২. ছন্নোৱাদসুত্তৱণ্ণনা

৩৮৯. এৱং মে সুতন্তি ছন্নোৱাদসুত্তং. তত্থ ছন্নোতি এৱংনামকো থেৰো, ন অভিনিক্খমনং নিক্খন্তত্থেৰো. পটিসল্লানাতি ফলসমাপত্তিতো. গিলানপুচ্ছকাতি গিলানুপট্ঠানং নাম বুদ্ধৱণ্ণিতং, তস্মা এৱমাহ. সত্থন্তি জীৱিতহাৰকসত্থং. নাৱকঙ্খামীতি ইচ্ছামি.

৩৯০. অনুপৱজ্জন্তি অনুপ্পত্তিকং অপ্পটিসন্ধিকং.

৩৯১. এতং মমাতিআদীনি তণ্হামানদিট্ঠিগাহৱসেন ৱুত্তানি. নিৰোধং দিস্ৱাতি খযৱযং ঞত্ৱা. নেতং মম নেসোহমস্মি ন মেসো অত্তাতি সমনুপস্সামীতি অনিচ্চং দুক্খং অনত্তাতি সমনুপস্সামি.

৩৯৩. তস্মাতি যস্মা মাৰণন্তিকৱেদনং অধিৱাসেতুং অসক্কোন্তো সত্থং আহৰামীতি ৱদতি, তস্মা. পুথুজ্জনো আযস্মা, তেন ইদম্পি মনসি কৰোহীতি দীপেতি. নিচ্চকপ্পন্তি নিচ্চকালং. নিস্সিতস্সাতি তণ্হাদিট্ঠীহি নিস্সিতস্স. চলিতন্তি ৱিপ্ফন্দিতং হোতি. পস্সদ্ধীতি কাযচিত্তপস্সদ্ধি, কিলেসপস্সদ্ধি নাম হোতীতি অত্থো. নতীতি তণ্হানতি. নতিযা অসতীতি ভৱত্থায আলযনিকন্তিপৰিযুট্ঠানেসু অসতি. আগতিগতি ন হোতীতি পটিসন্ধিৱসেন আগতি নাম ন হোতি, চুতিৱসেন গমনং নাম ন হোতি. চুতূপপাতোতি চৱনৱসেন চুতি, উপপজ্জনৱসেন উপপাতো. নেৱিধ ন হুৰং ন উভযমন্তৰেনাতি নযিধ লোকে, ন পৰলোকে, ন উভযত্থ হোতি. এসেৱন্তো দুক্খস্সাতি ৱট্টদুক্খকিলেসদুক্খস্স অযমেৱ অন্তো অযং পৰিচ্ছেদো পৰিৱটুমভাৱো হোতি. অযমেৱ হি এত্থ অত্থো. যে পন ‘‘ন উভযমন্তৰেনা’’তি ৱচনং গহেত্ৱা অন্তৰাভৱং ইচ্ছন্তি, তেসং উত্তৰং হেট্ঠা ৱুত্তমেৱ.

৩৯৪. সত্থং আহৰেসীতি জীৱিতহাৰকং সত্থং আহৰি, কণ্ঠনাড়িং ছিন্দি. অথস্স তস্মিং খণে মৰণভযং ওক্কমি, গতিনিমিত্তং উপট্ঠাসি. সো অত্তনো পুথুজ্জনভাৱং ঞত্ৱা সংৱিগ্গো ৱিপস্সনং পট্ঠপেত্ৱা সঙ্খাৰে পৰিগ্গণ্হন্তো অৰহত্তং পত্ৱা সমসীসী হুত্ৱা পৰিনিব্বাযি. সম্মুখাযেৱ অনুপৱজ্জতা ব্যাকতাতি কিঞ্চাপি ইদং থেৰস্স পুথুজ্জনকালে ব্যাকৰণং হোতি, এতেন পন ব্যাকৰণেন অনন্তৰাযমস্স পৰিনিব্বানং অহোসি. তস্মা ভগৱা তমেৱ ব্যাকৰণং গহেত্ৱা কথেসি. উপৱজ্জকুলানীতি উপসঙ্কমিতব্বকুলানি. ইমিনা থেৰো, – ‘‘ভন্তে, এৱং উপট্ঠাকেসু চ উপট্ঠাযিকাসু চ ৱিজ্জমানাসু সো ভিক্খু তুম্হাকং সাসনে পৰিনিব্বাযিস্সতী’’তি পুচ্ছতি. অথস্স ভগৱা কুলেসু সংসগ্গাভাৱং দীপেন্তো হোন্তি হেতে সাৰিপুত্তাতিআদিমাহ. ইমস্মিং কিৰ ঠানে থেৰস্স কুলেসু অসংসট্ঠভাৱো পাকটো অহোসি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

ছন্নোৱাদসুত্তৱণ্ণনা নিট্ঠিতা.