১০. মাৰতজ্জনীযসুত্তৱণ্ণনা

৫০৬. এৱং মে সুতন্তি মাৰতজ্জনীযসুত্তং. তত্থ কোট্ঠমনুপৱিট্ঠোতি কুচ্ছিং পৱিসিত্ৱা অন্তানং অন্তো অনুপৱিট্ঠো, পক্কাসযট্ঠানে নিসিন্নো. গৰুগৰো ৱিযাতি গৰুকগৰুকো ৱিয থদ্ধো পাসাণপুঞ্জসদিসো. মাসাচিতং মঞ্ঞেতি মাসভত্তং ভুত্তস্স কুচ্ছি ৱিয মাসপূৰিতপসিব্বকো ৱিয তিন্তমাসো ৱিয চাতি অত্থো. ৱিহাৰং পৱিসিত্ৱাতি সচে আহাৰদোসেন এস গৰুভাৱো, অব্ভোকাসে চঙ্কমিতুং ন সপ্পাযন্তি চঙ্কমা ওৰোহিত্ৱা পণ্ণসালং পৱিসিত্ৱা পকতিপঞ্ঞত্তে আসনে নিসীদি. পচ্চত্তং যোনিসো মনসাকাসীতি, ‘‘কিং নু খো এত’’ন্তি আৱজ্জমানো অত্তনোযেৱ উপাযেন মনসি অকাসি. সচে পন থেৰো অত্তনো সীলং আৱজ্জেত্ৱা, ‘‘যং হিয্যো ৱা পৰে ৱা পৰসুৱে ৱা পৰিভুত্তং অৱিপক্কমত্থি, অঞ্ঞো ৱা কোচি ৱিসভাগদোসো, সব্বং জীৰতু ফাসুকং হোতূ’’তি হত্থেন কুচ্ছিং পৰামসিস্স, মাৰো পাপিমা ৱিলীযিত্ৱা অগমিস্স. থেৰো পন তথা অকত্ৱা যোনিসো মনসি অকাসি. মা তথাগতং ৱিহেসেসীতি যথা হি পুত্তেসু ৱিহেসিতেসু মাতাপিতৰো ৱিহেসিতাৱ হোন্তি, সদ্ধিৱিহাৰিকঅন্তেৱাসিকেসু ৱিহেসিতেসু আচৰিযুপজ্ঝাযা ৱিহেসিতাৱ, জনপদে ৱিহেসিতে ৰাজা ৱিহেসিতোৱ হোতি, এৱং তথাগতসাৱকে ৱিহেসিতে তথাগতো ৱিহেসিতোৱ হোতি. তেনাহ – ‘‘মা তথাগতং ৱিহেসেসী’’তি.

পচ্চগ্গড়ে অট্ঠাসীতি পতিঅগ্গড়েৱ অট্ঠাসি. অগ্গড়ং ৱুচ্চতি কৱাটং, মুখেন উগ্গন্ত্ৱা পণ্ণসালতো নিক্খমিত্ৱা বহিপণ্ণসালায কৱাটং নিস্সায অট্ঠাসীতি অত্থো.

৫০৭. ভূতপুব্বাহং পাপিমাতি কস্মা ইদং দেসনং আৰভি? থেৰো কিৰ চিন্তেসি – ‘‘আকাসট্ঠকদেৱতানং তাৱ মনুস্সগন্ধো যোজনসতে ঠিতানং আবাধং কৰোতি. ৱুত্তঞ্হেতং – ‘যোজনসতং খো ৰাজঞ্ঞ মনুস্সগন্ধো দেৱে উব্বাধতী’তি (দী. নি. ২.৪১৫). অযং পন মাৰো নাগৰিকো পৰিচোক্খো মহেসক্খো আনুভাৱসম্পন্নো দেৱৰাজা সমানো মম কুচ্ছিযং পৱিসিত্ৱা অন্তানং অন্তো পক্কাসযোকাসে নিসিন্নো অতিৱিয পদুট্ঠো ভৱিস্সতি. এৱৰূপং নাম জেগুচ্ছং পটিকূলং ওকাসং পৱিসিত্ৱা নিসীদিতুং সক্কোন্তস্স কিমঞ্ঞং অকৰণীযং ভৱিস্সতি, কিং অঞ্ঞং লজ্জিস্সতি, ত্ৱং মম ঞাতিকোতি পন ৱুত্তে মুদুভাৱং অনাপজ্জমানো নাম নত্থি, হন্দস্স ঞাতিকোটিং পটিৱিজ্ঝিত্ৱা মুদুকেনেৱ নং উপাযেন ৱিস্সজ্জেস্সামী’’তি চিন্তেত্ৱা ইমং দেসনমাৰভি.

