতো. তং আযু পৰিহাযমানং দসৱস্সকালং পত্ৱা পুন ৱড্ঢমানং অসঙ্খেয্যং হুত্ৱা ততো পৰিহাযমানং তিংসৱস্সসহস্সাযুককালে ঠিতং, তদা কোণাগমনো নিব্বত্তো. তস্মিম্পি তথেৱ পৰিনিব্বুতে তং আযু দসৱস্সকালং পত্ৱা পুন ৱড্ঢমানং অসঙ্খেয্যং হুত্ৱা পৰিহাযিত্ৱা ৱীসৱস্সসহস্সকালে ঠিতং, তদা কস্সপো ভগৱা নিব্বত্তো. তস্মিম্পি তথেৱ পৰিনিব্বুতে তং আযু দসৱস্সকালং পত্ৱা পুন ৱড্ঢমানং অসঙ্খেয্যং হুত্ৱা পৰিহাযিত্ৱা ৱস্সসতকালং পত্তং, অথ অম্হাকং সম্মাসম্বুদ্ধো নিব্বত্তো. এৱং অনুপুব্বেন পৰিহাযিত্ৱা ৱড্ঢিত্ৱা ৱড্ঢিত্ৱা পৰিহীনন্তি ৱেদিতব্বং. তত্থ চ যং আযুপৰিমাণেসু মন্দেসু বুদ্ধা নিব্বত্তন্তি, তেসম্পি তদেৱ আযুপৰিমাণং হোতীতি. দসমং.

দুতিযো ৱগ্গো.

অনমতগ্গসংযুত্তৱণ্ণনা নিট্ঠিতা.