১০. সঙ্গাৰৱসুত্তৱণ্ণনা

৪৭৩. এৱং মে সুতন্তি সঙ্গাৰৱসুত্তং. তত্থ চঞ্চলিকপ্পেতি এৱংনামকে গামে. অভিপ্পসন্নাতি অৱেচ্চপ্পসাদৱসেন পসন্না. সা কিৰ সোতাপন্না অৰিযসাৱিকা ভাৰদ্ৱাজগোত্তস্স ব্ৰাহ্মণস্স ভৰিযা. সো ব্ৰাহ্মণো পুব্বে কালেন কালং ব্ৰাহ্মণে নিমন্তেত্ৱা তেসং সক্কাৰং কৰোতি. ইমং পন ব্ৰাহ্মণিং ঘৰং আনেত্ৱা অভিৰূপায মহাকুলায ব্ৰাহ্মণিযা চিত্তং কোপেতুং অসক্কোন্তো ব্ৰাহ্মণানং সক্কাৰং কাতুং নাসক্খি. অথ নং ব্ৰাহ্মণা দিট্ঠদিট্ঠট্ঠানে – ‘‘নযিদানি ত্ৱং ব্ৰাহ্মণলদ্ধিকো, একাহম্পি ব্ৰাহ্মণানং সক্কাৰং ন কৰোসী’’তি নিপ্পীড়েন্তি. সো ঘৰং আগন্ত্ৱা ব্ৰাহ্মণিযা তমত্থং আৰোচেত্ৱা – ‘‘সচে, ভোতি একদিৱসং মুখং ৰক্খিতুং সক্কুণেয্যাসি, ব্ৰাহ্মণানং একদিৱসং ভিক্খং দদেয্য’’ন্তি আহ. তুয্হং দেয্যধম্মং ৰুচ্চনকট্ঠানে দেহি, কিং ময্হং এত্থাতি. সো ব্ৰাহ্মণে নিমন্তেত্ৱা অপ্পোদকং পাযাসং পচাপেত্ৱা ঘৰঞ্চ সুজ্ঝাপেত্ৱা আসনানি পঞ্ঞাপেত্ৱা ব্ৰাহ্মণে নিসীদাপেসি. ব্ৰাহ্মণী মহাসাটকং নিৱাসেত্ৱা কটচ্ছুং গহেত্ৱা পৰিৱিসন্তী দুস্সকণ্ণকে পক্খলিত্ৱা ‘‘ব্ৰাহ্মণে পৰিৱিসামী’’তি সঞ্ঞম্পি অকত্ৱা আসেৱনৱসেন সহসা সত্থাৰমেৱ অনুস্সৰিত্ৱা উদানং উদানেসি.

ব্ৰাহ্মণা উদানং সুত্ৱা ‘‘উভতোপক্খিকো এস সমণস্স গোতমস্স সহাযো, নাস্স দেয্যধম্মং গণ্হিস্সামা’’তি কুপিতা ভোজনানি ছড্ডেত্ৱা নিক্খমিংসু. ব্ৰাহ্মণো – ‘‘ননু পঠমংযেৱ তং অৱচং ‘অজ্জেকদিৱসং মুখং ৰক্খেয্যাসী’তি, এত্তকং তে খীৰঞ্চ তণ্ডুলাদীনি চ নাসিতানী’’তি অতিৱিয কোপৱসং উপগতো – ‘‘এৱমেৱ পনাযং ৱসলী যস্মিং ৱা তস্মিং ৱা তস্স মুণ্ডকস্স সমণস্স ৱণ্ণং ভাসতি, ইদানি ত্যাহং ৱসলি তস্স সত্থুনো ৱাদং আৰোপেস্সামী’’তি আহ. অথ নং ব্ৰাহ্মণী ‘‘গচ্ছ ত্ৱং, ব্ৰাহ্মণ, গন্ত্ৱা ৱিজানিস্সসী’’তি ৱত্ৱা ‘‘ন খ্ৱাহং তং, ব্ৰাহ্মণ, পস্সামি সদেৱকে লোকে…পে… ৱাদং আৰোপেয্যা’’তিআদিমাহ. সো সত্থাৰং উপসঙ্কমিত্ৱা –

‘‘কিংসু ছেত্ৱা সুখং সেতি, কিংসু ছেত্ৱা ন সোচতি;

কিস্সস্সু একধম্মস্স, ৱধং ৰোচেসি গোতমা’’তি. (সং. নি. ১.১৮৭) –

পঞ্হং পুচ্ছি. সত্থা আহ –

‘‘কোধং ছেত্ৱা সুখং সেতি, কোধং ছেত্ৱা ন সোচতি;

কোধস্স ৱিসমূলস্স, মধুৰগ্গস্স ব্ৰাহ্মণ;

