৭. কঙ্খাৰেৱতসুত্তৱণ্ণনা

৪৭. সত্তমে কঙ্খাৰেৱতোতি তস্স থেৰস্স নামং. সো হি সাসনে পব্বজিত্ৱা লদ্ধূপসম্পদো সীলৱা কল্যাণধম্মো ৱিহৰতি, ‘‘অকপ্পিযা মুগ্গা, ন কপ্পন্তি মুগ্গা পৰিভুঞ্জিতুং, অকপ্পিযো গুড়ো’’তি (মহাৱ. ২৭২) চ আদিনা ৱিনযকুক্কুচ্চসঙ্খাতকঙ্খাবহুলো পন হোতি. তেন কঙ্খাৰেৱতোতি পঞ্ঞাযিত্থ. সো অপৰভাগে সত্থু সন্তিকে কম্মট্ঠানং গহেত্ৱা ঘটেন্তো ৱাযমন্তো ছড়ভিঞ্ঞা সচ্ছিকত্ৱা ঝানসুখেন ফলসুখেন ৱীতিনামেতি, যেভুয্যেন পন অত্তনা অধিগতং অৰিযমগ্গং গৰুং কত্ৱা পচ্চৱেক্খতি. তেন ৱুত্তং – ‘‘অত্তনো কঙ্খাৱিতৰণৱিসুদ্ধিং পচ্চৱেক্খমানো’’তি. মগ্গপঞ্ঞা হি ‘‘অহোসিং নু খো অহং অতীতমদ্ধান’’ন্তিআদিনযপৱত্তায (ম. নি. ১.১৮; সং. নি. ২.২০) সোড়সৱত্থুকায, ‘‘বুদ্ধে কঙ্খতি…পে… পটিচ্চসমুপ্পন্নেসু ধম্মেসু কঙ্খতী’’তি (ধ. স. ১০০৮) এৱং ৱুত্তায অট্ঠৱত্থুকায, পগেৱ ইতৰাসন্তি অনৱসেসতো সব্বকঙ্খানং ৱিতৰণতো সমতিক্কমনতো, অঞ্ঞেহি চ অত্তনা পহাতব্বকিলেসেহি অচ্চন্তৱিসুজ্ঝনতো ‘‘কঙ্খাৱিতৰণৱিসুদ্ধী’’তি ইধাধিপ্পেতা. তঞ্হি অযমাযস্মা দীঘৰত্তং কঙ্খাপকতত্তা ‘‘ইমং মগ্গধম্মং অধিগম্ম ইমা মে কঙ্খা অনৱসেসা পহীনা’’তি গৰুং কত্ৱা পচ্চৱেক্খমানো নিসীদি, ন সপ্পচ্চযনামৰূপদস্সনং অনিচ্চন্তিকত্তা তস্স কঙ্খাৱিতৰণস্স.

এতমত্থং ৱিদিত্ৱাতি এতং অৰিযমগ্গস্স অনৱসেসকঙ্খাৱিতৰণসঙ্খাতং অত্থং ৱিদিত্ৱা তদত্থদীপকং ইমং উদানং উদানেসি.

তত্থ যা কাচি কঙ্খা ইধ ৱা হুৰং ৱাতি ইধ ইমস্মিং পচ্চুপ্পন্নে অত্তভাৱে ‘‘অহং নু খোস্মি নো নু খোস্মী’’তিআদিনা হুৰং ৱা, অতীতানাগতেসু অত্তভাৱেসু ‘‘অহোসিং নু খো অহং অতীতমদ্ধান’’ন্তিআদিনা উপ্পজ্জনকা কঙ্খা. সকৱেদিযা ৱা পৰৱেদিযা ৱাতি তা এৱং ৱুত্তনযেনেৱ সকঅত্তভাৱে আৰম্মণৱসেন পটিলভিতব্বায পৱত্তিযা সকৱেদিযা ৱা পৰস্স অত্তভাৱে পটিলভিতব্বায ‘‘বুদ্ধো নু খো, নো নু খো’’তিআদিনা ৱা পৰস্মিং পধানে উত্তমে পটিলভিতব্বায পৱত্তিযা পৰৱেদিযা ৱা যা কাচি কঙ্খা ৱিচিকিচ্ছা. যে ঝাযিনো তা পজহন্তি সব্বা, আতাপিনো ব্ৰহ্মচৰিযং চৰন্তাতি যে আৰম্মণূপনিজ্ঝানেন লক্খণূপনিজ্ঝানেন ঝাযিনো ৱিপস্সনং উস্সুক্কাপেত্ৱা চতুব্বিধসম্মপ্পধানপাৰিপূৰিযা আতাপিনো মগ্গব্ৰহ্মচৰিযং চৰন্তা অধিগচ্ছন্তা সদ্ধানুসাৰীআদিপ্পভেদা পঠমমগ্গট্ঠা পুগ্গলা, তা সব্বা কঙ্খা পজহন্তি সমুচ্ছিন্দন্তি মগ্গক্খণে. ততো পৰং পন তা পহীনা নাম হোন্তি, তস্মা ইতো অঞ্ঞং তাসং অচ্চন্তপ্পহানং নাম নত্থীতি অধিপ্পাযো.

ইতি ভগৱা ঝানমুখেন আযস্মতো কঙ্খাৰেৱতস্স ঝানসীসেন অৰিযমগ্গাধিগমং থোমেন্তো থোমনাৱসেন উদানং উদানেসি. তেনেৱ চ নং ‘‘এতদগ্গং, ভিক্খৱে, মম সাৱকানং ভিক্খূনং ঝাযীনং যদিদং কঙ্খাৰেৱতো’’তি (অ. নি. ১.২০৪) ঝাযীভাৱেন এতদগ্গে ঠপেসীতি.

সত্তমসুত্তৱণ্ণনা নিট্ঠিতা.