৮. সঙ্গামজিসুত্তৱণ্ণনা

৮. অট্ঠমে সঙ্গামজীতি এৱংনামো. অযঞ্হি আযস্মা সাৱত্থিযং অঞ্ঞতৰস্স মহাৱিভৱস্স সেট্ঠিনো পুত্তো, ৱযপ্পত্তকালে মাতাপিতূহি পতিৰূপেন দাৰেন নিযোজেত্ৱা সাপতেয্যং নিয্যাতেত্ৱা ঘৰবন্ধনেন বদ্ধো হোতি. সো একদিৱসং সাৱত্থিৱাসিনো উপাসকে পুব্বণ্হসমযং দানং দত্ৱা সীলং সমাদিযিত্ৱা সাযন্হসমযে সুদ্ধৱত্থে সুদ্ধুত্তৰাসঙ্গে গন্ধমালাদিহত্থে ধম্মস্সৱনত্থং জেতৱনাভিমুখে গচ্ছন্তে দিস্ৱা ‘‘কত্থ তুম্হে গচ্ছথা’’তি পুচ্ছিত্ৱা ‘‘ধম্মস্সৱনত্থং জেতৱনে সত্থু সন্তিক’’ন্তি ৱুত্তে ‘‘তেন হি অহম্পি গমিস্সামী’’তি তেহি সদ্ধিং জেতৱনং অগমাসি. তেন চ সমযেন ভগৱা কঞ্চনগুহাযং সীহনাদং নদন্তো কেসৰসীহো ৱিয সদ্ধম্মমণ্ডপে পঞ্ঞত্তৱৰবুদ্ধাসনে নিসীদিত্ৱা চতুপৰিসমজ্ঝে ধম্মং দেসেতি.

অথ খো তে উপাসকা ভগৱন্তং ৱন্দিত্ৱা একমন্তং নিসীদিংসু, সঙ্গামজিপি কুলপুত্তো তস্সা পৰিসায পৰিযন্তে ধম্মং সুণন্তো নিসীদি. ভগৱা অনুপুব্বিকথং কথেত্ৱা চত্তাৰি সচ্চানি পকাসেসি, সচ্চপৰিযোসানে অনেকেসং পাণসহস্সানং ধম্মাভিসমযো অহোসি. সঙ্গামজিপি কুলপুত্তো সোতাপত্তিফলং পত্ৱা পৰিসায ৱুট্ঠিতায ভগৱন্তং উপসঙ্কমিত্ৱা ৱন্দিত্ৱা পব্বজ্জং যাচি ‘‘পব্বাজেথ মং ভগৱা’’তি. ‘‘অনুঞ্ঞাতোসি পন ত্ৱং মাতাপিতূহি পব্বজ্জাযা’’তি? ‘‘নাহং, ভন্তে, অনুঞ্ঞাতো’’তি. ‘‘ন খো, সঙ্গামজি, তথাগতা মাতাপিতূহি অননুঞ্ঞাতং পুত্তং পব্বাজেন্তী’’তি. ‘‘সোহং, ভন্তে, তথা কৰিস্সামি, যথা মং মাতাপিতৰো পব্বজিতুং অনুজানন্তী’’তি. সো ভগৱন্তং ৱন্দিত্ৱা পদক্খিণং কত্ৱা মাতাপিতৰো উপসঙ্কমিত্ৱা, ‘‘অম্মতাতা, অনুজানাথ মং পব্বজিতু’’ন্তি আহ. ততো পৰং ৰট্ঠপালসুত্তে (ম. নি. ২.২৯৩ আদযো) আগতনযেন ৱেদিতব্বং.

অথ সো ‘‘পব্বজিত্ৱা অত্তানং দস্সেস্সামী’’তি পটিঞ্ঞং দত্ৱা অনুঞ্ঞাতো মাতাপিতূহি ভগৱন্তং উপসঙ্কমিত্ৱা পব্বজ্জং যাচি. অলত্থ খো চ ভগৱতো সন্তিকে পব্বজ্জং উপসম্পদঞ্চ, অচিৰূপসম্পন্নো চ পন সো উপৰিমগ্গত্থায ঘটেন্তো ৱাযমন্তো অঞ্ঞতৰস্মিং অৰঞ্ঞাৱাসে ৱস্সং ৱসিত্ৱা ছড়ভিঞ্ঞো হুত্ৱা ৱুত্থৱস্সো ভগৱন্তং দস্সনায মাতাপিতূনঞ্চ পটিস্সৱমোচনত্থং সাৱত্থিং অগমাসি. তেন ৱুত্তং – ‘‘তেন খো পন সমযেন আযস্মা সঙ্গামজি সাৱত্থিং অনুপ্পত্তো হোতী’’তি.

