৮. সমণমুণ্ডিকসুত্তৱণ্ণনা

২৬০. এৱং মে সুতন্তি সমণমুণ্ডিকসুত্তং. তত্থ উগ্গাহমানোতি তস্স পৰিব্বাজকস্স নামং. সুমনোতি পকতিনামং. কিঞ্চি কিঞ্চি পন উগ্গহিতুং উগ্গাহেতুং সমত্থতায উগ্গাহমানোতি নং সঞ্জানন্তি. সমযং পৱদন্তি এত্থাতি সমযপ্পৱাদকং. তস্মিং কিৰ ঠানে চঙ্কীতাৰুক্খপোক্খৰসাতিপ্পভুতযো ব্ৰাহ্মণা নিগণ্ঠাচেলকপৰিব্বাজকাদযো চ পব্বজিতা সন্নিপতিত্ৱা অত্তনো অত্তনো সমযং পৱদন্তি কথেন্তি দীপেন্তি, তস্মা সো আৰামো সমযপ্পৱাদকোতি ৱুচ্চতি. স্ৱেৱ তিন্দুকাচীৰসঙ্খাতায তিম্বৰূসকৰুক্খপন্তিযা পৰিক্খিত্তত্তা তিন্দুকাচীৰং. যস্মা পনেত্থ পঠমং একা সালা অহোসি, পচ্ছা মহাপুঞ্ঞং পোট্ঠপাদপৰিব্বাজকং নিস্সায বহূ সালা কতা, তস্মা তমেৱ একং সালং উপাদায লদ্ধনামৱসেন একসালকোতি ৱুচ্চতি. মল্লিকায পন পসেনদিৰঞ্ঞো দেৱিযা উয্যানভূতো সো পুপ্ফফলসঞ্ছন্নো আৰামোতি কত্ৱা মল্লিকায আৰামোতি সঙ্খং গতো. তস্মিং সমযপ্পৱাদকে তিন্দুকাচীৰে একসালকে মল্লিকায আৰামে. পটিৱসতীতি ৱাসফাসুতায ৱসতি. দিৱা দিৱস্সাতি দিৱসস্স দিৱা নাম মজ্ঝন্হাতিক্কমো, তস্মিং দিৱসস্সপি দিৱাভূতে অতিক্কন্তমত্তে মজ্ঝন্হিকে নিক্খমীতি অত্থো. পটিসল্লীনোতি ততো ততো ৰূপাদিগোচৰতো চিত্তং পটিসংহৰিত্ৱা লীনো, ঝানৰতিসেৱনৱসেন একীভাৱং গতো. মনোভাৱনীযানন্তি মনৱড্ঢনকানং, যে আৱজ্জতো মনসিকৰোতো চিত্তং ৱিনীৱৰণং হোতি উন্নমতি ৱড্ঢতি. যাৱতাতি যত্তকা. অযং তেসং অঞ্ঞতৰোতি অযং তেসং অব্ভন্তৰো একো সাৱকো. অপ্পেৱ নামাতি তস্স উপসঙ্কমনং পত্থযমানো আহ. পত্থনাকাৰণং পন সন্দকসুত্তে ৱুত্তমেৱ.

২৬১. এতদৱোচাতি দন্দপঞ্ঞো অযং গহপতি, ধম্মকথায নং সঙ্গণ্হিত্ৱা অত্তনো সাৱকং কৰিস্সামীতি মঞ্ঞমানো এতং ‘‘চতূহি খো’’তিআদিৱচনং অৱোচ. তত্থ পঞ্ঞপেমীতি দস্সেমি ঠপেমি. সম্পন্নকুসলন্তি পৰিপুণ্ণকুসলং. পৰমকুসলন্তি উত্তমকুসলং. অযোজ্ঝন্তি ৱাদযুদ্ধেন যুজ্ঝিত্ৱা চালেতুং অসক্কুণেয্যং অচলং নিক্কম্পং থিৰং. ন কৰোতীতি অকৰণমত্তমেৱ ৱদতি, এত্থ পন সংৱৰপ্পহানং ৱা পটিসেৱনপ্পহানং ৱা ন ৱদতি. সেসপদেসুপি এসেৱ নযো.