সো মে ত্ৱং ভাগিনেয্যো হোসীতি সো ত্ৱং তস্মিং কালে ময্হং ভাগিনেয্যো হোসি. ইদং পৱেণিৱসেন ৱুত্তং. দেৱলোকস্মিং পন মাৰস্স পিতু ৱংসো পিতামহস্স ৱংসো ৰজ্জং কৰোন্তো নাম নত্থি, পুঞ্ঞৱসেন দেৱলোকে দেৱৰাজা হুত্ৱা নিব্বত্তো, যাৱতাযুকং ঠত্ৱা চৱতি. অঞ্ঞো একো অত্তনা কতেন কম্মেন তস্মিং ঠানে অধিপতি হুত্ৱা নিব্বত্ততি. ইতি অযং মাৰোপি তদা ততো চৱিত্ৱা পুন কুসলং কত্ৱা ইমস্মিং কালে তস্মিং অধিপতিট্ঠানে নিব্বত্তোতি ৱেদিতব্বো.

ৱিধুৰোতি ৱিগতধুৰো, অঞ্ঞেহি সদ্ধিং অসদিসোতি অত্থো. অপ্পকসিৰেনাতি অপ্পদুক্খেন. পসুপালকাতি অজেড়কপালকা. পথাৱিনোতি মগ্গপটিপন্না. কাযে উপচিনিত্ৱাতি সমন্ততো চিতকং বন্ধিত্ৱা. অগ্গিং দত্ৱা পক্কমিংসূতি এত্তকেন সৰীৰং পৰিযাদানং গমিস্সতীতি চিতকস্স পমাণং সল্লক্খেত্ৱা চতূসু দিসাসু অগ্গিং দত্ৱা পক্কমিংসু. চিতকো পদীপসিখা ৱিয পজ্জলি, থেৰস্স উদকলেণং পৱিসিত্ৱা নিসিন্নকালো ৱিয অহোসি. চীৱৰানি পপ্ফোটেত্ৱাতি সমাপত্তিতো ৱুট্ঠায ৱিগতধূমে কিংসুকৱণ্ণে অঙ্গাৰে মদ্দমানো চীৱৰানি ৱিধুনিত্ৱা. সৰীৰে পনস্স উসুমমত্তম্পি নাহোসি, চীৱৰেসু অংসুমত্তম্পি নজ্ঝাযি, সমাপত্তিফলং নামেতং.

৫০৮. অক্কোসথাতি দসহি অক্কোসৱত্থূহি অক্কোসথ. পৰিভাসথাতি ৱাচায পৰিভাসথ. ৰোসেথাতি ঘট্টেথ. ৱিহেসেথাতি দুক্খাপেথ. সব্বমেতং ৱাচায ঘট্টনস্সেৱ অধিৱচনং. যথা তং দূসী মাৰোতি যথা এতেসং দূসী মাৰো. লভেথ ওতাৰন্তি লভেথ ছিদ্দং, কিলেসুপ্পত্তিযা আৰম্মণং পচ্চযং লভেয্যাতি অত্থো. মুণ্ডকাতিআদীসু মুণ্ডে মুণ্ডাতি সমণে চ সমণাতি ৱত্তুং ৱট্টেয্য, ইমে পন হীড়েন্তা মুণ্ডকা সমণকাতি আহংসু. ইব্ভাতি গহপতিকা. কিণ্হাতি কণ্হা, কাড়কাতি অত্থো. বন্ধুপাদাপচ্চাতি এত্থ বন্ধূতি ব্ৰহ্মা অধিপ্পেতো. তঞ্হি ব্ৰাহ্মণা পিতামহোতি ৱোহৰন্তি. পাদানং অপচ্চা পাদাপচ্চা, ব্ৰহ্মুনো পিট্ঠিপাদতো জাতাতি অধিপ্পাযো. তেসং কিৰ অযং লদ্ধি – ‘‘ব্ৰাহ্মণা ব্ৰহ্মুনো মুখতো নিক্খন্তা, খত্তিযা উৰতো, ৱেস্সা নাভিতো, সুদ্দা জাণুতো, সমণা পিট্ঠিপাদতো’’তি.

