৫. সুনক্খত্তসুত্তৱণ্ণনা

৫৫. এৱং মে সুতন্তি সুনক্খত্তসুত্তং. তত্থ অঞ্ঞাতি অৰহত্তং. ব্যাকতাতি খীণা জাতীতিআদীহি চতূহি পদেহি কথিতা. অধিমানেনাতি অপ্পত্তে পত্তসঞ্ঞিনো, অনধিগতে অধিগতসঞ্ঞিনো হুত্ৱা অধিগতং অম্হেহীতি মানেন ব্যাকৰিংসু.

৫৬. এৱঞ্চেত্থ সুনক্খত্ত তথাগতস্স হোতীতি সুনক্খত্ত এত্থ এতেসং ভিক্খূনং পঞ্হব্যাকৰণে – ‘‘ইদং ঠানং এতেসং অৱিভূতং অন্ধকাৰং, তেনিমে অনধিগতে অধিগতসঞ্ঞিনো, হন্দ নেসং ৱিসোধেত্ৱা পাকটং কত্ৱা ধম্মং দেসেমী’’তি, এৱঞ্চ তথাগতস্স হোতি. অথ চ পনিধেকচ্চে…পে… তস্সপি হোতি অঞ্ঞথত্তন্তি ভগৱা পটিপন্নকানং ধম্মং দেসেতি. যত্থ পন ইচ্ছাচাৰে ঠিতা একচ্চে মোঘপুৰিসা হোন্তি, তত্ৰ ভগৱা পস্সতি – ‘‘ইমে ইমং পঞ্হং উগ্গহেত্ৱা অজানিত্ৱাৱ জানন্তা ৱিয অপ্পত্তে পত্তসঞ্ঞিনো হুত্ৱা গামনিগমাদীসু ৱিসেৱমানা ৱিচৰিস্সন্তি, তং নেসং ভৱিস্সতি দীঘৰত্তং অহিতায দুক্খাযা’’তি এৱমস্সাযং ইচ্ছাচাৰে ঠিতানং কাৰণা পটিপন্নকানম্পি অত্থায ‘‘ধম্মং দেসিস্সামী’’তি উপ্পন্নস্স চিত্তস্স অঞ্ঞথাভাৱো হোতি. তং সন্ধাযেতং ৱুত্তং.

৫৮. লোকামিসাধিমুত্তোতি ৱট্টামিস-কামামিস-লোকামিসভূতেসু পঞ্চসু কামগুণেসু অধিমুত্তো তন্নিন্নো তগ্গৰুকো তপ্পব্ভাৰো. তপ্পতিৰূপীতি কামগুণসভাগা. আনেঞ্জপটিসংযুত্তাযাতি আনেঞ্জসমাপত্তিপটিসংযুত্তায. সংসেয্যাতি কথেয্য. আনেঞ্জসংযোজনেন হি খো ৱিসংযুত্তোতি আনেঞ্জসমাপত্তিসংযোজনেন ৱিসংসট্ঠো. লোকামিসাধিমুত্তোতি এৱৰূপো হি লূখচীৱৰধৰো মত্তিকাপত্তং আদায অত্তনো সদিসেহি কতিপযেহি সদ্ধিং পচ্চন্তজনপদং গচ্ছতি, গামং পিণ্ডায পৱিট্ঠকালে মনুস্সা দিস্ৱা ‘‘মহাপংসুকুলিকা আগতা’’তি যাগুভত্তাদীনি সম্পাদেত্ৱা সক্কচ্চং দানং দেন্তি, ভত্তকিচ্চে নিট্ঠিতে অনুমোদনং সুত্ৱা – ‘‘স্ৱেপি, ভন্তে, ইধেৱ পিণ্ডায পৱিসথা’’তি ৱদন্তি. অলং উপাসকা, অজ্জাপি ৱো বহূনং দিন্নন্তি. তেন হি, ভন্তে, অন্তোৱস্সং ইধ ৱসেয্যাথাতি অধিৱাসেত্ৱা ৱিহাৰমগ্গং পুচ্ছিত্ৱা ৱিহাৰং গচ্ছন্তি. তত্থ সেনাসনং গহেত্ৱা পত্তচীৱৰং পটিসামেন্তি. সাযং একো আৱাসিকো তে ভিক্খূ পুচ্ছতি ‘‘কত্থ পিণ্ডায চৰিত্থা’’তি? অসুকগামেতি. ভিক্খাসম্পন্নাতি? আম এৱৰূপা নাম মনুস্সানং সদ্ধা হোতি. ‘‘অজ্জেৱ নু খো এতে এদিসা, নিচ্চম্পি এদিসা’’তি? সদ্ধা তে মনুস্সা নিচ্চম্পি এদিসা, তে নিস্সাযেৱ অযং ৱিহাৰো ৱড্ঢতীতি. ততো তে পংসুকুলিকা পুনপ্পুনং তেসং ৱণ্ণং কথেন্তি, দিৱসাৱসেসং কথেত্ৱা ৰত্তিম্পি কথেন্তি. এত্তাৱতা ইচ্ছাচাৰে ঠিতস্স সীসং নিক্খন্তং হোতি উদৰং ফালিতং. এৱং লোকামিসাধিমুত্তো ৱেদিতব্বো.

