৩. অন্ধকৱিন্দসুত্তৱণ্ণনা

১৮৪. ততিযে অন্ধকৱিন্দন্তি এৱংনামকং গামং. উপসঙ্কমীতি ‘‘সত্থা ইদানিপি ৱীৰিযং কৰোতি পধানমনুযুঞ্জতি, গচ্ছামিস্স সন্তিকে ঠত্ৱা সাসনানুচ্ছৱিকং ৱীৰিযপটিসংযুত্তং গাথং ৱক্খামী’’তি উপসঙ্কমি.

পন্তানীতি জনতং অতিক্কমিত্ৱা মনুস্সানং অনুপচাৰে ঠিতানি. সংযোজনৱিপ্পমোক্খাতি তানি চ সেনাসনানি সেৱমানো ন চীৱৰাদীনং অত্থায সেৱেয্য, অথ খো দসসংযোজনৱিপ্পমোক্খত্থায চৰেয্য. সঙ্ঘে ৱসেতি তেসু সেনাসনেসু ৰতিং অলভন্তো উপট্ঠাকাদীনং চিত্তানুৰক্খণত্থং গদ্ৰভপিট্ঠে ৰজং ৱিয উপ্পতন্তো অৰঞ্ঞে অচৰিত্ৱা সঙ্ঘমজ্ঝে ৱসেয্য. ৰক্খিতত্তো সতীমাতি তত্থ চ ৱসন্তো সগৱচণ্ডো গোণো ৱিয সব্ৰহ্মচাৰিনো অৱিজ্ঝন্তো অঘট্টেন্তো ৰক্খিতত্তো সতিপট্ঠানপৰাযণো হুত্ৱা ৱসেয্য.

ইদানি সঙ্ঘে ৱসমানস্স ভিক্খুনো ভিক্খাচাৰৱত্তং আচিক্খন্তো কুলাকুলন্তিআদিমাহ. তত্থ পিণ্ডিকায চৰন্তোতি পিণ্ডত্থায চৰমানো. সেৱেথ পন্তানি সেনাসনানীতি সঙ্ঘমজ্ঝং ওতৰিত্ৱা ৱসমানোপি ধুৰপৰিৱেণে তালনাড়িকেৰআদীনি ৰোপেত্ৱা উপট্ঠাকাদিসংসট্ঠো ন ৱসেয্য, চিত্তকল্লতং পন জনেত্ৱা চিত্তং হাসেত্ৱা তোসেত্ৱা পুন পন্তসেনাসনে ৱসেয্যাতি অৰঞ্ঞস্সেৱ ৱণ্ণং কথেতি. ভযাতি ৱট্টভযতো. অভযেতি নিব্বানে. ৱিমুত্তোতি অধিমুত্তো হুত্ৱা ৱসেয্য.

যত্থ ভেৰৱাতি যস্মিং ঠানে ভযজনকা সৱিঞ্ঞাণকা সীহব্যগ্ঘাদযো, অৱিঞ্ঞাণকা ৰত্তিভাগে খাণুৱল্লিআদযো বহূ অত্থি. সৰীসপাতি দীঘজাতিকাদিসৰীসপা. নিসীদি তত্থ ভিক্খূতি তাদিসে ঠানে ভিক্খু নিসিন্নো. ইমিনা ইদং দীপেতি – ভগৱা যথা তুম্হে এতৰহি তত্ৰট্ঠকভেৰৱাৰম্মণানি চেৱ সৰীসপে চ ৱিজ্জুনিচ্ছাৰণাদীনি চ অমনসিকত্ৱা নিসিন্না, এৱমেৱং পধানমনুযুত্তা ভিক্খূ নিসীদন্তীতি.

জাতু মে দিট্ঠন্তি একংসেন মযা দিট্ঠং. ন যিদং ইতিহীতিহন্তি ইদং ইতিহ ইতিহাতি ন তক্কহেতু ৱা নযহেতু ৱা পিটকসম্পদানেন ৱা অহং ৱদামি. একস্মিং ব্ৰহ্মচৰিযস্মিন্তি একায ধম্মদেসনায. ধম্মদেসনা হি ইধ ব্ৰহ্মচৰিযন্তি অধিপ্পেতা. মচ্চুহাযিনন্তি মৰণপৰিচ্চাগিনং খীণাসৱানং.

দসা চ দসধা দসাতি এত্থ দসাতি দসেৱ, দসধা দসাতি সতং, অঞ্ঞে চ দসুত্তৰং সেখসতং পস্সামীতি ৱদতি. সোতসমাপন্নাতি মগ্গসোতং সমাপন্না. অতিৰচ্ছানগামিনোতি দেসনামত্তমেতং, অৱিনিপাতধম্মাতি অত্থো. সঙ্খাতুং নোপি সক্কোমীতি মুসাৱাদভযেন এত্তকা নাম পুঞ্ঞভাগিনো সত্তাতি গণেতুং ন সক্কোমীতি বহুং ব্ৰহ্মধম্মদেসনং সন্ধায এৱমাহ. ততিযং.