তথাগতৱাৰঅট্ঠমনযৱণ্ণনা

১৩. নন্দী দুক্খস্স মূলন্তিআদীসু চ নন্দীতি পুৰিমতণ্হা. দুক্খন্তি পঞ্চক্খন্ধা. মূলন্তিআদি. ইতিৱিদিত্ৱাতি তং পুৰিমভৱনন্দিং ‘‘ইমস্স দুক্খস্স মূল’’ন্তি এৱং জানিত্ৱা. ভৱাতি কম্মভৱতো. জাতীতি ৱিপাকক্খন্ধা. তে হি যস্মা জাযন্তি, তস্মা ‘‘জাতী’’তি ৱুত্তা. জাতিসীসেন ৱা অযং দেসনা. এতম্পি ‘‘ইতি ৱিদিত্ৱা’’তি ইমিনা যোজেতব্বং. অযঞ্হি এত্থ অত্থো ‘‘কম্মভৱতো উপপত্তিভৱো হোতীতি এৱঞ্চ জানিত্ৱা’’তি. ভূতস্সাতি সত্তস্স. জৰামৰণন্তি জৰা চ মৰণঞ্চ. ইদং ৱুত্তং হোতি – তেন উপপত্তিভৱেন ভূতস্স সত্তস্স খন্ধানং জৰামৰণং হোতীতি এৱঞ্চ জানিত্ৱাতি.

এত্তাৱতা যং বোধিৰুক্খমূলে অপৰাজিতপল্লঙ্কে নিসিন্নো সম্মসিত্ৱা সব্বঞ্ঞুতং পত্তো, তস্স পটিচ্চসমুপ্পাদস্স পটিৱেধা মঞ্ঞনানং অভাৱকাৰণং দস্সেন্তো চতুসঙ্খেপং তিসন্ধিং তিযদ্ধং ৱীসতাকাৰং তমেৱ পটিচ্চসমুপ্পাদং দস্সেতি.

কথং পন এত্তাৱতা এস সব্বো দস্সিতো হোতীতি. এত্থ হি নন্দীতি অযং একো সঙ্খেপো. দুক্খস্সাতি ৱচনতো দুক্খং দুতিযো, ভৱা জাতীতি ৱচনতো ভৱো ততিযো, জাতিজৰামৰণং চতুত্থো. এৱং তাৱ চত্তাৰো সঙ্খেপা ৱেদিতব্বা, কোট্ঠাসাতি অত্থো. তণ্হাদুক্খানং পন অন্তৰং একো সন্ধি, দুক্খস্স চ ভৱস্স চ অন্তৰং দুতিযো, ভৱস্স চ জাতিযা চ অন্তৰং ততিযো. এৱং চতুন্নং অঙ্গুলীনং অন্তৰসদিসা চতুসঙ্খেপন্তৰা তযো সন্ধী ৱেদিতব্বা.

তত্থ নন্দীতি অতীতো অদ্ধা, জাতিজৰামৰণং অনাগতো, দুক্খঞ্চ ভৱো চ পচ্চুপ্পন্নোতি এৱং তযো অদ্ধা ৱেদিতব্বা. অতীতে পন পঞ্চসু আকাৰেসু নন্দীৱচনেন তণ্হা একা আগতা, তায অনাগতাপি অৱিজ্জাসঙ্খাৰউপাদানভৱা পচ্চযলক্খণেন গহিতাৱ হোন্তি. জাতিজৰামৰণৱচনেন পন যেসং খন্ধানং তজ্জাতিজৰামৰণং, তে ৱুত্তা যেৱাতি কত্ৱা আযতিং ৱিঞ্ঞাণনামৰূপসড়াযতনফস্সৱেদনা গহিতাৱ হোন্তি.