ঝাযিনোস্মা ঝাযিনোস্মাতি ঝাযিনো মযং ঝাযিনো মযন্তি. মধুৰকজাতাতি আলসিযজাতা. ঝাযন্তীতি চিন্তযন্তি. পজ্ঝাযন্তীতিআদীনি উপসগ্গৱসেন ৱড্ঢিতানি. মূসিকং মগ্গযমানোতি সাযং গোচৰত্থায সুসিৰৰুক্খতো নিক্খন্তং ৰুক্খসাখায মূসিকং পৰিযেসন্তো. সো কিৰ উপসন্তূপসন্তো ৱিয নিচ্চলোৱ তিট্ঠতি, সম্পত্তকালে মূসিকং সহসা গণ্হাতি. কোত্থূতি সিঙ্গালো, সোণোতিপি ৱদন্তি. সন্ধিসমলসঙ্কটিৰেতি সন্ধিম্হি চ সমলে চ সঙ্কটিৰে চ. তত্থ সন্ধি নাম ঘৰসন্ধি. সমলো নাম গূথনিদ্ধমনপনাড়ি. সঙ্কটিৰং নাম সঙ্কাৰট্ঠানং. ৱহচ্ছিন্নোতি কন্তাৰতো নিক্খন্তো ছিন্নৱহো. সন্ধিসমলসঙ্কটিৰেতি সন্ধিম্হি ৱা সমলে ৱা সঙ্কটিৰে ৱা. সোপি হি বদ্ধগত্তো ৱিয নিচ্চলো ঝাযতি.

নিৰযং উপপজ্জন্তীতি সচে মাৰো মনুস্সানং সৰীৰে অধিমুচ্চিত্ৱা এৱং কৰেয্য, মনুস্সানং অকুসলং ন ভৱেয্য, মাৰস্সেৱ ভৱেয্য. সৰীৰে পন অনধিমুচ্চিত্ৱা ৱিসভাগৱত্থুং ৱিপ্পটিসাৰাৰম্মণং দস্সেতি, তদা কিৰ সো ভিক্খূ খিপ্পং গহেত্ৱা মচ্ছে অজ্ঝোত্থৰন্তে ৱিয, জালং গহেত্ৱা মচ্ছে গণ্হন্তে ৱিয, লেপযট্ঠিং ওড্ডেত্ৱা সকুণে বন্ধন্তে ৱিয, সুনখেহি সদ্ধিং অৰঞ্ঞে মিগৱং চৰন্তে ৱিয, মাতুগামে গহেত্ৱা আপানভূমিযং নিসিন্নে ৱিয, নচ্চন্তে ৱিয, গাযন্তে ৱিয, ভিক্খুনীনং ৰত্তিট্ঠানদিৱাট্ঠানেসু ৱিসভাগমনুস্সে নিসিন্নে ৱিয, ঠিতে ৱিয চ কত্ৱা দস্সেসি. মনুস্সা অৰঞ্ঞগতাপি ৱনগতাপি ৱিহাৰগতাপি ৱিপ্পটিসাৰাৰম্মণং পস্সিত্ৱা আগন্ত্ৱা অঞ্ঞেসং কথেন্তি – ‘‘সমণা এৱৰূপং অস্সমণকং অননুচ্ছৱিকং কৰোন্তি, এতেসং দিন্নে কুতো কুসলং, মা এতেসং কিঞ্চি অদত্থা’’তি. এৱং তে মনুস্সা দিট্ঠদিট্ঠট্ঠানে সীলৱন্তে অক্কোসন্তা অপুঞ্ঞং পসৱিত্ৱা অপাযপূৰকা অহেসুং. তেন ৱুত্তং ‘‘নিৰযং উপপজ্জন্তী’’তি.

৫০৯. অন্ৱাৱিট্ঠাতি আৱট্টিতা. ফৰিত্ৱা ৱিহৰিংসূতি ন কেৱলং ফৰিত্ৱা ৱিহৰিংসু. ককুসন্ধস্স পন ভগৱতো ওৱাদে ঠত্ৱা ইমে চত্তাৰো ব্ৰহ্মৱিহাৰে নিব্বত্তেত্ৱা ঝানপদট্ঠানং ৱিপস্সনং ৱড্ঢেত্ৱা অৰহত্তে পতিট্ঠহিংসু.