ৱধং অৰিযা পসংসন্তি, তঞ্হি ছেত্ৱা ন সোচতী’’তি. (সং. নি. ১.১৮৭) –

পঞ্হং কথেসি. সো পব্বজিত্ৱা অৰহত্তং পত্তো. তস্সেৱ কনিট্ঠভাতা অক্কোসকভাৰদ্ৱাজো নাম ‘‘ভাতা মে পব্বজিতো’’তি সুত্ৱা ভগৱন্তং উপসঙ্কমিত্ৱা অক্কোসিত্ৱা ভগৱতা ৱিনীতো পব্বজিত্ৱা অৰহত্তং পত্তো. অপৰো তস্স কনিট্ঠো সুন্দৰিকভাৰদ্ৱাজো নাম. সোপি ভগৱন্তং উপসঙ্কমিত্ৱা পঞ্হং পুচ্ছিত্ৱা ৱিস্সজ্জনং সুত্ৱা পব্বজিত্ৱা অৰহত্তং পত্তো. অপৰো তস্স কনিট্ঠো পিঙ্গলভাৰদ্ৱাজো নাম. সো পঞ্হং পুচ্ছিত্ৱা পঞ্হব্যাকৰণপৰিযোসানে পব্বজিত্ৱা অৰহত্তং পত্তো. সঙ্গাৰৱো মাণৱোতি অযং তেসং সব্বকনিট্ঠো তস্মিং দিৱসে ব্ৰাহ্মণেহি সদ্ধিং একভত্তগ্গে নিসিন্নো. অৱভূতাৱাতি অৱড্ঢিভূতা অৱমঙ্গলভূতাযেৱ. পৰভূতাৱাতি ৱিনাসং পত্তাযেৱ. ৱিজ্জমানানন্তি ৱিজ্জমানেসু. সীলপঞ্ঞাণন্তি সীলঞ্চ ঞাণঞ্চ ন জানাসি.

৪৭৪. দিট্ঠধম্মাভিঞ্ঞাৱোসানপাৰমিপ্পত্তাতি দিট্ঠধম্মে অভিঞ্ঞাতে ইমস্মিঞ্ঞেৱ অত্তভাৱে অভিজানিত্ৱা ৱোসিতৱোসানা হুত্ৱা পাৰমীসঙ্খাতং সব্বধম্মানং পাৰভূতং নিব্বানং পত্তা মযন্তি ৱত্ৱা আদিব্ৰহ্মচৰিযং পটিজানন্তীতি অত্থো. আদিব্ৰহ্মচৰিযন্তি ব্ৰহ্মচৰিযস্স আদিভূতা উপ্পাদকা জনকাতি এৱং পটিজানন্তীতি ৱুত্তং হোতি. তক্কীতি তক্কগাহী. ৱীমংসীতি ৱীমংসকো, পঞ্ঞাচাৰং চৰাপেত্ৱা এৱংৱাদী. তেসাহমস্মীতি তেসং সম্মাসম্বুদ্ধানং অহমস্মি অঞ্ঞতৰো.

৪৮৫. অট্ঠিতৱতন্তি অট্ঠিততপং, অস্স পধানপদেন সদ্ধিং সম্বন্ধো, তথা সপ্পুৰিসপদস্স. ইদঞ্হি ৱুত্তং হোতি – ভোতো গোতমস্স অট্ঠিতপধানৱতং অহোসি, সপ্পুৰিসপধানৱতং অহোসীতি. অত্থি দেৱাতি পুট্ঠো সমানোতি ইদং মাণৱো ‘‘সম্মাসম্বুদ্ধো অজানন্তোৱ পকাসেসী’’তি সঞ্ঞায আহ. এৱং সন্তেতি তুম্হাকং অজাননভাৱে সন্তে. তুচ্ছং মুসা হোতীতি তুম্হাকং কথা অফলা নিপ্ফলা হোতি. এৱং মাণৱো ভগৱন্তং মুসাৱাদেন নিগ্গণ্হাতি নাম. ৱিঞ্ঞুনা পুৰিসেনাতি পণ্ডিতেন মনুস্সেন. ত্ৱং পন অৱিঞ্ঞুতায মযা ব্যাকতম্পি ন জানাসীতি দীপেতি. উচ্চেন সম্মতন্তি উচ্চেন সদ্দেন সম্মতং পাকটং লোকস্মিং. অধিদেৱাতি সুসুদাৰকাপি হি দেৱা নাম হোন্তি, দেৱিযো নাম হোন্তি দেৱা পন অধিদেৱা নাম, লোকে দেৱো দেৱীতি লদ্ধনামেহি মনুস্সেহি অধিকাতি অত্থো. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

সঙ্গাৰৱসুত্তৱণ্ণনা নিট্ঠিতা.

পঞ্চমৱগ্গৱণ্ণনা নিট্ঠিতা.