এৱমেতে ‘‘পুৰিমকম্মভৱস্মিং মোহো অৱিজ্জা, আযূহনা সঙ্খাৰা, নিকন্তি তণ্হা, উপগমনং উপাদানং, চেতনা ভৱো ইতি ইমে পঞ্চ ধম্মা পুৰিমকম্মভৱস্মিং ইধ পটিসন্ধিযা পচ্চযা. ইধ পটিসন্ধি ৱিঞ্ঞাণং, ওক্কন্তি নামৰূপং, পসাদো আযতনং, ফুট্ঠো ফস্সো, ৱেদযিতং ৱেদনা ইতি ইমে পঞ্চ ধম্মা ইধূপপত্তিভৱস্মিং পুৰেকতস্স কম্মস্স পচ্চযা. ইধ পৰিপক্কত্তা আযতনানং মোহো অৱিজ্জা, আযূহনা সঙ্খাৰা, নিকন্তি তণ্হা, উপগমনমুপাদানং, চেতনা ভৱো ইতি ইমে পঞ্চ ধম্মা ইধ কম্মভৱস্মিং আযতিং পটিসন্ধিযা পচ্চযা. আযতিং পটিসন্ধি ৱিঞ্ঞাণং, ওক্কন্তি নামৰূপং, পসাদো আযতনং, ফুট্ঠো ফস্সো, ৱেদযিতং ৱেদনা ইতি ইমে পঞ্চ ধম্মা আযতিং উপপত্তিভৱস্মিং ইধ কতস্স কম্মস্স পচ্চযা’’তি এৱং নিদ্দিট্ঠলক্খণা ৱীসতি আকাৰা ইধ ৱেদিতব্বা. এৱং ‘‘নন্দী দুক্খস্স মূলন্তি ইতি ৱিদিত্ৱা ভৱা জাতি, ভূতস্স জৰামৰণ’’ন্তি এত্তাৱতা এস সব্বোপি চতুসঙ্খেপো তিসন্ধি তিযদ্ধো ৱীসতাকাৰো পটিচ্চসমুপ্পাদো দস্সিতো হোতীতি ৱেদিতব্বো.

ইদানি তস্মা তিহ, ভিক্খৱে…পে… অভিসম্বুদ্ধোতি ৱদামীতি এত্থ অপুব্বপদৱণ্ণনং কত্ৱা পদযোজনায অত্থনিগমনং কৰিস্সাম. তস্মা তিহাতি তস্মা ইচ্চেৱ ৱুত্তং হোতি. তিকাৰহকাৰা হি নিপাতা. সব্বসোতি অনৱসেসৱচনমেতং. তণ্হানন্তি নন্দীতি এৱং ৱুত্তানং সব্বতণ্হানং. খযাতি লোকুত্তৰমগ্গেন অচ্চন্তক্খযা. ৱিৰাগাদীনি খযৱেৱচনানেৱ. যা হি তণ্হা খীণা, ৱিৰত্তাপি তা ভৱন্তি নিৰুদ্ধাপি চত্তাপি পটিনিস্সট্ঠাপি. খযাতি ৱা চতুমগ্গকিচ্চসাধাৰণমেতং. ততো পঠমমগ্গেন ৱিৰাগা, দুতিযেন নিৰোধা, ততিযেন চাগা, চতুত্থেন পটিনিস্সগ্গাতি যোজেতব্বং. যাহি ৱা তণ্হাহি পথৱিং পথৱিতো সঞ্জানেয্য, তাসং খযা. যাহি পথৱিং মঞ্ঞেয্য, তাসং ৱিৰাগা. যাহি পথৱিযা মঞ্ঞেয্য, তাসং নিৰোধা. যাহি পথৱিতো মঞ্ঞেয্য, তাসং চাগা. যাহি পথৱিং মেতি মঞ্ঞেয্য, তাসং পটিনিস্সগ্গা. যাহি ৱা পথৱিং মঞ্ঞেয্য, তাসং খযা…পে… যাহি পথৱিং অভিনন্দেয্য, তাসং পটিনিস্সগ্গাতি এৱমেত্থ যোজনা কাতব্বা, ন কিঞ্চি ৱিৰুজ্ঝতি.