৫১০. আগতিং ৱা গতিং ৱাতি পটিসন্ধিৱসেন আগমনট্ঠানং ৱা, চুতিৱসেন গমনট্ঠানং ৱা ন জানামি. সিযা চিত্তস্স অঞ্ঞথত্তন্তি সোমনস্সৱসেন অঞ্ঞথত্তং ভৱেয্য. সগ্গং লোকং উপপজ্জন্তীতি ইধাপি পুৰিমনযেনেৱ অত্থো ৱেদিতব্বো. যথা হি পুব্বে ৱিপ্পটিসাৰকৰং আৰম্মণং দস্সেতি, এৱমিধাপি পসাদকৰং. সো কিৰ তদা মনুস্সানং দস্সনট্ঠানে ভিক্খূ আকাসে গচ্ছন্তে ৱিয, ঠিতে ৱিয পল্লঙ্কেন নিসিন্নে ৱিয, আকাসে সূচিকম্মং কৰোন্তে ৱিয, পোত্থকং ৱাচেন্তে ৱিয, আকাসে চীৱৰং পসাৰেত্ৱা কাযং উতুং গণ্হাপেন্তে ৱিয, নৱপব্বজিতে আকাসেন চৰন্তে ৱিয, তৰুণসামণেৰে আকাসে ঠত্ৱা পুপ্ফানি ওচিনন্তে ৱিয কত্ৱা দস্সেসি. মনুস্সা অৰঞ্ঞগতাপি ৱনগতাপি ৱিহাৰগতাপি পব্বজিতানং তং পটিপত্তিং দিস্ৱা আগন্ত্ৱা অঞ্ঞেসং কথেন্তি – ‘‘ভিক্খূসু অন্তমসো সামণেৰাপি এৱংমহিদ্ধিকো মহানুভাৱা, এতেসং দিন্নং মহপ্ফলং নাম হোতি, এতেসং দেথ সক্কৰোথা’’তি. ততো মনুস্সা ভিক্খুসঙ্ঘং চতূহি পচ্চযেহি সক্কৰোন্তা বহুং পুঞ্ঞং কত্ৱা সগ্গপথপূৰকা অহেসুং. তেন ৱুত্তং ‘‘সগ্গং লোকং উপপজ্জন্তী’’তি.

৫১১. এথ তুম্হে, ভিক্খৱে, অসুভানুপস্সিনো কাযে ৱিহৰথাতি ভগৱা সকলজম্বুদীপং আহিণ্ডন্তো অন্তমসো দ্ৱিন্নম্পি তিণ্ণম্পি ভিক্খূনং ৱসনট্ঠানং গন্ত্ৱা –

‘‘অসুভসঞ্ঞাপৰিচিতেন, ভিক্খৱে, ভিক্খুনো চেতসা বহুলং ৱিহৰতো মেথুনধম্মসমাপত্তিযা চিত্তং পতিলীযতি পতিকুটতি পতিৱত্ততি ন সম্পসাৰিযতি, উপেক্খা ৱা পাটিকুল্যতা ৱা সণ্ঠাতি.

আহাৰে পটিকূলসঞ্ঞাপৰিচিতেন, ভিক্খৱে, ভিক্খুনো চেতসা বহুলং ৱিহৰতো ৰসতণ্হায চিত্তং পতিলীযতি পতিকুটতি পতিৱত্ততি ন সম্পসাৰিযতি, উপেক্খা ৱা পাটিকুল্যতা ৱা সণ্ঠাতি.

সব্বলোকে অনভিৰতিসঞ্ঞাপৰিচিতেন, ভিক্খৱে, ভিক্খুনো চেতসা বহুলং ৱিহৰতো লোকচিত্ৰেসু চিত্তং পতিলীযতি পতিকুটতি পতিৱত্ততি ন সম্পসাৰিযতি, উপেক্খা ৱা পাটিকুল্যতা ৱা সণ্ঠাতি.

