১০. পচ্চযসুত্তৱণ্ণনা

২০. দসমে পটিচ্চসমুপ্পাদঞ্চ ৱো ভিক্খৱে, দেসেস্সামি পটিচ্চসমুপ্পন্নে চ ধম্মেতি সত্থা ইমস্মিং সুত্তে পচ্চযে চ পচ্চযনিব্বত্তে চ সভাৱধম্মে দেসেস্সামীতি উভযং আৰভি. উপ্পাদা ৱা তথাগতানন্তি তথাগতানং উপ্পাদেপি, বুদ্ধেসু উপ্পন্নেসু অনুপ্পন্নেসুপি জাতিপচ্চযা জৰামৰণং, জাতিযেৱ জৰামৰণস্স পচ্চযো. ঠিতাৱ সা ধাতূতি ঠিতোৱ সো পচ্চযসভাৱো, ন কদাচি জাতি জৰামৰণস্স পচ্চযো ন হোতি. ধম্মট্ঠিততা ধম্মনিযামতাতি ইমেহিপি দ্ৱীহি পচ্চযমেৱ কথেতি. পচ্চযেন হি পচ্চযুপ্পন্না ধম্মা তিট্ঠন্তি, তস্মা পচ্চযোৱ ‘‘ধম্মট্ঠিততা’’তি ৱুচ্চতি. পচ্চযো ধম্মে নিযমেতি, তস্মা ‘‘ধম্মনিযামতা’’তি ৱুচ্চতি. ইদপ্পচ্চযতাতি ইমেসং জৰামৰণাদীনং পচ্চযা ইদপ্পচ্চযা, ইদপ্পচ্চযাৱ ইদপ্পচ্চযতা. তন্তি তং পচ্চযং. অভিসম্বুজ্ঝতীতি ঞাণেন অভিসম্বুজ্ঝতি. অভিসমেতীতি ঞাণেন অভিসমাগচ্ছতি. আচিক্খতীতি কথেতি. দেসেতীতি দস্সেতি. পঞ্ঞাপেতীতি জানাপেতি. পট্ঠপেতীতি ঞাণমুখে ঠপেতি. ৱিৱৰতীতি ৱিৱৰিত্ৱা দস্সেতি. ৱিভজতীতি ৱিভাগতো দস্সেতি. উত্তানীকৰোতীতি পাকটং কৰোতি. পস্সথাতি চাহাতি পস্সথ ইতি চ ৱদতি. কিন্তি? জাতিপচ্চযা, ভিক্খৱে, জৰামৰণন্তিআদি.

ইতি খো, ভিক্খৱেতি এৱং খো, ভিক্খৱে. যা তত্ৰাতি যা তেসু ‘‘জাতিপচ্চযা জৰামৰণ’’ন্তিআদীসু. তথতাতিআদীনি পচ্চযাকাৰস্সেৱ ৱেৱচনানি. সো তেহি তেহি পচ্চযেহি অনূনাধিকেহেৱ তস্স তস্স ধম্মস্স সম্ভৱতো তথতাতি, সামগ্গিং উপগতেসু পচ্চযেসু মুহুত্তম্পি ততো নিব্বত্তানং ধম্মানং অসম্ভৱাভাৱতো অৱিতথতাতি, অঞ্ঞধম্মপচ্চযেহি অঞ্ঞধম্মানুপ্পত্তিতো অনঞ্ঞথতাতি, জৰামৰণাদীনং পচ্চযতো ৱা পচ্চযসমূহতো ৱা ইদপ্পচ্চযতাতি ৱুত্তো. তত্ৰাযং ৱচনত্থো – ইমেসং পচ্চযা ইদপ্পচ্চযা, ইদপ্পচ্চযা এৱ ইদপ্পচ্চযতা, ইদপ্পচ্চযানং ৱা সমূহো ইদপ্পচ্চযতা. লক্খণং পনেত্থ সদ্দসত্থতো ৱেদিতব্বং.

