৭. ধনঞ্জানিসুত্তৱণ্ণনা

৪৪৫. এৱং মে সুতন্তি ধনঞ্জানিসুত্তং. তত্থ দক্খিণাগিৰিস্মিন্তি গিৰীতি পব্বতো, ৰাজগহং পৰিক্খিপিত্ৱা ঠিতপব্বতস্স দক্খিণদিসাভাগে জনপদস্সেতং নামং. তণ্ডুলপালিদ্ৱাৰাযাতি ৰাজগহস্স কিৰ দ্ৱত্তিংসমহাদ্ৱাৰানি চতুসট্ঠিখুদ্দকদ্ৱাৰানি, তেসু একং তণ্ডুলপালিদ্ৱাৰং নাম, তং সন্ধাযেৱমাহ. ৰাজানং নিস্সাযাতি ‘‘গচ্ছ মনুস্সে অপীড়েত্ৱা সস্সভাগং গণ্হাহী’’তি ৰঞ্ঞা পেসিতো গন্ত্ৱা সব্বমেৱ সস্সং গণ্হাতি, ‘‘মা নো, ভন্তে, নাসেহী’’তি চ ৱুত্তে – ‘‘ৰাজকুলে ৱুত্তং মন্দং, অহং ৰঞ্ঞা আগমনকালেযেৱ এৱং আণত্তো, মা কন্দিত্থা’’তি এৱং ৰাজানং নিস্সায ব্ৰাহ্মণগহপতিকে ৱিলুম্পতি. ধঞ্ঞং যেভুয্যেন অত্তনো ঘৰং পৱেসেত্ৱা অপ্পকং ৰাজকুলে পৱেসেতি. কিং ব্ৰাহ্মণগহপতিকানং ন পীড়ং অকাসীতি চ ৱুত্তো – ‘‘আম, মহাৰাজ, ইমস্মিং ৱাৰে খেত্তানি মন্দসস্সানি অহেসুং, তস্মা অপীড়েন্তস্স মে গণ্হতো ন বহুং জাত’’ন্তি এৱং ব্ৰাহ্মণগহপতিকে নিস্সায ৰাজানং ৱিলুম্পতি.

৪৪৬. পযো পীযতন্তি তৰুণখীৰং পিৱতু. তাৱ ভত্তস্সাতি যাৱ খীৰং পিৱিত্ৱা নিসীদিস্সথ, তাৱদেৱ ভত্তস্স কালো ভৱিস্সতি. ইধেৱ হি নো পাতৰাসভত্তং আহৰিস্সন্তীতি দস্সেতি. মাতাপিতৰোতিআদীসু মহল্লকা মাতাপিতৰো মুদুকানি অত্থৰণপাৱুৰণানি সুখুমানি ৱত্থানি মধুৰভোজনং সুগন্ধগন্ধমালাদীনি চ পৰিযেসিত্ৱা পোসেতব্বা. পুত্তধীতানং নামকৰণমঙ্গলাদীনি সব্বকিচ্চানি কৰোন্তেন পুত্তদাৰো পোসেতব্বো. এৱঞ্হি অকৰিযমানে গৰহা উপ্পজ্জতীতি ইমিনা নযেন অত্থো ৱেদিতব্বো.

৪৪৭. অধম্মচাৰীতি পঞ্চ দুস্সীল্যকম্মানি ৱা দস দুস্সীল্যকম্মানি ৱা ইধ অধম্মো নাম. উপকড্ঢেয্যুন্তি পঞ্চৱিধবন্ধনাদিকম্মকৰণত্থং তং তং নিৰযং কড্ঢেয্যুং.

৪৪৮. ধম্মচাৰীতি ধম্মিকসিৱৱিজ্জাদিকম্মকাৰী. পটিক্কমন্তীতি ওসৰন্তি পৰিহাযন্তি. অভিক্কমন্তীতি অভিসৰন্তি ৱড্ঢন্তি. সেয্যোতি ৱৰতৰং. হীনেতি নিহীনে লামকে. কালঙ্কতো চ সাৰিপুত্তাতি ইদং ভগৱা ‘‘তত্ৰস্স গন্ত্ৱা দেসেহী’’তি অধিপ্পাযেন থেৰমাহ. থেৰোপি তংখণংযেৱ গন্ত্ৱা মহাব্ৰহ্মুনো ধম্মং দেসেসি, ততো পট্ঠায চাতুপ্পদিকং গাথং কথেন্তোপি চতুসচ্চৱিমুত্তং নাম ন কথেসীতি.

পপঞ্চসূদনিযা মজ্ঝিমনিকাযট্ঠকথায

ধনঞ্জানিসুত্তৱণ্ণনা নিট্ঠিতা.