৯. মহাঅস্সপুৰসুত্তৱণ্ণনা

৪১৫. এৱং মে সুতন্তি মহাঅস্সপুৰসুত্তং. তত্থ অঙ্গেসূতি অঙ্গা নাম জানপদিনো ৰাজকুমাৰা, তেসং নিৱাসো একোপি জনপদো ৰুড়্হীসদ্দেন ‘‘অঙ্গা’’তি ৱুচ্চতি, তস্মিং অঙ্গেসু জনপদে. অস্সপুৰং নাম অঙ্গানং নিগমোতি অস্সপুৰন্তি নগৰনামেন লদ্ধৱোহাৰো অঙ্গানং জনপদস্স একো নিগমো, তং গোচৰগামং কত্ৱা ৱিহৰতীতি অত্থো. ভগৱা এতদৱোচাতি এতং ‘‘সমণা সমণাতি ৱো, ভিক্খৱে, জনো সঞ্জানাতী’’তিআদিৱচনমৱোচ.

কস্মা পন এৱং অৱোচাতি. তস্মিং কিৰ নিগমে মনুস্সা সদ্ধা পসন্না বুদ্ধমামকা ধম্মমামকা সঙ্ঘমামকা, তদহুপব্বজিতসামণেৰম্পি ৱস্সসতিকত্থেৰসদিসং কত্ৱা পসংসন্তি; পুব্বণ্হসমযং ভিক্খুসঙ্ঘং পিণ্ডায পৱিসন্তং দিস্ৱা বীজনঙ্গলাদীনি গহেত্ৱা খেত্তং গচ্ছন্তাপি, ফৰসুআদীনি গহেত্ৱা অৰঞ্ঞং পৱিসন্তাপি তানি উপকৰণানি নিক্খিপিত্ৱা ভিক্খুসঙ্ঘস্স নিসীদনট্ঠানং আসনসালং ৱা মণ্ডপং ৱা ৰুক্খমূলং ৱা সম্মজ্জিত্ৱা আসনানি পঞ্ঞপেত্ৱা অৰজপানীযং পচ্চুপট্ঠাপেত্ৱা ভিক্খুসঙ্ঘং নিসীদাপেত্ৱা যাগুখজ্জকাদীনি দত্ৱা কতভত্তকিচ্চং ভিক্খুসঙ্ঘং উয্যোজেত্ৱা ততো তানি উপকৰণানি আদায খেত্তং ৱা অৰঞ্ঞং ৱা গন্ত্ৱা অত্তনো কম্মানি কৰোন্তি, কম্মন্তট্ঠানেপি নেসং অঞ্ঞা কথা নাম নত্থি. চত্তাৰো মগ্গট্ঠা চত্তাৰো ফলট্ঠাতি অট্ঠ পুগ্গলা অৰিযসঙ্ঘো নাম; তে ‘‘এৱৰূপেন সীলেন, এৱৰূপেন আচাৰেন, এৱৰূপায পটিপত্তিযা সমন্নাগতা লজ্জিনো পেসলা উড়াৰগুণা’’তি ভিক্খুসঙ্ঘস্সেৱ ৱণ্ণং কথেন্তি. কম্মন্তট্ঠানতো আগন্ত্ৱা ভুত্তসাযমাসা ঘৰদ্ৱাৰে নিসিন্নাপি, সযনিঘৰং পৱিসিত্ৱা নিসিন্নাপি ভিক্খুসঙ্ঘস্সেৱ ৱণ্ণং কথেন্তি. ভগৱা তেসং মনুস্সানং নিপচ্চকাৰং দিস্ৱা ভিক্খুসঙ্ঘং পিণ্ডপাতাপচাযনে নিযোজেত্ৱা এতদৱোচ.

যে ধম্মা সমণকৰণা চ ব্ৰাহ্মণকৰণা চাতি যে ধম্মা সমাদায পৰিপূৰিতা সমিতপাপসমণঞ্চ বাহিতপাপব্ৰাহ্মণঞ্চ কৰোন্তীতি অত্থো. ‘‘তীণিমানি, ভিক্খৱে, সমণস্স সমণিযানি সমণকৰণীযানি. কতমানি তীণি? অধিসীলসিক্খাসমাদানং, অধিচিত্তসিক্খাসমাদানং, অধিপঞ্ঞাসিক্খাসমাদান’’ন্তি (অ. নি. ৩.৮২) এত্থ পন সমণেন কত্তব্বধম্মা ৱুত্তা. তেপি চ সমণকৰণা হোন্তিযেৱ. ইধ পন হিৰোত্তপ্পাদিৱসেন দেসনা ৱিত্থাৰিতা. এৱং নো অযং অম্হাকন্তি এত্থ নোতি নিপাতমত্তং. এৱং অযং অম্হাকন্তি অত্থো. মহপ্ফলা মহানিসংসাতি উভযম্পি অত্থতো একমেৱ. অৱঞ্ঝাতি অমোঘা. সফলাতি অযং তস্সেৱ অত্থো. যস্সা হি ফলং নত্থি, সা ৱঞ্ঝা নাম হোতি. সউদ্ৰযাতি সৱড্ঢি, ইদং সফলতায ৱেৱচনং. এৱঞ্হি ৱো, ভিক্খৱে, সিক্খিতব্বন্তি, ভিক্খৱে, এৱং তুম্হেহি সিক্খিতব্বং. ইতি ভগৱা ইমিনা এত্তকেন ঠানেন হিৰোত্তপ্পাদীনং ধম্মানং ৱণ্ণং কথেসি. কস্মা? ৱচনপথপচ্ছিন্দনত্থং. সচে হি কোচি অচিৰপব্বজিতো বালভিক্খু এৱং ৱদেয্য – ‘‘ভগৱা হিৰোত্তপ্পাদিধম্মে সমাদায ৱত্তথাতি ৱদতি, কো নু খো তেসং সমাদায ৱত্তনে আনিসংসো’’তি? তস্স ৱচনপথপচ্ছিন্দনত্থং. অযঞ্চ আনিসংসো, ইমে হি ধম্মা সমাদায পৰিপূৰিতা সমিতপাপসমণং নাম বাহিতপাপব্ৰাহ্মণং নাম কৰোন্তি, চতুপচ্চযলাভং উপ্পাদেন্তি, পচ্চযদাযকানং মহপ্ফলতং সম্পাদেন্তি, পব্বজ্জং অৱঞ্ঝং সফলং সউদ্ৰযং কৰোন্তীতি ৱণ্ণং অভাসি. অযমেত্থ সঙ্খেপো. ৱিত্থাৰতো পন ৱণ্ণকথা সতিপট্ঠানে (দী. নি. অট্ঠ. ২.৩৭৩; ম. নি. অট্ঠ. ২.৩৭৩) ৱুত্তনযেনেৱ ৱেদিতব্বা.

