৮. গোপকমোগ্গল্লানসুত্তৱণ্ণনা

৭৯. এৱং মে সুতন্তি গোপকমোগ্গল্লানসুত্তং. তত্থ অচিৰপৰিনিব্বুতে ভগৱতীতি ভগৱতি অচিৰপৰিনিব্বুতে, ধাতুভাজনীযং কত্ৱা ধম্মসঙ্গীতিং কাতুং ৰাজগহং আগতকালে. ৰঞ্ঞো পজ্জোতস্স আসঙ্কমানোতি চণ্ডপজ্জোতো নামেস ৰাজা বিম্বিসাৰমহাৰাজস্স সহাযো অহোসি, জীৱকং পেসেত্ৱা ভেসজ্জকাৰিতকালতো পট্ঠায পন দড়্হমিত্তোৱ জাতো, সো ‘‘অজাতসত্তুনা দেৱদত্তস্স ৱচনং গহেত্ৱা পিতা ঘাতিতো’’তি সুত্ৱা ‘‘মম পিযমিত্তং ঘাতেত্ৱা এস ৰজ্জং কৰিস্সামীতি মঞ্ঞতি, ময্হং সহাযস্স সহাযানং অত্থিকভাৱং জানাপেস্সামী’’তি পৰিসতি ৱাচং অভাসি. তং সুত্ৱা তস্স আসঙ্কা উপ্পন্না. তেন ৱুত্তং ‘‘ৰঞ্ঞো পজ্জোতস্স আসঙ্কমানো’’তি. কম্মন্তোতি বহিনগৰে নগৰপটিসঙ্খাৰাপনত্থায কম্মন্তট্ঠানং.

উপসঙ্কমীতি মযং ধম্মৱিনযসঙ্গীতিং কাৰেস্সামাতি ৱিচৰাম, অযঞ্চ মহেসক্খো ৰাজৱল্লভো সঙ্গহে কতে ৱেড়ুৱনস্স আৰক্খং কৰেয্যাতি মঞ্ঞমানো উপসঙ্কমি. তেহি ধম্মেহীতি তেহি সব্বঞ্ঞুতঞ্ঞাণধম্মেহি. সব্বেন সব্বন্তি সব্বাকাৰেন সব্বং. সব্বথা সব্বন্তি সব্বকোট্ঠাসেহি সব্বং. কিং পুচ্ছামীতি পুচ্ছতি? ছ হি সত্থাৰো পঠমতৰং অপ্পঞ্ঞাতকুলেহি নিক্খমিত্ৱা পব্বজিতা, তে তথাগতে ধৰমানেযেৱ কালংকতা, সাৱকাপি নেসং অপ্পঞ্ঞাতকুলেহেৱ পব্বজিতা. তে তেসং অচ্চযেন মহাৱিৱাদং অকংসু. সমণো পন গোতমো মহাকুলা পব্বজিতো, তস্স অচ্চযেন সাৱকানং মহাৱিৱাদো ভৱিস্সতীতি অযং কথা সকলজম্বুদীপং পত্থৰমানা উদপাদি. সম্মাসম্বুদ্ধে চ ধৰন্তে ভিক্খূনং ৱিৱাদো নাহোসি. যোপি অহোসি, সোপি তত্থেৱ ৱূপসমিতো. পৰিনিব্বুতকালে পনস্স – ‘‘অট্ঠসট্ঠিযোজনসতসহস্সুব্বেধং সিনেৰুং অপৱাহিতুং সমত্থস্স ৱাতস্স পুৰতো পুৰাণপণ্ণং কিং ঠস্সতি, দস পাৰমিযো পূৰেত্ৱা সব্বঞ্ঞুতঞ্ঞাণং পত্তস্স সত্থু অলজ্জমানো মচ্চুৰাজা কস্স লজ্জিস্সতী’’তি মহাসংৱেগং জনেত্ৱা ভিয্যোসোমত্তায ভিক্খূ সমগ্গা জাতা অতিৱিয উপসন্তুপসন্তা, কিং নু খো এতন্তি ইদং পুচ্ছামীতি পুচ্ছতি. অনুসঞ্ঞাযমানোতি অনুসঞ্জাযমানো, কতাকতং জনন্তোতি অত্থো. অনুৱিচৰমানো ৱা.

৮০. অত্থি নু খোতি অযম্পি হেট্ঠিমপুচ্ছমেৱ পুচ্ছতি. অপ্পটিসৰণেতি অপ্পটিসৰণে ধম্মৱিনযে. কো হেতু সামগ্গিযাতি তুম্হাকং সমগ্গভাৱস্স কো হেতু কো পচ্চযো. ধম্মপ্পটিসৰণাতি ধম্মো অম্হাকং পটিসৰণং, ধম্মো অৱস্সযোতি দীপেতি.

