৪. পঠমসঙ্গামসুত্তৱণ্ণনা

১২৫. চতুত্থে ৱেদেহিপুত্তোতি ৱেদেহীতি পণ্ডিতাধিৱচনমেতং, পণ্ডিতিত্থিযা পুত্তোতি অত্থো. চতুৰঙ্গিনিন্তি হত্থিঅস্সৰথপত্তিসঙ্খাতেহি চতূহি অঙ্গেহি সমন্নাগতং. সন্নয্হিত্ৱাতি চম্মপটিমুঞ্চনাদীহি সন্নাহং কাৰেত্ৱা. সঙ্গামেসুন্তি যুজ্ঝিংসু. কেন কাৰণেন? মহাকোসলৰঞ্ঞা কিৰ বিম্বিসাৰস্স ধীতৰং দেন্তেন দ্ৱিন্নং ৰজ্জানং অন্তৰে সতসহস্সুট্ঠানো কাসিগামো নাম ধীতু দিন্নো. অজাতসত্তুনা চ পিতৰি মাৰিতে মাতাপিস্স ৰঞ্ঞো ৱিযোগসোকেন নচিৰস্সেৱ মতা. ততো ৰাজা পসেনদি কোসলো – ‘‘অজাতসত্তুনা মাতাপিতৰো মাৰিতা, ময্হং পিতু সন্তকো গামো’’তি তস্সত্থায অড্ডং কৰোতি. অজাতসত্তুপি ‘‘ময্হং মাতু সন্তকো’’তি তস্স গামস্সত্থায দ্ৱেপি মাতুলভাগিনেয্যা যুজ্ঝিংসু.

পাপা দেৱদত্তাদযো মিত্তা অস্সাতি পাপমিত্তো. তেযেৱস্স সহাযাতি পাপসহাযো. তেস্ৱেৱস্স চিত্তং নিন্নং সম্পৱঙ্কন্তি পাপসম্পৱঙ্কো. পসেনদিস্স সাৰিপুত্তত্থেৰাদীনং ৱসেন কল্যাণমিত্তাদিতা ৱেদিতব্বা. দুক্খং সেতীতি জিতানি হত্থিআদীনি অনুসোচন্তো দুক্খং সযিস্সতি. ইদং ভগৱা পুন তস্স জযকাৰণং দিস্ৱা আহ. জযং ৱেৰং পসৱতীতি জিনন্তো ৱেৰং পসৱতি, ৱেৰিপুগ্গলং লভতি. চতুত্থং.