৬. পঠমনাৱাৱিমানৱণ্ণনা

সুৱণ্ণচ্ছদনং নাৱন্তি নাৱাৱিমানং. তস্স কা উপ্পত্তি? ভগৱতি সাৱত্থিযং ৱিহৰন্তে সোড়সমত্তা ভিক্খূ অঞ্ঞতৰস্মিং গামকাৱাসে ৱসিত্ৱা ৱুত্থৱস্সা ‘‘ভগৱন্তং পস্সিস্সাম, ধম্মঞ্চ সুণিস্সামা’’তি সাৱত্থিং উদ্দিস্স গিম্হসমযে অদ্ধানমগ্গং পটিপন্না, অন্তৰামগ্গে চ নিৰুদকো কন্তাৰো, তে চ তত্থ ঘম্মাভিতত্তা কিলন্তা তসিতা পানীযং অলভমানা অঞ্ঞতৰস্স গামস্স অৱিদূৰেন গচ্ছন্তি. তত্থ অঞ্ঞতৰা ইত্থী উদকভাজনং গহেত্ৱা উদকত্থায উদপানাভিমুখী গচ্ছতি. অথ তে ভিক্খূ তং দিস্ৱা ‘‘যত্থাযং ইত্থী গচ্ছতি, তত্থ গতে পানীযং লদ্ধুং সক্কা’’তি পিপাসাপৰেতা তংদিসাভিমুখা গন্ত্ৱা উদপানং দিস্ৱা তস্সা অৱিদূৰে অট্ঠংসু. সা ইত্থী ততো উদকং গহেত্ৱা নিৱত্তিতুকামা তে ভিক্খূ দিস্ৱা ‘‘ইমে অয্যা উদকেন অত্থিকা পিপাসিতা’’তি ঞত্ৱা গৰুচিত্তীকাৰং উপট্ঠপেত্ৱা উদকেন নিমন্তেসি. তে পত্তথৱিকতো পৰিস্সাৱনং নীহৰিত্ৱা পৰিস্সাৱেত্ৱা যাৱদত্থং পানীযং পিৱিত্ৱা হত্থপাদে সীতলে কত্ৱা তস্সা ইত্থিযা পানীযদানে অনুমোদনং ৱত্ৱা অগমংসু.

সা তং পুঞ্ঞং হদযে ঠপেত্ৱা অন্তৰন্তৰা অনুস্সৰন্তী অপৰভাগে কালং কত্ৱা তাৱতিংসভৱনে নিব্বত্তি. তস্সা পুঞ্ঞানুভাৱেন কপ্পৰুক্খোপসোভিতং মহন্তং ৱিমানং উপ্পজ্জি. তং ৱিমানং পৰিক্খিপিত্ৱা মুত্তজালৰজতৱিভূসিতা ৱিয সিকতাৱকিণ্ণপণ্ডৰপুলিনতটা মণিক্খন্ধনিম্মলসলিলৱাহিনী সৰিতা. তস্সা উভোসু তীৰেসু উয্যানৱিমানদ্ৱাৰে চ মহতী পোক্খৰণী পঞ্চৱণ্ণপদুমসণ্ডমণ্ডিতা সহ সুৱণ্ণনাৱায নিব্বত্তি. সা তত্থ দিব্বসম্পত্তিং অনুভৱন্তী নাৱায কীড়ন্তী লড়ন্তী ৱিচৰতি. অথেকদিৱসং আযস্মা মহামোগ্গল্লানো দেৱচাৰিকং চৰন্তো তং দেৱধীতৰং নাৱায কীড়ন্তিং দিস্ৱা তায কতপুঞ্ঞকম্মং পুচ্ছন্তো –

৪৩. ‘‘সুৱণ্ণচ্ছদনং নাৱং, নাৰি আৰুয্হ তিট্ঠসি;

ওগাহসি পোক্খৰণিং, পদ্মং ছিন্দসি পাণিনা.

৪৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৪৫. ‘‘পুচ্ছামি তং দেৱি মহানুভাৱে,

মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা,

ৱণ্ণো চ তে সব্বদিসা পভাসতী’’তি. – আহ;

ততো থেৰেন পুট্ঠায দেৱতায ৱিস্সজ্জিতাকাৰং দস্সেতুং সঙ্গীতিকাৰেহি –

৪৬. ‘‘সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফল’’ন্তি. –

অযং গাথা ৱুত্তা.

৪৭. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দিস্ৱান ভিক্খূ তসিতে কিলন্তে, উট্ঠায পাতুং উদকং অদাসিং.

৪৮. ‘‘যো ৱে কিলন্তান পিপাসিতানং, উট্ঠায পাতুং উদকং দদাতি;

সীতোদকা তস্স ভৱন্তি নজ্জো, পহূতমল্যা বহুপুণ্ডৰীকা.

