৪. ঘোটমুখসুত্তৱণ্ণনা

৪১২. এৱং মে সুতন্তি ঘোটমুখসুত্তং. তত্থ খেমিযম্বৱনেতি এৱংনামকে অম্বৱনে. ধম্মিকো পৰিব্বজোতি ধম্মিকা পব্বজ্জা. অদস্সনাতি তুম্হাদিসানং ৱা পণ্ডিতানং অদস্সনেন. যো ৱা পনেত্থ ধম্মোতি যো ৱা পন এত্থ ধম্মো সভাৱো, তস্সেৱ ৱা অদস্সনেন. ইমিনা ‘‘অম্হাকং কথা অপ্পমাণং, ধম্মোৱ পমাণ’’ন্তি দস্সেতি. ততো থেৰো ‘‘নৱউপোসথাগাৰে ৱিয বহুনা কম্মেন ইধ ভৱিতব্ব’’ন্তি চিন্তেত্ৱা চঙ্কমা ওৰুয্হ পণ্ণসালং পৱিসিত্ৱা নিসীদি. তং দস্সেতুং এৱং ৱুত্তেতিআদি ৱুত্তং.

৪১৩. চত্তাৰোমে ব্ৰাহ্মণাতি থেৰস্স কিৰ এতদহোসি – ‘‘অযং ব্ৰাহ্মণো ‘ধম্মিকং পব্বজ্জং উপগতো সমণো ৱা ব্ৰাহ্মণো ৱা নত্থী’তি ৱদতি. ইমস্স চত্তাৰো পুগ্গলে দ্ৱে চ পৰিসা দস্সেত্ৱা ‘চতুত্থং পুগ্গলং কতৰায পৰিসায বহুলং পস্সসী’তি পুচ্ছিস্সামি, জানমানো ‘অনাগাৰিযপৰিসায’ন্তি ৱক্খতি. এৱমেতং সকমুখেনেৱ ‘ধম্মিকো পৰিব্বজো অত্থী’তি ৱদাপেস্সামী’’তি ইমং দেসনং আৰভি.

৪১৪. তত্থ সাৰত্তৰত্তাতি সুট্ঠু ৰত্তৰত্তা. সানুগ্গহা ৱাচা ভাসিতা সকাৰণা ৱাচা ভাসিতা. ৱুত্তঞ্হেতং মযা ‘‘অম্হাকং কথা অপ্পমাণং, ধম্মোৱ পমাণ’’ন্তি.

৪২১. কিং পন তেতি গিহি নাম কপ্পিযম্পি অকপ্পিযম্পি ৱদেয্যাতি ৱিৱেচনত্থং পুচ্ছি. কাৰাপেসীতি মাপেসি. কাৰাপেত্ৱা চ পন কালং কত্ৱা সগ্গে নিব্বত্তো. এতস্স কিৰ জাননসিপ্পে মাতৰম্পি পিতৰম্পি ঘাতেত্ৱা অত্তাৱ ঘাতেতব্বোতি আগচ্ছতি. এতং সিপ্পং জানন্তো ঠপেত্ৱা এতং অঞ্ঞো সগ্গে নিব্বত্তো নাম নত্থি, এস পন থেৰং উপনিস্সায পুঞ্ঞং কত্ৱা তত্থ নিব্বত্তিত্ৱা চ পন ‘‘কেনাহং কম্মেন ইধ নিব্বত্তো’’তি আৱজ্জেত্ৱা যথাভূতং ঞত্ৱা একদিৱসং জিণ্ণায ভোজনসালায পটিসঙ্খৰণত্থং সঙ্ঘে সন্নিপতিতে মনুস্সৱেসেন আগন্ত্ৱা পুচ্ছি – ‘‘কিমত্থং, ভন্তে, সঙ্ঘো সন্নিপতিতো’’তি? ভোজনসালায পটিসঙ্খৰণত্থন্তি. কেনেসা কাৰিতাতি? ঘোটমুখেনাতি. ইদানি সো কুহিন্তি? কালঙ্কতোতি. অত্থি পনস্স কোচি ঞাতকোতি? অত্থি একা ভগিনীতি. পক্কোসাপেথ নন্তি. ভিক্খূ পক্কোসাপেসুং. সো তং উপসঙ্কমিত্ৱা – ‘‘অহং, তৱ ভাতা, ঘোটমুখো নাম ইমং সালং কাৰেত্ৱা সগ্গে নিব্বত্তো, অসুকে চ অসুকে চ ঠানে মযা ঠপিতং ধনং অত্থি, তং গহেত্ৱা ইমঞ্চ ভোজনসালং কাৰেহি, দাৰকে চ পোসেহী’’তি ৱত্ৱা ভিক্খুসঙ্ঘং ৱন্দিত্ৱা ৱেহাসং উপ্পতিত্ৱা দেৱলোকমেৱ অগমাসি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

ঘোটমুখসুত্তৱণ্ণনা নিট্ঠিতা.