৯. বহুৱেদনীযসুত্তৱণ্ণনা

৮৮. এৱং মে সুতন্তি বহুৱেদনীযসুত্তং. তত্থ পঞ্চকঙ্গো থপতীতি পঞ্চকঙ্গোতি তস্স নামং. ৱাসিফৰসুনিখাদনদণ্ডমুগ্গৰকাড়সুত্তনাড়িসঙ্খাতেহি ৱা অঙ্গেহি সমন্নাগতত্তা সো পঞ্চঙ্গোতি পঞ্ঞাতো. থপতীতি ৱড্ঢকীজেট্ঠকো. উদাযীতি পণ্ডিতউদাযিত্থেৰো.

৮৯. পৰিযাযন্তি কাৰণং. দ্ৱেপানন্দাতি দ্ৱেপি, আনন্দ. পৰিযাযেনাতি কাৰণেন. এত্থ চ কাযিকচেতসিকৱসেন দ্ৱে ৱেদিতব্বা. সুখাদিৱসেন তিস্সো, ইন্দ্ৰিযৱসেন সুখিন্দ্ৰিযাদিকা পঞ্চ, দ্ৱাৰৱসেন চক্খুসম্ফস্সজাদিকা ছ, উপৱিচাৰৱসেন ‘‘চক্খুনা ৰূপং দিস্ৱা সোমনস্সট্ঠানিযং ৰূপং উপৱিচৰতী’’তিআদিকা অট্ঠাৰস, ছ গেহস্সিতানি সোমনস্সানি, ছ নেক্খম্মসিতানি সোমনস্সানি, ছ গেহস্সিতানি দোমনস্সানি, ছ নেক্খম্মসিতানি দোমনস্সানি, ছ গেহস্সিতা উপেক্খা, ছ নেক্খম্মসিতাতি এৱং ছত্তিংস, তা অতীতে ছত্তিংস, অনাগতে ছত্তিংস, পচ্চুপ্পন্নে ছত্তিংসাতি এৱং অট্ঠৱেদনাসতং ৱেদিতব্বং.

৯০. পঞ্চ খো ইমে, আনন্দ, কামগুণাতি অযং পাটিএক্কো অনুসন্ধি. ন কেৱলম্পি দ্ৱে আদিং কত্ৱা ৱেদনা ভগৱতা পঞ্ঞত্তা, পৰিযাযেন একাপি ৱেদনা কথিতা. তং দস্সেন্তো পঞ্চকঙ্গস্স থপতিনো ৱাদং উপত্থম্ভেতুং ইমং দেসনং আৰভি.

অভিক্কন্ততৰন্তি সুন্দৰতৰং. পণীততৰন্তি অতপ্পকতৰং. এত্থ চ চতুত্থজ্ঝানতো পট্ঠায অদুক্খমসুখা ৱেদনা, সাপি সন্তট্ঠেন পণীতট্ঠেন চ সুখন্তি ৱুত্তা. ছ গেহস্সিতানি সুখন্তি ৱুত্তানি. নিৰোধো অৱেদযিতসুখৱসেন সুখং নাম জাতো. পঞ্চকামগুণৱসেন হি অট্ঠসমাপত্তিৱসেন চ উপ্পন্নং ৱেদযিতসুখং নাম. নিৰোধো অৱেদযিতসুখং নাম. ইতি ৱেদযিতসুখং ৱা হোতু অৱেদযিতসুখং ৱা, তং নিদ্দুক্খভাৱসঙ্খাতেন সুখট্ঠেন একন্তসুখমেৱ জাতং.

৯১. যত্থ যত্থাতি যস্মিং যস্মিং ঠানে. সুখং উপলব্ভতীতি ৱেদযিতসুখং ৱা অৱেদযিতসুখং ৱা উপলব্ভতি. তং তং তথাগতো সুখস্মিং পঞ্ঞপেতীতি তং সব্বং তথাগতো নিদ্দুক্খভাৱং সুখস্মিংযেৱ পঞ্ঞপেতীতি. ইধ ভগৱা নিৰোধসমাপত্তিং সীসং কত্ৱা নেয্যপুগ্গলৱসেন অৰহত্তনিকূটেনেৱ দেসনং নিট্ঠাপেসীতি.

পপঞ্চসূদনিযা মজ্ঝিমনিকাযট্ঠকথায

বহুৱেদনীযসুত্তৱণ্ণনা নিট্ঠিতা.