৪৯. ‘‘তং আপগা অনুপৰিযন্তি সব্বদা, সীতোদকা ৱালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৫০. ‘‘তংভূমিভাগেহি উপেতৰূপং, ৱিমানসেট্ঠং ভুস সোভমানং;

তস্সীধ কম্মস্স অযং ৱিপাকো, এতাদিসং পুঞ্ঞকতা লভন্তি.

৫১. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৫২. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি. –

অযং দেৱতায ৱিস্সজ্জিতাকাৰো.

৪৩. তত্থ সুৱণ্ণচ্ছদনন্তি ৱিচিত্তভিত্তিৱিৰচনেহি ৰত্তসুৱণ্ণমযেহি উভোহি পস্সেহি পটিচ্ছাদিতব্ভন্তৰতায চেৱ নানাৰতনসমুজ্জলিতেন কনকমযালঙ্কাৰেন উপৰি ছাদিততায চ সুৱণ্ণচ্ছদনং. নাৱন্তি পোতং. সো হি ওৰতো পাৰং পৱতি গচ্ছতীতি পোতো, সত্তে নেতীতি নাৱাতি চ ৱুচ্চতি. নাৰীতি তস্সা দেৱধীতায আলপনং. নৰতি নেতীতি নৰো, পুৰিসো. যথা হি পঠমপকতিভূতো সত্তো ইতৰায পকতিযা সেট্ঠত্থেন পুৰি সেতীতি ‘‘পুৰিসো’’তি ৱুচ্চতি, এৱং নযনট্ঠেন ‘‘নৰো’’তি. পুত্তভাতুভূতোপি হি পুগ্গলো মাতুজেট্ঠভগিনীনং পিতুট্ঠানে তিট্ঠতি, পগেৱ ভত্তুভূতো. নৰস্স এসাতি নাৰী, অযঞ্চ সমঞ্ঞা মনুস্সিত্থীসু পৱত্তা ৰুড়্হিৱসেন ইতৰাসুপি তথা ৱুচ্চতি. ওগাহসি পোক্খৰণিন্তি সতিপি ৰত্তুপ্পলনীলুপ্পলাদিকে বহুৱিধে ৰতনমযে জলজকুসুমে পোক্খৰসঙ্খাতানং দিব্বপদুমানং তত্থ যেভুয্যেন অত্থিতায ‘‘পোক্খৰণী’’তি লদ্ধনামং দিব্বসৰং জলৱিহাৰৰতিযা অনুপৱিসসি. পদ্মং ছিন্দসি পাণিনাতি ৰজতমযনাড়ং পদুমৰাগৰতনমযপত্তসঙ্ঘাতং কনকমযকণ্ণিকাকিঞ্জক্খকেসৰং দিব্বকমলং লীলাৰৱিন্দং কত্তুকামতায তৱ হত্থেন ভঞ্জসি.

৪৭. তসিতেতি পিপাসিতে. কিলন্তেতি তায পিপাসায অদ্ধানপৰিস্সমেন চ কিলন্তকাযে. উট্ঠাযাতি উট্ঠানৱীৰিযং কত্ৱা, আলসিযং অনাপজ্জিত্ৱাতি অত্থো.

৪৮. যো ৱেতিআদিনা যথা অহং, এৱং অঞ্ঞেপি আযতনগতেন উদকদানপুঞ্ঞেন এতাদিসং ফলং পটিলভন্তীতি দিট্ঠেন অদিট্ঠস্স অনুমানৱিধিং দস্সেন্তী থেৰেন পুট্ঠমত্থং সাধাৰণতো ৱিস্সজ্জেতি. তত্থ তস্সাতি তন্তি চ যথাৱুত্তপুঞ্ঞকাৰিনং পচ্চামসতি.

৪৯. অনুপৰিযন্তীতি অনুৰূপৱসেন পৰিক্খিপন্তি. তস্স ৱসনট্ঠানপৰিক্খিপনেন সোপি পৰিক্খিত্তো নাম হোতি. তিলকাতি বন্ধুজীৱকপুপ্ফসদিসপুপ্ফা একা ৰুক্খজাতি. উদ্দালকাতি ৱাতঘাতকা, যে ‘‘ৰাজৰুক্খা’’তিপি ৱুচ্চন্তি.

৫০. তংভূমিভাগেহীতি তাদিসেহি ভূমিভাগেহি, যথাৱুত্তপোক্খৰণীনদীউয্যানৱন্তেহি ভূমিপদেসেহীতি অত্থো. উপেতৰূপন্তি পাসংসিযভাৱেন উপেতং, তেসং পোক্খৰণীআদীনং ৱসেন ৰমণীযসন্নিৱেসন্তি ৱুত্তং হোতি. ভুস সোভমানন্তি ভুসং অতিৱিয ৱিৰোচমানং ৱিমানসেট্ঠং লভন্তীতি যোজনা. সেসং ৱুত্তনযমেৱাতি.

পঠমনাৱাৱিমানৱণ্ণনা নিট্ঠিতা.