৮. সঙ্ঘভেদসুত্তৱণ্ণনা

৪৮. অট্ঠমে আযস্মন্তং আনন্দং এতদৱোচাতি অভিমাৰে পযোজেত্ৱা নাড়াগিৰিং ৱিস্সজ্জাপেত্ৱা সিলং পৱট্টেত্ৱা ভগৱতো অনত্থং কাতুং অসক্কোন্তো ‘‘সঙ্ঘং ভিন্দিত্ৱা চক্কভেদং কৰিস্সামী’’তি অধিপ্পাযেন এতং ‘‘অজ্জতগ্গে’’তিআদিৱচনং অৱোচ. অঞ্ঞত্ৰেৱ ভগৱতাতি ৱিনা এৱ ভগৱন্তং, সত্থাৰং অকত্ৱাতি অত্থো. অঞ্ঞত্ৰ ভিক্খুসঙ্ঘাতি ৱিনা এৱ ভিক্খুসঙ্ঘং. উপোসথং কৰিস্সামি সঙ্ঘকম্মানি চাতি ভগৱতো ওৱাদকাৰকং ভিক্খুসঙ্ঘং ৱিসুং কত্ৱা মং অনুৱত্তন্তেহি ভিক্খূহি সদ্ধিং আৱেণিকং উপোসথং সঙ্ঘকম্মানি চ কৰিস্সামীতি অত্থো. দেৱদত্তো সঙ্ঘং ভিন্দিস্সতীতি ভেদকৰানং সব্বেসং দেৱদত্তেন সজ্জিতত্তা একংসেনেৱ দেৱদত্তো অজ্জ সঙ্ঘং ভিন্দিস্সতি দ্ৱিধা কৰিস্সতি. ‘‘অধম্মং ধম্মো’’তিআদীসু হি অট্ঠাৰসসু ভেদকৰৱত্থূসু যংকিঞ্চি একম্পি ৱত্থুং দীপেত্ৱা তেন তেন কাৰণেন ‘‘ইমং গণ্হথ, ইমং ৰোচেথা’’তি সঞ্ঞাপেত্ৱা সলাকং গাহেত্ৱা ৱিসুং সঙ্ঘকম্মে কতে সঙ্ঘো ভিন্নো হোতি. ৱুত্তঞ্হেতং –

‘‘পঞ্চহি, উপালি, আকাৰেহি সঙ্ঘো ভিজ্জতি কম্মেন উদ্দেসেন ৱোহৰন্তো অনুস্সাৱনেন সলাকগ্গাহেনা’’তি (পৰি. ৪৫৮).

তত্থ কম্মেনাতি অপলোকনকম্মাদীসু চতূসু কম্মেসু অঞ্ঞতৰেন কম্মেন. উদ্দেসেনাতি পঞ্চসু পাতিমোক্খুদ্দেসেসু অঞ্ঞতৰেন উদ্দেসেন. ৱোহৰন্তোতি তাহি তাহি উপ্পত্তীহি ‘‘অধম্মং ধম্মো’’তিআদীনি (অ. নি. ১০.৩৭; চূড়ৱ. ৩৫২) অট্ঠাৰসভেদকৰৱত্থূনি দীপেন্তো. অনুস্সাৱনেনাতি ‘‘ননু তুম্হে জানাথ ময্হং উচ্চাকুলা পব্বজিতভাৱং বহুস্সুতভাৱঞ্চ, মাদিসো নাম উদ্ধম্মং উব্বিনযং গাহেয্যাতি কিং তুম্হাকং চিত্তম্পি উপ্পাদেতুং যুত্তং, কিমহং অপাযতো ন ভাযামী’’তিআদিনা নযেন কণ্ণমূলে ৱচীভেদং কত্ৱা অনুস্সাৱনেন. সলাকগ্গাহেনাতি এৱং অনুস্সাৱেত্ৱা তেসং চিত্তং উপত্থম্ভেত্ৱা অনাৱত্তিধম্মে কত্ৱা ‘‘গণ্হথ ইমং সলাক’’ন্তি সলাকগ্গাহেন.