৫৯. ইদানি আনেঞ্জসমাপত্তিলাভিং অধিমানিকং দস্সেন্তো ঠানং খো পনেতন্তিআদিমাহ. আনেঞ্জাধিমুত্তস্সাতি কিলেসসিঞ্চনৱিৰহিতাসু হেট্ঠিমাসু ছসু সমাপত্তীসু অধিমুত্তস্স তন্নিন্নস্স তগ্গৰুনো তপ্পব্ভাৰস্স. সে পৱুত্তেতি তং পৱুত্তং. ছ সমাপত্তিলাভিনো হি অধিমানিকস্স পঞ্চকামগুণামিসবন্ধনা পতিতপণ্ডুপলাসো ৱিয উপট্ঠাতি. তেনেতং ৱুত্তং.

৬০. ইদানি আকিঞ্চঞ্ঞাযতনসমাপত্তি লাভিনো অধিমানিকস্স নিঘংসং দস্সেতুং ঠানং খো পনাতিআদিমাহ. তত্থ দ্ৱেধা ভিন্নাতি মজ্ঝে ভিন্না. অপ্পটিসন্ধিকাতি খুদ্দকা মুট্ঠিপাসাণমত্তা জতুনা ৱা সিলেসেন ৱা অল্লীযাপেত্ৱা পটিসন্ধাতুং সক্কা. মহন্তং পন কুটাগাৰপ্পমাণং সন্ধাযেতং ৱুত্তং. সে ভিন্নেতি তং ভিন্নং. উপৰি সমাপত্তিলাভিনো হি হেট্ঠাসমাপত্তি দ্ৱেধাভিন্না সেলা ৱিয হোতি, তং সমাপজ্জিস্সামীতি চিত্তং ন উপ্পজ্জতি. তেনেতং ৱুত্তং.

৬১. ইদানি নেৱসঞ্ঞানাসঞ্ঞাযতনলাভিনো অধিমানিকস্স চ নিঘংসং দস্সেন্তো ঠানং খো পনাতিআদিমাহ. তত্থ সে ৱন্তেতি তং ৱন্তং. অট্ঠসমাপত্তিলাভিনো হি হেট্ঠাসমাপত্তিযো ৱন্তসদিসা হুত্ৱা উপট্ঠহন্তি, পুন সমাপজ্জিস্সামীতি চিত্তং ন উপ্পজ্জতি. তেনেতং ৱুত্তং.

৬২. ইদানি খীণাসৱস্স নিঘংসং দস্সেন্তো ঠানং খো পনাতিআদিমাহ. তত্থ সে উচ্ছিন্নমূলেতি সো উচ্ছিন্নমূলো. উপৰি সমাপত্তিলাভিনো হি হেট্ঠাসমাপত্তি মূলচ্ছিন্নতালো ৱিয উপট্ঠাতি, তং সমাপজ্জিস্সামীতি চিত্তং ন উপ্পজ্জতি. তেনেতং ৱুত্তং.

৬৩. ঠানং খো পনাতি পাটিযেক্কো অনুসন্ধি. হেট্ঠা হি সমাপত্তিলাভিনো অধিমানিকস্সপি খীণাসৱস্সপি নিঘংসো কথিতো, সুক্খৱিপস্সকস্স পন অধিমানিকস্সপি খীণাসৱস্সপি ন কথিতো. তেসং দ্ৱিন্নম্পি নিঘংসং দস্সেতুং ইমং দেসনং আৰভি. তং পন পটিক্খিত্তং. সমাপত্তিলাভিনো হি অধিমানিকস্স নিঘংসে কথিতে সুক্খৱিপস্সকস্সপি অধিমানিকস্স কথিতোৱ হোতি, সমাপত্তিলাভিনো চ খীণাসৱস্স কথিতে সুক্খৱিপস্সকখীণাসৱস্স কথিতোৱ হোতি. এতেসং পন দ্ৱিন্নং ভিক্খূনং সপ্পাযাসপ্পাযং কথেতুং ইমং দেসনং আৰভি.