নেৱ অভিনন্দীতি তিত্থিযা নাম জানিত্ৱাপি অজানিত্ৱাপি যং ৱা তং ৱা ৱদন্তীতি মঞ্ঞমানো নাভিনন্দি. ন পটিক্কোসীতি সাসনস্স অনুলোমং ৱিয পসন্নাকাৰং ৱিয ৱদতীতি মঞ্ঞমানো ন পটিসেধেতি.

২৬২. যথা উগ্গাহমানস্সাতি যথা তস্স ৱচনং, এৱং সন্তে উত্তানসেয্যকো কুমাৰো অযোজ্ঝসমণো থিৰসমণো ভৱিস্সতি, মযং পন এৱং ন ৱদামাতি দীপেতি. কাযোতিপি ন হোতীতি সককাযো পৰকাযোতিপি ৱিসেসঞাণং ন হোতি. অঞ্ঞত্ৰ ফন্দিতমত্তাতি পচ্চত্থৰণে ৱলিসম্ফস্সেন ৱা মঙ্গুলদট্ঠেন ৱা কাযফন্দনমত্তং নাম হোতি. তং ঠপেত্ৱা অঞ্ঞং কাযেন কৰণকম্মং নাম নত্থি. তম্পি চ কিলেসসহগতচিত্তেনেৱ হোতি. ৱাচাতিপি ন হোতীতি মিচ্ছাৱাচা সম্মাৱাচাতিপি নানত্তং ন হোতি. ৰোদিতমত্তাতি জিঘচ্ছাপিপাসাপৰেতস্স পন ৰোদিতমত্তং হোতি. তম্পি কিলেসসহগতচিত্তেনেৱ. সঙ্কপ্পোতি মিচ্ছাসঙ্কপ্পো সম্মাসঙ্কপ্পোতিপি নানত্তং ন হোতি. ৱিকূজিতমত্তাতি ৱিকূজিতমত্তং ৰোদনহসিতমত্তং হোতি. দহৰকুমাৰকানঞ্হি চিত্তং অতীতাৰম্মণং পৱত্ততি, নিৰযতো আগতা নিৰযদুক্খং সৰিত্ৱা ৰোদন্তি, দেৱলোকতো আগতা হসন্তি, তম্পি কিলেসসহগতচিত্তেনেৱ হোতি. আজীৱোতি মিচ্ছাজীৱো সম্মাজীৱোতিপি নানত্তং ন হোতি. অঞ্ঞত্ৰ মাতুথঞ্ঞাতি থঞ্ঞচোৰদাৰকা নাম হোন্তি, মাতৰি খীৰং পাযন্তিযা অপিৱিত্ৱা অঞ্ঞৱিহিতকালে পিট্ঠিপস্সেন আগন্ত্ৱা থঞ্ঞং পিৱন্তি. এত্তকং মুঞ্চিত্ৱা অঞ্ঞো মিচ্ছাজীৱো নত্থি. অযম্পি কিলেসসহগতচিত্তেনেৱ হোতীতি দস্সেতি.

২৬৩. এৱং পৰিব্বাজকৱাদং পটিক্খিপিত্ৱা ইদানি সযং সেক্খভূমিযং মাতিকং ঠপেন্তো চতূহি খো অহন্তিআদিমাহ. তত্থ সমধিগয্হ তিট্ঠতীতি ৱিসেসেত্ৱা তিট্ঠতি. ন কাযেন পাপ কম্মন্তিআদীসু ন কেৱলং অকৰণমত্তমেৱ, ভগৱা পন এত্থ সংৱৰপ্পহানপটিসঙ্খা পঞ্ঞপেতি. তং সন্ধাযেৱমাহ. ন চেৱ সম্পন্নকুসলন্তিআদি পন খীণাসৱং সন্ধায ৱুত্তং.

ইদানি অসেক্খভূমিযং মাতিকং ঠপেন্তো দসহি খো অহন্তিআদিমাহ. তত্থ তীণি পদানি নিস্সায দ্ৱে পঠমচতুক্কা ঠপিতা, একং পদং নিস্সায দ্ৱে পচ্ছিমচতুক্কা. অযং সেক্খভূমিযং মাতিকা.