অনুত্তৰন্তি উত্তৰৱিৰহিতং সব্বসেট্ঠং. সম্মাসম্বোধিন্তি সম্মা সামঞ্চ বোধিং. অথ ৱা পসত্থং সুন্দৰঞ্চ বোধিং. বোধীতি ৰুক্খোপি মগ্গোপি সব্বঞ্ঞুতঞাণম্পি নিব্বানম্পি. ‘‘বোধিৰুক্খমূলে পঠমাভিসম্বুদ্ধো’’তি (মহাৱ. ১; উদা. ১) চ ‘‘অন্তৰা চ বোধিং অন্তৰা চ গয’’ন্তি (মহাৱ. ১১; ম. নি. ১.২৮৫) চ আগতট্ঠানেহি ৰুক্খো বোধীতি ৱুচ্চতি. ‘‘চতূসু মগ্গেসু ঞাণ’’ন্তি (চূড়নি. ১২১) আগতট্ঠানে মগ্গো. ‘‘পপ্পোতি বোধিং ৱৰভূৰিমেধসো’’তি (দী. নি. ৩.২১৭) আগতট্ঠানে সব্বঞ্ঞুতঞাণং. ‘‘পত্ৱান বোধিং অমতং অসঙ্খত’’ন্তি আগতট্ঠানে নিব্বানং. ইধ পন ভগৱতো অৰহত্তমগ্গঞাণং অধিপ্পেতং. অপৰে সব্বঞ্ঞুতঞাণন্তিপি ৱদন্তি.

সাৱকানং অৰহত্তমগ্গো অনুত্তৰা বোধি হোতি ন হোতীতি. ন হোতি. কস্মা? অসব্বগুণদাযকত্তা. তেসঞ্হি কস্সচি অৰহত্তমগ্গো অৰহত্তফলমেৱ দেতি, কস্সচি তিস্সো ৱিজ্জা, কস্সচি ছ অভিঞ্ঞা, কস্সচি চতস্সো পটিসম্ভিদা, কস্সচি সাৱকপাৰমীঞাণং. পচ্চেকবুদ্ধানম্পি পচ্চেকবোধিঞাণমেৱ দেতি. বুদ্ধানং পন সব্বগুণসম্পত্তিং দেতি অভিসেকো ৱিয ৰঞ্ঞো সব্বলোকিস্সৰিযভাৱং. তস্মা অঞ্ঞস্স কস্সচিপি অনুত্তৰা বোধি ন হোতীতি.

অভিসম্বুদ্ধোতি অভিঞ্ঞাসি পটিৱিজ্ঝি, পত্তো অধিগতোতি ৱুত্তং হোতি. ইতি ৱদামীতি ইতি ৱদামি আচিক্খামি দেসেমি পঞ্ঞপেমি, পট্ঠপেমি ৱিৱৰামি ৱিভজামি উত্তানীকৰোমীতি. তত্ৰাযং যোজনা – তথাগতোপি, ভিক্খৱে…পে… পথৱিং ন মঞ্ঞতি…পে… পথৱিং নাভিনন্দতি. তং কিস্স হেতু, নন্দী দুক্খস্স মূলং, ভৱা জাতি, ভূতস্স জৰামৰণন্তি ইতি ৱিদিত্ৱাতি. তত্থ ইতি ৱিদিত্ৱাতি ইতিকাৰো কাৰণত্থো. তেন ইমস্স পটিচ্চসমুপ্পাদস্স ৱিদিতত্তা পটিৱিদ্ধত্তাতি ৱুত্তং হোতি. কিঞ্চ ভিয্যো – যস্মা চ এৱমিমং পটিচ্চসমুপ্পাদং ৱিদিত্ৱা তথাগতস্স যা নন্দীতি ৱুত্ততণ্হা সব্বপ্পকাৰা, সা পহীনা, তাসঞ্চ তথাগতো সব্বসো তণ্হানং খযা…পে… অনুত্তৰং সম্মাসম্বোধিং অভিসম্বুদ্ধো. তস্মা পথৱিং ন মঞ্ঞতি…পে… পথৱিং নাভিনন্দতীতি ৱদামীতি এৱং অভিসম্বুদ্ধত্তা ন মঞ্ঞতি নাভিনন্দতীতি ৱদামীতি ৱুত্তং হোতি.