তত্থ সিযা – পুথুজ্জনস্স তাৱ আৰম্মণং অসপ্পাযং হোতু, খীণাসৱস্স কথং অসপ্পাযন্তি. যদগ্গেন পুথুজ্জনস্স অসপ্পাযং, তদগ্গেন খীণাসৱস্সাপি অসপ্পাযমেৱ. ৱিসং নাম জানিত্ৱা খাদিতম্পি অজানিত্ৱা খাদিতম্পি ৱিসমেৱ. ন হি খীণাসৱেনপি ‘‘অহং খীণাসৱো’’তি অসংৱুতেন ভৱিতব্বং. খীণাসৱেনপি যুত্তপযুত্তেনেৱ ভৱিতুং ৱট্টতি.

৬৪. তত্থ সমণেনাতি বুদ্ধসমণেন. ছন্দৰাগব্যাপাদেনাতি সো অৱিজ্জাসঙ্খাতো ৱিসদোসো ছন্দৰাগেন চ ব্যাপাদেন চ ৰুপ্পতি কুপ্পতি. অসপ্পাযানীতি অৱড্ঢিকৰানি আৰম্মণানি. অনুদ্ধংসেয্যাতি সোসেয্য মিলাপেয্য. সউপাদিসেসন্তি সগহণসেসং, উপাদিতব্বং গণ্হিতব্বং ইধ উপাদীতি ৱুত্তং. অনলঞ্চ তে অন্তৰাযাযাতি জীৱিতন্তৰাযং তে কাতুং অসমত্থং. ৰজোসূকন্তি ৰজো চ ৱীহিসুকাদি চ সূকং. অসু চ ৱিসদোসোতি সো চ ৱিসদোসো. তদুভযেনাতি যা সা অসপ্পাযকিৰিযা চ যো ৱিসদোসো চ, তেন উভযেন. পুথুত্তন্তি মহন্তভাৱং.

এৱমেৱ খোতি এত্থ সউপাদানসল্লুদ্ধাৰো ৱিয অপ্পহীনো অৱিজ্জাৱিসদোসো দট্ঠব্বো, অসপ্পাযকিৰিযায ঠিতভাৱো ৱিয ছসু দ্ৱাৰেসু অসংৱুতকালো, তদুভযেন ৱণে পুথুত্তং গতে মৰণং ৱিয সিক্খং পচ্চক্খায হীনাযাৱত্তনং, মৰণমত্তং দুক্খং ৱিয অঞ্ঞতৰায গৰুকায সংকিলিট্ঠায আপত্তিযা আপজ্জনং দট্ঠব্বং. সুক্কপক্খেপি ইমিনাৱ নযেন ওপম্মসংসন্দনং ৱেদিতব্বং.

৬৫. সতিযাযেতং অধিৱচনন্তি এত্থ সতি পঞ্ঞাগতিকা. লোকিকায পঞ্ঞায লোকিকা হোতি, লোকুত্তৰায লোকুত্তৰা. অৰিযাযেতং পঞ্ঞাযাতি পৰিসুদ্ধায ৱিপস্সনাপঞ্ঞায.

ইদানি খীণাসৱস্স বলং দস্সেন্তো সো ৱতাতিআদিমাহ. তত্থ সংৱুতকাৰীতি পিহিতকাৰী. ইতি ৱিদিত্ৱা নিৰুপধীতি এৱং জানিত্ৱা কিলেসুপধিপহানা নিৰুপধি হোতি, নিৰুপাদানোতি অত্থো. উপধিসঙ্খযে ৱিমুত্তোতি উপধীনং সঙ্খযভূতে নিব্বানে আৰম্মণতো ৱিমুত্তো. উপধিস্মিন্তি কামুপধিস্মিং. কাযং উপসংহৰিস্সতীতি কাযং অল্লীযাপেস্সতি. ইদং ৱুত্তং হোতি – তণ্হক্খযে নিব্বানে আৰম্মণতো ৱিমুত্তো খীণাসৱো পঞ্চ কামগুণে সেৱিতুং, কাযং ৱা উপসংহৰিস্সতি চিত্তং ৱা উপ্পাদেস্সতীতি নেতং ঠানং ৱিজ্জতি. সেসং সব্বত্থ উত্তানত্থমেৱাতি.

পপঞ্চসূদনিযা মজ্ঝিমনিকাযট্ঠকথায

সুনক্খত্তসুত্তৱণ্ণনা নিট্ঠিতা.