অনিচ্চন্তি হুত্ৱা অভাৱট্ঠেন অনিচ্চং. এত্থ চ অনিচ্চন্তি ন জৰামৰণং অনিচ্চং, অনিচ্চসভাৱানং পন খন্ধানং জৰামৰণত্তা অনিচ্চং নাম জাতং. সঙ্খতাদীসুপি এসেৱ নযো. এত্থ চ সঙ্খতন্তি পচ্চযেহি সমাগন্ত্ৱা কতং. পটিচ্চসমুপ্পন্নন্তি পচ্চযে নিস্সায উপ্পন্নং. খযধম্মন্তি খযসভাৱং. ৱযধম্মন্তি ৱিগচ্ছনকসভাৱং. ৱিৰাগধম্মন্তি ৱিৰজ্জনকসভাৱং. নিৰোধধম্মন্তি নিৰুজ্ঝনকসভাৱং. জাতিযাপি ৱুত্তনযেনেৱ অনিচ্চতা ৱেদিতব্বা. জনকপচ্চযানং ৱা কিচ্চানুভাৱক্খণে দিট্ঠত্তা একেন পৰিযাযেনেত্থ অনিচ্চাতিআদীনি যুজ্জন্তিযেৱ. ভৱাদযো অনিচ্চাদিসভাৱাযেৱ.

সম্মপ্পঞ্ঞাযাতি সৱিপস্সনায মগ্গপঞ্ঞায. পুব্বন্তন্তি পুৰিমং অতীতন্তি অত্থো. অহোসিং নু খোতিআদীসু ‘‘অহোসিং নু খো ননু খো’’তি সস্সতাকাৰঞ্চ অধিচ্চসমুপ্পত্তিআকাৰঞ্চ নিস্সায অতীতে অত্তনো ৱিজ্জমানতঞ্চ অৱিজ্জমানতঞ্চ কঙ্খতি. কিং কাৰণন্তি ন ৱত্তব্বং, উম্মত্তকো ৱিয বালপুথুজ্জনো যথা ৱা তথা ৱা পৱত্ততি. কিং নু খো অহোসিন্তি জাতিলিঙ্গুপপত্তিযো নিস্সায ‘‘খত্তিযো নু খো অহোসিং, ব্ৰাহ্মণৱেস্সসুদ্দগহট্ঠপব্বজিতদেৱমনুস্সানং অঞ্ঞতৰো’’তি কঙ্খতি. কথং নু খোতি সণ্ঠানাকাৰং নিস্সায ‘‘দীঘো নু খো অহোসিং ৰস্সওদাতকণ্হপমাণিকঅপ্পমাণিকাদীনং অঞ্ঞতৰো’’তি কঙ্খতি. কেচি পন ‘‘ইস্সৰনিম্মানাদীনি নিস্সায ‘কেন নু খো কাৰণেন অহোসি’ন্তি হেতুতো কঙ্খতী’’তি ৱদন্তি. কিং হুত্ৱা কিং অহোসিন্তি জাতিআদীনি নিস্সায ‘‘খত্তিযো হুত্ৱা নু খো ব্ৰাহ্মণো অহোসিং…পে… দেৱো হুত্ৱা মনুস্সো’’তি অত্তনো পৰম্পৰং কঙ্খতি. সব্বত্থেৱ পন অদ্ধানন্তি কালাধিৱচনমেতং. অপৰন্তন্তি অনাগতং অন্তং. ভৱিস্সামি নু খো ননু খোতি সস্সতাকাৰঞ্চ উচ্ছেদাকাৰঞ্চ নিস্সায অনাগতে অত্তনো ৱিজ্জমানতঞ্চ অৱিজ্জমানতঞ্চ কঙ্খতি. সেসমেত্থ ৱুত্তনযমেৱ.

