৩. অস্সলাযনসুত্তৱণ্ণনা

৪০১. এৱং মে সুতন্তি অস্সলাযনসুত্তং. তত্থ নানাৱেৰজ্জকানন্তি অঙ্গমগধাদীহি নানপ্পকাৰেহি ৱেৰজ্জেহি আগতানং, তেসু ৱা ৰট্ঠেসু জাতসংৱড্ঢানন্তিপি অত্থো. কেনচিদেৱাতি যঞ্ঞুপাসনাদিনা অনিযমিতকিচ্চেন. চাতুৱণ্ণিন্তি চতুৱণ্ণসাধাৰণং. মযং পন ন্হানসুদ্ধিযা ভাৱনাসুদ্ধিযাপি ব্ৰাহ্মণাৱ সুজ্ঝন্তীতি ৱদাম, অযুত্তম্পি সমণো গোতমো কৰোতীতি মঞ্ঞমানা এৱং চিন্তযিংসু. ৱুত্তসিৰোতি ৱাপিতসিৰো.

ধম্মৱাদীতি সভাৱৱাদী. দুপ্পটিমন্তিযাতি অম্হাদিসেহি অধম্মৱাদীহি দুক্খেন পটিমন্তিতব্বা হোন্তি. ধম্মৱাদিনো নাম পৰাজযো ন সক্কা কাতুন্তি দস্সেতি. পৰিব্বাজকন্তি পব্বজ্জাৱিধানং, তযো ৱেদে উগ্গহেত্ৱা সব্বপচ্ছা পব্বজন্তা যেহি মন্তেহি পব্বজন্তি, পব্বজিতা চ যে মন্তে পৰিহৰন্তি, যং ৱা আচাৰং আচৰন্তি, তং সব্বং ভোতা চৰিতং সিক্খিতং. তস্মা তুয্হং পৰাজযো নত্থি, জযোৱ ভৱিস্সতীতি মঞ্ঞন্তা এৱমাহংসু.

৪০২. দিস্সন্তি খো পনাতিআদি তেসং লদ্ধিভিন্দনত্থং ৱুত্তং. তত্থ ব্ৰাহ্মণিযোতি ব্ৰাহ্মণানং পুত্তপটিলাভত্থায আৱাহৱিৱাহৱসেন কুলা আনীতা ব্ৰাহ্মণিযো দিস্সন্তি. তা খো পনেতা অপৰেন সমযেন উতুনিযোপি হোন্তি, সঞ্জাতপুপ্ফাতি অত্থো. গব্ভিনিযোতি সঞ্জাতগব্ভা. ৱিজাযমানাতি পুত্তধীতৰো জনযমানা. পাযমানাতি দাৰকে থঞ্ঞং পাযন্তিযো. যোনিজাৱ সমানাতি ব্ৰাহ্মণীনং পস্সাৱমগ্গেন জাতা সমানা. এৱমাহংসূতি এৱং ৱদন্তি. কথং? ব্ৰাহ্মণোৱ সেট্ঠো ৱণ্ণো…পে… ব্ৰহ্মদাযাদাতি. যদি পন নেসং সচ্চৱচনং সিযা, ব্ৰাহ্মণীনং কুচ্ছি মহাব্ৰহ্মুনো উৰো ভৱেয্য, ব্ৰাহ্মণীনং পস্সাৱমগ্গো মহাব্ৰহ্মুনো মুখং ভৱেয্য, এত্তাৱতা ‘‘মযং মহাব্ৰহ্মুনো উৰে ৱসিত্ৱা মুখতো নিক্খন্তা’’তি ৱত্তুং মা লভন্তূতি অযং মুখতো জাতচ্ছেদকৱাদো ৱুত্তো.

৪০৩. অয্যো হুত্ৱা দাসো হোতি, দাসো হুত্ৱা অয্যো হোতীতি ব্ৰাহ্মণো সভৰিযো ৱণিজ্জং পযোজেন্তো যোনকৰট্ঠং ৱা কম্বোজৰট্ঠং ৱা গন্ত্ৱা কালং কৰোতি, তস্স গেহে ৱযপ্পত্তে পুত্তে অসতি ব্ৰাহ্মণী দাসেন ৱা কম্মকৰেন ৱা সদ্ধিং সংৱাসং কপ্পেতি. একস্মিং দাৰকে জাতে সো পুৰিসো দাসোৱ হোতি, তস্স জাতদাৰকো পন দাযজ্জসামিকো হোতি. মাতিতো সুদ্ধো পিতিতো অসুদ্ধো সো ৱণিজ্জং পযোজেন্তো মজ্ঝিমপদেসং গন্ত্ৱা ব্ৰাহ্মণদাৰিকং গহেত্ৱা তস্সা কুচ্ছিস্মিং পুত্তং পটিলভতি, সোপি মাতিতোৱ সুদ্ধো হোতি পিতিতো অসুদ্ধো. এৱং ব্ৰাহ্মণসমযস্মিঞ্ঞেৱ জাতিসম্ভেদো হোতীতি দস্সনত্থমেতং ৱুত্তং. কিং বলং, কো অস্সাসোতি যত্থ তুম্হে দাসা হোন্তা সব্বেৱ দাসা হোথ, অয্যা হোন্তা সব্বেৱ অয্যা হোথ, এত্থ ৱো কো থামো, কো অৱস্সযো, যং ব্ৰাহ্মণোৱ সেট্ঠো ৱণ্ণোতি ৱদথাতি দীপেতি.

৪০৪. খত্তিযোৱ নু খোতিআদযো সুত্তচ্ছেদকৱাদা নাম হোন্তি.