৮১. পৱত্ততীতি পগুণং হুত্ৱা আগচ্ছতি. আপত্তি হোতি ৱীতিক্কমোতি উভযমেতং বুদ্ধস্স আণাতিক্কমনমেৱ. যথাধম্মং যথানুসিট্ঠং কাৰেমাতি যথা ধম্মো চ অনুসিট্ঠি চ ঠিতা, এৱং কাৰেমাতি অত্থো.

ন কিৰ নো ভৱন্তো কাৰেন্তি ধম্মো নো কাৰেতীতি পদদ্ৱযেপি নো কাৰো নিপাতমত্তং. এৱং সন্তে ন কিৰ ভৱন্তো কাৰেন্তি, ধম্মোৱ কাৰেতীতি অযমেত্থ অত্থো.

৮৩. তগ্ঘাতি একংসে নিপাতো. কহং পন ভৱং আনন্দোতি কিং থেৰস্স ৱেড়ুৱনে ৱসনভাৱং ন জানাতীতি? জানাতি. ৱেড়ুৱনস্স পন অনেন আৰক্খা দিন্না, তস্মা অত্তানং উক্কংসাপেতুকামো পুচ্ছতি. কস্মা পন তেন তত্থ আৰক্খা দিন্না? সো কিৰ একদিৱসং মহাকচ্চাযনত্থেৰং গিজ্ঝকূটা ওতৰন্তং দিস্ৱা – ‘‘মক্কটো ৱিয এসো’’তি আহ. ভগৱা তং কথং সুত্ৱা – ‘‘সচে খমাপেতি, ইচ্চেতং কুসলং. নো চে খমাপেতি, ইমস্মিং ৱেড়ুৱনে গোনঙ্গলমক্কটো ভৱিস্সতী’’তি আহ. সো তং কথং সুত্ৱা – ‘‘সমণস্স গোতমস্স কথায দ্ৱেধাভাৱো নাম নত্থি, পচ্ছা মে মক্কটভূতকালে গোচৰট্ঠানং ভৱিস্সতী’’তি ৱেড়ুৱনে নানাৱিধে ৰুক্খে ৰোপেত্ৱা আৰক্খং অদাসি. অপৰভাগে কালং কত্ৱা মক্কটো হুত্ৱা নিব্বত্তি. ‘‘ৱস্সকাৰা’’তি ৱুত্তে আগন্ত্ৱা সমীপে অট্ঠাসি. তগ্ঘাতি সব্বৱাৰেসু একংসৱচনেযেৱ নিপাতো. তগ্ঘ, ভো আনন্দাতি এৱং থেৰেন পৰিসমজ্ঝে অত্তনো উক্কংসিতভাৱং ঞত্ৱা অহম্পি থেৰং উক্কংসিস্সামীতি এৱমাহ.

৮৪. ন চ খো, ব্ৰাহ্মণাতি থেৰো কিৰ চিন্তেসি ‘‘সম্মাসম্বুদ্ধেন ৱণ্ণিতজ্ঝানম্পি অত্থি, অৱণ্ণিতজ্ঝানম্পি অত্থি, অযং পন ব্ৰাহ্মণো সব্বমেৱ ৱণ্ণেতীতি পঞ্হং ৱিসংৱাদেতি, ন খো পন সক্কা ইমস্স মুখং উল্লোকেতুং ন পিণ্ডপাতং ৰক্খিতুং, পঞ্হং উজুং কত্ৱা কথেস্সামী’’তি ইদং ৱত্তুং আৰদ্ধং. অন্তৰং কৰিত্ৱাতি অব্ভন্তৰং কৰিত্ৱা. এৱৰূপং খো, ব্ৰাহ্মণ, সো ভগৱা ঝানং ৱণ্ণেসীতি ইধ সব্বসঙ্গাহকজ্ঝানং নাম কথিতং.

যং নো মযন্তি অযং কিৰ ব্ৰাহ্মণো ৱস্সকাৰব্ৰাহ্মণং উসূযতি, তেন পুচ্ছিতপঞ্হস্স অকথনং পচ্চাসীসমানো কথিতভাৱং ঞত্ৱা ‘‘ৱস্সকাৰেন পুচ্ছিতং পঞ্হং পুনপ্পুনং তস্স নামং গণ্হন্তো ৱিত্থাৰেত্ৱা কথেসি, মযা পুচ্ছিতপঞ্হং পন যট্ঠিকোটিযা উপ্পীড়েন্তো ৱিয একদেসমেৱ কথেসী’’তি অনত্তমনো অহোসি, তস্মা এৱমাহ. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

গোপকমোগ্গল্লানসুত্তৱণ্ণনা নিট্ঠিতা.