৪১৬. হিৰোত্তপ্পেনাতি ‘‘যং হিৰীযতি হিৰীযিতব্বেন, ওত্তপ্পতি ওত্তপ্পিতব্বেনা’’তি (ধ. স. ১৩৩১) এৱং ৱিত্থাৰিতায হিৰিযা চেৱ ওত্তপ্পেন চ. অপিচেত্থ অজ্ঝত্তসমুট্ঠানা হিৰী, বহিদ্ধাসমুট্ঠানং ওত্তপ্পং. অত্তাধিপতেয্যা হিৰী, লোকাধিপতেয্যং ওত্তপ্পং. লজ্জাসভাৱসণ্ঠিতা হিৰী, ভযসভাৱসণ্ঠিতং ওত্তপ্পং, ৱিত্থাৰকথা পনেত্থ সব্বাকাৰেন ৱিসুদ্ধিমগ্গে ৱুত্তা. অপিচ ইমে দ্ৱে ধম্মা লোকং পালনতো লোকপালধম্মা নামাতি কথিতা. যথাহ – ‘‘দ্ৱেমে, ভিক্খৱে, সুক্কা ধম্মা লোকং পালেন্তি. কতমে দ্ৱে? হিৰী চ ওত্তপ্পঞ্চ. ইমে খো, ভিক্খৱে, দ্ৱে সুক্কা ধম্মা লোকং পালেন্তি. ইমে চ খো, ভিক্খৱে, দ্ৱে সুক্কা ধম্মা লোকং ন পালেয্যুং, নযিধ পঞ্ঞাযেথ, ‘মাতা’তি ৱা, ‘মাতুচ্ছা’তি ৱা, ‘মাতুলানী’তি ৱা, ‘আচৰিযভৰিযা’তি ৱা, ‘গৰূনং দাৰা’তি ৱা, সম্ভেদং লোকো অগমিস্স, যথা অজেড়কা কুক্কুটসূকৰা সোণসিঙ্গালা’’তি (অ. নি. ২.৯). ইমেযেৱ জাতকে ‘‘দেৱধম্মা’’তি কথিতা. যথাহ –

‘‘হিৰিওত্তপ্পসম্পন্না, সুক্কধম্মসমাহিতা;

সন্তো সপ্পুৰিসা লোকে, দেৱধম্মাতি ৱুচ্চৰে’’তি. (জা. ১.১.৬);

মহাচুন্দত্থেৰস্স পন কিলেসসল্লেখনপটিপদাতি কত্ৱা দস্সিতা. যথাহ – ‘‘পৰে অহিৰিকা ভৱিস্সন্তি, মযমেত্থ হিৰিমনা ভৱিস্সামাতি সল্লেখো কৰণীযো. পৰে অনোত্তাপী ভৱিস্সন্তি, মযমেত্থ ওত্তাপী ভৱিস্সামাতি সল্লেখো কৰণীযো’’তি (ম. নি. ১.৮৩). ইমেৱ মহাকস্সপত্থেৰস্স ওৱাদূপসম্পদাতি কত্ৱা দস্সিতা. ৱুত্তঞ্হেতং – ‘‘তস্মা তিহ তে, কস্সপ, এৱং সিক্খিতব্বং, তিব্বং মে হিৰোত্তপ্পং পচ্চুপট্ঠিতং ভৱিস্সতি থেৰেসু নৱেসু মজ্ঝিমেসূতি. এৱঞ্হি তে, কস্সপ, সিক্খিতব্ব’’ন্তি (সং. নি. ২.১৫৪). ইধ পনেতে সমণধম্মা নামাতি দস্সিতা.

যস্মা পন এত্তাৱতা সামঞ্ঞত্থো মত্থকং পত্তো নাম হোতি, তস্মা অপৰেপি সমণকৰণধম্মে দস্সেতুং সিযা খো পন, ভিক্খৱে, তুম্হাকন্তিআদিমাহ. তত্থ সামঞ্ঞত্থোতি সংযুত্তকে তাৱ, ‘‘কতমঞ্চ, ভিক্খৱে, সামঞ্ঞং? অযমেৱ অৰিযো অট্ঠঙ্গিকো মগ্গো. সেয্যথিদং, সম্মাদিট্ঠি…পে… সম্মাসমাধি, ইদং ৱুচ্চতি, ভিক্খৱে, সামঞ্ঞং. কতমো চ, ভিক্খৱে, সামঞ্ঞত্থো? যো, ভিক্খৱে, ৰাগক্খযো দোসক্খযো মোহক্খযো, অযং ৱুচ্চতি, ভিক্খৱে, সামঞ্ঞত্থো’’তি (সং. নি. ৫.৩৬) মগ্গো ‘‘সামঞ্ঞ’’ন্তি, ফলনিব্বানানি ‘‘সামঞ্ঞত্থো’’তি ৱুত্তানি. ইমস্মিং পন ঠানে মগ্গম্পি ফলম্পি একতো কত্ৱা সামঞ্ঞত্থো কথিতোতি ৱেদিতব্বো. আৰোচযামীতি কথেমি. পটিৱেদযামীতি জানাপেমি.

৪১৭. পৰিসুদ্ধো নো কাযসমাচাৰোতি এত্থ কাযসমাচাৰো পৰিসুদ্ধো অপৰিসুদ্ধোতি দুৱিধো. যো হি ভিক্খু পাণং হনতি অদিন্নং আদিযতি, কামেসু মিচ্ছা চৰতি, তস্স কাযসমাচাৰো অপৰিসুদ্ধো নাম, অযং পন কম্মপথৱসেনেৱ ৱাৰিতো. যো পন পাণিনা ৱা লেড্ডুনা ৱা দণ্ডেন ৱা সত্থেন ৱা পৰং পোথেতি ৱিহেঠেতি, তস্স কাযসমাচাৰো অপৰিসুদ্ধো নাম, অযম্পি সিক্খাপদবদ্ধেনেৱ পটিক্খিত্তো. ইমস্মিং সুত্তে উভযম্পেতং অকথেত্ৱা পৰমসল্লেখো নাম কথিতো. যো হি ভিক্খু পানীযঘটে ৱা পানীযং পিৱন্তানং, পত্তে ৱা ভত্তং ভুঞ্জন্তানং কাকানং নিৱাৰণৱসেন হত্থং ৱা দণ্ডং ৱা লেড্ডুং ৱা উগ্গিৰতি, তস্স কাযসমাচাৰো অপৰিসুদ্ধো. ৱিপৰীতো পৰিসুদ্ধো নাম. উত্তানোতি উগ্গতো পাকটো. ৱিৱটোতি অনাৱটো অসঞ্ছন্নো. উভযেনাপি পৰিসুদ্ধতংযেৱ দীপেতি. ন চ ছিদ্দৱাতি সদা একসদিসো অন্তৰন্তৰে ছিদ্দৰহিতো. সংৱুতোতি কিলেসানং দ্ৱাৰ পিদহনেন পিদহিতো, ন ৱজ্জপটিচ্ছাদনত্থায.