অনিচ্চসঞ্ঞাপৰিচিতেন, ভিক্খৱে, ভিক্খুনো চেতসা বহুলং ৱিহৰতো লাভসক্কাৰসিলোকে চিত্তং পতিলীযতি পতিকুটতি পতিৱত্ততি ন সম্পসাৰিযতি, উপেক্খা ৱা পাটিকুল্যতা ৱা সণ্ঠাতী’’তি (অ. নি. ৭.৪৯) এৱং আনিসংসং দস্সেত্ৱা –

এথ তুম্হে, ভিক্খৱে, অসুভানুপস্সী কাযে ৱিহৰথ, আহাৰে পটিকূলসঞ্ঞিনো সব্বলোকে অনভিৰতিসঞ্ঞিনো সব্বসঙ্খাৰেসু অনিচ্চানুপস্সিনোতি. ইমানি চত্তাৰি কম্মট্ঠানানি কথেসি. তেপি ভিক্খূ ইমেসু চতূসু কম্মট্ঠানেসু কম্মং কৰোন্তা ৱিপস্সনং ৱড্ঢেত্ৱা সব্বাসৱে খেপেত্ৱা অৰহত্তে পতিট্ঠহিংসু, ইমানিপি চত্তাৰি কম্মট্ঠানানি ৰাগসন্তানি দোসমোহসন্তানি ৰাগপটিঘাতানি দোসমোহপটিঘাতানি চাতি.

৫১২. সক্খৰং গহেত্ৱাতি অন্তোমুট্ঠিযং তিট্ঠনপমাণং পাসাণং গহেত্ৱা. অযঞ্হি ব্ৰাহ্মণগহপতিকেহি ভিক্খূ অক্কোসাপেত্ৱাপি, ব্ৰাহ্মণগহপতিকানং ৱসেন ভিক্খুসঙ্ঘস্স লাভসক্কাৰং উপ্পাদাপেত্ৱাপি, ওতাৰং অলভন্তো ইদানি সহত্থা উপক্কমিতুকামো অঞ্ঞতৰস্স কুমাৰস্স সৰীৰে অধিমুচ্চিত্ৱা এৱৰূপং পাসাণং অগ্গহেসি. তং সন্ধায ৱুত্তং ‘‘সক্খৰং গহেত্ৱা’’তি.

সীসং ৱো ভিন্দীতি সীসং ভিন্দি, মহাচম্মং ছিজ্জিত্ৱা মংসং দ্ৱেধা অহোসি. সক্খৰা পনস্স সীসকটাহং অভিন্দিত্ৱা অট্ঠিং আহচ্চেৱ নিৱত্তা. নাগাপলোকিতং অপলোকেসীতি পহাৰসদ্দং সুত্ৱা যথা নাম হত্থিনাগো ইতো ৱা এত্তো ৱা অপলোকেতুকামো গীৱং অপৰিৱত্তেত্ৱা সকলসৰীৰেনেৱ নিৱত্তিত্ৱা অপলোকেতি. এৱং সকলসৰীৰেনেৱ নিৱত্তিত্ৱা অপলোকেসি. যথা হি মহাজনস্স অট্ঠীনি কোটিযা কোটিং আহচ্চ ঠিতানি, পচ্চেকবুদ্ধানং অঙ্কুসলগ্গানি, ন এৱং বুদ্ধানং. বুদ্ধানং পন সঙ্খলিকানি ৱিয একাবদ্ধানি হুত্ৱা ঠিতানি, তস্মা পচ্ছতো অপলোকনকালে ন সক্কা হোতি গীৱং পৰিৱত্তেতুং. যথা পন হত্থিনাগো পচ্ছাভাগং অপলোকেতুকামো সকলসৰীৰেনেৱ পৰিৱত্ততি, এৱং পৰিৱত্তিতব্বং হোতি. তস্মা ভগৱা যন্তেন পৰিৱত্তিতা সুৱণ্ণপটিমা ৱিয সকলসৰীৰেনেৱ নিৱত্তিত্ৱা অপলোকেসি, অপলোকেত্ৱা ঠিতো পন, ‘‘ন ৱাযং দূসী মাৰো মত্তমঞ্ঞাসী’’তি আহ. তস্সত্থো, অযং দূসী মাৰো পাপং কৰোন্তো নেৱ পমাণং অঞ্ঞাসি, পমাণাতিক্কন্তমকাসীতি.

