১৭. কেসকাৰীৱিমানৱণ্ণনা

ইদং ৱিমানং ৰুচিৰং পভস্সৰন্তি কেসকাৰীৱিমানং. তস্স কা উপ্পত্তি? ভগৱা বাৰাণসিযং ৱিহৰতি ইসিপতনে মিগদাযে. তেন খো পন সমযেন সম্বহুলা ভিক্খূ পুব্বণ্হসমযং নিৱাসেত্ৱা পত্তচীৱৰমাদায বাৰাণসিং পিণ্ডায পৱিসিংসু. তে অঞ্ঞতৰস্স ব্ৰাহ্মণস্স গেহদ্ৱাৰসমীপেন গচ্ছন্তি. তস্মিঞ্চ গেহে ব্ৰাহ্মণস্স ধীতা কেসকাৰী নাম গেহদ্ৱাৰসমীপে মাতু সীসতো ঊকা গণ্হন্তী তে ভিক্খূ গচ্ছন্তে দিস্ৱা মাতৰং আহ ‘‘অম্ম, ইমে পব্বজিতা পঠমেন যোব্বনেন সমন্নাগতা অভিৰূপা দস্সনীযা পাসাদিকা সুখুমালা কেনচি পাৰিজুঞ্ঞেন অনভিভূতা মঞ্ঞে, কস্মা নু খো ইমে ইমস্মিংযেৱ ৱযে পব্বজন্তী’’তি? তং মাতা আহ ‘‘অত্থি, অম্ম, সক্যপুত্তো সক্যকুলা পব্বজিতো বুদ্ধো লোকে উপ্পন্নো, সো ধম্মং দেসেতি আদিকল্যাণং মজ্ঝেকল্যাণং পৰিযোসানকল্যাণং সাত্থং সব্যঞ্জনং কেৱলপৰিপুণ্ণং, পৰিসুদ্ধং ব্ৰহ্মচৰিযং পকাসেতি, তস্স ইমে ধম্মং সুত্ৱা পব্বজন্তী’’তি.

তেন চ সমযেন আগতফলো ৱিঞ্ঞাতসাসনো অঞ্ঞতৰো উপাসকো তায ৱীথিযা গচ্ছন্তো তং কথং সুত্ৱা তাসং সন্তিকং উপসঙ্কমি. অথ নং ব্ৰাহ্মণী আহ ‘‘এতৰহি খো উপাসক বহূ কুলপুত্তা মহন্তং ভোগক্খন্ধং মহন্তং ঞাতিপৰিৱট্টং পহায সক্যসমযে পব্বজন্তি, তে কিং নু খো অত্থৱসং সম্পস্সন্তা পব্বজন্তী’’তি? তং সুত্ৱা উপাসকো ‘‘কামেসু আদীনৱং, নেক্খম্মে চ আনিসংসং সম্পস্সন্তা’’তি ৱত্ৱা অত্তনো ঞাণবলানুৰূপং তমত্থং ৱিত্থাৰতো কথেসি, তিণ্ণঞ্চ ৰতনানং গুণে পকাসেসি, পঞ্চন্নং সীলানং দিট্ঠধম্মিকং সম্পৰাযিকঞ্চ গুণানিসংসং পৱেদেসি. অথ ব্ৰাহ্মণধীতা তং ‘‘কিং অম্হেহিপি সৰণেসু চ সীলেসু চ পতিট্ঠায তযা ৱুত্তে গুণানিসংসে অধিগন্তুং সক্কা’’তি পুচ্ছি. সো ‘‘সব্বসাধাৰণা ইমে ধম্মা ভগৱতা ভাসিতা, কস্মা ন সক্কা’’তি ৱত্ৱা তস্সা সৰণানি চ সীলানি চ অদাসি. সা গহিতসৰণা সমাদিন্নসীলা চ হুত্ৱা পুন আহ ‘‘কিং ইতো উত্তৰি অঞ্ঞম্পি কৰণীযং অত্থী’’তি. সো তস্সা ৱিঞ্ঞুভাৱং সল্লক্খেন্তো ‘‘উপনিস্সযসম্পন্না ভৱিস্সতী’’তি ঞত্ৱা সৰীৰসভাৱং ৱিভাৱেন্তো দ্ৱত্তিংসাকাৰকম্মট্ঠানং কথেত্ৱা কাযে ৱিৰাগং উপ্পাদেত্ৱা উপৰি অনিচ্চতাদিপটিসংযুত্তায ধম্মিযা কথায সংৱেজেত্ৱা ৱিপস্সনামগ্গং আচিক্খিত্ৱা গতো. সা তেন ৱুত্তনযং সব্বং মনসি কত্ৱা পটিকূলমনসিকাৰে সমাহিতচিত্তা ৱিপস্সনং পট্ঠপেত্ৱা উপনিস্সযসম্পত্তিযা ন চিৰস্সেৱ সোতাপত্তিফলে পতিট্ঠহি. অথাপৰেন সমযেন কালং কত্ৱা সক্কস্স দেৱৰঞ্ঞো পৰিচাৰিকা হুত্ৱা নিব্বত্তি, সতসহস্সঞ্চস্সা অচ্ছৰাপৰিৱাৰো অহোসি. তং সক্কো দেৱৰাজা দিস্ৱা অচ্ছৰিযব্ভুতচিত্তজাতো পমুদিতহদযো –

