৪. চতুত্থপীঠৱিমানৱণ্ণনা

পীঠং তে ৱেড়ুৰিযমযন্তি চতুত্থপীঠৱিমানং. ইমস্সাপি ৱত্থু ৰাজগহে সমুট্ঠিতং, তং দুতিযৱিমানে ৱুত্তনযেনেৱ ৱেদিতব্বং. নীলৱত্থেন হি অত্থৰিত্ৱা পীঠস্স দিন্নত্তা ইমিস্সাপি ৱিমানং ৱেড়ুৰিযমযং নিব্বত্তং. সেসং পঠমৱিমানে ৱুত্তসদিসং. তেন ৱুত্তং –

২৩. ‘‘পীঠং তে ৱেড়ুৰিযমযং উড়াৰং, মনোজৱং গচ্ছতি যেনকামং;

অলঙ্কতে মল্যধৰে সুৱত্থে, ওভাসসি ৱিজ্জুৰিৱব্ভকূটং.

২৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

২৫. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

২৬. ‘‘সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং’’.

২৭. ‘‘অপ্পস্স কম্মস্স ফলং মমেদং, যেনম্হি এৱং জলিতানুভাৱা;

অহং মনুস্সেসু মনুস্সভূতা, পুৰিমায জাতিযা মনুস্সলোকে.

২৮. ‘‘অদ্দসং ৱিৰজং ভিক্খুং, ৱিপ্পসন্নমনাৱিলং;

তস্স অদাসহং পীঠং, পসন্না সেহি পাণিভি.

২৯. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৩০. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

এত্থাপি হি নীলৱত্থেন অত্থৰিত্ৱা পীঠস্স দিন্নত্তা ইমিস্সাপি ৱিমানং ৱেড়ুৰিযমযং নিব্বত্তং. তেনেৱেত্থ ‘‘পীঠং তে ৱেড়ুৰিযময’’ন্তি আদিতো আগতং. সেসং ততিযসদিসমেৱাতি তত্থ ৱুত্তনযেনেৱ অত্থো ৱেদিতব্বো.

চতুত্থপীঠৱিমানৱণ্ণনা নিট্ঠিতা.