৪১৮. ৱচীসমাচাৰেপি যো ভিক্খু মুসা ৱদতি, পিসুণং কথেতি, ফৰুসং ভাসতি, সম্ফং পলপতি, তস্স ৱচীসমাচাৰো অপৰিসুদ্ধো নাম. অযং পন কম্মপথৱসেন ৱাৰিতো. যো পন গহপতিকাতি ৱা দাসাতি ৱা পেস্সাতি ৱা আদীহি খুংসেন্তো ৱদতি, তস্স ৱচীসমাচাৰো অপৰিসুদ্ধো নাম. অযং পন সিক্খাপদবদ্ধেনেৱ পটিক্খিত্তো. ইমস্মিং সুত্তে উভযম্পেতং অকথেত্ৱা পৰমসল্লেখো নাম কথিতো. যো হি ভিক্খু দহৰেন ৱা সামণেৰেন ৱা, ‘‘কচ্চি, ভন্তে, অম্হাকং উপজ্ঝাযং পস্সথা’’তি ৱুত্তে, সম্বহুলা, আৱুসো, ভিক্খুভিক্খুনিযো একস্মিং পদেসে ৱিচদিংসু, উপজ্ঝাযো তে ৱিক্কাযিকসাকভণ্ডিকং উক্খিপিত্ৱা গতো ভৱিস্সতী’’তিআদিনা নযেন হসাধিপ্পাযোপি এৱৰূপং কথং কথেতি, তস্স ৱচীসমাচাৰো অপৰিসুদ্ধো. ৱিপৰীতো পৰিসুদ্ধো নাম.

৪১৯. মনোসমাচাৰে যো ভিক্খু অভিজ্ঝালু ব্যাপন্নচিত্তো মিচ্ছাদিট্ঠিকো হোতি, তস্স মনোসমাচাৰো অপৰিসুদ্ধো নাম. অযং পন কম্মপথৱসেনেৱ ৱাৰিতো. যো পন উপনিক্খিত্তং জাতৰূপৰজতং সাদিযতি, তস্স মনোসমাচাৰো অপৰিসুদ্ধো নাম. অযম্পি সিক্খাপদবদ্ধেনেৱ পটিক্খিত্তো. ইমস্মিং সুত্তে উভযম্পেতং অকথেত্ৱা পৰমসল্লেখো নাম কথিতো. যো পন ভিক্খু কামৱিতক্কং ৱা ব্যাপাদৱিতক্কং ৱা ৱিহিংসাৱিতক্কং ৱা ৱিতক্কেতি, তস্স মনোসমাচাৰো অপৰিসুদ্ধো. ৱিপৰীতো পৰিসুদ্ধো নাম.

৪২০. আজীৱস্মিং যো ভিক্খু আজীৱহেতু ৱেজ্জকম্মং পহিণগমনং গণ্ডফালনং কৰোতি, অৰুমক্খনং দেতি, তেলং পচতীতি একৱীসতিঅনেসনাৱসেন জীৱিকং কপ্পেতি. যো ৱা পন ৱিঞ্ঞাপেত্ৱা ভুঞ্জতি, তস্স আজীৱো অপৰিসুদ্ধো নাম. অযং পন সিক্খাপদবদ্ধেনেৱ পটিক্খিত্তো. ইমস্মিং সুত্তে উভযম্পেতং অকথেত্ৱা পৰমসল্লেখো নাম কথিতো. যো হি ভিক্খু সপ্পিনৱনীততেলমধুফাণিতাদীনি লভিত্ৱা, ‘‘স্ৱে ৱা পুনদিৱসে ৱা ভৱিস্সতী’’তি সন্নিধিকাৰকং পৰিভুঞ্জতি, যো ৱা পন নিম্বঙ্কুৰাদীনি দিস্ৱা সামণেৰে ৱদতি – ‘‘অংঙ্কুৰে খাদথা’’তি, সামণেৰা থেৰো খাদিতুকামোতি কপ্পিযং কত্ৱা দেন্তি, দহৰে পন সামণেৰে ৱা পানীযং পিৱথ, আৱুসোতি ৱদতি, তে থেৰো পানীযং পিৱিতুকামোতি পানীযসঙ্খং ধোৱিত্ৱা দেন্তি, তম্পি পৰিভুঞ্জন্তস্স আজীৱো অপৰিসুদ্ধো নাম হোতি. ৱিপৰীতো পৰিসুদ্ধো নাম.

৪২২. মত্তঞ্ঞূতি পৰিযেসনপটিগ্গহণপৰিভোগেসু মত্তঞ্ঞূ, যুত্তঞ্ঞূ, পমাণঞ্ঞূ.

৪২৩. জাগৰিযমনুযুত্তাতি ৰত্তিন্দিৱং ছ কোট্ঠাসে কত্ৱা একস্মিং কোট্ঠাসে নিদ্দায ওকাসং দত্ৱা পঞ্চ কোট্ঠাসে জাগৰিযম্হি যুত্তা পযুত্তা. সীহসেয্যন্তি এত্থ কামভোগিসেয্যা, পেতসেয্যা, সীহসেয্যা, তথাগতসেয্যাতি চতস্সো সেয্যা. তত্থ ‘‘যেভুয্যেন, ভিক্খৱে, কামভোগী সত্তা ৱামেন পস্সেন সেন্তী’’তি (অ. নি. ৪.২৪৬) অযং কামভোগিসেয্যা, তেসু হি যেভুয্যেন দক্খিণপস্সেন সযানো নাম নত্থি.

‘‘যেভুয্যেন, ভিক্খৱে, পেতা উত্তানা সেন্তী’’তি (অ. নি. ৪.২৪৬) অযং পেতসেয্যা, পেতা হি অপ্পমংসলোহিতত্তা অট্ঠিসঙ্ঘাতজটিতা একেন পস্সেন সযিতুং ন সক্কোন্তি, উত্তানাৱ সেন্তি.