অথ ৱা যস্মা ‘‘নন্দী দুক্খস্স মূল’’ন্তিআদিনা নযেন পটিচ্চসমুপ্পাদং ৱিদিত্ৱা সব্বসো তণ্হা খযং গতা, তস্মা তিহ, ভিক্খৱে, তথাগতো সব্বসো তণ্হানং খযা…পে… অভিসম্বুদ্ধোতি ৱদামি. সো এৱং অভিসম্বুদ্ধত্তা পথৱিং ন মঞ্ঞতি…পে… নাভিনন্দতীতি. যত্থ যত্থ হি যস্মাতি অৱত্ৱা তস্মাতি ৱুচ্চতি, তত্থ তত্থ যস্মাতি আনেত্ৱা যোজেতব্বং, অযং সাসনযুত্তি. এস নযো সব্বত্থ.

ইদমৱোচ ভগৱাতি ইদং নিদানাৱসানতো পভুতি যাৱ অভিসম্বুদ্ধোতি ৱদামীতি সকলসুত্তন্তং ভগৱা পৰেসং পঞ্ঞায অলব্ভণেয্যপতিট্ঠং পৰমগম্ভীৰং সব্বঞ্ঞুতঞাণং দস্সেন্তো একেন পুথুজ্জনৱাৰেন একেন সেক্খৱাৰেন চতূহি খীণাসৱৱাৰেহি দ্ৱীহি তথাগতৱাৰেহীতি অট্ঠহি মহাৱাৰেহি একমেকস্মিঞ্চ ৱাৰে পথৱীআদীহি চতুৱীসতিযা অন্তৰৱাৰেহি পটিমণ্ডেত্ৱা দ্ৱেভাণৱাৰপৰিমাণায তন্তিযা অৱোচ.

এৱং ৱিচিত্ৰনযদেসনাৱিলাসযুত্তং পনেতং সুত্তং কৰৱিকৰুদমঞ্জুনা কণ্ণসুখেন পণ্ডিতজনহদযানং অমতাভিসেকসদিসেন ব্ৰহ্মস্সৰেন ভাসমানস্সাপি. ন তে ভিক্খূ ভগৱতো ভাসিতং অভিনন্দুন্তি তে পঞ্চসতা ভিক্খূ ইদং ভগৱতো ৱচনং নানুমোদিংসু. কস্মা? অঞ্ঞাণকেন. তে কিৰ ইমস্স সুত্তস্স অত্থং ন জানিংসু, তস্মা নাভিনন্দিংসু. তেসঞ্হি তস্মিং সমযে এৱং ৱিচিত্ৰনযদেসনাৱিলাসযুত্তম্পি এতং সুত্তং ঘনপুথুলেন দুস্সপট্টেন মুখে বন্ধং কত্ৱা পুৰতো ঠপিতমনুঞ্ঞভোজনং ৱিয অহোসি. ননু চ ভগৱা অত্তনা দেসিতং ধম্মং পৰে ঞাপেতুং কপ্পসতসহস্সাধিকানি চত্তাৰি অসঙ্খ্যেয্যানি পাৰমিযো পূৰেত্ৱা সব্বঞ্ঞুতং পত্তো. সো কস্মা যথা তে ন জানন্তি, তথা দেসেসীতি. ৱুত্তমিদং ইমস্স সুত্তস্স নিক্খেপৱিচাৰণাযং এৱ ‘‘মানভঞ্জনত্থং সব্বধম্মমূলপৰিযাযন্তি দেসনং আৰভী’’তি, তস্মা ন যিধ পুন ৱত্তব্বমত্থি, এৱং মানভঞ্জনত্থং দেসিতঞ্চ পনেতং সুত্তং সুত্ৱা তে ভিক্খূ তংযেৱ কিৰ পথৱিং দিট্ঠিগতিকোপি সঞ্জানাতি, সেক্খোপি অৰহাপি তথাগতোপি সঞ্জানাতি. কিন্নামিদং কথং নামিদন্তি চিন্তেন্তা পুব্বে মযং ভগৱতা কথিতং যংকিঞ্চি খিপ্পমেৱ জানাম, ইদানি পনিমস্স মূলপৰিযাযস্স অন্তং ৱা কোটিং ৱা ন জানাম ন পস্সাম, অহো বুদ্ধা নাম অপ্পমেয্যা অতুলাতি উদ্ধটদাঠা ৱিয সপ্পা নিম্মদা হুত্ৱা বুদ্ধুপট্ঠানঞ্চ ধম্মস্সৱনঞ্চ সক্কচ্চং আগমংসু.

