৬. ইসিগিলিসুত্তৱণ্ণনা

১৩৩. এৱং মে সুতন্তি ইসিগিলিসুত্তং. তত্থ অঞ্ঞাৱ সমঞ্ঞা অহোসীতি ইসিগিলিস্স ইসিগিলীতি সমঞ্ঞায উপ্পন্নকালে ৱেভাৰো ন ৱেভাৰোতি পঞ্ঞাযিত্থ, অঞ্ঞাযেৱস্স সমঞ্ঞা অহোসি. অঞ্ঞা পঞ্ঞত্তীতি ইদং পুৰিমপদস্সেৱ ৱেৱচনং. সেসেসুপি এসেৱ নযো.

তদা কিৰ ভগৱা সাযন্হসমযে সমাপত্তিতো ৱুট্ঠায গন্ধকুটিতো নিক্খমিত্ৱা যস্মিং ঠানে নিসিন্নানং পঞ্চ পব্বতা পঞ্ঞাযন্তি, তত্থ ভিক্খুসঙ্ঘপৰিৱুতো নিসীদিত্ৱা ইমে পঞ্চ পব্বতে পটিপাটিযা আচিক্খি. তত্থ ন ভগৱতো পব্বতেহি অত্থো অত্থি, ইতি ইমেসু পন পব্বতেসু পটিপাটিযা কথিযমানেসু ইসিগিলিস্স ইসিগিলিভাৱো কথেতব্বো হোতি. তস্মিং কথিযমানে পদুমৱতিযা পুত্তানং পঞ্চসতানং পচ্চেকবুদ্ধানং নামানি চেৱ পদুমৱতিযা চ পত্থনা কথেতব্বা ভৱিস্সতীতি ভগৱা ইমং পঞ্চ পব্বতপটিপাটিং আচিক্খি.

পৱিসন্তা দিস্সন্তি পৱিট্ঠা ন দিস্সন্তীতি যথাফাসুকট্ঠানে পিণ্ডায চৰিত্ৱা কতভত্তকিচ্চা আগন্ত্ৱা চেতিযগব্ভে যমকমহাদ্ৱাৰং ৱিৱৰন্তা ৱিয তং পব্বতং দ্ৱেধা কত্ৱা অন্তো পৱিসিত্ৱা ৰত্তিট্ঠানদিৱাট্ঠানানি মাপেত্ৱা তত্থ ৱসিংসু, তস্মা এৱমাহ. ইমে ইসীতি ইমে পচ্চেকবুদ্ধইসী.

কদা পন তে তত্থ ৱসিংসু? অতীতে কিৰ অনুপ্পন্নে তথাগতে বাৰাণসিং উপনিস্সায একস্মিং গামকে একা কুলধীতা খেত্তং ৰক্খমানা একস্স পচ্চেকবুদ্ধস্স পঞ্চহি লাজাসতেহি সদ্ধিং একং পদুমপুপ্ফং দত্ৱা পঞ্চ পুত্তসতানি পত্থেসি. তস্মিংযেৱ চ খণে পঞ্চসতা মিগলুদ্দকা মধুৰমংসং দত্ৱা ‘‘এতিস্সা পুত্তা ভৱেয্যামা’’তি পত্থযিংসু. সা যাৱতাযুকং ঠত্ৱা দেৱলোকে নিব্বত্তা, ততো চুতা জাতস্সৰে পদুমগব্ভে নিব্বত্তি. তমেকো তাপসো দিস্ৱা পটিজগ্গি, তস্সা ৱিচৰন্তিযাৱ পাদুদ্ধাৰে পাদুদ্ধাৰে ভূমিতো পদুমানি উট্ঠহন্তি. একো ৱনচৰকো দিস্ৱা বাৰাণসিৰঞ্ঞো আৰোচেসি. ৰাজা নং আহৰাপেত্ৱা অগ্গমহেসিং অকাসি, তস্সা গব্ভো সণ্ঠাসি. মহাপদুমকুমাৰো মাতুকুচ্ছিযং ৱসি, সেসা গব্ভমলং নিস্সা নিব্বত্তা. ৱযপ্পত্তা উয্যানে পদুমস্সৰে কীড়ন্তা একেকস্মিং পদুমে নিসীদিত্ৱা খযৱযং পট্ঠপেত্ৱা পচ্চেকবোধিঞাণং নিব্বত্তযিংসু. অযং তেসং ব্যাকৰণগাথা অহোসি –

‘‘সৰোৰুহং পদুমপলাসপত্তজং, সুপুপ্ফিতং ভমৰগণানুচিণ্ণং;

অনিচ্চতাযুপগতং ৱিদিত্ৱা, একো চৰে খগ্গৱিসাণকপ্পো’’তি.