৪০৮. ইদানি চাতুৱণ্ণিসুদ্ধিং দস্সেন্তো ইধ ৰাজাতিআদিমাহ. সাপানদোণিযাতি সুনখানং পিৱনদোণিযা. অগ্গিকৰণীযন্তি সীতৱিনোদনঅন্ধকাৰৱিধমনভত্তপচনাদি অগ্গিকিচ্চং. এত্থ অস্সলাযনাতি এত্থ সব্বস্মিং অগ্গিকিচ্চং কৰোন্তে.

৪০৯. ইদানি যদেতং ব্ৰাহ্মণা চাতুৱণ্ণিসুদ্ধীতি ৱদন্তি, এত্থ চাতুৱণ্ণাতি নিযমো নত্থি. পঞ্চমো হি পাদসিকৱণ্ণোপি অত্থীতি সংখিত্তেন তেসং ৱাদে দোসদস্সনত্থং ইধ খত্তিযকুমাৰোতিআদিমাহ. তত্ৰ অমুত্ৰ চ পনেসানন্তি অমুস্মিঞ্চ পন পুৰিমনযে এতেসং মাণৱকানং কিঞ্চি নানাকৰণং ন পস্সামীতি ৱদতি. নানাকৰণং পন তেসম্পি অত্থিযেৱ. খত্তিযকুমাৰস্স হি ব্ৰাহ্মণকঞ্ঞায উপ্পন্নো খত্তিযপাদসিকো নাম, ইতৰো ব্ৰাহ্মণপাদসিকো নাম, এতে হীনজাতিমাণৱকা.

এৱং পঞ্চমস্স ৱণ্ণস্স অত্থিতায চাতুৱণ্ণিসুদ্ধীতি এতেসং ৱাদে দোসং দস্সেত্ৱা ইদানি পুন চাতুৱণ্ণিসুদ্ধিযং ওৱদন্তো তং কিং মঞ্ঞসীতিআদিমাহ. তত্থ সদ্ধেতি মতকভত্তে. থালিপাকেতি পণ্ণাকাৰভত্তে. যঞ্ঞেতি যঞ্ঞভত্তে. পাহুনেতি আগন্তুকানং কতভত্তে. কিং হীতি কিং মহপ্ফলং ভৱিস্সতি, নো ভৱিস্সতীতি দীপেতি.

৪১০. ভূতপুব্বন্তি অস্সলাযন পুব্বে মযি জাতিযা হীনতৰে তুম্হে সেট্ঠতৰা সমানাপি মযা জাতিৱাদে পঞ্হং পুট্ঠা সম্পাদেতুং ন সক্খিত্থ, ইদানি তুম্হে হীনতৰা হুত্ৱা মযা সেট্ঠতৰেন বুদ্ধানং সকে জাতিৱাদপঞ্হং পুট্ঠা কিং সম্পাদেস্সথ? ন এত্থ চিন্তা কাতব্বাতি মাণৱং উপত্থম্ভেন্তো ইমং দেসনং আৰভি. তত্থ অসিতোতি কাড়কো. দেৱলোতি তস্স নামং, অযমেৱ ভগৱা তেন সমযেন. পটলিযোতি গণঙ্গণুপাহনা. পত্থণ্ডিলেতি পণ্ণসালপৰিৱেণে. কো নু খোতি কহং নু খো. গামণ্ডলৰূপো ৱিযাতি গামদাৰকৰূপো ৱিয. সো খ্ৱাহং, ভো, হোমীতি সো অহং, ভো, অসিতদেৱলো হোমীতি ৱদতি. তদা কিৰ মহাসত্তো কোণ্ডদমকো হুত্ৱা ৱিচৰতি. অভিৱাদেতুং উপক্কমিংসূতি ৱন্দিতুং উপক্কমং অকংসু. ততো পট্ঠায চ ৱস্সসতিকতাপসোপি তদহুজাতং ব্ৰাহ্মণকুমাৰং অৱন্দন্তো কোণ্ডিতো হোতি.

৪১১. জনিকা মাতাতি যায তুম্হে জনিতা, সা ৱো জনিকা মাতা. জনিকামাতূতি জনিকায মাতু. যো জনকোতি যো জনকো পিতা. ‘‘যো জনিকো পিতাতেৱ’’ ৱা পাঠো.

অসিতেনাতি পঞ্চাভিঞ্ঞেন অসিতেন দেৱলেন ইসিনা ইমং গন্ধব্বপঞ্হং পুট্ঠা ন সম্পাযিস্সন্তি. যেসন্তি যেসং সত্তন্নং ইসীনং. ন পুণ্ণো দব্বিগাহোতি তেসং সত্তন্নং ইসীনং দব্বিং গহেত্ৱা পণ্ণং পচিত্ৱা দাযকো পুণ্ণো নাম একো অহোসি, সো দব্বিগহণসিপ্পং জানাতি. ত্ৱং সাচৰিযকো তেসং পুণ্ণোপি ন হোতি, তেন ঞাতং দব্বিগহণসিপ্পমত্তম্পি ন জানাসীতি. সেসং সব্বত্থ উত্তানমেৱাতি.

অযং পন অস্সলাযনো সদ্ধো অহোসি পসন্নো, অত্তনো অন্তোনিৱেসনেযেৱ চেতিযং কাৰেসি. যাৱজ্জদিৱসা অস্সলাযনৱংসে জাতা নিৱেসনং কাৰেত্ৱা অন্তোনিৱেসনে চেতিযং কৰোন্তেৱাতি.

পপঞ্চসূদনিযা মজ্ঝিমনিকাযট্ঠকথায

অস্সলাযনসুত্তৱণ্ণনা নিট্ঠিতা.