তেন খো পন সমযেন ভিক্খূ ধম্মসভাযং সন্নিসিন্না ইমং কথং সমুট্ঠাপেসুং ‘‘অহো বুদ্ধানং আনুভাৱো, তে নাম ব্ৰাহ্মণপব্বজিতা তথা মানমদমত্তা ভগৱতা মূলপৰিযাযদেসনায নিহতমানা কতা’’তি, অযঞ্চৰহি তেসং ভিক্খূনং অন্তৰাকথা ৱিপ্পকতা. অথ ভগৱা গন্ধকুটিযা নিক্খমিত্ৱা তঙ্খণানুৰূপেন পাটিহাৰিযেন ধম্মসভাযং পঞ্ঞত্তৱৰবুদ্ধাসনে নিসীদিত্ৱা তে ভিক্খূ আহ – ‘‘কায নুত্থ, ভিক্খৱে, এতৰহি কথায সন্নিসিন্না’’তি. তে তমত্থং ভগৱতো আৰোচেসুং. ভগৱা এতদৱোচ – ‘‘ন, ভিক্খৱে, ইদানেৱ, পুব্বেপি অহং ইমে এৱং মানপগ্গহিতসিৰে ৱিচৰন্তে নিহতমানে অকাসি’’ন্তি. ততো ইমিস্সা অট্ঠুপ্পত্তিযা ইদং অতীতং আনেসি –

ভূতপুব্বং, ভিক্খৱে, অঞ্ঞতৰো দিসাপামোক্খো ব্ৰাহ্মণো বাৰাণসিযং পটিৱসতি তিণ্ণং ৱেদানং পাৰগূ সনিঘণ্টুকেটুভানং সাক্খৰপ্পভেদানং ইতিহাসপঞ্চমানং পদকো ৱেয্যাকৰণো লোকাযতমহাপুৰিসলক্খণেসু অনৱযো, সো পঞ্চমত্তানি মাণৱকসতানি মন্তে ৱাচেতি. পণ্ডিতা মাণৱকা বহুঞ্চ গণ্হন্তি লহুঞ্চ, সুট্ঠু চ উপধাৰেন্তি, গহিতঞ্চ তেসং ন ৱিনস্সতি. সোপি ব্ৰাহ্মণো আচৰিযমুট্ঠিং অকত্ৱা ঘটে উদকং আসিঞ্চন্তো ৱিয সব্বম্পি সিপ্পং উগ্গণ্হাপেত্ৱা তে মাণৱকে এতদৱোচ ‘‘এত্তকমিদং সিপ্পং দিট্ঠধম্মসম্পৰাযহিত’’ন্তি. তে মাণৱকা – ‘‘যং অম্হাকং আচৰিযো জানাতি, মযম্পি তং জানাম, মযম্পি দানি আচৰিযা এৱা’’তি মানং উপ্পাদেত্ৱা ততো পভুতি আচৰিযে অগাৰৱা নিক্খিত্তৱত্তা ৱিহৰিংসু. আচৰিযো ঞত্ৱা ‘‘কৰিস্সামি নেসং মাননিগ্গহ’’ন্তি চিন্তেসি. সো একদিৱসং উপট্ঠানং আগন্ত্ৱা ৱন্দিত্ৱা নিসিন্নে তে মাণৱকে আহ ‘‘তাতা পঞ্হং পুচ্ছিস্সামি, কচ্চিত্থ সমত্থা কথেতু’’ন্তি. তে ‘‘পুচ্ছথ আচৰিয, পুচ্ছথ আচৰিযা’’তি সহসাৱ আহংসু, যথা তং সুতমদমত্তা. আচৰিযো আহ –