সহাপলোকনাযাতি ককুসন্ধস্স ভগৱতো অপলোকনেনেৱ সহ তঙ্খণঞ্ঞেৱ. তম্হা চ ঠানা চৱীতি তম্হা চ দেৱট্ঠানা চুতো, মহানিৰযং উপপন্নোতি অত্থো. চৱমানো হি ন যত্থ কত্থচি ঠিতো চৱতি, তস্মা ৱসৱত্তিদেৱলোকং আগন্ত্ৱা চুতো, ‘‘সহাপলোকনাযা’’তি চ ৱচনতো ন ভগৱতো অপলোকিতত্তা চুতোতি ৱেদিতব্বো, চুতিকালদস্সনমত্তমেৱ হেতং. উড়াৰে পন মহাসাৱকে ৱিৰদ্ধত্তা কুদাৰিযা পহটং ৱিযস্স আযু তত্থেৱ ছিজ্জিত্ৱা গতন্তি ৱেদিতব্বং. তযো নামধেয্যা হোন্তীতি তীণি নামানি হোন্তি. ছফস্সাযতনিকোতি ছসু ফস্সাযতনেসু পাটিযেক্কায ৱেদনায পচ্চযো.

সঙ্কুসমাহতোতি অযসূলেহি সমাহতো. পচ্চত্তৱেদনিযোতি সযমেৱ ৱেদনাজনকো. সঙ্কুনা সঙ্কু হদযে সমাগচ্ছেয্যাতি অযসূলেন সদ্ধিং অযসূলং হদযমজ্ঝে সমাগচ্ছেয্য. তস্মিং কিৰ নিৰযে উপপন্নানং তিগাৱুতো অত্তভাৱো হোতি, থেৰস্সাপি তাদিসো অহোসি. অথস্স হি নিৰযপালা তালক্খন্ধপমাণানি অযসূলানি আদিত্তানি সম্পজ্জলিতানি সজোতিভূতানি সযমেৱ গহেত্ৱা পুনপ্পুনং নিৱত্তমানা, – ‘‘ইমিনা তে ঠানেন চিন্তেত্ৱা পাপং কত’’ন্তি পূৱদোণিযং পূৱং কোট্টেন্তো ৱিয হদযমজ্ঝং কোট্টেত্ৱা, পণ্ণাস জনা পাদাভিমুখা পণ্ণাস জনা সীসাভিমুখা কোট্টেত্ৱা গচ্ছন্তি, এৱং গচ্ছন্তা পঞ্চহি ৱস্সসতেহি উভো অন্তে পত্ৱা পুন নিৱত্তমানা পঞ্চহি ৱস্সসতেহি হদযমজ্ঝং আগচ্ছন্তি. তং সন্ধায এৱং ৱুত্তং.

ৱুট্ঠানিমন্তি ৱিপাকৱুট্ঠানৱেদনং. সা কিৰ মহানিৰযে ৱেদনাতো দুক্খতৰা হোতি, যথা হি সিনেহপানসত্তাহতো পৰিহাৰসত্তাহং দুক্খতৰং, এৱং মহানিৰযদুক্খতো উস্সদে ৱিপাকৱুট্ঠানৱেদনা দুক্খতৰাতি ৱদন্তি. সেয্যথাপি মচ্ছস্সাতি পুৰিসসীসঞ্হি ৱট্টং হোতি, সূলেন পহৰন্তস্স পহাৰো ঠানং ন লভতি পৰিগলতি, মচ্ছসীসং আযতং পুথুলং, পহাৰো ঠানং লভতি, অৱিৰজ্ঝিত্ৱা কম্মকাৰণা সুকৰা হোতি, তস্মা এৱৰূপং সীসং হোতি.