‘‘যেভুয্যেন, ভিক্খৱে, সীহো মিগৰাজা নঙ্গুট্ঠং অন্তৰসত্থিম্হি অনুপক্খিপিত্ৱা দক্খিণেন পস্সেন সেতী’’তি (অ. নি. ৪.২৪৬) অযং সীহসেয্যা. তেজুস্সদত্তা হি সীহো মিগৰাজা দ্ৱে পুৰিমপাদে একস্মিং ঠানে পচ্ছিমপাদে একস্মিং ঠপেত্ৱা নঙ্গুট্ঠং অন্তৰসত্থিম্হি পক্খিপিত্ৱা পুৰিমপাদপচ্ছিমপাদনঙ্গুট্ঠানং ঠিতোকাসং সল্লক্খেত্ৱা দ্ৱিন্নং পুৰিমপাদানং মত্থকে সীসং ঠপেত্ৱা সযতি. দিৱসম্পি সযিত্ৱা পবুজ্ঝমানো ন উত্ৰাসন্তো পবুজ্ঝতি. সীসং পন উক্খিপিত্ৱা পুৰিমপাদানং ঠিতোকাসং সল্লক্খেতি. সচে কিঞ্চি ঠানং ৱিজহিত্ৱা ঠিতং হোতি, ‘‘নযিদং তুয্হং জাতিযা, ন সূৰভাৱস্স চ অনুৰূপ’’ন্তি অনত্তমনো হুত্ৱা তত্থেৱ সযতি, ন গোচৰায পক্কমতি. অৱিজহিত্ৱা ঠিতে পন ‘‘তুয্হং জাতিযা সূৰভাৱস্স চ অনুৰূপমিদ’’ন্তি হট্ঠতুট্ঠো উট্ঠায সীহৱিজম্ভিতং ৱিজম্ভিত্ৱা কেসৰভাৰং ৱিধুনিত্ৱা তিক্খত্তুং সীহনাদং নদিত্ৱা গোচৰায পক্কমতি. চতুত্থজ্ঝানসেয্যা পন তথাগতসেয্যাতি ৱুচ্চতি. তাসু ইধ সীহসেয্যা আগতা. অযঞ্হি তেজুস্সদইৰিযাপথত্তা উত্তমসেয্যা নাম. পাদে পাদন্তি দক্খিণপাদে ৱামপাদং. অচ্চাধাযাতি অতিআধায ঈসকং অতিক্কম্ম ঠপেত্ৱা, গোপ্ফকেন হি গোপ্ফকে, জাণুনা ৱা জাণুম্হি সঙ্ঘট্টিযমানে অভিণ্হং ৱেদনা উপ্পজ্জতি, চিত্তং একগ্গং ন হোতি, সেয্যা অফাসুকা হোতি. যথা পন ন সঙ্ঘট্টেতি, এৱং অতিক্কম্ম ঠপিতে ৱেদনা নুপ্পজ্জতি, চিত্তং একগ্গং হোতি, সেয্যা ফাসুকা হোতি, তস্মা এৱমাহ.

৪২৫. অভিজ্ঝং লোকেতিআদি চূড়হত্থিপদে ৱিত্থাৰিতং.

৪২৬. যা পনাযং সেয্যথাপি, ভিক্খৱেতি উপমা ৱুত্তা. তত্থ ইণং আদাযাতি ৱড্ঢিযা ধনং গহেত্ৱা. ব্যন্তী কৰেয্যাতি ৱিগতন্তানি কৰেয্য. যথা তেসং কাকণিকমত্তোপি পৰিযন্তো নাম নাৱসিস্সতি, এৱং কৰেয্য, সব্বসো পটিনিয্যাতেয্যাতি অত্থো. ততোনিদানন্তি আণণ্যনিদানং. সো হি অণণোম্হীতি আৱজ্জন্তো বলৱপামোজ্জং লভতি, বলৱসোমনস্সমধিগচ্ছতি. তেন ৱুত্তং – ‘‘লভেথ পামোজ্জং, অধিগচ্ছেয্য সোমনস্স’’ন্তি.

ৱিসভাগৱেদনুপ্পত্তিযা ককচেনেৱ চতুইৰিযাপথং ছিন্দন্তো আবাধতীতি আবাধো, স্ৱাস্স অত্থীতি আবাধিকো. তংসমুট্ঠানেন দুক্খেন দুক্খিতো. অধিমত্তগিলানোতি বাড়্হগিলানো. নচ্ছাদেয্যাতি অধিমত্তব্যাধিপৰেততায ন ৰুচ্চেয্য. বলমত্তাতি বলমেৱ, বলঞ্চস্স কাযে ন ভৱেয্যাতি অত্থো. ততোনিদানন্তি আৰোগ্যনিদানং, তস্স হি অৰোগোম্হীতি আৱজ্জযতো তদুভযং হোতি. তেন ৱুত্তং – ‘‘লভেথ পামোজ্জং, অধিগচ্ছেয্য সোমনস্স’’ন্তি. ন চস্স কিঞ্চি ভোগানং ৱযোতি কাকণিকমত্তম্পি ভোগানং ৱযো ন ভৱেয্য. ততোনিদানন্তি বন্ধনামোক্খনিদানং, সেসং ৱুত্তনযেনেৱ সব্বপদেসু যোজেতব্বং. অনত্তাধীনোতি ন অত্তনি অধীনো, অত্তনো ৰুচিযা কিঞ্চি কাতুং ন লভতি. পৰাধীনোতি পৰেসু অধীনো, পৰস্সেৱ ৰুচিযা পৱত্ততি. ন যেন কামং গমোতি যেন দিসাভাগেনস্স কামো হোতি. ইচ্ছা উপ্পজ্জতি গমনায, তেন গন্তুং ন লভতি. দাসব্যাতি দাসভাৱা. ভুজিস্সোতি অত্তনো সন্তকো. ততোনিদানন্তি ভুজিস্সনিদানং. কন্তাৰদ্ধানমগ্গন্তি কন্তাৰং অদ্ধানমগ্গং, নিৰুদকং দীঘমগ্গন্তি অত্থো. ততোনিদানন্তি খেমন্তভূমিনিদানং.

