১০. সঙ্খাৰুপপত্তিসুত্তৱণ্ণনা

১৬০. এৱং মে সুতন্তি সঙ্খাৰুপপত্তিসুত্তং. তত্থ সঙ্খাৰুপপত্তিন্তি সঙ্খাৰানংযেৱ উপপত্তিং, ন সত্তস্স, ন পোসস্স, পুঞ্ঞাভিসঙ্খাৰেন ৱা ভৱূপগক্খন্ধানং উপপত্তিং.

১৬১. সদ্ধায সমন্নাগতোতি সদ্ধাদযো পঞ্চ ধম্মা লোকিকা ৱট্টন্তি. দহতীতি ঠপেতি. অধিট্ঠাতীতি পতিট্ঠাপেতি. সঙ্খাৰা চ ৱিহাৰা চাতি সহ পত্থনায সদ্ধাদযোৱ পঞ্চ ধম্মা. তত্ৰুপপত্তিযাতি তস্মিং ঠানে নিব্বত্তনত্থায. অযং মগ্গো অযং পটিপদাতি সহ পত্থনায পঞ্চ ধম্মাৱ. যস্স হি পঞ্চ ধম্মা অত্থি, ন পত্থনা, তস্স গতি অনিবদ্ধা. যস্স পত্থনা অত্থি, ন পঞ্চ ধম্মা, তস্সপি অনিবদ্ধা. যেসং উভযং অত্থি, তেসং গতি নিবদ্ধা. যথা হি আকাসে খিত্তদণ্ডো অগ্গেন ৱা মজ্ঝেন ৱা মূলেন ৱা নিপতিস্সতীতি নিযমো নত্থি, এৱং সত্তানং পটিসন্ধিগ্গহণং অনিযতং. তস্মা কুসলং কম্মং কত্ৱা একস্মিং ঠানে পত্থনং কাতুং ৱট্টতি.

১৬৫. আমণ্ডন্তি আমলকং. যথা তং পৰিসুদ্ধচক্খুস্স পুৰিসস্স সব্বসোৱ পাকটং হোতি, এৱং তস্স ব্ৰহ্মুনো সদ্ধিং তত্থ নিব্বত্তসত্তেহি সহস্সী লোকধাতু. এস নযো সব্বত্থ.

১৬৭. সুভোতি সুন্দৰো. জাতিমাতি আকৰসম্পন্নো. সুপৰিকম্মকতোতি ধোৱনাদীহি সুট্ঠুকতপৰিকম্মো. পণ্ডুকম্বলে নিক্খিত্তোতি ৰত্তকম্বলে ঠপিতো.

১৬৮. সতসহস্সোতি লোকধাতুসতসহস্সম্হি আলোকফৰণব্ৰহ্মা. নিক্খন্তি নিক্খেন কতং পিড়ন্ধনং, নিক্খং নাম পঞ্চসুৱণ্ণং, ঊনকনিক্খেন কতং পসাধনঞ্হি ঘট্টনমজ্জনক্খমং ন হোতি, অতিৰেকেন কতং ঘট্টনমজ্জনং খমতি, ৱণ্ণৱন্তং পন ন হোতি, ফৰুসধাতুকং খাযতি. নিক্খেন কতং ঘট্টনমজ্জনঞ্চেৱ খমতি, ৱণ্ণৱন্তঞ্চ হোতি. জম্বোনদন্তি জম্বুনদিযং নিব্বত্তং. মহাজম্বুৰুক্খস্স হি একেকা সাখা পণ্ণাস পণ্ণাস যোজনানি ৱড্ঢিতা, তাসু মহন্তা নদিযো সন্দন্তি, তাসং নদীনং উভযতীৰেসু জম্বুপক্কানং পতিতট্ঠানে সুৱণ্ণঙ্কুৰা উট্ঠহন্তি, তে নদীজলেন ৱুয্হমানা অনুপুব্বেন মহাসমুদ্দং পৱিসন্তি. তং সন্ধায জম্বোনদন্তি ৱুত্তং. দক্খকম্মাৰপুত্তউক্কামুখসুকুসলসম্পহট্ঠন্তি দক্খেন সুকুসলেন কম্মাৰপুত্তেন উক্কামুখে পচিত্ৱা সম্পহট্ঠং. উক্কামুখেতি উদ্ধনে. সম্পহট্ঠন্তি ধোতঘট্টিতমজ্জিতং. ৱত্থোপমে (ম. নি. ১.৭৫-৭৬) চ ধাতুৱিভঙ্গে (ম. নি. ৩.৩৫৭-৩৬০) চ পিণ্ডসোধনং ৱুত্তং. ইমস্মিং সুত্তে কতভণ্ডসোধনং ৱুত্তং.