এতৰহি ৱা পচ্চুপ্পন্নং অদ্ধানন্তি ইদানি ৱা পটিসন্ধিমাদিং কত্ৱা চুতিপৰিযন্তং সব্বম্পি ৱত্তমানকালং গহেত্ৱা. অজ্ঝত্তং কথংকথী ভৱিস্সতীতি অত্তনো খন্ধেসু ৱিচিকিচ্ছী ভৱিস্সতি. অহং নু খোস্মীতি অত্তনো অত্থিভাৱং কঙ্খতি. যুত্তং পনেতন্তি? যুত্তং অযুত্তন্তি কা এত্থ চিন্তা. অপিচেত্থ ইদং ৱত্থুম্পি উদাহৰন্তি – চূড়মাতায কিৰ পুত্তো মুণ্ডো, মহামাতায পুত্তো অমুণ্ডো, তং পুত্তং মুণ্ডেসুং, সো উট্ঠায ‘‘অহং নু খো চূড়মাতায পুত্তো’’তি চিন্তেসি. এৱং অহং নু খোস্মীতি কঙ্খা হোতি. নো নু খোস্মীতি অত্তনো নত্থিভাৱং কঙ্খতি. তত্ৰাপি ইদং ৱত্থু – একো কিৰ মচ্ছে গণ্হন্তো উদকে চিৰট্ঠানেন সীতিভূতং অত্তনো ঊৰুং মচ্ছোতি চিন্তেত্ৱা পহৰি. অপৰো সুসানপস্সে খেত্তং ৰক্খন্তো ভীতো সঙ্কুটিতো সযি, সো পটিবুজ্ঝিত্ৱা অত্তনো জণ্ণুকানি দ্ৱে যক্খাতি চিন্তেত্ৱা পহৰি. এৱং নো নু খোস্মীতি কঙ্খতি.

কিং নু খোস্মীতি খত্তিযোৱ সমানো অত্তনো খত্তিযভাৱং কঙ্খতি. এসেৱ নযো সেসেসুপি. দেৱো পন সমানো দেৱভাৱং অজানন্তো নাম নত্থি, সোপি পন ‘‘অহং ৰূপী নু খো অৰূপী নু খো’’তিআদিনা নযেন কঙ্খতি. খত্তিযাদযো কস্মা ন জানন্তীতি চে? অপচ্চক্খা তেসং তত্থ তত্থ কুলে উপ্পত্তি. গহট্ঠাপি চ পোত্থলিকাদযো পব্বজিতসঞ্ঞিনো, পব্বজিতাপি ‘‘কুপ্পং নু খো মে কম্ম’’ন্তিআদিনা নযেন গহট্ঠসঞ্ঞিনো. মনুস্সাপি চ ৰাজানো ৱিয অত্তনি দেৱসঞ্ঞিনো হোন্তি. কথং নু খোস্মীতি ৱুত্তনযমেৱ. কেৱলঞ্হেত্থ অব্ভন্তৰে জীৱো নাম অত্থীতি গহেত্ৱা তস্স সণ্ঠানাকাৰং নিস্সায ‘‘দীঘো নু খোস্মি ৰস্সচতুৰস্সছড়ংসঅট্ঠংসসোড়সংসাদীনং অঞ্ঞতৰপ্পকাৰো’’তি কঙ্খন্তো কথং নু খোস্মীতি? কঙ্খতীতি ৱেদিতব্বো. সৰীৰসণ্ঠানং পন পচ্চুপ্পন্নং অজানন্তো নাম নত্থি. কুতো আগতো সো কুহিং গামী ভৱিস্সতীতি অত্তভাৱস্স আগতিগতিট্ঠানং কঙ্খন্তো এৱং কঙ্খতি. অৰিযসাৱকস্সাতি ইধ সোতাপন্নো অধিপ্পেতো, ইতৰেপি পন তযো অৱাৰিতাযেৱাতি. দসমং.

আহাৰৱগ্গো দুতিযো.