৫. পৰিনিব্বানসুত্তৱণ্ণনা

১৮৬. পঞ্চমে উপৱত্তনে মল্লানং সালৱনেতি যথেৱ হি কদম্বনদীতীৰতো ৰাজমাতুৱিহাৰদ্ৱাৰেন থূপাৰামং গন্তব্বং হোতি, এৱং হিৰঞ্ঞৱতিকায নাম নদিযা পাৰিমতীৰতো সালৱনং উয্যানং. যথা অনুৰাধপুৰস্স থূপাৰামো, এৱং তং কুসিনাৰায হোতি. যথা থূপাৰামতো দক্খিণদ্ৱাৰেন নগৰং পৱিসনমগ্গো পাচীনমুখো গন্ত্ৱা উত্তৰেন নিৱত্ততি, এৱং উয্যানতো সালপন্তি পাচীনমুখা গন্ত্ৱা উত্তৰেন নিৱত্তা. তস্মা তং ‘‘উপৱত্তন’’ন্তি ৱুচ্চতি. তস্মিং উপৱত্তনে মল্লানং সালৱনে. অন্তৰেন যমকসালানন্তি মূলক্খন্ধৱিটপপত্তেহি অঞ্ঞমঞ্ঞং সংসিব্বিত্ৱা ঠিতসালানং অন্তৰিকায. অপ্পমাদেন সম্পাদেথাতি সতিঅৱিপ্পৱাসেন কত্তব্বকিচ্চানি সম্পাদযথ. ইতি ভগৱা যথা নাম মৰণমঞ্চে নিপন্নো মহদ্ধনো কুটুম্বিকো পুত্তানং ধনসাৰং আচিক্খেয্য, এৱমেৱং পৰিনিব্বানমঞ্চে নিপন্নো পঞ্চচত্তালীস ৱস্সানি দিন্নং ওৱাদং সব্বং একস্মিং অপ্পমাদপদেযেৱ পক্খিপিত্ৱা অভাসি. অযং তথাগতস্স পচ্ছিমা ৱাচাতি ইদং পন সঙ্গীতিকাৰানং ৱচনং.

ইতো পৰং যং পৰিনিব্বানপৰিকম্মং কত্ৱা ভগৱা পৰিনিব্বুতো, তং দস্সেতুং, অথ খো ভগৱা পঠমং ঝানন্তিআদি ৱুত্তং. তত্থ সঞ্ঞাৱেদযিতনিৰোধং সমাপন্নে ভগৱতি অস্সাসপস্সাসানং অপ্পৱত্তিং দিস্ৱা, ‘‘পৰিনিব্বুতো সত্থা’’তি সঞ্ঞায দেৱমনুস্সা একপ্পহাৰেন ৱিৰৱিংসু, আনন্দত্থেৰোপি – ‘‘পৰিনিব্বুতো নু খো, ভন্তে, অনুৰুদ্ধ ভগৱা’’তি থেৰং পুচ্ছি. থেৰো ‘‘ন খো, আৱুসো আনন্দ, তথাগতো পৰিনিব্বুতো, অপিচ সঞ্ঞাৱেদযিতনিৰোধং সমাপন্নো’’তি আহ. কথং পন সো অঞ্ঞাসি? থেৰো কিৰ সত্থাৰা সদ্ধিংযেৱ তং তং সমাপত্তিং সমাপজ্জন্তো যাৱ নেৱসঞ্ঞানাসঞ্ঞাযতনৱুট্ঠানং, তাৱ গন্ত্ৱা, ‘‘ইদানি ভগৱা নিৰোধং সমাপন্নো, অন্তোনিৰোধে চ কালংকিৰিযা নাম নত্থী’’তি অঞ্ঞাসি.

অথ খো ভগৱা সঞ্ঞাৱেদযিতনিৰোধসমাপত্তিতো ৱুট্ঠহিত্ৱা নেৱসঞ্ঞানাসঞ্ঞাযতনং সমাপজ্জি…পে… ততিযজ্ঝানা ৱুট্ঠহিত্ৱা চতুত্থং ঝানং সমাপজ্জীতি এত্থ পন ভগৱা চতুৱীসতিযা ঠানেসু পঠমং ঝানং সমাপজ্জি, তেৰসসু ঠানেসু দুতিযং ঝানং… তথা ততিযং… পন্নৰসসু ঠানেসু চতুত্থং ঝানং সমাপজ্জি. কথং? দসসু অসুভেসু দ্ৱত্তিংসাকাৰে অট্ঠসু কসিণেসু মেত্তাকৰুণামুদিতেসু আনাপানে পৰিচ্ছেদাকাসেতি ইমেসু তাৱ চতুৱীসতিযা ঠানেসু পঠমং ঝানং সমাপজ্জি. ঠপেত্ৱা পন দ্ৱত্তিংসাকাৰঞ্চ দস চ অসুভানি সেসেসু তেৰসসু দুতিযং ঝানং… তেসুযেৱ ততিযং ঝানং সমাপজ্জি. অট্ঠসু পন কসিণেসু উপেক্খাব্ৰহ্মৱিহাৰে আনাপানে পৰিচ্ছেদাকাসে চতূসু অৰূপেসূতি ইমেসু পন্নৰসসু ঠানেসু চতুত্থং ঝানং সমাপজ্জি. অযম্পি চ সঙ্খেপকথাৱ. নিব্বানপুৰং পৱিসন্তো পন ভগৱা ধম্মস্সামি সব্বাপি চতুৱীসতিকোটিসতসহস্সসঙ্খা সমাপত্তিযো পৱিসিত্ৱা ৱিদেসং গচ্ছন্তো ঞাতিজনং আলিঙ্গেত্ৱা ৱিয সব্বসমাপত্তিসুখং অনুভৱিত্ৱা পৱিট্ঠো.

