১০. চূড়পন্থকসুত্তৱণ্ণনা

৫০. দসমে চূড়পন্থকোতি মহাপন্থকত্থেৰস্স কনিট্ঠভাতিকত্তা পন্থে জাতত্তা চ দহৰকালে লদ্ধৱোহাৰেন অপৰভাগেপি অযমাযস্মা ‘‘চূড়পন্থকো’’ত্ৱেৱ পঞ্ঞাযিত্থ. গুণৱিসেসেহি পন ছড়ভিঞ্ঞো পভিন্নপটিসম্ভিদো ‘‘এতদগ্গং, ভিক্খৱে, মম সাৱকানং ভিক্খূনং মনোমযং কাযং অভিনিম্মিনন্তানং যদিদং চূড়পন্থকো, চেতোৱিৱট্টকুসলানং যদিদং চূড়পন্থকো’’তি দ্ৱীসু (অ. নি. ১.১৯৯) ঠানেসু ভগৱতা এতদগ্গে ঠপিতো অসীতিযা মহাসাৱকেসু অব্ভন্তৰো.

সো একদিৱসং পচ্ছাভত্তং পিণ্ডপাতপ্পটিক্কন্তো অত্তনো দিৱাট্ঠানে দিৱাৱিহাৰং নিসিন্নো সমাপত্তীহি দিৱসভাগং ৱীতিনামেত্ৱা সাযন্হসমযং উপাসকেসু ধম্মস্সৱনত্থং অনাগতেসু এৱ ৱিহাৰমজ্ঝং পৱিসিত্ৱা ভগৱতি গন্ধকুটিযং নিসিন্নে ‘‘অকালো তাৱ ভগৱতো উপট্ঠানং উপসঙ্কমিতু’’ন্তি গন্ধকুটিপমুখে একমন্তং নিসীদি পল্লঙ্কং আভুজিত্ৱা. তেন ৱুত্তং – ‘‘তেন খো পন সমযেন আযস্মা চূড়পন্থকো ভগৱতো অৱিদূৰে নিসিন্নো হোতি পল্লঙ্কং আভুজিত্ৱা উজুং কাযং পণিধায পৰিমুখং সতিং উপট্ঠপেত্ৱা’’তি. সো হি তদা কালপৰিচ্ছেদং কত্ৱা সমাপত্তিং সমাপজ্জিত্ৱা নিসীদি.

এতমত্থং ৱিদিত্ৱাতি এতং আযস্মতো চূড়পন্থকস্স কাযচিত্তানং সম্মাপণিহিতভাৱসঙ্খাতং অত্থং জানিত্ৱা. ইমং উদানন্তি অঞ্ঞোপি যো পস্সদ্ধকাযো সব্বিৰিযাপথেসু উপট্ঠিতস্সতি সমাহিতো, তস্স ভিক্খুনো অনুপাদা পৰিনিব্বানপৰিযোসানস্স ৱিসেসাধিগমস্স তত্থ পাতুভাৱৱিভাৱনং ইমং উদানং উদানেসি.

তত্থ ঠিতেন কাযেনাতি কাযদ্ৱাৰিকস্স অসংৱৰস্স পহানেন অকৰণেন সম্মা ঠপিতেন চোপনকাযেন, তথা চক্খাদীনং ইন্দ্ৰিযানং নিব্বিসেৱনভাৱকৰণেন সুট্ঠু ঠপিতেন পঞ্চদ্ৱাৰিককাযেন, সংযতহত্থপাদতায হত্থকুক্কুচ্চাদীনং অভাৱতো অপৰিফন্দনেন ঠিতেন কৰজকাযেন চাতি সঙ্খেপতো সব্বেনপি কাযেন নিব্বিকাৰতাসঙ্খাতেন নিচ্চলভাৱেন ঠিতেন. এতেনস্স সীলপাৰিসুদ্ধি দস্সিতা. ইত্থম্ভূতলক্খণে চ ইদং কৰণৱচনং. ঠিতেন চেতসাতি চিত্তস্স ঠিতিপৰিদীপনেন সমাধিসম্পদং দস্সেতি. সমাধি হি চিত্তস্স ‘ঠিতী’তি ৱুচ্চতি. তস্মা সমথৱসেন ৱিপস্সনাৱসেনেৱ ৱা একগ্গতায সতি চিত্তং আৰম্মণে একোদিভাৱূপগমনেন ঠিতং নাম হোতি, ন অঞ্ঞথা. ইদঞ্চ যথাৱুত্তকাযচিত্তানং ঠপনং সমাদহনং সব্বস্মিং কালে সব্বেসু চ ইৰিযাপথেসু ইচ্ছিতব্বন্তি দস্সেন্তো আহ – ‘‘তিট্ঠং নিসিন্নো উদ ৱা সযানো’’তি. তত্থ ৱা-সদ্দো অনিযমত্থো. তেন তিট্ঠন্তো ৱা নিসিন্নো ৱা সযানো ৱা তদঞ্ঞিৰিযাপথো ৱাতি অযমত্থো দীপিতো হোতীতি চঙ্কমনস্সাপি ইধ সঙ্গহো ৱেদিতব্বো.