১৫০. ‘‘ইদং ৱিমানং ৰুচিৰং পভস্সৰং, ৱেড়ুৰিযথম্ভং সততং সুনিম্মিতং;

সুৱণ্ণৰুক্খেহি সমন্তমোত্থতং, ঠানং মমং কম্মৱিপাকসম্ভৱং.

১৫১. ‘‘তত্ৰূপপন্না পুৰিমচ্ছৰা ইমা, সতং সহস্সানি সকেন কম্মুনা;

তুৱংসি অজ্ঝুপগতা যসস্সিনী, ওভাসযং তিট্ঠসি পুব্বদেৱতা.

১৫২. ‘‘সসী অধিগ্গয্হ যথা ৱিৰোচতি, নক্খত্তৰাজাৰিৱ তাৰকাগণং;

তথেৱ ত্ৱং অচ্ছৰাসঙ্গণং ইমং, দদ্দল্লমানা যসসা ৱিৰোচসি.

১৫৩. ‘‘কুতো নু আগম্ম অনোমদস্সনে, উপপন্না ত্ৱং ভৱনং মমং ইদং;

ব্ৰহ্মংৱ দেৱা তিদসা সহিন্দকা, সব্বে ন তপ্পামসে দস্সনেন ত’’ন্তি. –

চতূহি গাথাহি তায কতকম্মং পুচ্ছি.

১৫০. তত্থ ইদং ৱিমানন্তি যস্মিং ৱিমানে সা দেৱতা উপ্পন্না, তং অত্তনো ৱিমানং সন্ধাযাহ. সততন্তি সব্বকালং ৰুচিৰং পভস্সৰন্তি যোজনা. সততন্তি ৱা সম্মাততং, অতিৱিয ৱিত্থিণ্ণন্তি অত্থো. সমন্তমোত্থতন্তি সমন্ততো অৱত্থতং ছাদিতং. ঠানন্তি ৱিমানমেৱ সন্ধায ৱদতি. তঞ্হি তিট্ঠন্তি এত্থ কতপুঞ্ঞাতি ঠানন্তি ৱুচ্চতি. কম্মৱিপাকসম্ভৱন্তি কম্মৱিপাকভাৱেন সম্ভূতং, কম্মৱিপাকেন ৱা সহ সম্ভূতং. মমন্তি ইদং মম ঠানং মম কম্মৱিপাকসম্ভৱন্তি দ্ৱীহিপি পদেহি যোজেতব্বং.

১৫১. তত্ৰূপপন্নাতি গাথায অযং সঙ্খেপত্থো – তত্ৰ তস্মিং যথাৱুত্তে ৱিমানে উপপন্নাতি নিব্বত্তা পগেৱ উপ্পন্নত্তা পুব্বদেৱতা ইমা পুৰিমা অচ্ছৰাযো পৰিমাণতো সতং সহস্সানি. তুৱংসীতি ত্ৱং অসি সকেন কম্মুনা অজ্ঝুপগতা উপপন্না. যসস্সিনীতি পৰিৱাৰসম্পন্না, তেনেৱ সকেন কম্মুনা কম্মানুভাৱেন ওভাসযন্তী ৱিৰোচমানা তিট্ঠসীতি.

১৫২. ইদানি তমেৱ ওভাসনং উপমায ৱিভাৱেন্তো ‘‘সসী’’তি গাথমাহ. তস্সত্থো – যথা সসলঞ্ছনযোগেন ‘‘সসী’’তি, নক্খত্তেহি অধিকগুণতায ‘‘নক্খত্তৰাজা’’তি চ লদ্ধনামো চন্দো সব্বং তাৰকাগণং অধিগ্গয্হ অভিভৱিত্ৱা ৱিৰোচতি ৱিৰাজতি, তথেৱ ত্ৱং ইমং অচ্ছৰানং দেৱকঞ্ঞানং গণং সমূহং অত্তনো যসসা দদ্দল্লমানা অতিৱিয ৱিজ্জোতমানা ৱিৰোচসীতি. এত্থ চ ‘‘ইমা’’তি ‘‘ইম’’ন্তি চ নিপাতমত্তং. কেচি পন ‘‘নক্খত্তৰাজাৰিৱ তাৰাগণং তথেৱ ত্ৱ’’ন্তি পঠন্তি.