চতুত্থজ্ঝানা ৱুট্ঠহিত্ৱা সমনন্তৰা ভগৱা পৰিনিব্বাযীতি এত্থ চ ঝানসমনন্তৰং পচ্চৱেক্খণসমনন্তৰন্তি, দ্ৱে সমনন্তৰানি. চতুত্থজ্ঝানা ৱুট্ঠায ভৱঙ্গং ওতিণ্ণস্স তত্থেৱ পৰিনিব্বানং ঝানসমনন্তৰং নাম, চতুত্থজ্ঝানা ৱুট্ঠহিত্ৱা পুন ঝানঙ্গানি পচ্চৱেক্খিত্ৱা ভৱঙ্গং ওতিণ্ণস্স তত্থেৱ পৰিনিব্বানং পচ্চৱেক্খণসমনন্তৰং নাম. ইমানি দ্ৱেপি সমনন্তৰানেৱ. ভগৱা পন ঝানং সমাপজ্জিত্ৱা ঝানা ৱুট্ঠায ঝানঙ্গানি পচ্চৱেক্খিত্ৱা ভৱঙ্গচিত্তেন অব্যাকতেন দুক্খসচ্চেন পৰিনিব্বাযি. যে হি কেচি বুদ্ধা ৱা পচ্চেকবুদ্ধা ৱা অৰিযসাৱকা ৱা অন্তমসো কুন্থকিপিল্লিকং উপাদায সব্বে ভৱঙ্গচিত্তেনেৱ অব্যাকতেন দুক্খসচ্চেন কালং কৰোন্তি.

ভূতাতি সত্তা. অপ্পটিপুগ্গলোতি পটিভাগপুগ্গলৱিৰহিতো. বলপ্পত্তোতি দসৱিধং ঞাণবলং পত্তো. উপ্পাদৱযধম্মিনোতি উপ্পাদৱযসভাৱা. তেসং ৱূপসমোতি তেসং সঙ্খাৰানং ৱূপসমো. সুখোতি অসঙ্খতং নিব্বানমেৱ সুখন্তি অত্থো. তদাসীতি ‘‘সহ পৰিনিব্বানা মহাভূমিচালো অহোসী’’তি এৱং মহাপৰিনিব্বানে (দী. নি. ২.২২০) ৱুত্তং ভূমিচালং সন্ধাযাহ. সো হি লোমহংসনকো চ ভিংসনকো চ আসি. সব্বাকাৰৱৰূপেতেতি সব্বাকাৰৱৰগুণূপেতে. নাহু অস্সাসপস্সাসোতি ন জাতো অস্সাসপস্সাসো. অনেজোতি তণ্হাসঙ্খাতায এজায অভাৱেন অনেজো. সন্তিমাৰব্ভাতি অনুপাদিসেসং নিব্বানং আৰব্ভ পটিচ্চ সন্ধায. চক্খুমাতি পঞ্চহি চক্খূহি চক্খুমা. পৰিনিব্বুতোতি খন্ধপৰিনিব্বানেন পৰিনিব্বুতো. অসল্লীনেনাতি অনল্লীনেন অসঙ্কুটিতেন সুৱিকসিতেনেৱ চিত্তেন. ৱেদনং অজ্ঝৱাসযীতি ৱেদনং অধিৱাসেসি, ন ৱেদনানুৱত্তী হুত্ৱা ইতো চিতো সম্পৰিৱত্তি. ৱিমোক্খোতি কেনচি ধম্মেন অনাৱৰণৱিমোক্খো সব্বসো অপঞ্ঞত্তিভাৱূপগমো পজ্জোতনিব্বানসদিসো জাতোতি. পঞ্চমং.

দুতিযো ৱগ্গো.

ইতি সাৰত্থপ্পকাসিনিযা

সংযুত্তনিকায-অট্ঠকথায

ব্ৰহ্মসংযুত্তৱণ্ণনা নিট্ঠিতা.