‘‘কালো ঘসতি ভূতানি, সব্বানেৱ সহত্তনা;

যো চ কালঘসো ভূতো, স ভূতপচনিং পচী’’তি. (জা. ১.১০.১৯০) –

ৱিস্সজ্জেথ তাতা ইমং পঞ্হন্তি.

তে চিন্তেত্ৱা অজানমানা তুণ্হী অহেসুং. আচৰিযো আহ ‘‘অলং তাতা গচ্ছথজ্জ, স্ৱে কথেয্যাথা’’তি উয্যোজেসি. তে দসপি ৱীসতিপি সম্পিণ্ডিতা হুত্ৱা ন তস্স পঞ্হস্স আদিং, ন অন্তমদ্দসংসু. আগন্ত্ৱা আচৰিযস্স আৰোচেসুং ‘‘ন ইমস্স পঞ্হস্স অত্থং আজানামা’’তি. আচৰিযো তেসং নিগ্গহত্থায ইমং গাথমভাসি –

‘‘বহূনি নৰসীসানি, লোমসানি ব্ৰহানি চ;

গীৱাসু পটিমুক্কানি, কোচিদেৱেত্থ কণ্ণৱা’’তি. (জা. ১.১০.১৯১) –

গাথাযত্থো – বহূনি নৰানং সীসানি দিস্সন্তি, সব্বানি চ তানি লোমসানি সব্বানি চ মহন্তানি গীৱাযমেৱ চ ঠপিতানি, ন তালফলং ৱিয হত্থেন গহিতানি, নত্থি তেসং ইমেহি ধম্মেহি নানাকৰণং. এত্থ পন কোচিদেৱ কণ্ণৱাতি অত্তানং সন্ধাযাহ. কণ্ণৱাতি পঞ্ঞৱা. কণ্ণচ্ছিদ্দং পন ন কস্সচি নত্থি, তং সুত্ৱা তে মাণৱকা মঙ্কুভূতা পত্তক্খন্ধা অধোমুখা অঙ্গুলিযা ভূমিং ৱিলিখন্তা তুণ্হী অহেসুং.

অথ নেসং অহিৰিকভাৱং পস্সিত্ৱা আচৰিযো ‘‘উগ্গণ্হথ তাতা পঞ্হ’’ন্তি পঞ্হং ৱিস্সজ্জেসি. কালোতি পুৰেভত্তকালোপি পচ্ছাভত্তকালোপীতি এৱমাদি. ভূতানীতি সত্তাধিৱচনমেতং. কালো হি ভূতানং ন চম্মমংসাদীনি খাদতি, অপিচ খো নেসং আযুৱণ্ণবলানি খেপেন্তো যোব্বঞ্ঞং মদ্দন্তো আৰোগ্যং ৱিনাসেন্তো ঘসতি খাদতীতি ৱুচ্চতি. সব্বানেৱ সহত্তনাতি এৱং ঘসন্তো চ ন কিঞ্চি ৱজ্জেতি, সব্বানেৱ ঘসতি. ন কেৱলঞ্চ ভূতানিযেৱ, অপিচ খো সহত্তনা অত্তানম্পি ঘসতি. পুৰেভত্তকালো হি পচ্ছাভত্তকালং ন পাপুণাতি. এস নযো পচ্ছাভত্তকালাদীসু. যো চ কালঘসো ভূতোতি খীণাসৱস্সেতং অধিৱচনং. সো হি আযতিং পটিসন্ধিকালং খেপেত্ৱা খাদিত্ৱা ঠিতত্তা ‘‘কালঘসো’’তি ৱুচ্চতি. স ভূতপচনিং পচীতি সো যাযং তণ্হা অপাযেসু ভূতে পচতি, তং ঞাণগ্গিনা পচি দয্হি ভস্মমকাসি, তেন ‘‘ভূতপচনিং পচী’’তি ৱুচ্চতি. ‘‘পজনি’’ন্তিপি পাঠো. জনিকং নিব্বত্তিকন্তি অত্থো.