ইমে পঞ্চ নীৱৰণে অপ্পহীনেতি এত্থ ভগৱা অপ্পহীনং কামচ্ছন্দনীৱৰণং ইণসদিসং, সেসানি ৰোগাদিসদিসানি কত্ৱা দস্সেতি. তত্ৰাযং সদিসতা – যো হি পৰেসং ইণং গহেত্ৱা ৱিনাসেতি. সো তেহি ইণং দেহীতি ৱুচ্চমানোপি ফৰুসং ৱুচ্চমানোপি বজ্ঝমানোপি পহৰিযমানোপি কিঞ্চি পটিবাহিতুং ন সক্কোতি, সব্বং তিতিক্খতি, তিতিক্খকাৰণঞ্হিস্স তং ইণং হোতি. এৱমেৱং যো যম্হি কামচ্ছন্দেন ৰজ্জতি, তণ্হাগণেন তং ৱত্থুং গণ্হাতি, সো তেন ফৰুসং ৱুচ্চমানোপি বজ্ঝমানোপি পহৰিযমানোপি সব্বং তিতিক্খতি. তিতিক্খকাৰণঞ্হিস্স সো কামচ্ছন্দো হোতি ঘৰসামিকেহি ৱধীযমানানং ইত্থীনং ৱিযাতি. এৱং ইণং ৱিয কামচ্ছন্দো দট্ঠব্বো.

যথা পন পিত্তৰোগাতুৰো মধুসক্কৰাদীসুপি দিন্নেসু পিত্তৰোগাতুৰতায তেসং ৰসং ন ৱিন্দতি, তিত্তকং তিত্তকন্তি উগ্গিৰতিযেৱ. এৱমেৱং ব্যাপন্নচিত্তো হিতকামেহি আচৰিযুপজ্ঝাযেহি অপ্পমত্তকম্পি ওৱদীযমানো ওৱাদং ন গণ্হাতি, ‘‘অতি ৱিয মে তুম্হে উপদ্দৱেথা’’তিআদীনি ৱত্ৱা ৱিব্ভমতি. পিত্তৰোগাতুৰতায সো পুৰিসো মধুসক্কৰাদিৰসং ৱিয, কোধাতুৰতায ঝানসুখাদিভেদং সাসনৰসং ন ৱিন্দতীতি. এৱং ৰোগো ৱিয ব্যাপাদো দট্ঠব্বো.

যথা পন নক্খত্তদিৱসে বন্ধনাগাৰে বদ্ধো পুৰিসো নক্খত্তস্স নেৱ আদিং, ন মজ্ঝং, ন পৰিযোসানং পস্সতি. সো দুতিযদিৱসে মুত্তো, ‘‘অহো হিয্যো নক্খত্তং মনাপং, অহো নচ্চং, অহো গীত’’ন্তিআদীনি সুত্ৱাপি পটিৱচনং ন দেতি. কিং কাৰণা? নক্খত্তস্স অননুভূতত্তা. এৱমেৱং থিনমিদ্ধাভিভূতো ভিক্খু ৱিচিত্তনযেপি ধম্মস্সৱনে পৱত্তমানে নেৱ তস্স আদিং, ন মজ্ঝং, ন পৰিযোসানং জানাতি. সো উট্ঠিতে ধম্মস্সৱনে, ‘‘অহো ধম্মস্সৱনং, অহো কাৰণং, অহো উপমা’’তি ধম্মস্সৱনস্স ৱণ্ণং ভণমানানং সুত্ৱাপি পটিৱচনং ন দেতি. কিং কাৰণা? থিনমিদ্ধৱসেন ধম্মকথায অননুভূতত্তাতি. এৱং বন্ধনাগাৰং ৱিয থিনমিদ্ধং দট্ঠব্বং.

যথা পন নক্খত্তং কীড়ন্তোপি দাসো, ‘‘ইদং নাম অচ্চাযিকং কৰণীযং অত্থি, সীঘং, তত্থ গচ্ছ, নো চে গচ্ছসি, হত্থপাদং ৱা তে ছিন্দামি কণ্ণনাসং ৱা’’তি ৱুত্তো সীঘং গচ্ছতিযেৱ, নক্খত্তস্স আদিমজ্ঝপৰিযোসানং অনুভৱিতুং ন লভতি. কস্মা? পৰাধীনতায. এৱমেৱং ৱিনযে অপ্পকতঞ্ঞুনা ৱিৱেকত্থায অৰঞ্ঞং পৱিট্ঠেনাপি কিস্মিঞ্চিদেৱ অন্তমসো কপ্পিযমংসেপি অকপ্পিযমংসসঞ্ঞায উপ্পন্নায ৱিৱেকং পহায সীলৱিসোধনত্থং ৱিনযধৰস্স সন্তিকে গন্তব্বং হোতি. ৱিৱেকসুখং অনুভৱিতুং ন লভতি. কস্মা? উদ্ধচ্চকুক্কুচ্চাভিভূততাযাতি, এৱং দাসব্যং ৱিয উদ্ধচ্চকুক্কুচ্চং দট্টব্বং.

যথা পন কন্তাৰদ্ধানমগ্গপটিপন্নো পুৰিসো চোৰেহি মনুস্সানং ৱিলুত্তোকাসং পহতোকাসঞ্চ দিস্ৱা দণ্ডকসদ্দেনপি সকুণসদ্দেনপি চোৰা আগতাতি উস্সঙ্কিতপৰিসঙ্কিতো হোতি, গচ্ছতিপি, তিট্ঠতিপি, নিৱত্ততিপি, গতট্ঠানতো আগতট্ঠানমেৱ বহুতৰং হোতি. সো কিচ্ছেন কসিৰেন খেমন্তভূমিং পাপুণাতি ৱা, ন ৱা পাপুণাতি. এৱমেৱং যস্স অট্ঠসু ঠানেসু ৱিচিকিচ্ছা উপ্পন্না হোতি. সো ‘‘বুদ্ধো নু খো, ন নু খো বুদ্ধো’’তিআদিনা নযেন ৱিচিকিচ্ছন্তো অধিমুচ্চিত্ৱা সদ্ধায গণ্হিতুং ন সক্কোতি. অসক্কোন্তো মগ্গং ৱা ফলং ৱা ন পাপুণাতীতি যথা কন্তাৰদ্ধানমগ্গে ‘‘চোৰা অত্থি নত্থী’’তি পুনপ্পুনং আসপ্পনপৰিসপ্পনং অপৰিযোগাহনং ছম্ভিতত্ত চিত্তস্স উপ্পাদেন্তো খেমন্তপত্তিযা অন্তৰাযং কৰোতি, এৱং ৱিচিকিচ্ছাপি ‘‘বুদ্ধো নু খো ন বুদ্ধো’’তিআদিনা নযেন পুনপ্পুনং আসপ্পনপৰিসপ্পনং অপৰিযোগাহনং ছম্ভিতত্তং চিত্তস্স উপ্পাদযমানা অৰিযভূমিপ্পত্তিযা অন্তৰাযং কৰোতীতি কন্তাৰদ্ধানমগ্গো ৱিয দট্ঠব্বা.

