৭. দুতিযনাৱাৱিমানৱণ্ণনা

সুৱণ্ণচ্ছদনং নাৱন্তি দুতিযনাৱাৱিমানং. তস্স কা উপ্পত্তি? ভগৱতি সাৱত্থিযং ৱিহৰন্তে অঞ্ঞতৰো খীণাসৱত্থেৰো উপকট্ঠায ৱস্সূপনাযিকায গামকাৱাসে ৱস্সং উপগন্তুকামো সাৱত্থিতো তং গামং উদ্দিস্স পচ্ছাভত্তং অদ্ধানমগ্গপটিপন্নো, মগ্গপৰিস্সমেন কিলন্তো তসিতো অন্তৰামগ্গে অঞ্ঞতৰং গামং সম্পত্তো, বহিগামে তাদিসং ছাযূদকসম্পন্নট্ঠানং অপস্সন্তো পৰিস্সমেন চ অভিভুয্যমানো চীৱৰং পাৰুপিত্ৱা গামং পৱিসিত্ৱা ধুৰগেহস্সেৱ দ্ৱাৰে অট্ঠাসি. তত্থ অঞ্ঞতৰা ইত্থী থেৰং পস্সিত্ৱা ‘‘কুতো, ভন্তে, আগতত্থা’’তি পুচ্ছিত্ৱা মগ্গপৰিস্সমং পিপাসিতভাৱঞ্চ ঞত্ৱা ‘‘এথ, ভন্তে’’তি গেহং পৱেসেত্ৱা ‘‘ইধ নিসীদথা’’তি আসনং পঞ্ঞাপেত্ৱা অদাসি. তত্থ নিসিন্নে পাদোদকং পাদব্ভঞ্জনতেলঞ্চ দত্ৱা তালৱণ্টং গহেত্ৱা বীজি. পৰিড়াহে ৱূপসন্তে মধুৰং সীতলং সুগন্ধং পানকং যোজেত্ৱা অদাসি. থেৰো তং পিৱিত্ৱা পটিপ্পস্সদ্ধকিলমথো অনুমোদনং কত্ৱা পক্কামি. সা অপৰভাগে কালং কত্ৱা তাৱতিংসভৱনে নিব্বত্তীতি সব্বং অনন্তৰৱিমানসদিসন্তি ৱেদিতব্বং. গাথাসুপি অপুব্বং নত্থি. তেন ৱুত্তং –

৫৩. ‘‘সুৱণ্ণচ্ছদনং নাৱং, নাৰি আৰুয্হ তিট্ঠসি;

ওগাহসি পোক্খৰণিং, পদ্মং ছিন্দসি পাণিনা.

৫৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৫৫. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

৫৬. ‘‘সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং’’.

৫৭. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দিস্ৱান ভিক্খুং তসিতং কিলন্তং, উট্ঠায পাতুং উদকং অদাসিং.

৫৮. ‘‘যো ৱে কিলন্তস্স পিপাসিতস্স, ট্ঠায পাতুং উদকং দদাতি;

সীতোদকা তস্স ভৱন্তি নজ্জো, পহূতমল্যা বহুপুণ্ডৰীকা.

৫৯. ‘‘তং আপগা অনুপৰিযন্তি সব্বদা, সীতোদকা ৱালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৬০. ‘‘তংভূমিভাগেহি উপেতৰূপং, ৱিমানসেট্ঠং ভুস সোভমানং;

তস্সীধ কম্মস্স অযং ৱিপাকো, এতাদিসং পুঞ্ঞকতা লভন্তি.

৬১. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৬২. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

অত্থৱণ্ণনাসুপি ইধ একোৱ থেৰোতি অপুব্বং নত্থি.

দুতিযনাৱাৱিমানৱণ্ণনা নিট্ঠিতা.