৯. কাযগতাসতিসুত্তৱণ্ণনা

১৫৩-৪. এৱং মে সুতন্তি কাযগতাসতিসুত্তং. তত্থ গেহসিতাতি পঞ্চকামগুণনিস্সিতা. সৰসঙ্কপ্পাতি ধাৱনসঙ্কপ্পা. সৰন্তীতি হি সৰা, ধাৱন্তীতি অত্থো. অজ্ঝত্তমেৱাতি গোচৰজ্ঝত্তস্মিংযেৱ. কাযগতাসতিন্তি কাযপৰিগ্গাহিকম্পি কাযাৰম্মণম্পি সতিং. কাযপৰিগ্গাহিকন্তি ৱুত্তে সমথো কথিতো হোতি, কাযাৰম্মণন্তি ৱুত্তে ৱিপস্সনা. উভযেন সমথৱিপস্সনা কথিতা হোন্তি.

পুন চপৰং…পে… এৱম্পি, ভিক্খৱে, ভিক্খু কাযগতাসতিং ভাৱেতীতি সতিপট্ঠানে চুদ্দসৱিধেন কাযানুপস্সনা কথিতা.

১৫৬. অন্তোগধাৱাস্সাতি তস্স ভিক্খুনো ভাৱনায অব্ভন্তৰগতাৱ হোন্তি. ৱিজ্জাভাগিযাতি এত্থ সম্পযোগৱসেন ৱিজ্জং ভজন্তীতি ৱিজ্জাভাগিযা. ৱিজ্জাভাগে ৱিজ্জাকোট্ঠাসে ৱত্তন্তীতিপি ৱিজ্জাভাগিযা. তত্থ ৱিপস্সনাঞাণং, মনোমযিদ্ধি, ছ অভিঞ্ঞাতি অট্ঠ ৱিজ্জা. পুৰিমেন অত্থেন তাহি সম্পযুত্তধম্মাপি ৱিজ্জাভাগিযা. পচ্ছিমেন অত্থেন তাসু যা কাচি একা ৱিজ্জা ৱিজ্জা, সেসা ৱিজ্জাভাগিযাতি এৱং ৱিজ্জাপি ৱিজ্জায সম্পযুত্তা ধম্মাপি ৱিজ্জাভাগিযাতেৱ ৱেদিতব্বা. চেতসা ফুটোতি এত্থ দুৱিধং ফৰণং আপোফৰণঞ্চ, দিব্বচক্খুফৰণঞ্চ, তত্থ আপোকসিণং সমাপজ্জিত্ৱা আপেন ফৰণং আপোফৰণং নাম. এৱং ফুটেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৱ হোন্তি, আলোকং পন ৱড্ঢেত্ৱা দিব্বচক্খুনা সকলসমুদ্দস্স দস্সনং দিব্বচক্খুফৰণং নাম. এৱং ফৰণেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৱ হোন্তি.

ওতাৰন্তি ৱিৱৰং ছিদ্দং. আৰম্মণন্তি কিলেসুপ্পত্তিপচ্চযং. লভেথ ওতাৰন্তি লভেয্য পৱেসনং, ৱিনিৱিজ্ঝিত্ৱা যাৱ পৰিযোসানা গচ্ছেয্যাতি অত্থো. নিক্খেপনন্তি নিক্খিপনট্ঠানং.

১৫৭. এৱং অভাৱিতকাযগতাসতিং পুগ্গলং অল্লমত্তিকপুঞ্জাদীহি উপমেত্ৱা ইদানি ভাৱিতকাযগতাসতিং সাৰফলকাদীহি উপমেতুং সেয্যথাপীতিআদিমাহ. তত্থ অগ্গড়ফলকন্তি কৱাটং.

১৫৮. কাকপেয্যোতি মুখৱট্টিযং নিসীদিত্ৱা কাকেন গীৱং অনামেত্ৱাৱ পাতব্বো. অভিঞ্ঞাসচ্ছিকৰণীযস্সাতি অভিঞ্ঞায সচ্ছিকাতব্বস্স. সক্খিভব্বতং পাপুণাতীতি পচ্চক্খভাৱং পাপুণাতি. সতি সতি আযতনেতি সতিসতি কাৰণে. কিং পনেত্থ কাৰণন্তি? অভিঞ্ঞাৱ কাৰণং. আড়িবন্ধাতি মৰিযাদবদ্ধা.

যানীকতাযাতি যুত্তযানং ৱিয কতায. ৱত্থুকতাযাতি পতিট্ঠাকতায. অনুট্ঠিতাযাতি অনুপ্পৱত্তিতায. পৰিচিতাযাতি পৰিচযকতায. সুসমাৰদ্ধাযাতি সুট্ঠু সমাৰদ্ধায সুসম্পগ্গহিতায. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

কাযগতাসতিসুত্তৱণ্ণনা নিট্ঠিতা.