১৫৩. ইদানি তস্সা দেৱতায পুৰিমভৱং তত্থ কতপুঞ্ঞঞ্চ পুচ্ছন্তো ‘‘কুতো নু আগম্মা’’তি গাথমাহ. তত্থ কুতো নু আগম্মাতি কুতো নু ভৱতো কুতো নু পুঞ্ঞকম্মতো কাৰণভূততো ইদং মম ভৱনং আগম্ম ভদ্দে অনোমদস্সনে সব্বঙ্গসোভনে ত্ৱং উপপন্না উপ্পত্তিগহণৱসেন উপগতা. ‘‘অনোমদস্সনে’’তি ৱুত্তমেৱত্থং উপমায পকাসেন্তো ‘‘ব্ৰহ্মংৱ দেৱা তিদসা সহিন্দকা, সব্বে ন তপ্পামসে দস্সনেন ত’’ন্তি আহ. তত্থ যথা ব্ৰহ্মানং সহম্পতিং সনঙ্কুমাৰং ৱা উপগতং সহ ইন্দেনাতি সহিন্দকা তাৱতিংসা দেৱা পস্সন্তা দস্সনেন ন তপ্পন্তি, এৱং তৱ দস্সনেন মযং সব্বে দেৱা ন তপ্পামসেতি অত্থো.

এৱং পন সক্কেন দেৱানমিন্দেন পুচ্ছিতা সা দেৱতা তমত্থং পকাসেন্তী –

১৫৪. ‘‘যমেতং সক্ক অনুপুচ্ছসে মমং, কুতো চুতা ত্ৱং ইধ আগতাতি;

বাৰাণসী নাম পুৰত্থি কাসিনং, তত্থ অহোসিং পুৰে কেসকাৰিকা.

১৫৫. ‘‘বুদ্ধে চ ধম্মে চ পসন্নমানসা, সঙ্ঘে চ একন্তগতা অসংসযা;

অখণ্ডসিক্খাপদা আগতপ্ফলা, সম্বোধিধম্মে নিযতা অনামযা’’তি. –

গাথদ্ৱযমাহ.

১৫৪-৫. তত্থ যমেতন্তি যং এতং পঞ্হন্তি অত্থো. অনুপুচ্ছসেতি অনুকূলভাৱেন পুচ্ছসি. মমন্তি মং. পুৰত্থীতি পুৰং অত্থি. কাসিনন্তি কাসিৰট্ঠস্স. কেসকাৰিকাতি পুৰিমত্তভাৱে অত্তনো নামং ৱদতি. বুদ্ধে চ ধম্মে চাতিআদিনা অত্তনো পুঞ্ঞং ৱিভাৱেতি.

পুন সক্কো তস্সা তং পুঞ্ঞসম্পত্তিঞ্চ দিব্বসম্পত্তিঞ্চ অনুমোদমানো –

১৫৬. ‘‘তন্ত্যাভিনন্দামসে স্ৱাগতঞ্চ তে,

ধম্মেন চ ত্ৱং যসসা ৱিৰোচসি;

বুদ্ধে চ ধম্মে চ পসন্নমানসে,

সঙ্ঘে চ একন্তগতে অসংসযে;

অখণ্ডসিক্খাপদে আগতপ্ফলে,

সম্বোধিধম্মে নিযতে অনামযে’’তি. – আহ;

১৫৬. তত্থ তন্ত্যাভিনন্দামসেতি তং তে দুৱিধম্পি সম্পত্তিং অভিনন্দাম অনুমোদাম. স্ৱাগতঞ্চ তেতি তুয্হঞ্চ ইধাগমনং স্ৱাগতং, অম্হাকং পীতিসোমনস্সসংৱদ্ধনমেৱ. সেসং ৱুত্তনযমেৱাতি.

তং পন পৱত্তিং সক্কো দেৱৰাজা আযস্মতো মহামোগ্গল্লানত্থেৰস্স কথেসি, থেৰো ভগৱতো নিৱেদেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা সদেৱকস্স লোকস্স সাত্থিকা জাতাতি.

কেসকাৰীৱিমানৱণ্ণনা নিট্ঠিতা.

ইতি পৰমত্থদীপনিযা খুদ্দক-অট্ঠকথায ৱিমানৱত্থুস্মিং

সত্তৰসৱত্থুপটিমণ্ডিতস্স পঠমস্স পীঠৱগ্গস্স

অত্থৱণ্ণনা নিট্ঠিতা.