যং পন সব্বৱাৰেসু ফৰিত্ৱা অধিমুচ্চিত্ৱাতি ৱুত্তং, তত্থ পঞ্চৱিধং ফৰণং চেতোফৰণং কসিণফৰণং দিব্বচক্খুফৰণং আলোকফৰণং সৰীৰফৰণন্তি. তত্থ চেতোফৰণং নাম লোকধাতুসহস্সে সত্তানং চিত্তজাননং. কসিণফৰণং নাম লোকধাতুসহস্সে কসিণপত্থৰণং. দিব্বচক্খুফৰণং নাম আলোকং ৱড্ঢেত্ৱা দিব্বেন চক্খুনা সহস্সলোকধাতুদস্সনং. আলোকফৰণম্পি এতদেৱ. সৰীৰফৰণং নাম লোকধাতুসহস্সে সৰীৰপভায পত্থৰণং. সব্বত্থ ইমানি পঞ্চ ফৰণানি অৱিনাসেন্তেন কথেতব্বন্তি.

তিপিটকচূড়াভযত্থেৰো পনাহ – ‘‘মণিওপম্মে কসিণফৰণং ৱিয নিক্খোপম্মে সৰীৰফৰণং ৱিয দিস্সতী’’তি. তস্স ৱাদং ৱিয অট্ঠকথা নাম নত্থীতি পটিক্খিত্ৱা সৰীৰফৰণং ন সব্বকালিকং, চত্তাৰিমানি ফৰণানি অৱিনাসেত্ৱাৱ কথেতব্বন্তি ৱুত্তং. অধিমুচ্চতীতি পদং ফৰণপদস্সেৱ ৱেৱচনং, অথ ৱা ফৰতীতি পত্থৰতি. অধিমুচ্চতীতি জানাতি.

১৬৯. আভাতিআদীসু আভাদযো নাম পাটিযেক্কা দেৱা নত্থি, তযো পৰিত্তাভাদযো দেৱা আভা নাম, পৰিত্তাসুভাদযো চ. সুভকিণ্হাদযো চ সুভা নাম. ৱেহপ্ফলাদিৱাৰা পাকটাযেৱ.

ইমে তাৱ পঞ্চ ধম্মে ভাৱেত্ৱা কামাৱচৰেসু নিব্বত্ততু. ব্ৰহ্মলোকে নিব্বত্তং পন আসৱক্খযঞ্চ কথং পাপুণাতীতি? ইমে পঞ্চ ধম্মা সীলং, সো ইমস্মিং সীলে পতিট্ঠায কসিণপৰিকম্মং কত্ৱা তা তা সমাপত্তিযো ভাৱেত্ৱা ৰূপীব্ৰহ্মলোকে নিব্বত্ততি, অৰূপজ্ঝানানি নিব্বত্তেত্ৱা অৰূপীব্ৰহ্মলোকে, সমাপত্তিপদট্ঠানং ৱিপস্সনং ৱড্ঢেত্ৱা অনাগামিফলং সচ্ছিকত্ৱা পঞ্চসু সুদ্ধাৱাসেসু নিব্বত্ততি. উপৰিমগ্গং ভাৱেত্ৱা আসৱক্খযং পাপুণাতীতি.

পপঞ্চসূদনিযা মজ্ঝিমনিকাযট্ঠকথায

সঙ্খাৰুপপত্তিসুত্তৱণ্ণনা নিট্ঠিতা.

দুতিযৱগ্গৱণ্ণনা নিট্ঠিতা.