তস্মিং কালে তে তত্থ ৱসিংসু, তদা চস্স পব্বতস্স ইসিগিলীতি সমঞ্ঞা উদপাদি.

১৩৫. যে সত্তসাৰাতি অৰিট্ঠো উপৰিট্ঠো তগৰসিখী যসস্সী সুদস্সনো পিযদস্সী গন্ধাৰো পিণ্ডোলো উপাসভো নীতো তথো সুতৱা ভাৱিতত্তোতি তেৰসন্নং পচ্চেকবুদ্ধানং নামানি ৱত্ৱা ইদানি তেসঞ্চ অঞ্ঞেসঞ্চ গাথাবন্ধেন নামানি আচিক্খন্তো যে সত্তসাৰাতিআদিমাহ. তত্থ সত্তসাৰাতি সত্তানং সাৰভূতা. অনীঘাতি নিদ্দুক্খা. নিৰাসাতি নিত্তণ্হা.

দ্ৱে জালিনোতি চূড়জালি মহাজালীতি দ্ৱে জালিনামকা. সন্তচিত্তোতি ইদম্পি একস্স নামমেৱ. পস্সি জহি উপধিদুক্খমূলন্তি এত্থ পস্সি নাম সো পচ্চেকবুদ্ধো, দুক্খস্স পন মূলং উপধিং জহীতি অযমস্স থুতি. অপৰাজিতোতিপি একস্স নামমেৱ.

সত্থা পৱত্তা সৰভঙ্গো লোমহংসো উচ্চঙ্গমাযোতি ইমে পঞ্চ জনা. অসিতো অনাসৱো মনোমযোতি ইমেপি তযো জনা. মানচ্ছিদো চ বন্ধুমাতি বন্ধুমা নাম একো, মানস্স পন ছিন্নত্তা মানচ্ছিদোতি ৱুত্তো. তদাধিমুত্তোতিপি নামমেৱ.

কেতুম্ভৰাগো চ মাতঙ্গো অৰিযোতি ইমে তযো জনা. অথচ্চুতোতি অথ অচ্চুতো. অচ্চুতগামব্যামঙ্কোতি ইমে দ্ৱে জনা. খেমাভিৰতো চ সোৰতোতি ইমে দ্ৱেযেৱ.

সয্হো অনোমনিক্কমোতি সয্হো নাম সো বুদ্ধো, অনোমৱীৰিযত্তা পন অনোমনিক্কমোতি ৱুত্তো. আনন্দো নন্দো উপনন্দো দ্ৱাদসাতি চত্তাৰো আনন্দা, চত্তাৰো নন্দা চত্তাৰো উপনন্দাতি এৱং দ্ৱাদস. ভাৰদ্ৱাজো অন্তিমদেহধাৰীতি ভাৰদ্ৱাজো নাম সো বুদ্ধো. অন্তিমদেহধাৰীতি থুতি.

তণ্হচ্ছিদোতি সিখৰিস্সাযং থুতি. ৱীতৰাগোতি মঙ্গলস্স থুতি. উসভচ্ছিদা জালিনিং দুক্খমূলন্তি উসভো নাম সো বুদ্ধো দুক্খমূলভূতং জালিনিং অচ্ছিদাতি অত্থো. সন্তং পদং অজ্ঝগমোপনীতোতি উপনীতো নাম সো বুদ্ধো সন্তং পদং অজ্ঝগমা. ৱীতৰাগোতিপি একস্স নামমেৱ. সুৱিমুত্তচিত্তোতি অযং কণ্হস্স থুতি.

এতে চ অঞ্ঞে চাতি এতে পাড়িযং আগতা চ পাড়িযং অনাগতা অঞ্ঞে চ এতেসং একনামকাযেৱ. ইমেসু হি পঞ্চসু পচ্চেকবুদ্ধসতেসু দ্ৱেপি তযোপি দসপি দ্ৱাদসপি আনন্দাদযো ৱিয একনামকা অহেসুং. ইতি পাড়িযং আগতনামেহেৱ সব্বেসং নামানি ৱুত্তানি হোন্তীতি ইতো পৰং ৱিসুং ৱিসুং অৱত্ৱা ‘‘এতে চ অঞ্ঞে চা’’তি আহ. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

ইসিগিলিসুত্তৱণ্ণনা নিট্ঠিতা.