ইদানি সেয্যথাপি, ভিক্খৱে, আণণ্যন্তি এত্থ ভগৱা পহীনকামচ্ছন্দনীৱৰণং আণণ্যসদিসং, সেসানি আৰোগ্যাদিসদিসানি কত্ৱা দস্সেতি. তত্ৰাযং সদিসতা – যথা হি পুৰিসো ইণং আদায কম্মন্তে পযোজেত্ৱা সমিদ্ধকম্মন্তো, ‘‘ইদং ইণং নাম পলিবোধমূল’’ন্তি চিন্তেত্ৱা সৱড্ঢিকং ইণং নিয্যাতেত্ৱা পণ্ণং ফালাপেয্য. অথস্স ততো পট্ঠায নেৱ কোচি দূতং পেসেতি, ন পণ্ণং, সো ইণসামিকে দিস্ৱাপি সচে ইচ্ছতি, আসনা উট্ঠহতি, নো চে, ন উট্ঠহতি. কস্মা? তেহি সদ্ধিং নিল্লেপতায অলগ্গতায. এৱমেৱ ভিক্খু, ‘‘অযং কামচ্ছন্দো নাম পলিবোধমূল’’ন্তি সতিপট্ঠানে ৱুত্তনযেনেৱ ছ ধম্মে ভাৱেত্ৱা কামচ্ছন্দনীৱৰণং পজহতি. তস্সেৱং পহীনকামচ্ছন্দস্স যথা ইণমুত্তস্স পুৰিসস্স ইণসামিকে দিস্ৱা নেৱ ভযং ন ছম্ভিতত্তং হোতি. এৱমেৱ পৰৱত্থুম্হি নেৱ সঙ্গো ন বন্ধো হোতি. দিব্বানিপি ৰূপানি পস্সতো কিলেসো ন সমুদাচৰতি. তস্মা ভগৱা আণণ্যমিৱ কামচ্ছন্দপ্পহানমাহ.

যথা পন সো পিত্তৰোগাতুৰো পুৰিসো ভেসজ্জকিৰিযায তং ৰোগং ৱূপসমেত্ৱা ততো পট্ঠায মধুসক্কৰাদীনং ৰসং ৱিন্দতি. এৱমেৱং ভিক্খু, ‘‘অযং ব্যাপাদো নাম অনত্থকাৰকো’’তি ছ ধম্মে ভাৱেত্ৱা ব্যাপাদনীৱৰণং পজহতি. সো এৱং পহীনব্যাপাদো যথা পিত্তৰোগৱিমুত্তো পুৰিসো মধুসক্কৰাদীনি মধুৰানি সম্পিযাযমানো পটিসেৱতি. এৱমেৱং আচাৰপণ্ণত্তিআদীনি সিক্খাপিযমানো সিৰসা সম্পটিচ্ছিত্ৱা সম্পিযাযমানো সিক্খতি. তস্মা ভগৱা আৰোগ্যমিৱ ব্যাপাদপ্পহানমাহ.

যথা সো নক্খত্তদিৱসে বন্ধনাগাৰং পৱেসিতো পুৰিসো অপৰস্মিং নক্খত্তদিৱসে, ‘‘পুব্বেপি অহং পমাদদোসেন বদ্ধো তং নক্খত্তং নানুভৱামি, ইদানি অপ্পমত্তো ভৱিস্সামী’’তি যথাস্স পচ্চত্থিকা ওকাসং ন লভন্তি. এৱং অপ্পমত্তো হুত্ৱা নক্খত্তং অনুভৱিত্ৱা – ‘‘অহো নক্খত্তং অহো নক্খত্ত’’ন্তি উদানং উদানেসি. এৱমেৱ ভিক্খু, ‘‘ইদং থিনমিদ্ধং নাম মহাঅনত্থকৰ’’ন্তি ছ ধম্মে ভাৱেত্ৱা থিনমিদ্ধনীৱৰণং পজহতি. সো এৱং পহীনথিনমিদ্ধো যথা বন্ধনা মুত্তো পুৰিসো সত্তাহম্পি নক্খত্তস্স আদিমজ্ঝপৰিযোসানং অনুভৱতি. এৱমেৱং ভিক্খু ধম্মনক্খত্তস্স আদিমজ্ঝপৰিযোসানং অনুভৱন্তো সহ পটিসম্ভিদাহি অৰহত্তং পাপুণাতি. তস্মা ভগৱা বন্ধনা মোক্খমিৱ থিনমিদ্ধপ্পহানমাহ.

যথা পন দাসো কঞ্চিদেৱ মিত্তং উপনিস্সায সামিকানং ধনং দত্ৱা অত্তানং ভুজিস্সং কত্ৱা ততো পট্ঠায যং ইচ্ছতি, তং কৰেয্য. এৱমেৱ ভিক্খু, ‘‘ইদং উদ্ধচ্চকুক্কুচ্চং নাম মহাঅনত্থকৰ’’ন্তি ছ ধম্মে ভাৱেত্ৱা উদ্ধচ্চকুক্কুচ্চং পজহতি. সো এৱং পহীনুদ্ধচ্চকুক্কুচ্চো যথা ভুজিস্সো পুৰিসো যং ইচ্ছতি, তং কৰোতি. ন তং কোচি বলক্কাৰেন ততো নিৱত্তেতি. এৱমেৱং ভিক্খু যথাসুখং নেক্খম্মপটিপদং পটিপজ্জতি, ন নং উদ্ধচ্চকুক্কুচ্চং বলক্কাৰেন ততো নিৱত্তেতি. তস্মা ভগৱা ভুজিস্সং ৱিয উদ্ধচ্চকুক্কুচ্চপ্পহানমাহ.

যথা বলৱা পুৰিসো হত্থসাৰং গহেত্ৱা সজ্জাৱুধো সপৰিৱাৰো কন্তাৰং পটিপজ্জেয্য. তং চোৰা দূৰতোৱ দিস্ৱা পলাযেয্যুং. সো সোত্থিনা তং কন্তাৰং নিত্থৰিত্ৱা খেমন্তং পত্তো হট্ঠতুট্ঠো অস্স. এৱমেৱং ভিক্খু, ‘‘অযং ৱিচিকিচ্ছা নাম অনত্থকাৰিকা’’তি ছ ধম্মে ভাৱেত্ৱা ৱিচিকিচ্ছং পজহতি. সো এৱং পহীনৱিচিকিচ্ছো যথা বলৱা সজ্জাৱুধো সপৰিৱাৰো পুৰিসো নিব্ভযো চোৰে তিণং ৱিয অগণেত্ৱা সোত্থিনা নিক্খমিত্ৱা খেমন্তভূমিং পাপুণাতি. এৱমেৱং দুচ্চৰিতকন্তাৰং নিত্থৰিত্ৱা পৰমখেমন্তভূমিং অমতং নিব্বানং পাপুণাতি. তস্মা ভগৱা খেমন্তভূমিং ৱিয ৱিচিকিচ্ছাপহানমাহ.