৫১৩. ৱিধুৰং সাৱকমাসজ্জাতি ৱিধুৰং সাৱকং ঘট্টযিত্ৱা. পচ্চত্তৱেদনাতি সযমেৱ পাটিযেক্কৱেদনাজনকা. ঈদিসো নিৰযো আসীতি ইমস্মিং ঠানে নিৰযো দেৱদূতসুত্তেন দীপেতব্বো. কণ্হ-দুক্খং নিগচ্ছসীতি কাড়ক-মাৰ, দুক্খং ৱিন্দিস্সসি. মজ্ঝে সৰস্সাতি মহাসমুদ্দস্স মজ্ঝে উদকং ৱত্থুং কত্ৱা নিব্বত্তৱিমানানি কপ্পট্ঠিতিকানি হোন্তি, তেসং ৱেড়ুৰিযস্স ৱিয ৱণ্ণো হোতি, পব্বতমত্থকে জলিতনড়গ্গিক্খন্ধো ৱিয চ নেসং অচ্চিযো জোতন্তি, পভস্সৰা পভাসম্পন্না হোন্তি, তেসু ৱিমানেসু নীলভেদাদিৱসেন নানত্তৱণ্ণা অচ্ছৰা নচ্চন্তি. যো এতমভিজানাতীতি যো এতং ৱিমানৱত্থুং জানাতীতি অত্থো. এৱমেত্থ ৱিমানপেতৱত্থুকেনেৱ অত্থো ৱেদিতব্বো. পাদঙ্গুট্ঠেন কম্পযীতি ইদং পাসাদকম্পনসুত্তেন দীপেতব্বং. যো ৱেজযন্তং পাসাদন্তি ইদং চূড়তণ্হাসঙ্খযৱিমুত্তিসুত্তেন দীপেতব্বং. সক্কং সো পৰিপুচ্ছতীতি ইদম্পি তেনেৱ দীপেতব্বং. সুধম্মাযাভিতো সভন্তি সুধম্মসভায সমীপে, অযং পন ব্ৰহ্মলোকে সুধম্মসভাৱ, ন তাৱতিংসভৱনে. সুধম্মসভাৱিৰহিতো হি দেৱলোকো নাম নত্থি.

ব্ৰহ্মলোকে পভস্সৰন্তি ব্ৰহ্মলোকে মহামোগ্গল্লানমহাকস্সপাদীহি সাৱকেহি সদ্ধিং তস্স তেজোধাতুং সমাপজ্জিত্ৱা নিসিন্নস্স ভগৱতো ওভাসং. একস্মিঞ্হি সমযে ভগৱা ব্ৰহ্মলোকে সুধম্মায দেৱসভায সন্নিপতিত্ৱা, – ‘‘অত্থি নু খো কোচি সমণো ৱা ব্ৰাহ্মণো ৱা এৱংমহিদ্ধিকো. যো ইধ আগন্তুং সক্কুণেয্যা’’তি চিন্তেন্তস্সেৱ ব্ৰহ্মগণস্স চিত্তমঞ্ঞায তত্থ গন্ত্ৱা ব্ৰহ্মগণস্স মত্থকে নিসিন্নো তেজোধাতুং সমাপজ্জিত্ৱা মহামোগ্গল্লানাদীনং আগমনং চিন্তেসি. তেপি গন্ত্ৱা সত্থাৰং ৱন্দিত্ৱা তেজোধাতুং সমাপজ্জিত্ৱা পচ্চেকং দিসাসু নিসীদিংসু, সকলব্ৰহ্মলোকো একোভাসো অহোসি. সত্থা চতুসচ্চপ্পকাসনং ধম্মং দেসেসি, দেসনাপৰিযোসানে অনেকানি ব্ৰহ্মসহস্সানি মগ্গফলেসু পতিট্ঠহিংসু. তং সন্ধাযিমা গাথা ৱুত্তা, সো পনাযমত্থো অঞ্ঞতৰব্ৰহ্মসুত্তেন দীপেতব্বো.

ৱিমোক্খেন অফস্সযীতি ঝানৱিমোক্খেন ফুসি. ৱনন্তি জম্বুদীপং. পুব্বৱিদেহানন্তি পুব্বৱিদেহানঞ্চ দীপং. যে চ ভূমিসযা নৰাতি ভূমিসযা নৰা নাম অপৰগোযানকা চ উত্তৰকুৰুকা চ. তেপি সব্বে ফুসীতি ৱুত্তং হোতি. অযং পন অত্থো নন্দোপনন্দদমনেন দীপেতব্বো. ৱত্থু ৱিসুদ্ধিমগ্গে ইদ্ধিকথায ৱিত্থাৰিতং. অপুঞ্ঞং পসৱীতি অপুঞ্ঞং পটিলভি. আসং মা অকাসি ভিক্খূসূতি ভিক্খূ ৱিহেসেমীতি এতং আসং মা অকাসি. সেসং সব্বত্থ উত্তানমেৱাতি.

পপঞ্চসূদনিযা মজ্ঝিমনিকাযট্ঠকথায

মাৰতজ্জনীযসুত্তৱণ্ণনা নিট্ঠিতা.

পঞ্চমৱগ্গৱণ্ণনা নিট্ঠিতা.