সো হাযস্মা ধুৰগামে পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো জেতৱনং পৱিসিত্ৱা ভগৱন্তং উপসঙ্কমিত্ৱা ভগৱতা সদ্ধিং কতপটিসন্থাৰো অঞ্ঞং ব্যাকৰিত্ৱা পুন ভগৱন্তং ৱন্দিত্ৱা পদক্খিণং কত্ৱা নিক্খমিত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি. অথস্স মাতাপিতৰো ঞাতিমিত্তা চস্স আগমনং সুত্ৱা, ‘‘সঙ্গামজি, কিৰ ইধাগতো’’তি হট্ঠতুট্ঠা তুৰিততুৰিতা ৱিহাৰং গন্ত্ৱা পৰিযেসন্তা নং তত্থ নিসিন্নং দিস্ৱা উপসঙ্কমিত্ৱা পটিসন্থাৰং কত্ৱা ‘‘মা অপুত্তকং সাপতেয্যং ৰাজানো হৰেয্যুং, অপ্পিযা দাযাদা ৱা গণ্হেয্যুং, নালং পব্বজ্জায, এহি, তাত, ৱিব্ভমা’’তি যাচিংসু. তং সুত্ৱা থেৰো ‘‘ইমে ময্হং কামেহি অনত্থিকভাৱং ন জানন্তি, গূথধাৰী ৱিয গূথপিণ্ডে কামেসুযেৱ অল্লীযনং ইচ্ছন্তি, নযিমে সক্কা ধম্মকথায সঞ্ঞাপেতু’’ন্তি অস্সুণন্তো ৱিয নিসীদি. তে নানপ্পকাৰং যাচিত্ৱা অত্তনো ৱচনং অগ্গণ্হন্তং দিস্ৱা ঘৰং পৱিসিত্ৱা পুত্তেন সদ্ধিং তস্স ভৰিযং সপৰিৱাৰং উয্যোজেসুং ‘‘মযং নানপ্পকাৰং তং যাচন্তাপি তস্স মনং অলভিত্ৱা আগতা, গচ্ছ ত্ৱং, ভদ্দে, তৱ ভত্তাৰং পুত্তসন্দস্সনেন যাচিত্ৱা সঞ্ঞাপেহী’’তি. তায কিৰ আপন্নসত্তায অযমাযস্মা পব্বজিতো. সা ‘‘সাধূ’’তি সম্পটিচ্ছিত্ৱা দাৰকমাদায মহতা পৰিৱাৰেন জেতৱনং অগমাসি. তং সন্ধায ৱুত্তং – ‘‘অস্সোসি খো আযস্মতো সঙ্গামজিস্সা’’তিআদি.

তত্থ পুৰাণদুতিযিকাতি পুব্বে গিহিকালে পাদপৰিচৰণৱসেন দুতিযিকা, ভৰিযাতি অত্থো. অয্যোতি ‘‘অয্যপুত্তো’’তি ৱত্তব্বে পব্বজিতানং অনুচ্ছৱিকৱোহাৰেন ৱদতি. কিৰাতি অনুস্সৱনত্থে নিপাতো, তস্স অনুপ্পত্তো কিৰাতি সম্বন্ধো ৱেদিতব্বো. খুদ্দপুত্তঞ্হি সমণ, পোস মন্তি আপন্নসত্তমেৱ মং ছড্ডেত্ৱা পব্বজিতো, সাহং এতৰহি খুদ্দপুত্তা, তাদিসং মং ছড্ডেত্ৱাৱ তৱ সমণধম্মকৰণং অযুত্তং, তস্মা, সমণ, পুত্তদুতিযং মং ঘাসচ্ছাদনাদীহি ভৰস্সূতি. আযস্মা পন, সঙ্গামজি, ইন্দ্ৰিযানি উক্খিপিত্ৱা তং নেৱ ওলোকেতি, নাপি আলপতি. তেন ৱুত্তং – ‘‘এৱং ৱুত্তে আযস্মা সঙ্গামজি তুণ্হী অহোসী’’তি.

