৭. গণকমোগ্গল্লানসুত্তৱণ্ণনা

৭৪. এৱং মে সুতন্তি গণকমোগ্গল্লানসুত্তং. তত্থ যাৱ পচ্ছিমসোপানকড়েৱৰাতি যাৱ পঠমসোপানফলকা একদিৱসেনেৱ সত্তভূমিকো পাসাদো ন সক্কা কাতুং, ৱত্থুং সোধেত্ৱা থম্ভুস্সাপনতো পট্ঠায পন যাৱ চিত্তকম্মকৰণা অনুপুব্বকিৰিযা চেত্থ পঞ্ঞাযতীতি দস্সেতি. যদিদং অজ্ঝেনেতি তযোপি ৱেদা ন সক্কা একদিৱসেনেৱ অধীযিতুং, এতেসং অজ্ঝেনেপি পন অনুপুব্বকিৰিযাৱ পঞ্ঞাযতীতি দস্সেতি. ইস্সত্থেতি আৱুধৱিজ্জাযপি একদিৱসেনেৱ ৱালৱেধি নাম ন সক্কা কাতুং, ঠানসম্পাদনমুট্ঠিকৰণাদীহি পন এত্থাপি অনুপুব্বকিৰিযা পঞ্ঞাযতীতি দস্সেতি. সঙ্খানেতি গণনায. তত্থ অনুপুব্বকিৰিযং অত্তনাৱ দস্সেন্তো এৱং গণাপেমাতিআদিমাহ.

৭৫. সেয্যথাপি ব্ৰাহ্মণাতি ইধ ভগৱা যস্মা বাহিৰসমযে যথা যথা সিপ্পং উগ্গণ্হন্তি, তথা তথা কেৰাটিকা হোন্তি, তস্মা অত্তনো সাসনং বাহিৰসমযেন অনুপমেত্ৱা ভদ্ৰঅস্সাজানীযেন উপমেন্তো সেয্যথাপীতিআদিমাহ. ভদ্ৰো হি অস্সাজানীযো যস্মিং কাৰণে দমিতো হোতি, তং জীৱিতহেতুপি নাতিক্কমতি. এৱমেৱ সাসনে সম্মাপটিপন্নো কুলপুত্তো সীলৱেলং নাতিক্কমতি. মুখাধানেতি মুখট্ঠপনে.

৭৬. সতিসম্পজঞ্ঞায চাতি সতিসম্পজঞ্ঞাহি সমঙ্গিভাৱত্থায. দ্ৱে হি খীণাসৱা সততৱিহাৰী চ নোসততৱিহাৰী চ. তত্থ সততৱিহাৰী যংকিঞ্চি কম্মং কত্ৱাপি ফলসমাপত্তিং সমাপজ্জিতুং সক্কোতি, নো সততৱিহাৰী পন অপ্পমত্তকেপি কিচ্চে কিচ্চপ্পসুতো হুত্ৱা ফলসমাপত্তিং অপ্পেতুং ন সক্কোতি.

তত্ৰিদং ৱত্থু – একো কিৰ খীণাসৱত্থেৰো খীণাসৱসামণেৰং গহেত্ৱা অৰঞ্ঞৱাসং গতো, তত্থ মহাথেৰস্স সেনাসনং পত্তং, সামণেৰস্স ন পাপুণাতি, তং ৱিতক্কেন্তো থেৰো একদিৱসম্পি ফলসমাপত্তিং অপ্পেতুং নাসক্খি. সামণেৰো পন তেমাসং ফলসমাপত্তিৰতিযা ৱীতিনামেত্ৱা ‘‘সপ্পাযো, ভন্তে, অৰঞ্ঞৱাসো জাতো’’তি থেৰং পুচ্ছি. থেৰো ‘‘ন জাতো, আৱুসো’’তি আহ. ইতি যো এৱৰূপো খীণাসৱো, সো ইমে ধম্মে আদিতো পট্ঠায আৱজ্জিত্ৱাৱ সমাপজ্জিতুং সক্খিস্সতীতি দস্সেন্তো ‘‘সতিসম্পজঞ্ঞায চা’’তি আহ.

৭৮. যেমে, ভো গোতমাতি তথাগতে কিৰ কথযন্তেৱ ব্ৰাহ্মণস্স ‘‘ইমে পুগ্গলা ন আৰাধেন্তি, ইমে আৰাধেন্তী’’তি নযো উদপাদি, তং দস্সেন্তো এৱং ৱত্তুমাৰদ্ধো.

পৰমজ্জধম্মেসূতি অজ্জধম্মা নাম ছসত্থাৰধম্মা, তেসু গোতমৱাদোৱ, পৰমো উত্তমোতি অত্থো. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

গণকমোগ্গল্লানসুত্তৱণ্ণনা নিট্ঠিতা.