অথ তে মাণৱকা দীপসহস্সালোকেন ৱিয ৰত্তিং সমৱিসমং আচৰিযস্স ৱিস্সজ্জনেন পঞ্হস্স অত্থং পাকটং দিস্ৱা ‘‘ইদানি মযং যাৱজীৱং গুৰুৱাসং ৱসিস্সাম, মহন্তা এতে আচৰিযা নাম, মযঞ্হি বহুস্সুতমানং উপ্পাদেত্ৱা চতুপ্পদিকগাথাযপি অত্থং ন জানামা’’তি নিহতমানা পুব্বসদিসমেৱ আচৰিযস্স ৱত্তপ্পটিপত্তিং কত্ৱা সগ্গপৰাযণা অহেসুং.

অহং খো, ভিক্খৱে, তেন সমযেন তেসং আচৰিযো অহোসিং, ইমে ভিক্খূ মাণৱকা. এৱং পুব্বেপাহং ইমে এৱং মানপগ্গহিতসিৰে ৱিচৰন্তে নিহতমানে অকাসিন্তি.

ইমঞ্চ জাতকং সুত্ৱা তে ভিক্খূ পুব্বেপি মযং মানেনেৱ উপহতাতি ভিয্যোসোমত্তায নিহতমানা হুত্ৱা অত্তনো উপকাৰককম্মট্ঠানপৰাযণা অহেসুং.

ততো ভগৱা একং সমযং জনপদচাৰিকং চৰন্তো ৱেসালিং পত্ৱা গোতমকে চেতিযে ৱিহৰন্তো ইমেসং পঞ্চসতানং ভিক্খূনং ঞাণপৰিপাকং ৱিদিত্ৱা ইমং গোতমকসুত্তং কথেসি –

‘‘অভিঞ্ঞাযাহং, ভিক্খৱে, ধম্মং দেসেমি নো অনভিঞ্ঞায, সনিদানাহং…পে… সপ্পাটিহাৰিযাহং, ভিক্খৱে, ধম্মং দেসেমি নো অপ্পাটিহাৰিযং. তস্স ময্হং, ভিক্খৱে, অভিঞ্ঞায ধম্মং দেসযতো…পে… নো অপ্পাটিহাৰিযং. কৰণীযো ওৱাদো, কৰণীযা অনুসাসনী. অলঞ্চ পন ৱো, ভিক্খৱে, তুট্ঠিযা অলং অত্তমনতায অলং সোমনস্সায. সম্মাসম্বুদ্ধো ভগৱা, স্ৱাক্খাতো ধম্মো, সুপ্পটিপন্নো সঙ্ঘোতি. ইদমৱোচ ভগৱা, ইমস্মিঞ্চ পন ৱেয্যাকৰণস্মিং ভঞ্ঞমানে দসসহস্সিলোকধাতু অকম্পিত্থা’’তি (অ. নি. ৩.১২৬).

ইদঞ্চ সুত্তং সুত্ৱা তে পঞ্চসতা ভিক্খূ তস্মিংযেৱাসনে সহ পটিসম্ভিদাহি অৰহত্তং পাপুণিংসু, এৱাযং দেসনা এতস্মিং ঠানে নিট্ঠমগমাসীতি.

তথাগতৱাৰঅট্ঠমনযৱণ্ণনা নিট্ঠিতা.

পপঞ্চসূদনিযা মজ্ঝিমনিকাযট্ঠকথায

মূলপৰিযাযসুত্তৱণ্ণনা নিট্ঠিতা.