সা তিক্খত্তুং তথেৱ ৱত্ৱা তুণ্হীভূতমেৱ তং দিস্ৱা ‘‘পুৰিসা নাম ভৰিযাসু নিৰপেক্খাপি পুত্তেসু সাপেক্খা হোন্তি, পুত্তসিনেহো পিতু অট্ঠিমিঞ্জং আহচ্চ তিট্ঠতি, তস্মা পুত্তপেমেনাপি ময্হং ৱসে ৱত্তেয্যা’’তি মঞ্ঞমানা পুত্তং থেৰস্স অঙ্কে নিক্খিপিত্ৱা একমন্তং অপক্কম্ম ‘‘এসো তে, সমণ, পুত্তো, পোস ন’’ন্তি ৱত্ৱা থোকং অগমাসি. সা কিৰ সমণতেজেনস্স সম্মুখে ঠাতুং নাসক্খি. থেৰো দাৰকম্পি নেৱ ওলোকেতি নাপি আলপতি. অথ সা ইত্থী অৱিদূৰে ঠত্ৱা মুখং পৰিৱত্তেত্ৱা ওলোকেন্তী থেৰস্স আকাৰং ঞত্ৱা পটিনিৱত্তিত্ৱা ‘‘পুত্তেনপি অযং সমণো অনত্থিকো’’তি দাৰকং গহেত্ৱা পক্কামি. তেন ৱুত্তং – ‘‘অথ খো আযস্মতো সঙ্গামজিস্স পুৰাণদুতিযিকা’’তিআদি.

তত্থ পুত্তেনপীতি অযং সমণো অত্তনো ওৰসপুত্তেনপি অনত্থিকো, পগেৱ অঞ্ঞেহীতি অধিপ্পাযো. দিব্বেনাতি এত্থ দিব্বসদিসত্তা দিব্বং. দেৱতানঞ্হি সুচৰিতকম্মনিব্বত্তং পিত্তসেম্হৰুহিৰাদীহি অপলিবুদ্ধং দূৰেপি আৰম্মণসম্পটিচ্ছনসমত্থং দিব্বং পসাদচক্খু হোতি. ইদম্পি চতুত্থজ্ঝানসমাধিনিব্বত্তং অভিঞ্ঞাচক্খুং তাদিসন্তি দিব্বং ৱিযাতি দিব্বং, দিব্বৱিহাৰসন্নিস্সযেন লদ্ধত্তা ৱা দিব্বং, মহাজুতিকত্তা মহাগতিকত্তা ৱা দিব্বং, তেন দিব্বেন. ৱিসুদ্ধেনাতি নীৱৰণাদিসংকিলেসৱিগমেন সুপৰিসুদ্ধেন. অতিক্কন্তমানুসকেনাতি মনুস্সানং ৱিসযাতীতেন. ইমং এৱৰূপং ৱিপ্পকাৰন্তি ইমং এৱং ৱিপ্পকাৰং যথাৱুত্তং পব্বজিতেসু অসাৰুপ্পং অঙ্কে পুত্তট্ঠপনসঙ্খাতং ৱিৰূপকিৰিযং.

এতমত্থন্তি এতং আযস্মতো সঙ্গামজিস্স পুত্তদাৰাদীসু সব্বত্থ নিৰপেক্খভাৱসঙ্খাতং অত্থং সব্বাকাৰতো ৱিদিত্ৱা. ইমং উদানন্তি ইমং তস্স ইট্ঠানিট্ঠাদীসু তাদিভাৱদীপকং উদানং উদানেসি.

তত্থ আযন্তিন্তি আগচ্ছন্তিং, পুৰাণদুতিযিকন্তি অধিপ্পাযো. নাভিনন্দতীতি দট্ঠুং মং আগতাতি ন নন্দতি ন তুস্সতি. পক্কমন্তিন্তি সা অযং মযা অসম্মোদিতাৱ গচ্ছতীতি গচ্ছন্তিং. ন সোচতীতি ন চিত্তসন্তাপমাপজ্জতি. যেন পন কাৰণেন থেৰো এৱং নাভিনন্দতি ন সোচতি, তং দস্সেতুং ‘‘সঙ্গা সঙ্গামজিং মুত্ত’’ন্তি ৱুত্তং. তত্থ সঙ্গাতি ৰাগসঙ্গো দোসমোহমানদিট্ঠিসঙ্গোতি পঞ্চৱিধাপি সঙ্গা সমুচ্ছেদপ্পটিপস্সদ্ধিৱিমুত্তীহি ৱিমুত্তং সঙ্গামজিং ভিক্খুং. তমহং ব্ৰূমি ব্ৰাহ্মণন্তি তং তাদিভাৱপ্পত্তং খীণাসৱং অহং সব্বসো বাহিতপাপত্তা ব্ৰাহ্মণন্তি ৱদামীতি.

অট্ঠমসুত্তৱণ্ণনা নিট্ঠিতা.