এতং সতিং ভিক্খু অধিট্ঠহানোতি যায পগেৱ পৰিসুদ্ধসমাচাৰো কাযচিত্তদুট্ঠুল্লভাৱূপসমনেন কাযং চিত্তঞ্চ অসাৰদ্ধং কত্ৱা পটিলদ্ধায অনৱজ্জসুখাধিট্ঠায কাযচিত্তপস্সদ্ধিৱসেন চিত্তং লহুং মুদুং কম্মঞ্ঞঞ্চ কত্ৱা সম্মা ঠপেন্তো সমাদহন্তো কম্মট্ঠানং পৰিব্ৰূহেতি মত্থকঞ্চ পাপেতি, তং এৱ কম্মট্ঠানানুযোগস্স আদিমজ্ঝপৰিযোসানেসু বহূপকাৰং সতিং ভিক্খু অধিট্ঠহানো সীলৱিসোধনং আদিং কত্ৱা যাৱ ৱিসেসাধিগমা তত্থ তত্থ অধিট্ঠহন্তোতি অত্থো. লভেথ পুব্বাপৰিযং ৱিসেসন্তি সো এৱং সতিআৰক্খেন চেতসা কম্মট্ঠানং উপৰূপৰি ৱড্ঢেন্তো ব্ৰূহেন্তো ফাতিং কৰোন্তো পুব্বাপৰিযং পুব্বাপৰিযৱন্তং পুব্বাপৰভাগেন পৱত্তং উড়াৰুড়াৰতৰাদিভেদৱিসেসং লভেয্য.

তত্থ দুৱিধো পুব্বাপৰিযৱিসেসো সমথৱসেন ৱিপস্সনাৱসেন চাতি. তেসু সমথৱসেন তাৱ নিমিত্তুপ্পত্তিতো পট্ঠায যাৱ নেৱসঞ্ঞানাসঞ্ঞাযতনৱসীভাৱো, তাৱ পৱত্তো ভাৱনাৱিসেসো পুব্বাপৰিযৱিসেসো. ৱিপস্সনাৱসেন পন ৰূপমুখেন অভিনিৱিসন্তস্স ৰূপধম্মপৰিগ্গহতো, ইতৰস্স নামধম্মপৰিগ্গহতো পট্ঠায যাৱ অৰহত্তাধিগমো, তাৱ পৱত্তো ভাৱনাৱিসেসো পুব্বাপৰিযৱিসেসো. অযমেৱ চ ইধাধিপ্পেতো.

লদ্ধান পুব্বাপৰিযং ৱিসেসন্তি পুব্বাপৰিযৱিসেসং উক্কংসপাৰমিপ্পত্তং অৰহত্তং লভিত্ৱা. অদস্সনং মচ্চুৰাজস্স গচ্ছেতি জীৱিতুপচ্ছেদৱসেন সব্বেসং সত্তানং অভিভৱনতো মচ্চুৰাজসঙ্খাতস্স মৰণস্স ৱিসযভূতং ভৱত্তযং সমতিক্কন্তত্তা অদস্সনং অগোচৰং গচ্ছেয্য. ইমস্মিং ৱগ্গে যং অৱুত্তং, তং হেট্ঠা ৱুত্তনযমেৱাতি.

দসমসুত্তৱণ্ণনা নিট্ঠিতা.

নিট্ঠিতা চ মহাৱগ্গৱণ্ণনা.