৮. ৱিজযাথেৰীগাথাৱণ্ণনা

চতুক্খত্তুন্তিআদিকা ৱিজযায থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে ৱিৱট্টূপনিস্সযং কুসলং উপচিনন্তী, অনুক্কমেন পৰিব্ৰূহিতকুসলমূলা দেৱমনুস্সেসু সংসৰন্তী, ইমস্মিং বুদ্ধুপ্পাদে ৰাজগহে অঞ্ঞতৰস্মিং কুলগেহে নিব্বত্তিত্ৱা ৱিঞ্ঞুতং পত্ৱা খেমায থেৰিযা গিহিকালে সহাযিকা অহোসি. সা তস্সা পব্বজিতভাৱং সুত্ৱা ‘‘সাপি নাম ৰাজমহেসী পব্বজিস্সতি কিমঙ্গং পনাহ’’ন্তি পব্বজিতুকামাযেৱ হুত্ৱা খেমাথেৰিযা সন্তিকং উপসঙ্কমি. থেৰী তস্সা অজ্ঝাসযং ঞত্ৱা তথা ধম্মং দেসেসি, যথা সংসাৰে সংৱিগ্গমানসা সাসনে সা অভিপ্পসন্না ভৱিস্সতি. সা তং ধম্মং সুত্ৱা সংৱেগজাতা পটিলদ্ধসদ্ধা চ হুত্ৱা পব্বজ্জং যাচি. থেৰী তং পব্বাজেসি. সা পব্বজিত্ৱা কতপুব্বকিচ্চা ৱিপস্সনং পট্ঠপেত্ৱা হেতুসম্পন্নতায, ন চিৰস্সেৱ সহ পটিসম্ভিদাহি অৰহত্তং পত্ৱা অত্তনো পটিপত্তিং পচ্চৱেক্খিত্ৱা উদানৱসেন –

১৬৯. ‘‘চতুক্খত্তুং পঞ্চক্খত্তুং, ৱিহাৰা উপনিক্খমিং;

অলদ্ধা চেতসো সন্তিং, চিত্তে অৱসৱত্তিনী.

১৭০. ‘‘ভিক্খুনিং উপসঙ্কম্ম, সক্কচ্চং পৰিপুচ্ছহং;

সা মে ধম্মমদেসেসি, ধাতুআযতনানি চ.

১৭১. ‘‘চত্তাৰি অৰিযসচ্চানি, ইন্দ্ৰিযানি বলানি চ;

বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা.

১৭২. ‘‘তস্সাহং ৱচনং সুত্ৱা, কৰোন্তী অনুসাসনিং;

ৰত্তিযা পুৰিমে যামে, পুব্বজাতিমনুস্সৰিং.

১৭৩. ‘‘ৰত্তিযা মজ্ঝিমে যামে, দিব্বচক্খুং ৱিসোধযিং;

ৰত্তিযা পচ্ছিমে যামে, তমোখন্ধং পদালযিং.

১৭৪. ‘‘পীতিসুখেন চ কাযং, ফৰিত্ৱা ৱিহৰিং তদা;

সত্তমিযা পাদে পসাৰেসিং, তমোখন্ধং পদালিযা’’তি. –

ইমা গাথা অভাসি.

তত্থ ভিক্খুনিন্তি খেমাথেৰিং সন্ধায ৱদতি.

বোজ্ঝঙ্গট্ঠঙ্গিকং মগ্গন্তি সত্তবোজ্ঝঙ্গঞ্চ অট্ঠঙ্গিকঞ্চ অৰিযমগ্গং. উত্তমত্থস্স পত্তিযাতি অৰহত্তস্স নিব্বানস্সেৱ ৱা পত্তিযা অধিগমায.

পীতিসুখেনাতি ফলসমাপত্তিপৰিযাপন্নায পীতিযা সুখেন চ. কাযন্তি তংসম্পযুত্তং নামকাযং তদনুসাৰেন ৰূপকাযঞ্চ. ফৰিত্ৱাতি ফুসিত্ৱা ব্যাপেত্ৱা ৱা. সত্তমিযা পাদে পসাৰেসিন্তি ৱিপস্সনায আৰদ্ধদিৱসতো সত্তমিযং পল্লঙ্কং ভিন্দিত্ৱা পাদে পসাৰেসিং. কথং? তমোখন্ধং পদালিয, অপ্পদালিতপুব্বং মোহক্খন্ধং অগ্গমগ্গঞাণাসিনা পদালেত্ৱা. সেসং হেট্ঠা ৱুত্তনযমেৱ.

ৱিজযাথেৰীগাথাৱণ্ণনা নিট্ঠিতা.

ছক্কনিপাতৱণ্ণনা নিট্ঠিতা.