২৬৪. ইদানি তং ৱিভজন্তো কতমে চ থপতি অকুসলসীলাতিআদিমাহ. তত্থ সৰাগন্তি অট্ঠৱিধং লোভসহগতচিত্তং. সদোসন্তি পটিঘসম্পযুত্তচিত্তদ্ৱযং. সমোহন্তি ৱিচিকিচ্ছুদ্ধচ্চসহগতচিত্তদ্ৱযম্পি ৱট্টতি, সব্বাকুসলচিত্তানিপি. মোহো সব্বাকুসলে উপ্পজ্জতীতি হি ৱুত্তং. ইতোসমুট্ঠানাতি ইতো সৰাগাদিচিত্ততো সমুট্ঠানং উপ্পত্তি এতেসন্তি ইতোসমুট্ঠানা.

কুহিন্তি কতৰং ঠানং পাপুণিত্ৱা অপৰিসেসা নিৰুজ্ঝন্তি. এত্থেতেতি সোতাপত্তিফলে ভুম্মং. পাতিমোক্খসংৱৰসীলঞ্হি সোতাপত্তিফলে পৰিপুণ্ণং হোতি, তং ঠানং পত্ৱা অকুসলসীলং অসেসং নিৰুজ্ঝতি. অকুসলসীলন্তি চ দুস্সীলস্সেতং অধিৱচনন্তি ৱেদিতব্বং.

অকুসলানং সীলানং নিৰোধায পটিপন্নোতি এত্থ যাৱ সোতাপত্তিমগ্গা নিৰোধায পটিপন্নো নাম হোতি, ফলপত্তে পন তে নিৰোধিতা নাম হোন্তি.

২৬৫. ৱীতৰাগন্তিআদীহি অট্ঠৱিধং কামাৱচৰকুসলচিত্তমেৱ ৱুত্তং. এতেন হি কুসলসীলং সমুট্ঠাতি.

সীলৱা হোতীতি সীলসম্পন্নো হোতি গুণসম্পন্নো চ. নো চ সীলমযোতি অলমেত্তাৱতা, নত্থি ইতো কিঞ্চি উত্তৰি কৰণীযন্তি এৱং সীলমযো ন হোতি. যত্থস্স তেতি অৰহত্তফলে ভুম্মং. অৰহত্তফলঞ্হি পত্ৱা অকুসলসীলং অসেসং নিৰুজ্ঝতি.

নিৰোধায পটিপন্নোতি এত্থ যাৱ অৰহত্তমগ্গা নিৰোধায পটিপন্নো নাম হোতি, ফলপত্তে পন তে নিৰোধিতা নাম হোন্তি.

২৬৬. কামসঞ্ঞাদীসু কামসঞ্ঞা অট্ঠলোভসহগতচিত্তসহজাতা, ইতৰা দ্ৱে দোমনস্সসহগতচিত্তদ্ৱযেন সহজাতা.

পঠমং ঝানন্তি অনাগামিফলপঠমজ্ঝানং. এত্থেতেতি অনাগামিফলে ভুম্মং. অনাগামিফলঞ্হি পত্ৱা অকুসলসঙ্কপ্পা অপৰিসেসা নিৰুজ্ঝন্তি.

নিৰোধায পটিপন্নোতি এত্থ যাৱ অনাগামিমগ্গা নিৰোধায পটিপন্নো নাম হোতি, ফলপত্তে পন তে নিৰোধিতা নাম হোন্তি. নেক্খম্মসঞ্ঞাদযো হি তিস্সোপি অট্ঠকামাৱচৰকুসলসহজাতসঞ্ঞাৱ.

২৬৭. এত্থেতেতি অৰহত্তফলে ভুম্মং. দুতিযজ্ঝানিকং অৰহত্তফলঞ্হি পাপুণিত্ৱা কুসলসঙ্কপ্পা অপৰিসেসা নিৰুজ্ঝন্তি. নিৰোধায পটিপন্নোতি এত্থ যাৱ অৰহত্তমগ্গা নিৰোধায পটিপন্নো নাম হোতি, ফলপত্তে পন তে নিৰোধিতা নাম হোন্তি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

সমণমুণ্ডিকসুত্তৱণ্ণনা নিট্ঠিতা.