৪২৭. ইমমেৱ কাযন্তি ইমং কৰজকাযং. অভিসন্দেতীতি তেমেতি স্নেহেতি, সব্বত্থ পৱত্তপীতিসুখং কৰোতি. পৰিসন্দেতীতি সমন্ততো সন্দেতি. পৰিপূৰেতীতি ৱাযুনা ভস্তং ৱিয পূৰেতি. পৰিপ্ফৰতীতি সমন্ততো ফুসতি. সব্বাৱতো কাযস্সাতি অস্স ভিক্খুনো সব্বকোট্ঠাসৱতো কাযস্স. কিঞ্চি উপাদিন্নকসন্ততিপৱত্তিট্ঠানে ছৱিমংসলোহিতানুগতং অণুমত্তম্পি ঠানং পঠমজ্ঝানসুখেন অফুট্ঠং নাম ন হোতি. দক্খোতি ছেকো পটিবলো ন্হানীযচুণ্ণানি কাতুঞ্চেৱ যোজেতুঞ্চ সন্নেতুঞ্চ. কংসথালেতি যেন কেনচি লোহেন কতভাজনে. মত্তিকভাজনং পন থিৰং ন হোতি, সন্নেন্তস্স ভিজ্জতি, তস্মা তং ন দস্সেতি. পৰিপ্ফোসকং পৰিপ্ফোসকন্তি সিঞ্চিত্ৱা সিঞ্চিত্ৱা. সন্নেয্যাতি ৱামহত্থেন কংসথালং গহেত্ৱা দক্খিণেন হত্থেন পমাণযুত্তং উদকং সিঞ্চিত্ৱা সিঞ্চিত্ৱা পৰিমদ্দন্তো পিণ্ডং কৰেয্য. স্নেহানুগতাতি উদকসিনেহেন অনুগতা. স্নেহপৰেতাতি উদকসিনেহেন পৰিগতা. সন্তৰবাহিৰাতি সদ্ধিং অন্তোপদেসেন চেৱ বহিপদেসেন চ, সব্বত্থকমেৱ উদকসিনেহেন ফুটাতি অত্থো. ন চ পগ্ঘৰিণীতি ন বিন্দু বিন্দু উদকং পগ্ঘৰতি, সক্কা হোতি হত্থেনপি দ্ৱীহিপি তীহিপি অঙ্গুলীহি গহেতুং ওৱট্টিকম্পি কাতুন্তি অত্থো.

৪২৮. দুতিযজ্ঝানসুখউপমাযং উব্ভিতোদকোতি উব্ভিন্নউদকো, ন হেট্ঠা উব্ভিজ্জিত্ৱা উগ্গচ্ছনউদকো, অন্তোযেৱ পন উব্ভিজ্জনউদকোতি অত্থো. আযমুখন্তি আগমনমগ্গো. দেৱোতি মেঘো. কালেনকালন্তি কালে কালে, অন্ৱদ্ধমাসং ৱা অনুদসাহং ৱাতি অত্থো. ধাৰন্তি ৱুট্ঠিং. নানুপ্পৱেচ্ছেয্যাতি ন পৱেসেয্য, ন ৱস্সেয্যাতি অত্থো. সীতা ৱাৰিধাৰা উব্ভিজ্জিত্ৱাতি সীতং ৱাৰি তং উদকৰহদং পূৰযমানং উব্ভিজ্জিত্ৱা. হেট্ঠা উগ্গচ্ছনউদকঞ্হি উগ্গন্ত্ৱা উগ্গন্ত্ৱা ভিজ্জন্তং উদকং খোভেতি. চতূহি দিসাহি পৱিসনউদকং পুৰাণপণ্ণতিণকট্ঠদণ্ডকাদীহি উদকং খোভেতি. ৱুট্ঠিউদকং ধাৰানিপাতপুপ্ফুড়কেহি উদকং খোভেতি. সন্নিসিন্নমেৱ পন হুত্ৱা ইদ্ধিনিম্মিতমিৱ উপ্পজ্জমানং উদকং ইমং পদেসং ফৰতি, ইমং পদেসং ন ফৰতীতি নত্থি. তেন অফুটোকাসো নাম ন হোতীতি. তত্থ ৰহদো ৱিয কৰজকাযো, উদকং ৱিয দুতিযজ্ঝানসুখং. সেসং পুৰিমনযেনেৱ ৱেদিতব্বং.

৪২৯. ততিযজ্ঝানসুখউপমাযং উপ্পলানি এত্থ সন্তীতি উপ্পলিনী. সেসপদদ্ৱযেসুপি এসেৱ নযো. এত্থ চ সেতৰত্তনীলেসু যংকিঞ্চি উপ্পলং উপ্পলমেৱ, ঊনকসতপত্তং পুণ্ডৰীকং, সতপত্তং পদুমং. পত্তনিযমং ৱা ৱিনাপি সেতং পদুমং, ৰত্তং পুণ্ডৰীকন্তি অযমেত্থ ৱিনিচ্ছযো. উদকানুগ্গতানীতি উদকতো ন উগ্গতানি. অন্তোনিমুগ্গপোসীনীতি উদকতলস্স অন্তো নিমুগ্গানিযেৱ হুত্ৱা পোসীনি, ৱড্ঢীনীতি অত্থো. সেসং পুৰিমনযেনেৱ ৱেদিতব্বং.