এত্থ চ কম্মমেৱ উদ্দেসো ৱা পমাণং, ৱোহাৰানুস্সাৱনসলাকগ্গাহা পন পুব্বভাগা. অট্ঠাৰসৱত্থুদীপনৱসেন হি ৱোহৰন্তেন তত্থ ৰুচিজননত্থং অনুস্সাৱেত্ৱা সলাকায গাহিতাযপি অভিন্নোৱ হোতি সঙ্ঘো. যদা পনেৱং চত্তাৰো ৱা অতিৰেকা ৱা সলাকং গাহেত্ৱা আৱেণিকং উদ্দেসং ৱা কম্মং ৱা কৰোন্তি, তদা সঙ্ঘো ভিন্নো নাম হোতি. দেৱদত্তো চ সব্বং সঙ্ঘভেদস্স পুব্বভাগং নিপ্ফাদেত্ৱা ‘‘একংসেনেৱ অজ্জ আৱেণিকং উপোসথং সঙ্ঘকম্মঞ্চ কৰিস্সামী’’তি চিন্তেত্ৱা ‘‘অজ্জতগ্গে’’তিআদিৱচনং অৱোচ. তেনাহ – ‘‘অজ্জ, ভন্তে, দেৱদত্তো সঙ্ঘং ভিন্দিস্সতী’’তি. যতো অৱোচুম্হা ‘‘ভেদকৰানং সব্বেসং দেৱদত্তেন সজ্জিতত্তা’’তি.

এতমত্থং ৱিদিত্ৱাতি এতং অৱীচিমহানিৰযুপ্পত্তিসংৱত্তনিযং কপ্পট্ঠিযং অতেকিচ্ছং দেৱদত্তেন নিব্বত্তিযমানং সঙ্ঘভেদকম্মং সব্বাকাৰতো ৱিদিত্ৱা. ইমং উদানন্তি কুসলাকুসলেসু যথাক্কমং সপ্পুৰিসাসপ্পুৰিসসভাগৱিসভাগপটিপত্তিৱসেন পন সুকুসলাতি ইদমত্থৱিভাৱনং ইমং উদানং উদানেসি.

তত্থ সুকৰং সাধুনা সাধূতি অত্তনো পৰেসঞ্চ হিতং সাধেতীতি সাধু, সম্মাপটিপন্নো. তেন সাধুনা সাৰিপুত্তাদিনা সাৱকেন পচ্চেকবুদ্ধেন সম্মাসম্বুদ্ধেন অঞ্ঞেন ৱা লোকিযসাধুনা সাধু সুন্দৰং ভদ্দকং অত্তনো পৰেসঞ্চ হিতসুখাৱহং সুকৰং সুখেন কাতুং সক্কা. সাধু পাপেন দুক্কৰন্তি তদেৱ পন ৱুত্তলক্খণং সাধু পাপেন দেৱদত্তাদিনা পাপপুগ্গলেন দুক্কৰং কাতুং ন সক্কা, ন সো তং কাতুং সক্কোতীতি অত্থো. পাপং পাপেন সুকৰন্তি পাপং অসুন্দৰং অত্তনো পৰেসঞ্চ অনত্থাৱহং পাপেন যথাৱুত্তপাপপুগ্গলেন সুকৰং সুখেন কাতুং সক্কুণেয্য. পাপমৰিযেহি দুক্কৰন্তি অৰিযেহি পন বুদ্ধাদীহি তং তং পাপং দুক্কৰং দুৰভিসম্ভৱং. সেতুঘাতোযেৱ হি তেসন্তি সত্থা দীপেতি.

অট্ঠমসুত্তৱণ্ণনা নিট্ঠিতা.