৪৩০. চতুত্থজ্ঝানসুখউপমাযং পৰিসুদ্ধেন চেতসা পৰিযোদাতেনাতি এত্থ নিৰুপক্কিলেসট্ঠেন পৰিসুদ্ধং. পভস্সৰট্ঠেন পৰিযোদাতং ৱেদিতব্বং. ওদাতেন ৱত্থেনাতি ইদং উতুফৰণত্থং ৱুত্তং. কিলিট্ঠৱত্থেন হি উতুফৰণং ন হোতি, তঙ্খণধোতপৰিসুদ্ধেন উতুফৰণং বলৱং হোতি. ইমিস্সা হি উপমায ৱত্থং ৱিয কৰজকাযো. উতুফৰণং ৱিয চতুত্থজ্ঝানসুখং. তস্মা যথা সুন্হাতস্স পুৰিসস্স পৰিসুদ্ধং ৱত্থং সসীসং পাৰুপিত্ৱা নিসিন্নস্স সৰীৰতো উতু সব্বমেৱ ৱত্থং ফৰতি, ন কোচি ৱত্থস্স অফুটোকাসো হোতি. এৱং চতুত্থজ্ঝানসুখেন ভিক্খুনো কৰজকাযস্স ন কোচি ওকাসো অফুটো হোতীতি এৱমেত্থ অত্থো দট্ঠব্বো. চতুত্থজ্ঝানচিত্তমেৱ ৱা ৱত্থং ৱিয, তংসমুট্ঠানৰূপং উতুফৰণং ৱিয. যথা হি কত্থচি ওদাতৱত্থে কাযং অপ্ফুসন্তেপি তংসমুট্ঠানেন উতুনা সব্বত্থকমেৱ কাযো ফুট্ঠো হোতি. এৱং চতুত্থজ্ঝানসমুট্ঠিতেন সুখুমৰূপেন সব্বত্থকমেৱ ভিক্খুনো কৰজকাযো ফুটো হোতীতি এৱমেত্থ অত্থো দট্ঠব্বো.

৪৩১. পুব্বেনিৱাসঞাণউপমাযং তংদিৱসং কতকিৰিযা পাকটা হোতীতি তংদিৱসং গতগামত্তযমেৱ গহিতং. তত্থ গামত্তযং গতপুৰিসো ৱিয পুব্বেনিৱাসঞাণলাভী দট্ঠব্বো. তযো গামা ৱিয তযো ভৱা দট্ঠব্বা. তস্স পুৰিসস্স তীসু গামেসু তংদিৱসং কতকিৰিযায আৱিভাৱো ৱিয পুব্বেনিৱাসায চিত্তং অভিনীহৰিত্ৱা নিসিন্নস্স ভিক্খুনো তীসু ভৱেসু কতকিৰিযায আৱিভাৱো দট্ঠব্বো.

৪৩২. দিব্বচক্খুউপমাযং দ্ৱে অগাৰাতি দ্ৱে ঘৰা. সদ্ৱাৰাতি সম্মুখদ্ৱাৰা. অনুচঙ্কমন্তেতি অপৰাপৰং সঞ্চৰন্তে. অনুৱিচৰন্তেতি ইতো চিতো চ ৱিচৰন্তে, ইতো পন গেহা নিক্খমিত্ৱা এতং গেহং, এতস্মা ৱা নিক্খমিত্ৱা ইমং গেহং পৱিসনৱসেনপি দট্ঠব্বা. তত্থ দ্ৱে অগাৰা সদ্ৱাৰা ৱিয চুতিপটিসন্ধিযো, চক্খুমা পুৰিসো ৱিয দিব্বচক্খুঞাণলাভী, চক্খুমতো পুৰিসস্স দ্ৱিন্নং গেহানং অন্তৰে ঠত্ৱা পস্সতো দ্ৱে অগাৰে পৱিসনকনিক্খমনকপুৰিসানং পাকটকালো ৱিয দিব্বচক্খুলাভিনো আলোকং ৱড্ঢেত্ৱা ওলোকেন্তস্স চৱনকউপপজ্জনকসত্তানং পাকটকালো. কিং পন তে ঞাণস্স পাকটা, পুগ্গলস্সাতি? ঞাণস্স. তস্স পাকটত্তা পন পুগ্গলস্স পাকটাযেৱাতি.

৪৩৩. আসৱক্খযঞাণউপমাযং পব্বতসঙ্খেপেতি পব্বতমত্থকে. অনাৱিলোতি নিক্কদ্দমো. সিপ্পিযো চ সম্বুকা চ সিপ্পিসম্বুকং. সক্খৰা চ কথলা চ সক্খৰকথলং. মচ্ছানং গুম্বা ঘটাতি মচ্ছগুম্বং. তিট্ঠন্তম্পি চৰন্তম্পীতি এত্থ সক্খৰকথলং তিট্ঠতিযেৱ, ইতৰানি চৰন্তিপি তিট্ঠন্তিপি. যথা পন অন্তৰন্তৰা ঠিতাসুপি নিসিন্নাসুপি ৱিজ্জমানাসুপি, ‘‘এতা গাৱো চৰন্তী’’তি চৰন্তিযো উপাদায ইতৰাপি চৰন্তীতি ৱুচ্চন্তি. এৱং তিট্ঠন্তমেৱ সক্খৰকথলং উপাদায ইতৰম্পি দ্ৱযং তিট্ঠন্তন্তি ৱুত্তং. ইতৰঞ্চ দ্ৱযং চৰন্তং উপাদায সক্খৰকথলম্পি চৰন্তন্তি ৱুত্তং. তত্থ চক্খুমতো পুৰিসস্স তীৰে ঠত্ৱা পস্সতো সিপ্পিসম্বুকাদীনং ৱিভূতকালো ৱিয আসৱানং খযায চিত্তং নীহৰিত্ৱা নিসিন্নস্স ভিক্খুনো চতুন্নং সচ্চানং ৱিভূতকালো দট্ঠব্বো.

৪৩৪. ইদানি সত্তহাকাৰেহি সলিঙ্গতো সগুণতো খীণাসৱস্স নামং গণ্হন্তো, অযং ৱুচ্চতি, ভিক্খৱে, ভিক্খু সমণো ইতিপীতিআদিমাহ. তত্থ এৱং খো, ভিক্খৱে, ভিক্খু সমণো হোতীতিআদীসু, ভিক্খৱে, এৱং ভিক্খু সমিতপাপত্তা সমণো হোতি. বাহিতপাপত্তা ব্ৰাহ্মণো হোতি. ন্হাতকিলেসত্তা ন্হাতকো হোতি, ধোতকিলেসত্তাতি অত্থো. চতুমগ্গঞাণসঙ্খাতেহি ৱেদেহি অকুসলধম্মানং গতত্তা ৱেদগূ হোতি, ৱিদিতত্তাতি অত্থো. তেনেৱ ৱিদিতাস্স হোন্তীতিআদিমাহ. কিলেসানং সুতত্তা সোত্তিযো হোতি, নিস্সুতত্তা অপহতত্তাতি অত্থো. কিলেসানং আৰকত্তা অৰিযো হোতি, হতত্তাতি অত্থো. তেহি আৰকত্তা অৰহং হোতি, দূৰীভূতত্তাতি অত্থো. সেসং সবত্থ পাকটমেৱাতি.

পপঞ্চসূদনিযা মজ্ঝিমনিকাযট্ঠকথায

মহাঅস্সপুৰসুত্তৱণ্ণনা নিট্ঠিতা.